Topics

گانے کی آواز۔کانوں میں آوازیں آتی ہیں

س: میرے کانوں میں طرح طرح کی آوازیں آتی رہتی ہیں۔ پہلے دونوں کانوں میں شائیں شائیں کی آوازیں آتی تھیں۔ ڈاکٹر صاحب سے علاج کروانے کے بعد اب دونوں کانوں میں انسانوں کی آوازیں آتی ہیں۔ معلوم ہوتا ہے جیسے کوئی آدمی گانا گا رہا ہے یا ساز بجنے کی آواز آتی ہے۔ اتنے زور کی آواز ہوتی ہے جس طرح ریڈیو پوری آواز سے چل رہا ہو۔ ڈاکٹرصاحب نے کہا تھا یہ آوازیں اب خود بخود ختم ہو جائیں گی۔ علاج ختم ہوئے تین ماہ ہو چکے ہیں لیکن ابھی تک آوازوں کا سلسلہ جاری ہے۔ میں ان آوازوں سے تنگ آ چکی ہوں میں اپنے دماغ میں سکون چاہتی ہوں۔ درخواست ہے اس مرض کی تشخیص کر کے علاج تجویز کر دیں۔

ج: 7دانے بادام گری، 7دانے منقیٰ، گیارہ دانے کالی مرچ پیس کر رات کو دودھ کے ساتھ کھائیں۔ سوتے وقت کان میں روغن بادام ڈال لیا کریں۔ کانوں میں تیل ڈالنے سے پہلے ہلکا سا گرم کر لیا کریں۔ ٹھنڈی اور کھٹی چیزوں سے پرہیز کریں۔


Topics


Roohani Daak (3)

خواجہ شمس الدین عظیمی

جناب خواجہ شمس الدین عظیمی صاحب نے کالم نویسی کاآغاز1969میں روزنامہ حریت سے کیا ۔پہلے طبیعیات کے اوپر مضامین شائع ہوتے رہے پھر نفسیات اور مابعد نفسیات کے مضمون زیر بحث آ گئے۔ روزنامہ حریت کے قارئین نے سائیکالوجی اور پیراسائیکالوجی کے ان مضامین کو نہ صرف پسند کیا بلکہ اپنے مسائل کے حل کے لئے خطوط لکھنے شروع کر دیئے۔ زیادہ تر خطوط خواب سے متعلق ہوتے تھے۔ شروع کے دنوں میں ہفتہ میں تین یا چار خط موصول ہوتے تھے اور پھر یہ سلسلہ ہر ہفتہ سینکڑوں خطوط پر پھیل گیا۔ حریت کے بعد روزنامہ جسارت، روزنامہ اعلان، روزنامہ مشرق اور پھر روزنامہ جنگ میں روحانی ڈاک کے عنوان پر یہ کالم اتنا زیادہ مقبول ہوا کہ خطوط کی تعداد ہزاروں تک پہنچ گئی۔ جب اخبار کا دامن اتنی بڑی ڈاک کا متحمل نہ ہو سکا تو پیارے اور محترم دوستوں کے مشوروں اور تعاون سے روحانی ڈائجسٹ کا اجراء ہوا اور آج بھی روحانی ڈاک کے عنوان سے یہ کالم روحانی ڈائجسٹ میں شائع ہو رہا ہے۔

آپ نے ان اخبارات وجرائد میں عوام کے ان گنت معاشی، معاشرتی، نفسیاتی مسائل اورالجھنوں کا حل پیش کیا ہے اورمظاہرقدرت کے پیچیدہ معموں سے متعلق سوالات کے جوابات دئیے ہیں۔خواجہ شمس الدین عظیمی صاحب کے لائق شاگرد جناب میاں مشتاق احمد عظیمی نے روحانی ڈاک میں شائع شدہ ان خطوط کو یکجا کیا اورترتیب وتدوین کے مراحل سے گزارکر چارجلدوں پر مشتمل کتاب روحانی ڈاک کو عوام الناس کی خدمت کے لئے شائع کردیا۔


انتساب

ہر انسان کے اوپر روشنیوں کا ایک اور جسم ہے جو مادی گوشت پوست کے جسم کو متحرک رکھتا ہے۔ اگریہ روشنیوں کا جسم نہ ہو تو آدمی مر جاتا ہے اور مادی جسم مٹی کے ذرات میں تبدیل ہو کر مٹی بن جاتا ہے۔

جتنی بیماریاں، پریشانیاں اس دنیا میں موجود ہیں وہ سب روشنیوں کے اس جسم کے بیمار ہونے سے ہوتی ہیں۔ یہ جسم صحت مند ہوتا ہے آدمی بھی صحت مند رہتا ہے۔ اس جسم کی صحت مندی کے لئے بہترین نسخہ اللہ کا ذکر ہے۔

*****