NABOWAT K BARWEN SAAL

Nabowat k barwen saal Yasrab se aaney waly logon mein se 75 afraad ne Islam qabool kiya aur Islam k liye jaan o maal qurbaan karny k ehad ko duhraya.

Jab ye musalmaan Makkah pohnch gaye to dar pardah Syedena Huzoor Aleh saalato Wasalam k sath rabta kiya aur aakhir kaar is baat par ittefaaq ho gaya k dono fareeq Mana mein Aqb k paas jo ghati hey is mein jama hon aur ye ijtema raat ki tareeki mein khufiya tareeqe par ho.

Is ijtema k ahwaal Ansaar k aik Quaid Hazrat Kaab Bin Malik r.a is tarha farmaty hain:

“Hum log Haj k liye nikly Huzoor Aleh saalato Wasalam se Aqba mein mulaqaat tey howi aur bal akhir wo raat aagai jis mein Huzoor Aleh saalato Wasalam se mulaqaat tey thi. Hamarey sath hamarey aik mauziz sardaar Abdulallah Bin Umro Bin Haraam bhi the(jo abhi Islam nahi laye the) hum ne Abdullah Bin Umro Bin Haraam se kaha k

“Ay Abu Jabir! Aap hamarey aik mauziz aur shareef sarbarah hain aur hum aap ko aap k mojodah halaat se nikalna chahtey hain ta k aap gumrah na ho jayen. Is k baad hum ne inhen Islam ki dawat di aur bataya k aaj Aqba mein Huzoor Aleh saalato Wasalam se hamari mulaqaat hey. Abdullah Bin Haraam ne Islam qabool kar liya aur hamarey sath Aqba tashreef le gaye aur Naqeeb bhi muqarrar howy.

Hum log hasb e dastoor is raat apni qoam k hamrah apney khemon mein soye lekin jab tehai raat guzar gai to apney khemon se nikal kar Huzoor Aleh saalato Wasalam k sath tey shudah muqaam par pohnch gaye.

Hum sab 75 admi the, 73 mard aur 2 aurten. Aurton mein aik Ume Ammarah r.a Naseeba Bint e Kaab thien jo qabeela Bano Maazan Bin Najaar se talluq rakhti thien aur dosri Asma Bint Umro thien jin ka talluq qabeela Bano Salma se tha.

Hum sab ghati mein jama ho kar Huzoor Aleh saalato Wasalam ka intezaar karny lagy aur akhir wo lamha aagaya jab Huzoor Aleh saalato Wasalam tashreef laye. Huzoor Aleh saalato Wasalam k sath aap k chacha Hazrat Abbas r.a Bin Abdul Muttalib bhi the. Wo agarchey  abhi tak apni qoam k Deen par hi the magar chahtey the k apney bhatije k mamle mein mojood rahen.

Majlis mukammal ho gayi to Deen aur fouj tawon ko kattai aur akhri shakal deny k liye guftugu ka aghaaz howa. Huzoor Aleh saalato Wasalam k chacha Hazrat Abbas r.a ne farmaya:

“Khazraj k logo! Hazrat Muhammad (alhe saalato wassalaam) ko jo hesiyat maloom hey. hamari qoam k wo log jo Deeni nuqta-e-nazar se hum se muttafiq nahi hain, hum ne Muhammad (alhe saalato wassalaam) ko in se mehfoz rakha hey. wo apni qoam aur apney shehar mein qowat o izzat aur taqat o hifazat k sath tashreef rakhtey hain. Magar ab tumhare yahan aana chahtey hain.

Lehaza agar tumhara ye khayal hey k tum inhen jis maqsad k liye bula rahe ho isy pura karo ge aur Hazrat Muhammad (alhe saalato wassalaam) mukhalfeen se mehfoz rahen ge tab to theek hey. lekin agar tum inhen apney paas le jany k baad in ka sath chor do ge to phir abhi se inhen chor do q k wo apni qoam aur apney shehar mein beharhaal hifazat se hain.”

Hazrat Kaab r.a kehtey hain k hum ne Hazrat Abbas r.a se kaha:

“Aap ki baat hum ne sun li. Ab Ay Allah k rasool Aleh saalato wassalaam! Aap guftugu farmayen aur Huzoor Aleh saalato Wasalam hum se jo ehad o pemaan chahen kar len, hum hazir hain.”

Is k baad Syedena Huzoor Aleh saalato wassalam ne guftugu farmai. Huzoor Aleh saalato Wasalam ne phele Quraan ki tilawat ki aur Islam ki dawat di.

 

Bait Ki Dafaat:

Bait Aqba ka waqiya Imam Ahmed r.a ne tafseel k sath riwayat kiya hey. Hazrat Jabir r.a k biyaan hey. “Hum ne arz kiya: “Aye Allah k Rasool Aleh saalato wassalaam!

Hum Huzoor Aleh saalato Wasalam se kis baat par bait Karen.”

Huzoor Aleh saalato Wasalam ne farmaya:

“Is baat par k

•         Har haal mein baat suno ge aur mano ge.

•         Tangi aur khushaali har haal mein maal kharch karo ge.

•         Bhalai ka hukum do ge, burai se ruko ge.

•         Allah Tala ki rah mein uth kharey hoge aur Allah Tala k mamle mein kisi malamat ki parwah nahi karo ge.

•         Jab mein tumhare paas aajaon ga to meri madad karo ge aur jis tarha se apni jaan aur apney baal bachon ki hifazat karty ho is tarha meri bhi hifazat karo ge.

“Aur tumhare liye Jannat hey.”

        Barah Naqeeb:

       Bait mukammal ho chuki to Huzoor Aleh saalato Wasalam ne ye tajweez rakhi k barah sarbarah muntakhib kar liye jayen jo apni qoam k naqeeb hon aur is bait ki dafaat par amal dar amad k liye apni apni qoam k mamlaat k zimahdaar hon. Huzoor Aleh saalato Wasalam k is irshaad par foran hi naqeebon ka intekhaab amal mein agaya. 79 naqeeb Khazraj se muntakhib kiye gaye aur 73 naqeeb Oos se. jab in naqab ka intekhaab ho chukka to in se naqeeb aur sardaar hony ki hasiyat se Huzoor Aleh saalato Wasalam ne aik aur ehad liya.

Huzoor Aleh saalato Wasalam ne farmaya:

“Aap log apni qoam k kafail hain, jaise hawari Hazrat Essa a.s ki janib se kafail the aur mein apni qoam yani musalmano ka kafail hon.”

In sab ne kaha”Ji han.”

Shetaan Ki Fitna Angezi:

Mukammal muhaidah howa hi tha k shetaan ko is ka pata lag gaya. Shetaan ko is ki khabar bilkul akhri lamhaat mein howi thi aur shetaan k paas itna muqa nahi tha k ye khabar chupke se Quraish ko pohncha di jaye aur wo is ijtema k shurka par hamla kar den. Isi liye shetaan ne aik onchi jagah kharey ho kar nehayat buland awaaz se pukara!

“Kheme walon! Muhammad Aleh saalato Wasalam ko dekho is waqt be Deen is k sath hain aur tum se larney k liye jama hain.”

Huzoor Aleh saalato Wasalam ne farmaya: “Ye is ghati ka shetaan hey.”

Is k baad Huzoor Aleh saalato Wasalam ne logon se farmaya k wo apney apny ghar chale jayen.

Quraish Ka Ehtijaj:

Ye khabar Quraish tak pohnchi to khoraam mach gaya. Q k is bait k jo nataij martab ho sakty the is ka inhen achi tarha andaza tha. Chunacha subah hoty hi Quraish k aik wafad ne is muhaidey k khilaaf sakht ehtijaj kiya:

“Khazraj k logo! Hamey maloom howa hey k Aap log Muhammad (alhe saalato wassalaam) ko le jana chahte hain aur hum se jang karny k liye in k hath par bait kar rahe hain. Halan k koi Arab qabeela aisa nahi hey jis se jang karna hamarey liye itna ziyadah nagawaar ho jitna aap hazraat se hey.”

Qabeela Khazraj k degar log is bait k barey mein kuch nahi jante the q k ye mukammal raazdari k sath raat ki tareeki mein howi thi. Inhon ne jawab diya “Aisi koi baat hamarey ilm mein nahi hey.”

Kuffaar Ka Taqub:

Quraish is muhaide k barey mein mutafakkar the bal akhir inhen maloom hogaya k bait ki khabar sahi hey. lekin inhen bait ki tasdeeq is waqt howi jab hajaj apney apny watan rawana ho chuky the. Quraish ne taiz raftaari k sath ahle Madina ka peecha kiya lekin muqa nikal chukka tha. Albatta Hazrat Saad r.a Bin Ibadah ko inhon ne pakar liya aur Makkah le gaye. Pury raaste inhen mukhtalif aziyaten dety rahe. Lekin baad mein Jabeer Bin Matam aur Haris Bin Amiya ne akar inhen chura diya. 

HIJRAT-E-MADINA

Hijrat ka matalb hey ke sab kuch chor kar jaan bacha li jaye. Chunacha musalmaan maal o mata chor kar Makkah se Madina chaley gaye.

Hazrat Ayesha r.a farmati hain ke Huzoor  Aleh saalato Wasalam ne farmaya:

“Mujhe tumhara muqaam-e-hijrat dikhaya gaya hey ye do pahariyon ke darmiyaan waqiya aik nakhlistaan ilaqa hey.”

Madina Ka Mehal e Waqo:

Madina bulandi par waqiya hey is ke shumaal aur junoob mein do pahaar hain. Madina ke teen taraf yani mashriq, maghrib aur junoob mein manjamid shuda atish fisah phela howa hey.

Makkah mukarrama se Madina Munawara 277 mile (445 kilo metre) ke fasley par waqiya hey. is ke shumaal mein Jible Uhad aur junoob mein Jible Aer waqiya hain. Mashriqi janib Harah o Aqam aur maghribi janib Hara-ul-Wabar hey. shehar Madina paharon ke darmiyan aik wasi mastateel hey. ye ilaqa intehai zarghaiz aur shadaab hey. Aab o hawa matadal aur khushgawaar hey aur pani halka aur sheeren hey. wahan Jazeera tul Arab ke dusre ilaqon ki nisbat barishen ziyadah hoti hain. Madina ke junoob mashriq aur shumaal mashriq mein khajoor ke ghany baghaat the. Sahil samandar se ziyadah fasla nahi. Yaman aur Shaam ke darmiyan ki qadeem tijarti shahrah Imam-ul-Mubeen yahin se ho kar guzarti thi. Jof-e-Madina mein paanch zarghaiz wadiyan thien.

1.     Mazinaib     2. Meharwar      3. Zaanona  4. Bathaan   5. Qanata

Wadiyon ke sath choti choti bastiyon ka silsila door tak phela howa tha. Ye bastiyan aik dusrey se thore thore fasle par waqiya thien. Bastiyon ke is majmoye ko Yasrab kaha jata tha.