Spiritual Healing
س: تین سال قبل کمرشل ایریا میں چند پلاٹ خریدے تھے۔ ہم لوگ دو سال سے یہ پلاٹ فروخت کرنے کی کوشش کر رہے ہیں مگر کم سے کم قیمت پر بھی کوئی لینے کو تیار نہیں ہوتا۔ گاہک آتے ہیں۔ بات پکی ہو جاتی ہے لیکن سودا مکمل نہیں ہوتا۔ ایک دوصاحب تو ایڈوانس بھی چھوڑ گئے ہیں۔
ج: چار انچ لمبی لوہے کی ٹوپی دار کیلیں چار عدد خرید کر ان کے اوپر دم کریں۔ دم کرنے کا طریقہ یہ ہے:
ایک مرتبہ پوری سورہ قل ہو اللہ شریف پڑھ کر آنکھیں بند کر لیں اور سورج کا تصور کریں۔ سورج کا تصور قائم ہو جانے پر یہ خیال کریں کہ سورج آپ کی زبان کی نوک پر رکھا ہوا ہے۔ جب یہ خیال گہرا ہو جائے کیلوں کے اوپر پھونک مار دیں اور ان کیلوں کو پلاٹ کے چاروں کونوں میں گاڑھ دیں۔ کئی پلاٹ ہونے کی صورت میں ہر پلاٹ کے لئے چار کیلیں لینا ضروری ہیں۔ انشاء اللہ اس عمل سے مقصد میں کامیابی ہو جائے گی۔
خواجہ شمس الدین عظیمی
جناب خواجہ شمس الدین عظیمی صاحب نے کالم نویسی کاآغاز1969میں روزنامہ حریت سے کیا ۔پہلے طبیعیات کے اوپر مضامین شائع ہوتے رہے پھر نفسیات اور مابعد نفسیات کے مضمون زیر بحث آ گئے۔ روزنامہ حریت کے قارئین نے سائیکالوجی اور پیراسائیکالوجی کے ان مضامین کو نہ صرف پسند کیا بلکہ اپنے مسائل کے حل کے لئے خطوط لکھنے شروع کر دیئے۔ زیادہ تر خطوط خواب سے متعلق ہوتے تھے۔ شروع کے دنوں میں ہفتہ میں تین یا چار خط موصول ہوتے تھے اور پھر یہ سلسلہ ہر ہفتہ سینکڑوں خطوط پر پھیل گیا۔ حریت کے بعد روزنامہ جسارت، روزنامہ اعلان، روزنامہ مشرق اور پھر روزنامہ جنگ میں روحانی ڈاک کے عنوان پر یہ کالم اتنا زیادہ مقبول ہوا کہ خطوط کی تعداد ہزاروں تک پہنچ گئی۔ جب اخبار کا دامن اتنی بڑی ڈاک کا متحمل نہ ہو سکا تو پیارے اور محترم دوستوں کے مشوروں اور تعاون سے روحانی ڈائجسٹ کا اجراء ہوا اور آج بھی روحانی ڈاک کے عنوان سے یہ کالم روحانی ڈائجسٹ میں شائع ہو رہا ہے۔
آپ نے ان اخبارات وجرائد میں عوام کے ان گنت معاشی، معاشرتی، نفسیاتی مسائل اورالجھنوں کا حل پیش کیا ہے اورمظاہرقدرت کے پیچیدہ معموں سے متعلق سوالات کے جوابات دئیے ہیں۔خواجہ شمس الدین عظیمی صاحب کے لائق شاگرد جناب میاں مشتاق احمد عظیمی نے روحانی ڈاک میں شائع شدہ ان خطوط کو یکجا کیا اورترتیب وتدوین کے مراحل سے گزارکر چارجلدوں پر مشتمل کتاب روحانی ڈاک کو عوام الناس کی خدمت کے لئے شائع کردیا۔
انتساب
ہر انسان کے اوپر روشنیوں کا ایک اور جسم ہے جو مادی گوشت پوست کے جسم کو متحرک رکھتا ہے۔ اگریہ روشنیوں کا جسم نہ ہو تو آدمی مر جاتا ہے اور مادی جسم مٹی کے ذرات میں تبدیل ہو کر مٹی بن جاتا ہے۔
جتنی بیماریاں، پریشانیاں اس دنیا میں موجود ہیں وہ سب روشنیوں کے اس جسم کے بیمار ہونے سے ہوتی ہیں۔ یہ جسم صحت مند ہوتا ہے آدمی بھی صحت مند رہتا ہے۔ اس جسم کی صحت مندی کے لئے بہترین نسخہ اللہ کا ذکر ہے۔
*****
