Topics
سوال:
میرے لڑکے کا ایکسیڈنٹ ہوا تو جمعہ کی صبح کو ایک بکرا صدقہ کر دیا۔ اسی دن جمعہ
کی نماز پڑھنے کے لئے مرد باہر نکلے تو دیکھا کہ صحن میں دو مومی تھیلیوں میں چار
کالے بکروں کے سر پڑے ہوئے ہیں۔ انہوں نے اٹھا کر باہر رکھ دیئے۔ لیکن جب واپس آئے
تو دیکھا ایک لفافہ پھر اندر پڑا ہوا ہے۔ وہ بہت دور جا کر پھینک آئے۔ رات کو
دروازہ بند کیا تو نہیں تھے۔ لیکن صبح جب دروازہ کھولا تو دونوں تھیلے موجود تھے۔
اس واقعہ کے بعد سے گھر کے سب افراد بہت جھگڑتے ہیں اور ایک دوسرے سے نفرت کرتے
ہیں۔ گھر کا ایک فرد بیمار ہے۔ عجیب بات یہ ہے کہ ہر شخص کسی نہ کسی ایسی بیماری
میں مبتلا ہے جس کا تعلق سر کے درد سے ہے۔ اگر یہ جادو ہے تو اس کا آسان توڑ
بتائیں۔
جواب:
کوڑ یا لوبان ہاون
دستہ میں پیس کر ایک ڈبہ میں رکھ لیں اور اس کے اوپر ایک سو گیارہ مرتبہ سورۂ فلق
پڑھ کر دم کریں اور یہ لوبان رات کو سوتے وقت پورے گھر میں جلائیں، انشاء اللہ گھر
جادو کے اثرات سے محفوظ ہو جائے گا۔ جمعہ کے روز چار عدد بکروں کے سری پائے پکا کر
غریبوں کو کھلا دیں۔ صبح، شام، رات کو ایک ایک بار سورۂ فلق پڑھ کر پانی پر دم کر
کے سارے گھر والے پئیں۔
خواجہ شمس الدین عظیمی
جناب خواجہ شمس الدین عظیمی صاحب نے کالم نویسی کاآغاز1969میں روزنامہ حریت سے کیا ۔پہلے طبیعیات کے اوپر مضامین شائع ہوتے رہے پھر نفسیات اور مابعد نفسیات کے مضمون زیر بحث آ گئے۔ روزنامہ حریت کے قارئین نے سائیکالوجی اور پیراسائیکالوجی کے ان مضامین کو نہ صرف پسند کیا بلکہ اپنے مسائل کے حل کے لئے خطوط لکھنے شروع کر دیئے۔ زیادہ تر خطوط خواب سے متعلق ہوتے تھے۔ شروع کے دنوں میں ہفتہ میں تین یا چار خط موصول ہوتے تھے اور پھر یہ سلسلہ ہر ہفتہ سینکڑوں خطوط پر پھیل گیا۔ حریت کے بعد روزنامہ جسارت، روزنامہ اعلان، روزنامہ مشرق اور پھر روزنامہ جنگ میں روحانی ڈاک کے عنوان پر یہ کالم اتنا زیادہ مقبول ہوا کہ خطوط کی تعداد ہزاروں تک پہنچ گئی۔ جب اخبار کا دامن اتنی بڑی ڈاک کا متحمل نہ ہو سکا تو پیارے اور محترم دوستوں کے مشوروں اور تعاون سے روحانی ڈائجسٹ کا اجراء ہوا اور آج بھی روحانی ڈاک کے عنوان سے یہ کالم روحانی ڈائجسٹ میں شائع ہو رہا ہے۔
آپ نے ان اخبارات وجرائد میں عوام کے ان گنت معاشی، معاشرتی، نفسیاتی مسائل اورالجھنوں کا حل پیش کیا ہے اورمظاہرقدرت کے پیچیدہ معموں سے متعلق سوالات کے جوابات دئیے ہیں۔خواجہ شمس الدین عظیمی صاحب کے لائق شاگرد جناب میاں مشتاق احمد عظیمی نے روحانی ڈاک میں شائع شدہ ان خطوط کو یکجا کیا اورترتیب وتدوین کے مراحل سے گزارکر چارجلدوں پر مشتمل کتاب روحانی ڈاک کو عوام الناس کی خدمت کے لئے شائع کردیا۔
