Topics
سوال: رات کو سونے کے بعد تھوڑے تھوڑے وقفے سے
آنکھ کھل جاتی ہے اور چیخ مار کر اٹھ بیٹھتا ہوں۔ براہ کرم کوئی دعا یا وظیفہ
بتائیں کہ اس مرض سے جان چھوٹ جائے۔ خواب میں دیکھتا ہوں کہ چند آدمی میرا گلا
گھونٹ رہے ہیں اور میں ان سے فرار چاہتا ہوں مگر یہ مجھے نہیں چھوڑتے۔
جواب: سب سے پہلے یہ بات ضروری ہے کہ آپ اپنی طرز
فکر کا محاسبہ کریں۔ جن باتوں کو ذہن غلط کہتا ہے ان کی طرف سے پوری طرح اپنی توجہ
ہٹا لیں۔ ماحول کے اچھے اثرات کو قبول کیجئے۔ ہر وقت باوضو رہئے۔ رات کو سونے سے
پہلے بھی وضو کر لیا کریں۔ میرے مشورے کو بغور پڑھئے، سمجھئے اور اس پر عمل کیجئے۔
انشاء اللہ آپ الجھن سے نجات حاصل کر لیں گے۔ صبح کی نماز سے پہلے یا نماز کے بعد
کم از کم دو میل ٹہلئے۔ صبح کی نماز سے پہلے ٹہل سکیں تو زیادہ اچھا ہے۔ ٹہلتے وقت
اللہ کے ناموں کا ورد کیجئے۔
خواجہ شمس الدین عظیمی
جناب خواجہ شمس الدین عظیمی صاحب نے کالم نویسی کاآغاز1969میں روزنامہ حریت سے کیا ۔پہلے طبیعیات کے اوپر مضامین شائع ہوتے رہے پھر نفسیات اور مابعد نفسیات کے مضمون زیر بحث آ گئے۔ روزنامہ حریت کے قارئین نے سائیکالوجی اور پیراسائیکالوجی کے ان مضامین کو نہ صرف پسند کیا بلکہ اپنے مسائل کے حل کے لئے خطوط لکھنے شروع کر دیئے۔ زیادہ تر خطوط خواب سے متعلق ہوتے تھے۔ شروع کے دنوں میں ہفتہ میں تین یا چار خط موصول ہوتے تھے اور پھر یہ سلسلہ ہر ہفتہ سینکڑوں خطوط پر پھیل گیا۔ حریت کے بعد روزنامہ جسارت، روزنامہ اعلان، روزنامہ مشرق اور پھر روزنامہ جنگ میں روحانی ڈاک کے عنوان پر یہ کالم اتنا زیادہ مقبول ہوا کہ خطوط کی تعداد ہزاروں تک پہنچ گئی۔ جب اخبار کا دامن اتنی بڑی ڈاک کا متحمل نہ ہو سکا تو پیارے اور محترم دوستوں کے مشوروں اور تعاون سے روحانی ڈائجسٹ کا اجراء ہوا اور آج بھی روحانی ڈاک کے عنوان سے یہ کالم روحانی ڈائجسٹ میں شائع ہو رہا ہے۔
آپ نے ان اخبارات وجرائد میں عوام کے ان گنت معاشی، معاشرتی، نفسیاتی مسائل اورالجھنوں کا حل پیش کیا ہے اورمظاہرقدرت کے پیچیدہ معموں سے متعلق سوالات کے جوابات دئیے ہیں۔خواجہ شمس الدین عظیمی صاحب کے لائق شاگرد جناب میاں مشتاق احمد عظیمی نے روحانی ڈاک میں شائع شدہ ان خطوط کو یکجا کیا اورترتیب وتدوین کے مراحل سے گزارکر چارجلدوں پر مشتمل کتاب روحانی ڈاک کو عوام الناس کی خدمت کے لئے شائع کردیا۔
