Topics

Ism Zaat

          

Ab hum lafz Allah yani Ism zaat ke mozo’aat ka tazkirah karengey.

1.         Allah ka alif ahdiyat ke tammam daairo’n ki tajalli ka naam hey. Ahdiyat ki tajalli sey muraad takhleeq ki wo saakht hey jo tanazul zaat yani waajib ke anwaar hain. mojoodat mein yeh anwaar Nehar Taswwed ke zariye muntashir hotey hain. Yehi Nehar Tasweed har Sabtah ke Latifah Akhfaa ko ser’aab karti hey. Es tarah har latifah akhfah aik dusrey sey mutarif aur roshnaas hey. Kainat ke in Zee Rooh afrad mein jin mein latifah Akhfaa mojood hey wo sab ke sab Nehar Tasweed ke zariye es makhfi rishtah mein aik dusrey sey munsalik aur aik dusrey sey roshnaas hain.. Yehi wo buniyad hey jis ke zariye hum mojoodat ki har cheez ko jantey hain.

Nehar Tasweed ke lateef anwaar hi wo shuaaein hain jo insan, jinaat aur Zee Rooh afrad ke haafizeh ka kaam deti hain. In hi shuaao’n mein mojoodat ka pura sabat (Record) hey. Jab hum kisi cheez ko yaad karna ya jaanna chahatey hain tu yehi shuaaein harkat kar ke Ayaan aur aayaan sey Jovaya mein muntaqil ho kar hamara shaoor banti hain. Aur hum kisi bhooli hoyee cheez ko ya jaani hoyee cheez ko apney shaoor mein mehsoos kar letey hain. Es haqeeqat ke zariye es baat ki wazahat ho jati hey ke insan ke latifah Akhfaa mein Azal sey Abad tak ki tammam ma’lumaat ka zakheerah mehfooz hey. Agar wo es zakheerah sey istifaadah karney ki mashq karey tu mukhtalif zamaano’n ke mukhtalif wa’qiaat, haadsaat aur ma’lumaat Akhfaa ki shua’on sey farahum kar sakta hey.

Mojoodat ki zindagi ke tammam ajza wahi hain jo Kainat ke wajood mein aaney sey pehley Allah Taala ke Ilm mein they. Yeh samjhna zaruri hey ke mojoodat ke tammam ajzaaye tarkeebi wohi ho saktey they jo peshtar sey Allah Taala ke zehan mein mojood they. In hi ajzaaye tarkeebi ka aik qa’noon ke tehat muratab hona baqa aur hayat ki shakal mein ronuma hua. Es mafhoom ko ziyadah waazeh karney ke liye aik sawaal qayam kartey hain. Es sawaal ke jawaab mein qa’noon ki kayee hesiyatein munkashif ho jayin gi.

Sawaal: hayat kiya hey?

Jawaab: Maslan Allah Taala ke zehan mein insan aur insan ki shakal-o-surat isi tarah mojood thi jis tarah insan ba’haalat mojoodah peda ho kar baalag khad-o-khaal haasil kar ke aik umar tak aik khaas mazhar ki hesiyat mein zindagi basar karta hey. Es misaal ki wazahat es tarah ki jati hey ke insan ki zaat aik harkat hey. Wo harkat Allah Taala ke hukum sey shuru hoti hey. Es harkat ke hazaaro’n ajza hain aur in ajza mein sey har cheez aik harkat hey. Goya insan ki zaat lashumaar harkato’n ka majmoaa hey. Jab insan ney apni zindagi ki pehli harkat ki tu es harkat ki ibtida ko alag aur intiha ko alag mazhar banney ka moqa mila. Ibtid’an jo harkat waqoo mein aai, wo khalqiyat ki sifat ka mazhar thi. Wo harkat ibtidaai marahil sey guzar kar takmeel tak pohnchi. Pehla jza ibtidaai harkat aur dusra juzv takmeel. Dono’n mil kar hayat insani ki aik tamseel bani. Yeh dono’n tamseelein hoyeen Pehli tamseel aik record thi aur dusri tamseel bhi aik judaganah record ki hesiyat rakhti hey. Pehli tamseel ka record agar mehfooz na hota tu zindagi ki pehli harkat jo zindagi ka aik juzv hey fana ho jaati. Isi tarah dusri tamseel ka record na rehta tu dusri harkat fana ho jaati. Agar fanaiyet ka yeh silsilah jaari rehta tu zindagi ki har harkat jaisey waqoo mein aati waisey hi fana ho jaya karti. Es tarah kisi insan ki tammam zindagi ki nafi ho jati aur phir kisi tarah bhi hum zindagi ko zindagi nahin keh saktey they. Es liye yeh zaruri hua ke zindagi ki har harkat mehfooz rahey. Zindagi ki har harkat Allah Taala ki sifat khalqiyat ke tehat waqey hoyee hey yani sifat khalqiyat ki hadood mein zahir hoyee. Es harkat ka mehfooz rehna Allah Taala ki kisi aisi sifat mein mumkin tha jo ahtaah kar sakti ho aur hifazat ki salahiyet rakhti ho. Chunachey yeh laazim ho gaya ke harkat sifat khalqiyat ke tehat shuru hoyee thi es ki takmeel sifat Qudrat ki hadood mein ho. Ab har harkat ke liye laazim ho gaya ke wo sifat khalqiyat yani Rehmat ki hado’n mein shuru ho aur sifat maalkiyat yani sifat Qudrat ki hado’n mein takmeel pazeer ho. Es asool sey yeh zahir hota hey ke Rehmat aur Qudrat ke saaye mein hi harkat wajood pa sakti thi. In dono’n sifaat ka saharah liye bagher harkat ka wajood na mumkin hey.

Is bayan sey yeh saabit ho jata hey ke zindagi Rehmat aur Qudrat ka majmuaa hey. Allah Taala ki jis qadar sifaat hain in mein sey har sifat ke sath Rehmat aur Qudrat ka jazb hona yaqeeni hey.

‘Alif’ jin anwaar ka naam hey in ko tasawuf ki zubaan mein “SIRR” kehtey hain. Sirr who anwaar hain jo apni latafat ki wajah sey aala tareen shahood rakhney walo’n ko nazar aatey hain. Yehi wo anwaar hain jo nehar tasweed ke zariye mojoodat ko seraab kartey hain. In hi anwaar ke zariye salik Allah Taala ki ma’rfat haasil karta hey.

Nehar tajreed, nehar tash’heed aur nehar tazheer ke anwaar ma’rfat zaat tak nahin pohncha saktey. Zaat ki ma’rfat haasil karney ke liye yeh zaruri hey ke salik in inwaar ki ma’rfat haasil karey jin ka naam Alif hey.

Looh-e-mehfooz ka qa’noon yeh hey ke jab koi fard dusrey fard sey roshnaas hota hey tu apni tabiyat mein es ka asar qabool karta hey. Es tarah do afrad mein aik fard asar daalney waala aur dusra fard asar qabool karney waala hota hey. Istilahan in dono mein sey aik ka naam hasaas aur dusrey ka naam mehsoos rakhtey hain. Hasaas mehsoos ka asar qabool karta hey aur magloob ki hesiyat rakhta hey. Maslan Zaid jab Mehmood ko dekhta hey tu Mehmood ke mutaliq apni maloomaat ki bina par koi raaye qayam karta hey. Yeh raaye Mehmood ki sifat hey jis ko ba’tor-e-ehsaas Zaid apney andar qabool karta hey. Yani insan dusrey insan ya kisi cheez ki sifat sey magloob ho kar es cheez ki sifat ko qabool kar ke apni shikast aur mehkomiyet ka aitraaf karta hey. Yehan aa kar insan,

Hewanaat, nabataat, jamadaat sab ke sab aik hi qataar mein kharey nazar aatey hain aur insan ki afzaliyat gum ho kar reh jati hey. Ab yeh samjhna zaruri ho gaya ke aakhir insan ki wo kon si hesiyat hey jo es ki afzaliyat ko qayam rakhti hey aur es hesiyat ka haasil karna kis tarah mumkin ho sakta hey.

Ambiyaa es hesiyat ko haasil karney ka ahtimaam es tarah kiya kartey they ke wo jab kisi cheez ke mutaliq sochtey tu es cheez ke aur apney darmiyan koi rishtah barah e rast qayam nahin kartey they. Hameshah in ki tarz-e-fikar yeh hoti thi ke Kainat ki tammam cheezo’n ka aur hamara maalik Allah Taala hey. Kisi cheez ka rishtah hum sey barah raast nahin hey balkeh hum sey har cheez ka rishta Allah Taala ki ma’rfat hey. Raftah raftah in ki yeh tarz-e-fikar mustehkam ho jati thi aur in ka zehan aisey rujhanaat peda kar leta tha ke jab wo kisi cheez ki taraf mukhaatib hotey they tu es cheez ki taraf khayaal janey sey peheley Allah Taala ki taraf khayaal jata tha. Unhein kisi cheez ki taraf tawajoh deney sey peshtar yeh ehsaas aada’tan hota tha ke yeh cheez hum sey baraheraast koi taluq nahin rakhti. Es cheez ka aur hamara waastah mehaz Allah Taala ki wajah sey hey.

Jab in ki tarz-e-fikar yeh hoti thi tu in ke zehan ki har harkat mein Allah Taala ka ehsaas hota tha. Allah Taala hi bahesiyat mehsoos ke in ka mukhaatib aur mad-e-nazar qaraar paata tha aur qa’noon ki ro sey Allah Taala ki sifaat hi in ka ehsaas banti thein. Raftah raftah Allah Taala ki sifaat in ke zehan mein aik mustaqil maqam haasil kar leti thi ya yun kehna chahiye ke in ka zehan Allah Taala ki sifaat ka qayam maqam ban jata tha. Yeh maqam haasil honey ke baad in ke zehan ki har harkat Allah Taala ki sifaat ki harkat hoti thi aur Allah Taala ki sifaat ki koi harkat Qudrat aur Hakimiyet ke wasaf sey khaali nahin hoti thi. Chonachey in ke zehan ko yeh Qudrat haasil ho jati thi ke wo apney irado’n ke mutabiq mojodaat ke kisi zarrey, kisi fard aur kisi hasti ko harkat mein la saktey they.

Bismilaah Shareef ki batini tafseer es hi buniyaadi sabaq par mabni hey. Auliyaye Karam mein ahl-e-nizamat ko Allah Taala ki taraf sey yehi zehan atta kiya jata hey aur qurb-e-nwaafil waley Auliyaye Karam apni riyazat aur mujahido’n ke zariye es hi zehan ko haasil karney ki koshish kartey hain.

 

Topics

Loh o Qalam (Roman) View

Loh o Qalam (Roman)

Qalandar Baba Auliay (R.A)

“Guftah O Guftah Allah Bowad Garchah Az Halqoom-e- Abdullah Bowad” key misdaaq Haamil Ilm-e-laduni, waqif israar kun fakoon, Murshid Kareem, Abdaal-e-Haq, Hassan Ukhra Muhammad Azeem Barkhiya, Hazrat Qalandar Baba Auliya Rehmatullah Aleh R.A ki zabaan-e- faiz-e-tarjumaan sey nikala hua aik aik lafz khud huzoor baba sahib Ke roohani tasaraf sey merey zehan par naqsh hota raha….. aur phir yeh Ilhaami tehreer Hazrat Qalandar Baba Aliya R.A ki Mubarak Zuban aur is Aajiz ke qalam sey kaghaz par muntaqil ho kar kitaab “Loh-O-Qalam” ban gayi.

Merey paas yeh roohani uloom nou-e-insaan aur noo-e-jinaat key liye ek wirsah hain. Main yeh amanat barey boorho’n, insaan aur jinaat ki mojoodah aur aaney waali nasal key supard karta hoon.

 

 

Khwaja Shamsuddin Azeemi