Spiritual Healing
سوال: میری شادی کو ڈھائی سال ہو چکے ہیں۔ جس میں
سے صرف دو تین ماہ میں نے شوہر کی چاہت کے دیکھے ہیں۔ اس کے بعد سمجھ لیجئے کہ میں
کنواری لڑکی کی طرح زندگی گزار رہی ہوں۔ میرے شوہر مجھے میرے ماں باپ کے گھر چھوڑ
گئے۔ لے کر بھی نہیں جاتے۔ خدا کے لئے میری مدد کیجئے۔ وہ ایک دوسری عورت سے شادی
کرنا چاہتے ہیں۔ آپ کی مدد سے میرا گھر اجڑنے سے بچ جائے گا۔ کوئی ایسا وظیفہ
بتائیں جس سے ان کے دل میں میرے لئے محبت پیدا ہو جائے۔ اور وہ مجھے اپنے گھر لے
جائیں۔ آپ کو پیارے حبیب ، سرور کائنات صلی اللہ علیہ و سلم کا واسطہ آپ مجھے
مایوس نہ لوٹائیں۔
جواب: سب کاموں سے فارغ ہونے کے بعد رات کو سونے
سے پہلے اول و آخر گیارہ گیارہ مرتبہ درود شریف کے ساتھ سورۂ الکوثر پوری سورہ
41مرتبہ پڑھ کر بات کئے بغیر بستر پر چلی جائیں، آنکھیں بند کر کے اپنے شوہر کا
تصور کرتے کرتے سو جائیں، نوے دن تک۔ ناغہ کے دن بعد میں پورے کر لیں۔ بالکل بے
فکر ہو جائیں۔ اللہ کے کلام کی برکت سے آپ کے شوہر دوسری شادی نہیں کریں گے اور آپ
ان کی آنکھوں کا تارا بن جائیں گی۔
خواجہ شمس الدین عظیمی
جناب خواجہ شمس الدین عظیمی صاحب نے کالم نویسی کاآغاز1969میں روزنامہ حریت سے کیا ۔پہلے طبیعیات کے اوپر مضامین شائع ہوتے رہے پھر نفسیات اور مابعد نفسیات کے مضمون زیر بحث آ گئے۔ روزنامہ حریت کے قارئین نے سائیکالوجی اور پیراسائیکالوجی کے ان مضامین کو نہ صرف پسند کیا بلکہ اپنے مسائل کے حل کے لئے خطوط لکھنے شروع کر دیئے۔ زیادہ تر خطوط خواب سے متعلق ہوتے تھے۔ شروع کے دنوں میں ہفتہ میں تین یا چار خط موصول ہوتے تھے اور پھر یہ سلسلہ ہر ہفتہ سینکڑوں خطوط پر پھیل گیا۔ حریت کے بعد روزنامہ جسارت، روزنامہ اعلان، روزنامہ مشرق اور پھر روزنامہ جنگ میں روحانی ڈاک کے عنوان پر یہ کالم اتنا زیادہ مقبول ہوا کہ خطوط کی تعداد ہزاروں تک پہنچ گئی۔ جب اخبار کا دامن اتنی بڑی ڈاک کا متحمل نہ ہو سکا تو پیارے اور محترم دوستوں کے مشوروں اور تعاون سے روحانی ڈائجسٹ کا اجراء ہوا اور آج بھی روحانی ڈاک کے عنوان سے یہ کالم روحانی ڈائجسٹ میں شائع ہو رہا ہے۔
آپ نے ان اخبارات وجرائد میں عوام کے ان گنت معاشی، معاشرتی، نفسیاتی مسائل اورالجھنوں کا حل پیش کیا ہے اورمظاہرقدرت کے پیچیدہ معموں سے متعلق سوالات کے جوابات دئیے ہیں۔خواجہ شمس الدین عظیمی صاحب کے لائق شاگرد جناب میاں مشتاق احمد عظیمی نے روحانی ڈاک میں شائع شدہ ان خطوط کو یکجا کیا اورترتیب وتدوین کے مراحل سے گزارکر چارجلدوں پر مشتمل کتاب روحانی ڈاک کو عوام الناس کی خدمت کے لئے شائع کردیا۔
