Spiritual Healing
سوال: دو سال سے میری آنکھ میں ناسور ہے۔ دو سال کے عرصہ میں علاج کے سلسلے میں جو کچھ کر سکتا تھا کیا مگر فائدہ نہیں ہوا۔ چھ ماہ سے روحانی ڈائجسٹ کا قاری ہوں۔ اس کے ذریعہ بہت سے لوگوں کو شفایاب ہوتے دیکھا ہے۔ اس مشاہدے کے بعد مجھے یقین ہو گیا ہے کہ اللہ تعالیٰ کے بنائے ہوئے علاج سے مجھے بھی شفا عطاکریں گے۔
جواب: چکنے سفید پتھر پر جس پر کبھی نمک مرچ نہ لگا ہو چنے کی دال کو گلاب یا بارش کے پانی میں گھس کر ناسور پر لگایا گیا۔ انشاء اللہ اس مرض سے نجات مل جائے گی۔ یہ پتھر ندی یا دریا کے کنارے ملتا ہے جو پانی کی رگڑ سے چکنا ہو جاتا ہے اور اس پتھر پر قدرتی نقش و نگار سے بنے ہوتے ہیں۔ کراچی میں یہ پتھر حب ریور کے کنارے مل جاتا ہے۔
خواجہ شمس الدین عظیمی
جناب خواجہ شمس الدین عظیمی صاحب نے کالم نویسی کاآغاز1969میں روزنامہ حریت سے کیا ۔پہلے طبیعیات کے اوپر مضامین شائع ہوتے رہے پھر نفسیات اور مابعد نفسیات کے مضمون زیر بحث آ گئے۔ روزنامہ حریت کے قارئین نے سائیکالوجی اور پیراسائیکالوجی کے ان مضامین کو نہ صرف پسند کیا بلکہ اپنے مسائل کے حل کے لئے خطوط لکھنے شروع کر دیئے۔ زیادہ تر خطوط خواب سے متعلق ہوتے تھے۔ شروع کے دنوں میں ہفتہ میں تین یا چار خط موصول ہوتے تھے اور پھر یہ سلسلہ ہر ہفتہ سینکڑوں خطوط پر پھیل گیا۔ حریت کے بعد روزنامہ جسارت، روزنامہ اعلان، روزنامہ مشرق اور پھر روزنامہ جنگ میں روحانی ڈاک کے عنوان پر یہ کالم اتنا زیادہ مقبول ہوا کہ خطوط کی تعداد ہزاروں تک پہنچ گئی۔ جب اخبار کا دامن اتنی بڑی ڈاک کا متحمل نہ ہو سکا تو پیارے اور محترم دوستوں کے مشوروں اور تعاون سے روحانی ڈائجسٹ کا اجراء ہوا اور آج بھی روحانی ڈاک کے عنوان سے یہ کالم روحانی ڈائجسٹ میں شائع ہو رہا ہے۔
آپ نے ان اخبارات وجرائد میں عوام کے ان گنت معاشی، معاشرتی، نفسیاتی مسائل اورالجھنوں کا حل پیش کیا ہے اورمظاہرقدرت کے پیچیدہ معموں سے متعلق سوالات کے جوابات دئیے ہیں۔خواجہ شمس الدین عظیمی صاحب کے لائق شاگرد جناب میاں مشتاق احمد عظیمی نے روحانی ڈاک میں شائع شدہ ان خطوط کو یکجا کیا اورترتیب وتدوین کے مراحل سے گزارکر چارجلدوں پر مشتمل کتاب روحانی ڈاک کو عوام الناس کی خدمت کے لئے شائع کردیا۔
