Topics
جواب: اللہ تعالیٰ نے ہر انسان کو کائنات میں
موجود تمام علوم حاصل کرنے کی صلاحیتیں عطا کی ہیں حالات سے اور ماحول کے اثر سے
کچھ صلاحیتیں زیادہ نمایاں ہوجاتی ہیں اور باقی صلاحیتیں دب جاتی ہیں۔(ختم نہیں ہو
جاتیں) ۔ جب کوئی ایک صلاحیت زیادہ نمایاں ہو جاتی ہے تو اس صلاحیت کو بروئے کار
لانے کے لئے انسان کے اندر ذوق و شوق پیدا ہو جاتا ہے لیکن اس کا مطلب یہ نہیں ہے
کہ دوسری معطل صلاحیتوں کو اجاگر کیا جائے تو اس میں انسان کامیاب نہیں ہو سکتا۔
اس قانون کی روشنی میں یہ کہنا کہ میرے اندر مصوری اور سول انجینئرنگ سیکھنے کی
فطری صلاحیت موجود نہیں ہے۔ غلط ہے، میرا خیال ہے کہ سول انجینئرنگ اور مصوری کو
فروغ دینے والی صلاحیت آپ کے اندر دوسری صلاحیتوں سے زیادہ طاقتور ہے۔ صرف ذوق و
شوق کے ساتھ محنت کرنا ضروری ہے۔ آپ اگر اس طرف پوری توجہ کے ساتھ لگ گئے تو انشاء
اللہ آپ کا شمار نامور انجینئروں میں ہو گا۔ چلتے پھرتے وضو اور بغیر وضو ہر حالت
میں ہر وقت یا حی یا قیوم کا ورد کریں۔
خواجہ شمس الدین عظیمی
جناب خواجہ شمس الدین عظیمی صاحب نے کالم نویسی کاآغاز1969میں روزنامہ حریت سے کیا ۔پہلے طبیعیات کے اوپر مضامین شائع ہوتے رہے پھر نفسیات اور مابعد نفسیات کے مضمون زیر بحث آ گئے۔ روزنامہ حریت کے قارئین نے سائیکالوجی اور پیراسائیکالوجی کے ان مضامین کو نہ صرف پسند کیا بلکہ اپنے مسائل کے حل کے لئے خطوط لکھنے شروع کر دیئے۔ زیادہ تر خطوط خواب سے متعلق ہوتے تھے۔ شروع کے دنوں میں ہفتہ میں تین یا چار خط موصول ہوتے تھے اور پھر یہ سلسلہ ہر ہفتہ سینکڑوں خطوط پر پھیل گیا۔ حریت کے بعد روزنامہ جسارت، روزنامہ اعلان، روزنامہ مشرق اور پھر روزنامہ جنگ میں روحانی ڈاک کے عنوان پر یہ کالم اتنا زیادہ مقبول ہوا کہ خطوط کی تعداد ہزاروں تک پہنچ گئی۔ جب اخبار کا دامن اتنی بڑی ڈاک کا متحمل نہ ہو سکا تو پیارے اور محترم دوستوں کے مشوروں اور تعاون سے روحانی ڈائجسٹ کا اجراء ہوا اور آج بھی روحانی ڈاک کے عنوان سے یہ کالم روحانی ڈائجسٹ میں شائع ہو رہا ہے۔
آپ نے ان اخبارات وجرائد میں عوام کے ان گنت معاشی، معاشرتی، نفسیاتی مسائل اورالجھنوں کا حل پیش کیا ہے اورمظاہرقدرت کے پیچیدہ معموں سے متعلق سوالات کے جوابات دئیے ہیں۔خواجہ شمس الدین عظیمی صاحب کے لائق شاگرد جناب میاں مشتاق احمد عظیمی نے روحانی ڈاک میں شائع شدہ ان خطوط کو یکجا کیا اورترتیب وتدوین کے مراحل سے گزارکر چارجلدوں پر مشتمل کتاب روحانی ڈاک کو عوام الناس کی خدمت کے لئے شائع کردیا۔
