Topics

Quwat e Alqaa


Quwat-e-alqaa ki tafseel yeh hey ke sufi jis ka naam “huiyat” rakthey hain esko tafseeli tuar per zehan nashin kar liya jaye. Darasal “LA” ki tajalliyaat ka markaz hey. Es markaziyat ka tahqaq quwat-e-alqaa ki bina qayam karta hey. Es ki sharaah yeh hey ke zaat ki tajalliyaat jab tanazul kar ke “ waajib” ki Intaba’iyat mein muntaqil hoti hain tu mojoodat ke baarey mein Ilm Ilaahi ka urf takhleeq paa jata hey. Yeh pehla tanazul hey. Es cheez ka tazkirah hum ney pehley “Ilm-ul-Qalam” ke naam sey bhi kiya tha. Yeh tajalliyaat aisey israar hain jo mashiyat-e-izdi ka pura ahata kar letey hain. Jab mashiyat-e-izdi aik martabah aur tanazul karti hey tu yehi israar looh-e-mehfooz ke ajmaal ki shakal ikhtiyaar kar letey hain. In hi shaklo’n ka naam mazhab “Taqdeer Mubram” rkhta hey. Dar’asal yeh urf ki ebaratein hain. Urf sey muraad manwiyat hey jo hukum Ilaahi ki bisaat banti hey. Yeh urf ajmaal ki noiyat hey. Es mein koi tafseel nahin paai jaati. Yehan yeh samjhna zaroori hey ke abhi tak “Daur-e-Azliyah” ka ajra paaya jata hey. Dusrey alfaz mein jahan tak ifadah bilfel ya faaliyat ki shakhein yani ikhtiraat-o-ejadaat ka silsilah jaari hey, daur-e-azliya shumar hoga. Qayamat tak aur qayamat ke baad Abad al’aabad tak jo jo naye amaal pesh aatey rahen gey. Khuwah es mein Janat-O-Dozakh ke Qaroon-e-Oolaa, Qaroon-e- Wasta aur Qaroon-e-Ukhra hi kiyun na hoon, daur-e-azliyah ki hadood mein hi samjhey jayein gey. Abad tak mumkinaat ka har muzahirah Azal hi ke ahatey mein muqa'yad hey. Es hi liye jo bhi tanazul Ilm-ul-Qalam ke israar ka pesh aa raha hey ya pesh aaye ga wo es hi ajmaal ki tafseel hogi jo looh-e-mehfooz ki kuliyaat ke naam sey pukara jata hey. Quran Pak mein Allah Taala ney farmaya hey ke mein looh-e-mehfooz ka maalik hoon jis hukum ko caahon barqaraar rakhoon aur jis hukum ko chahon mansookh kar doon.

لِکُلِّ اَجَلٍ کِتَابُٗoیَمْحُواللّٰہُ مَاَ یَشَآءُ وَ یُثْبِتُ

وَعِنْدَہٗٓ اُمُّ الْکِتٰبِo (Surah rahd – Ayat: 38)

Tarjumah: Har wadah hey likha hua. Mitaata hey Allah jo chahey aur rakhta hey aur Is ke paas hey asal kitab.

Yeh farmaan es hi ajmaal ke baarey mein hey jis ke maini yeh hain ke Allah Taala jab cahein aur jis tarah chahein israar ke mafhoom aur rujanaat badal saktey hain.

Yehan zara shara aur basat ke sath mzkorah baala ayat par ghor karney sey Daur-e-Azliyah ki wuswato’n ka andazah ho sakta hey. Agar Allah Taala apni kisi maslihat ko takhleeqi ikhtaraat aur ejadaat ke ajmaal mein badalna pasand farmatey hain tu yeh Allah Taala ke qa’noon ke munaafi nahin hey. Dusrey tanazul ke baad ajmaal ki tafseel ahkamaat ke purey khad-o-khaal pesh karti hey. Yehan tak makaiyat aur zamaniyat ka koi dakhal nahin hota. Albatah “joo” yani teesrey tanazul ke baad jab koi shey Aalam takhleet ki hadood mein daakhil ho kar ansriyat ke libaas ko qabool karti hey. Es waqt makaniyat ki buniyadein parti hain. Yeh alqa ki aakhiri manzil hey. Es manzil mein jo halatein aur surtein guzarti hain in ko afaadah bil’fel kehtey hain. Es ki misaal cinema sey di ja sakti hey. Jab Oprator machine ko harkat deta hey tu filmi reel ka aks kayee lenso’n (Lenses) ke zariye khl’la sey guzar kar pardah par parta hey. Agarchey khal’la mein har wo tasweer jo pardah par nazar aa rahi hey, apney tam’aam khad-o-khaal aur puri harkaat ke sath mojood hey lekin aankh issey dekh nahin sakti. Ziyadah sey ziyadah wo shuaa nazar aati hey. Jis shuaa ke andar tasweerein mojood hain. Jab yeh tasweerein pardah sey takraati hain es waqt in ki faliyat puri tarah dekhney wali aankh ke ahaatey mein sama jati hey. Es muzahirah ka naam hi afadah balfel hey. Es muzahirah ki hadood mein hi har makaniyat aur har zamaniyat ki takhleeq hoti hey. Jab tak koi cheez sirf Allah Taala ke hadood mein thi es waqt tak es ney waajib ka lens (LENSE) uboor nahin kiya tha yani es mein hukum ke khad-o-khaal mojood nahin they lekin waajib ke lense sey guzarney ke baad jab es cheez ke wajood ney kuliyaat ya looh-e-mefooz ki hadood mein qadam rakha. Es waqt hukum ke khad-o-khaal muratab ho gaye. Phir es lense sey guzarney ke baad “ joo” mein jis ko aalam-e-tamsaal bhi kehtey hain tamsaal yani tasweerein jo hukum ke mazmoon aur mafhoom ki wazahat karti hain wajood mein aa gayin. Ab yeh tasweerein “joo” ke lense sey guzar kar aik kaamil tamsul ki hesiyat ikhtiyaar kar leti hain. Es Aalam ko aalam-e-takhleet ya aalam-e- tamsul bhi kehtey hain. Lekin abhi ansariyet in mein shaamil nahin hoyee yani in tasweeron ney jism ya jasad-e-khaaki ka libaas nahin pehna. Jab tak in tasweeron ki ansariyet sey waastah na parey, yeh ehsaas sey roshnaas nahin hoteen.

Alqaa ki ibtidaa pehley lense ke uboori daur sey hoti hey jab tak mojoodat ki tamaam faaliyatein Allah Taala ke Ilm mein rahein, alqaa ki pehli manzil mein theen aur jab looh-e-mehfooz ke lense sey guzrein tu ahkamaat Ilaahiyah mein khad-o-khaal aur aasaar peda ho gaye. Yeh alqaa ki dusri manzil hey jab ahkaam aur mafhoom ki faaliyatein “joo” ke lense sey guzar kar shakal-o-surat ikhtiyaar kar leti hain tu yeh alqaa ki teesri manzil hoti hey. Es manzil sey uboor haasil karney ke baad tamaam tasaaweer Aalam-e-Nasoot ke marhaley mein daakhil ho jati hain. Yehan in ko makaniyat aur zamaniyat aur ehsaas sey saabqah parta hey. Yeh alqaa ki chothi manzil hey.

Topics


Loh o Qalam (Roman)

Qalandar Baba Auliay (R.A)

“Guftah O Guftah Allah Bowad Garchah Az Halqoom-e- Abdullah Bowad” key misdaaq Haamil Ilm-e-laduni, waqif israar kun fakoon, Murshid Kareem, Abdaal-e-Haq, Hassan Ukhra Muhammad Azeem Barkhiya, Hazrat Qalandar Baba Auliya Rehmatullah Aleh R.A ki zabaan-e- faiz-e-tarjumaan sey nikala hua aik aik lafz khud huzoor baba sahib Ke roohani tasaraf sey merey zehan par naqsh hota raha….. aur phir yeh Ilhaami tehreer Hazrat Qalandar Baba Aliya R.A ki Mubarak Zuban aur is Aajiz ke qalam sey kaghaz par muntaqil ho kar kitaab “Loh-O-Qalam” ban gayi.

Merey paas yeh roohani uloom nou-e-insaan aur noo-e-jinaat key liye ek wirsah hain. Main yeh amanat barey boorho’n, insaan aur jinaat ki mojoodah aur aaney waali nasal key supard karta hoon.

 

 

Khwaja Shamsuddin Azeemi