Topics
Jab schoolon
mein larko’n ko drawing sikhaai jati hey tu aik kaghaz jis ko graph kehtey hain.
Drawing ki asal mein istemaal hota hey. Es kaghaz mein graph yani chhotey
chhotey chakor khaaney hotey hain. In chakor khaano’n ko buniyad qaraar dey kar
drawing sikhaaney waley ustaad cheezon, jaawaron aur adimiyo’n ki taswerein
banana sikhatey hain, ustaad yeh batatey hain ke in chhotey khano’n ki itni
ta’daad sey admi ka sar, itni ta’daad sey naak, itni ta’daad sey moonh aur itni
ta’daad sey gerden banti hey. In khano ki naap sey wo mukhtalif azaa ki sakht
ka tanasob qayam kartey hain jis sey larko’n ko tasweer bananey mein asani hoti
hey. Goya graph tasweeron ki asal hey. Ya dusrey alfaz mein es graph ko tarteeb
deney sey tasweerein ban jati hain. Bikul isi tarah Nasma ki yeh lakeerein
tamam maadi ajsaam ki saakht mein asal ka kaam deti hain. In hi lakeeron ki
zarb taqseem mowaleed sulaasah ki haiyatein aur khad-o-khaal banati hain.
Looh-e-mehfooz ke qa’noon ki roo sey dar’asal yeh lakeeren ya bey rang shuaaein
chhoti bari harkaat hain. In ka jitna ijtimaa hota jaye ga itni hi aur es tarz
ki thos hissyaat tarkeeb paati jaaein gi. In hi ki ijtimaaiyat sey rang aur
kashish ki tarzein qayaam paati hain. Aur in hi lakeeron ki harkat aur
gardishein waqfah peda karti hain. Aik taraf in lakeero’n ki ijtimaaiyat
makaniyat banaati hey aur dusri taraf in lakeero’n ki gardish zmanaiyat ki
takhleeq karti hey.
Tasawuf ki
istilaah mein lakeero’n ke es qa’noon ko Nasma ka jazb kehtey hain yani Nasma apni
zarurat aur apney tabai taqaazo’n ke tehat mumkin ki shakal-o-surat ikhtiyaar
kar leta hey. Tasawuf mein mumkin es cheez ko kehtey hain jis ko aakhiri darjah
mein ya takmeel ke baad maadi aankh dekh sakti hey. Yeh maadi haiyat jo
mowaleed sulaasah ki kisi nou mein dekhi jati hey tashakhus kehlati hey. Yeh
lakeerein tashakhus sey peshtar jin buniyadi haiyat ki takhleeq karti hain in
haiyat ka naam tasawuf ki zuban mein tahaquq hey. Es haiyat ko tamsul bhi kaha
jata hey. Yeh haiyat darasal mufrid hey. Looh-e-mehfooz ke qa’noon Nasma ki wo shakal-o-surat
jis ko maadi aankh dekh sakti hey haiyat murakab tashakhus ya jism kehlati hey.
Jab haiyat mufrid ijtimaaiyat ki surat mein iqdaam kar ke apni manzil tak
pohnch jati hey tu haiyat murakab ho jati hey. Goya ibtidaai haalat
haiyat-e-mufrad hey aur intihaai halat haiyat-e-murakab hey. Ibtidaai haalat ko
Rooh ki aankh aur intihaai haalat ko jism ki aankh dekhti hey.
Nasma woh makhfi roshni hey jis ko noor ki
roshnion mein dekha ja sakta hey aur noor wo makhfi roshni hey jo khud bhi
nazar aati hey aur dusri makhfi roshniyo’n ko bhi dikhaati hey.
Qalandar Baba Auliay (R.A)
“Guftah O Guftah Allah Bowad Garchah Az Halqoom-e- Abdullah Bowad”
key misdaaq Haamil Ilm-e-laduni, waqif israar kun fakoon, Murshid Kareem, Abdaal-e-Haq,
Hassan Ukhra Muhammad Azeem Barkhiya, Hazrat Qalandar Baba Auliya Rehmatullah
Aleh R.A ki zabaan-e- faiz-e-tarjumaan sey
nikala hua aik aik lafz khud huzoor baba sahib Ke roohani tasaraf sey merey
zehan par naqsh hota raha….. aur phir yeh Ilhaami tehreer Hazrat Qalandar Baba Aliya
R.A ki Mubarak Zuban aur is Aajiz ke
qalam sey kaghaz par muntaqil ho kar kitaab “Loh-O-Qalam” ban gayi.
Merey paas yeh roohani uloom nou-e-insaan aur noo-e-jinaat key liye
ek wirsah hain. Main yeh amanat barey boorho’n, insaan aur jinaat ki mojoodah
aur aaney waali nasal key supard karta hoon.
Khwaja Shamsuddin Azeemi
