Topics

Duniya O Akhirat

quran pak mein Allah Taala ne apne mehboob o maqarrab bundon ki khususiyaat ke zimn mein aik baat yeh batayi hai ke raton ko un ki peethein bistaron se allag rehti hain aur bedaar reh kar apne rab ki taraf mutwajjah rehtay hain, is se siraat mustaqeem par chalne ki duayen mangte hain, is ke fazl ka sawal karte hain, ruku o sujood mein masroof rehtay hain.
Huzoor nabi kareem s.a.w se bhi Allah Taala ne yahi irshad farmaya ke :
‘‘ Ae ourh lapait kar sonay walay! Raat ko qiyam kya karo magar kam, aadhi raat ya is se kuch kam kar lo ya is se kuch ziyada barha do aur quran ko khoob thehr thehr kar parho, hum tum par aik bhaari kalaam nazil karne walay hain.’‘ ( Surah Muzammil )

Raat ke is qiyam ki wajah Allah Taala ne khud yeh batayi hai ke :
‘‘ dar haqeeqat raat ka uthna nafs par qaboo panay ke liye bohat kargar aur quran padhany ke liye ziyada mozoon hai.’‘ ( Surah Muzammil )

Un ehkamaat ki roshni mein nabi s.a.w ka mamool tha ke aap awwal shab aaraam farmatay thay aur raat ke pichlle pehar ibadat mein mashgool ho jatay thay. Yahi ibadat aur neend ke behtareen auqaat hain. Aam halaat mein raat gaye tak jaagne aur dosray waqton mein neend poori karne se asaab be cheeni ka shikaar ho jatay hain. Fitrat ke nizaam mein raat ka pehla hissa aaraam aur sukoon ke liye, pichla pehar ibadat aur yaksoi ke husool ke liye aur din ka waqt husool muaash aur doosri masrofiyat ke liye muqarrar hai. Allah Taala ka irshad hai :

‘‘ Aur hum ne neend ko tumahray liye sukoon o aaraam, raat ko parda posh aur din ko rozi ke liye daud dhoop ka waqt banaya hai.’‘
( Surah Alnisaa )

Neend aur baydaari ke muamlay mein aitdaal ki rawish ikhtiyar karni chahiye. Nah itna ziyada sona chahiye ke jism par kahili sawaar ho jaye aur dimaghi feal sust par jaye aur nah itna kam sona chahiye ke dimaghi thakan poori terhan rafa nah ho. Hazrat abdullah ibn umar se aik baar Huzoor Akram  s.a.w ne poocha '

Kya yeh baat sahih hai ke tum rozana din mein rozay rakhtay ho aur raat raat bhar namaz mein guzartay ho? Hazrat abdullah ne kaha' jee haan. Yeh baat durust hai. Huzoor s.a.w ne farmaya' nahi aisa nah karo, kabhi roza rakho aur kabhi khao piyo. Isi terhan suo bhi aur uth kar namaz bhi qaim karo. Kyunkay tumahray jism ka bhi tum par haq hai, tumhari aankh ka bhi tum par haq hai.

‘‘ Kya un logon ne yeh nahi dekha ke hum ne raat banai taa ke yeh aaraam o sukoon haasil karen aur din ko roshan, bilashuba is mein mominon ke liye sochnay ke asharaat hain.’‘ ( Surah Namal )

Hazrat akram s.a.w sonay ke liye tashreef le jatay to wudu karte aur letnay se pehlay quran pak ke kisi hissa ki tilawat farmatay. Bistar mein letnay se pehlay aksar yeh dua karte thay :

‘‘ Ae mere rab! Tairay hi naam se mein ne apna pehlu bistar par rakha aur tairay hi saharay mein is ko bistar se uthaoun ga. Agar to raat hi mein meri jaan qabz kere to is par reham farma aur agar to usay chore kar mazeed mohlat day to is ki hifazat farma jis terhan to apne naik bundon ki hifazat karta hai.’‘

Kabhi Aap s.a.w yeh dua farmatay :

‘‘ shukar o tareef Khuda hi ke liye hai jis ne hamein khilaya pilaya aur jis ne hamaray kamon mein bharpoor madad farmai aur jis ne hamein rehne basnay ka thikana bakhsha. Kitney hi log hain jin ka nah koi moueen o madadgaar hai aur nah koi thikana dainay wala.’‘

Hazrat? Naram aur mulaem bistar istemaal nahi karte thay. Aap s.a.w ka bistar chamray ka tha jis mein khajoor ki chhaal bhari hui thi. Hazrat hifsa ka bayan hai ke mere haan Aap s.a.w ka bistar aik taat tha jis ko dohra kar ke hum Huzoor s.a.w ke neechay bichaa diya karte thay. Kabhi kabhi chitaai par bhi aaraam farmatay thay. Aap s.a.w ne kabhi bhi khawab gaah ke liye ya aaraam karne ke liye qeemti aur naram samaan istemaal nahi kya.

Nabi kareem s.a.w chitaai par so rahay thay. Chitaai par letnay ki wajah se Aap s.a.w ke jism par nishanaat par gaye thay. Hazrat abdullah ibn masood farmatay hain.’‘ mein yeh dekh kar ronay laga. Huzoor Akram  s.a.w ne mujhe rota dekh kar wajah daryaft farmai. Mein ne arz kya ya Rasool Allah ! Yeh qaisar o kasri to resham aur makhmal ke gaddon par soyen aur aap boriye par ?’‘

Huzoor s.a.w ne irshad farmaya.’‘ yeh ronay ki baat nahi hai. Un ke liye duniya hai aur hamaray liye akhirat hai.’‘

Nabi kareem s.a.w sonay se pehlay zaroori cheeze apne sarahnay rakh liya karte thay. Aap s.a.w ka irshad tha ke sonay se pehlay ghar ki tamam cheezon ka achi terhan jaiza le liya karo, khanay peenay ke bartan dhaank do aur aag jal rahi ho to usay bujha do.

Pyare nabi s.a.w jab bistar par tashreef le jatay to dono haath dua mangnay ki terhan milatay aur Surah ikhlaas, Surah Alfalq aur Surah Al naas tilawat farma kar hathon par dam farmatay aur phir jahan tak haath pohanchana apne jism mubarak par phair letay aur yeh amal teen martaba karte. Huzoor Akram  s.a.w dayen rukhsaar ke neechay haath rakh kar dayen karvat laytna pasand farmatay thay. Aur sonay se pehlay bistar ko achi terhan jhaad letay thay. Raat ke pichlle pehar jald se jald bedaar ho kar ibadat mein masroof rehtay thay. Kabhi is se bhi pehlay bedaar ho jatay thay aur kabhi to poori raat ibadat mein masroof rehtay thay. 

Topics

Tajaliyat - Roman View

Tajaliyat - Roman

KHWAJA SHAMS-UD-DIN AZEEMI

UN SCINCEDANO KE NAAM

JO 15VEEN SADDI HIJIRI MEIN

MOJOODA SCINCE KA

AKHRI UROOJ DUNIYA

KI TABAHI DHEKH KAR

EK WAHID ZAAT

KHALIQ KAINAAT

ALLAH KI TAJALI KA

IRFAN HASIL KAR LEINGE