Spiritual Healing
س: میری ناک اور کان بند ہو گئے ہیں۔ گردن اکڑ جاتی ہے۔ سر اور آنکھیں بھاری رہتی ہیں۔ کان میں سے سوں سوں کی آوازیں آتی ہیں۔ کسی کام میں دل نہیں لگتا۔ ڈاکٹر کہتے ہیں آپ کے دماغ کی ہر رگ میں نزلہ جم گیا ہے اور اب ڈاکٹروں نے علاج بند کر دیا ہے۔ کیونکہ دوائیں کھانے سے سینے میں تکلیف ہو جاتی ہے۔ دیکھنے میں ویسے تندرست لگتی ہوں۔ دس سال پہلے ٹائی فائیڈ ہوا تھا ،
جب ہی سے کسی نہ کسی بیماری میں مبتلا ہوں۔
ج: نزلہ جم جانے کا علاج یونانی طب سے بہت اچھا ہو جاتا ہے۔ کسی تجربہ کار حکیم سے پرہیز کے ساتھ علاج کرائیں۔ یونانی علاج کے ساتھ روحانی علاج بھی کریں۔
مومی کاغذ پر زردہ کے رنگ اور عرق گلاب سے بسم اللّٰہ الرحمٰن الرحیم ایک بار یا فارِقُ 9مرتبہ لکھ کر صبح، شام، رات پانی سے دھو کر پئیں۔ چالیس روز تک۔
خواجہ شمس الدین عظیمی
جناب خواجہ شمس الدین عظیمی صاحب نے کالم نویسی کاآغاز1969میں روزنامہ حریت سے کیا ۔پہلے طبیعیات کے اوپر مضامین شائع ہوتے رہے پھر نفسیات اور مابعد نفسیات کے مضمون زیر بحث آ گئے۔ روزنامہ حریت کے قارئین نے سائیکالوجی اور پیراسائیکالوجی کے ان مضامین کو نہ صرف پسند کیا بلکہ اپنے مسائل کے حل کے لئے خطوط لکھنے شروع کر دیئے۔ زیادہ تر خطوط خواب سے متعلق ہوتے تھے۔ شروع کے دنوں میں ہفتہ میں تین یا چار خط موصول ہوتے تھے اور پھر یہ سلسلہ ہر ہفتہ سینکڑوں خطوط پر پھیل گیا۔ حریت کے بعد روزنامہ جسارت، روزنامہ اعلان، روزنامہ مشرق اور پھر روزنامہ جنگ میں روحانی ڈاک کے عنوان پر یہ کالم اتنا زیادہ مقبول ہوا کہ خطوط کی تعداد ہزاروں تک پہنچ گئی۔ جب اخبار کا دامن اتنی بڑی ڈاک کا متحمل نہ ہو سکا تو پیارے اور محترم دوستوں کے مشوروں اور تعاون سے روحانی ڈائجسٹ کا اجراء ہوا اور آج بھی روحانی ڈاک کے عنوان سے یہ کالم روحانی ڈائجسٹ میں شائع ہو رہا ہے۔
آپ نے ان اخبارات وجرائد میں عوام کے ان گنت معاشی، معاشرتی، نفسیاتی مسائل اورالجھنوں کا حل پیش کیا ہے اورمظاہرقدرت کے پیچیدہ معموں سے متعلق سوالات کے جوابات دئیے ہیں۔خواجہ شمس الدین عظیمی صاحب کے لائق شاگرد جناب میاں مشتاق احمد عظیمی نے روحانی ڈاک میں شائع شدہ ان خطوط کو یکجا کیا اورترتیب وتدوین کے مراحل سے گزارکر چارجلدوں پر مشتمل کتاب روحانی ڈاک کو عوام الناس کی خدمت کے لئے شائع کردیا۔
انتساب
ہر انسان کے اوپر روشنیوں کا ایک اور جسم ہے جو مادی گوشت پوست کے جسم کو متحرک رکھتا ہے۔ اگریہ روشنیوں کا جسم نہ ہو تو آدمی مر جاتا ہے اور مادی جسم مٹی کے ذرات میں تبدیل ہو کر مٹی بن جاتا ہے۔
جتنی بیماریاں، پریشانیاں اس دنیا میں موجود ہیں وہ سب روشنیوں کے اس جسم کے بیمار ہونے سے ہوتی ہیں۔ یہ جسم صحت مند ہوتا ہے آدمی بھی صحت مند رہتا ہے۔ اس جسم کی صحت مندی کے لئے بہترین نسخہ اللہ کا ذکر ہے۔
*****
