Spiritual Healing
س: ہمارے گھر میں بہت پریشانی ہے۔ عامل حضرات بتاتے ہیں کہ گھر میں جنات کا سایہ ہے۔ میرے بیٹے بھی کوئی کام نہیں کرتے۔ رشتے دار بھی ہم سے دور ہوتے جا رہے ہیں۔ آپ بتائیں کہ ہم کیا کریں ہم نے بہت سے عامل حضرات سے تعویذات بنوائے سینکڑوں روپے تعویذ گنڈوں کی فیس دی، بکرے ذبح کئے گئے۔ مگر کسی طرح سے بھی جنات سے ہمیں نجات نہیں ملی۔
کوئی جگہ نہیں چھوڑی جہاں سے ہم نے علاج نہ کرایا ہو اور ہر طرف سے مایوس ہو کر سوچا کہ آپ کو بھی لکھ کر دیکھ لیں شاید کوئی حل نکل آئے۔ جس سے ہماری پریشانی دور ہو اور میرے بیٹے کام کرنے لگ جائیں۔ گھر میں برکت ہو۔ گھر کی نحوست ختم ہو جائے۔
ج: گھر میں نہ کوئی آسیب ہے نہ ہی کسی جن کا اثر ہے اور نہ ہی کسی نے تعویذ کرائے ہیں۔ یہ سب مفروضہ باتیں ہیں۔ تین باتوں کا خیال رکھیں۔ گھر میں سیل نہ رہنے دیں۔ صفائی کا خاص خیال رکھیں اور صبح ہر حال میں گھر کے تمام افراد سورج طلوع ہونے سے پہلے بیدار ہو جائیں سارے معاملات خود بخود ٹھیک ہو جائیں گے۔
خواجہ شمس الدین عظیمی
جناب خواجہ شمس الدین عظیمی صاحب نے کالم نویسی کاآغاز1969میں روزنامہ حریت سے کیا ۔پہلے طبیعیات کے اوپر مضامین شائع ہوتے رہے پھر نفسیات اور مابعد نفسیات کے مضمون زیر بحث آ گئے۔ روزنامہ حریت کے قارئین نے سائیکالوجی اور پیراسائیکالوجی کے ان مضامین کو نہ صرف پسند کیا بلکہ اپنے مسائل کے حل کے لئے خطوط لکھنے شروع کر دیئے۔ زیادہ تر خطوط خواب سے متعلق ہوتے تھے۔ شروع کے دنوں میں ہفتہ میں تین یا چار خط موصول ہوتے تھے اور پھر یہ سلسلہ ہر ہفتہ سینکڑوں خطوط پر پھیل گیا۔ حریت کے بعد روزنامہ جسارت، روزنامہ اعلان، روزنامہ مشرق اور پھر روزنامہ جنگ میں روحانی ڈاک کے عنوان پر یہ کالم اتنا زیادہ مقبول ہوا کہ خطوط کی تعداد ہزاروں تک پہنچ گئی۔ جب اخبار کا دامن اتنی بڑی ڈاک کا متحمل نہ ہو سکا تو پیارے اور محترم دوستوں کے مشوروں اور تعاون سے روحانی ڈائجسٹ کا اجراء ہوا اور آج بھی روحانی ڈاک کے عنوان سے یہ کالم روحانی ڈائجسٹ میں شائع ہو رہا ہے۔
آپ نے ان اخبارات وجرائد میں عوام کے ان گنت معاشی، معاشرتی، نفسیاتی مسائل اورالجھنوں کا حل پیش کیا ہے اورمظاہرقدرت کے پیچیدہ معموں سے متعلق سوالات کے جوابات دئیے ہیں۔خواجہ شمس الدین عظیمی صاحب کے لائق شاگرد جناب میاں مشتاق احمد عظیمی نے روحانی ڈاک میں شائع شدہ ان خطوط کو یکجا کیا اورترتیب وتدوین کے مراحل سے گزارکر چارجلدوں پر مشتمل کتاب روحانی ڈاک کو عوام الناس کی خدمت کے لئے شائع کردیا۔
انتساب
ہر انسان کے اوپر روشنیوں کا ایک اور جسم ہے جو مادی گوشت پوست کے جسم کو متحرک رکھتا ہے۔ اگریہ روشنیوں کا جسم نہ ہو تو آدمی مر جاتا ہے اور مادی جسم مٹی کے ذرات میں تبدیل ہو کر مٹی بن جاتا ہے۔
جتنی بیماریاں، پریشانیاں اس دنیا میں موجود ہیں وہ سب روشنیوں کے اس جسم کے بیمار ہونے سے ہوتی ہیں۔ یہ جسم صحت مند ہوتا ہے آدمی بھی صحت مند رہتا ہے۔ اس جسم کی صحت مندی کے لئے بہترین نسخہ اللہ کا ذکر ہے۔
*****
