Topics

Baab 4 Tabligh e Islam


Huzoor alhe saalato wassalaam par emaan laney wali pehli khatoon in ki begum

Hazrat Khadija(r.a) thin aur is ke baad in ke chaccha ke betey Hazrat Ali(r.a) Ibn Abi Talib(r.a) musalmaan hoye. Jinhen Huzoor alhe saalato wassalaam ne apni aulaad ki tarha paala tha. Teesrey musalmaan Huzoor alhe saalato wassalaam ke ghulam Zaid(r.a) the. Jinhe Huzoor alhe saalato wassalaam ne azaad kardia tha lekin wo apne waledain ke paas janey par raza mand nahi hoye aur unhon ne kaha:

“ Main Huzoor alhe saalato wassalaam ko apne maa baap se ziyadah aziz rakhta   

  hon.”

Teen saal ki mudad tak Hazrat Khadija(r.a), Hazrat Ali(r.a), Hazrat Zaid(r.a) ke baad koi aur sakhs Huzoor alhe saalato wassalaam par emaan laney par amaada na hoa. Jab Hazrat Abu Bakar(r.a) musalmaan ho gaye to musalmaan ki tadaad chaar hogai.

Tarz-e-Taleem:

Huzoor alhe saalato wassalaam ka qaida tha k Quran ki jo ayatein Huzoor alhe saalato wassalaam par nazil hoti thin wo muslamaanon ko yaad kara detey the. Jo loog musalmaan nahi hoye the in ko wo ayatein parh kar sunatey the.

Tareeqa ye tha ke pehley Allah talah ki tareef aur is ki qurbat ka zikar farmate the, Allah talah ki izzat o jaalaal aur sifaat ko biyaan farmate the. Is paighaam ka aik aik lafz aisa tha jo kuffaar ko mukhalifat ke bawajood mutaassir kar deta tha.

Aghaz-e-Namaz:

Allah talah ke ehkaam main sab se pehley Namaz farz hoi. Hazrat Jibrael(a.s) Huzoor sallallahu alaihi wasallam ko “Aqba” pahaar ke peeche waadi main le gaye. Wahan Hazrat Jibrael(a.s) ne khud wuzo kar ke Huzoor alhe saalato wassalaam ko wuzo ka tareeqa bataya aur Namaz ke tareeqa ki taleem di.

Aik rooz Huzoor alhe saalato wassalaam aur Hazrat Ali(r.a) Namaz qaim kar rahe the. Wahan Huzoor alhe saalato wassalaam ke chaccha Abu Talib ponhach gaye. Wo Huzoor alhe saalato wassalaam aur Hazrat Ali(r.a) ko Namaz qaim karte hoye dekhte rahe. Jab Huzoor alhe saalato wassalaam ne Namaz puri karli to hazrat Abu Talib ne pocha: “Tum kia kar rahe the?”

Huzoor alhe saalato wassalaam ne farmaya:

“Allah talah ne mujhe rasool bana kar bheja he, buth parasti se mana farmaya he aur apni ibadat karna farz kia he. Namaz ada karney ka yahi tareeqa he. Aye chaccha! Ap bhi Allah talah ke is deen ko qabool kar len aur is azeem usshan kaam kaam main meri madad karen.”

 

 

Hazrat Abu Talib ne kaha ke

“ Aye mery aziz! Tum itmenaan ke sath deen ki tabligh karte raho. Main har tarha tumhari madad karon ga. Allah talah tumhari hifazat farmaye.”

Hazrat Abu Talib ne Hazrat Ali(r.a) se kaha:

“ Beta ! Muhammad (alhe saalato wassalaam) kabhi tumhare liye bura nahi chahen ge, Muhammad(alhe saalato wassalaam) jo kahen in ki baat par amal karo.”

Dawat:

Taqreeban teen saal tak islam ki dawat aala ul elaan nahi hoi. Jo sakhs khud musalmaan hone ki khuwahish karta Huzoor alhe saalato wassalaam usy kalma parha kar musalmaan kar letey the. Jo sakhs shouq zahir karta is ko quran sunatey. Jo banda musalmaan ho jata is ko Quran kareem ki ayatein yaad kara detey  they aur unhen Islam ki taleem detey the.Baasat ke teesrey saal ye ayaat nazil hoin.

“So Aap ko jis baat ka hukum kia gaya is ko saaf saaf suna dijye aur mushrikeen ki parwa na kijye.” ( Surat Ul Hijar Ayat-94)

“Aur apne qareebi rishte doron ko daraiyye aur in logon ke sath aajizi se paish aye jo Islam main dakhil hokar Aap ki raah par chalen.”( Surat As-shura Ayat- 214 - 215)

In ayaat ke nazool ke baad Huzoor alhe saalato wassalaam ne elania tabligh shuro kardi. Huzoor alhe saalato wassalaam ne Quraish ko madou kia aur farmaya:

“Allah talah aik hain. Wahda La Shareek hain.”

Sab rishte daron, chaccha aur inki aulaad aur inke risht daron ko mukhatib kar ke farmaya:

“ Har sakhs ki nijaat emaan aur is ke amaal-e-saleh par muqoof he. Koi ye na samjhe      

   ke hum Rasool sallallahu alaihi wasallam ke rishte daar hain.”

 

Himayat-e-Islam:

Jab Huzoor alhe saalato wassalaam ne bootun ki pur satish se mana farmaya to kuffaar ne dushmani shuro kardi aur sab Huzoor alhe saalato wassalaam ke dushman ban gaye. In halaat main Hazrat Abu Talib ne Huzoor sallallahu alaihi wasallam ki himayat ka elaan kar dia. Hazrat Abu Talib Makkah main itni bari shakhsiat the k in ke muqable main kisi ko aney ki himmat nahi thi is liye mushrikeen Makkah shaded mukhalifat ke bawajood kuch nahi kar sakey aur Huzoor alhe saalato wassalaam ne tabligh ka silsila jari rakha. Ye dekh kar mushrikeen Makkah ghez-o-ghazab main bhar gaye aur mashwara kar ke sab Hazrat Abu Talib ke paas aye. Unhon ne kaha:

“ Aap ke bhajitey hamarey khudaon ko bura kehtey hain, hamarey aqaid ko bura kehtey hain. Muhammad(sallallahu alaihi wasallam) ne hamarey abao ajdaad ko gumrah kaha he. Aap apne bhatijey ko in baton se rokein ya in ki himayat se dastabardaar hojaen.”

Hazrat Abu Talib ne in logon ko narmi se samjha kar rukhsat kardia.

Huzoor alhe saalato wassalaam apne kaam main mashghool rahe aur Quran Pak ki taleemaat logon ko elaania sunatey rahy. Huzoor alhe saalato wassalaam ki tabligh se buhat log Islam main dakhil hogaye. Kuffaar ne jab ye dekha ke Islam rooz barooz phail raha he to inhe be chaini laahaq hoi aur Quraish ke har majma main Huzoor alhe saalato wassalaam ka zikar honey laga. Akhir sab mil kar phir Hazrat Abu Talib ke paas aye.

Mushrikeen Makkah ne kaha:

“ Aye Abu Talib! Aap umar main hum se barey hain, Aap ka martaba bhi hum se ziyada he. Hum sab Aap ki khidmat main hazir hoye hain, pehley bhi hazir hoye the hum ne Aap se darkhuwast kit hi ke apne bhatijey ko Islam ki tabligh se rokein lekin is silsiley main Aap ne kuch nahi kia, ab hum se sabar nahi hota aur hum is baat ko bardasht nahi kar saktey ke Muhammad (sallallahu alaihi wasallam) hamarey aqaeed ko bura kahen. Aap apne bhatijey ko rokein ya phir hum in ke sath jang karein gey.”

Dhamki dey kar mushrikeen Makkah ghussey main uth kar chaley gaye.

Hazrat Abu Talib ye surat-e-haal dekh kar buhat pareshan hoye, in ko ye baat shaaq guzri ke qoum naraz ho gai he aur dushmani par aamaada he. Hazrat Abu Talib ne Huzoor alhe saalato wassalaam ko bulaya aur Aap se kaha:

“ Aye Muhammad (alhe saalato wassalaam) tumhari qoum jama ho kar merey paas ai thi aur qoum ne tumharey barey main nazeeba guftugu ki he, tum mujh par aur apne upar reham karo, mujh par aisa boojh na dalo jo meri bardasht se bahir ho.”

Huzoor alhe saalato wassalaam ne apne chaccha se farmaya:

“ Agar ye log merey daien hath par suraj aur baien hath par chand rakh dein aur chahen ke main Allah talah ke ehkaam ki tabligh chor don to ye mumkin nahi, do surtain hain ye to Allah ki Towheed ka ghalba hoga, bout parasti khatam hogi aur ehkaam-e-Elahi jari hon gey ya main dunya main nahi rahon ga.”

Huzoor alhe saalato wassalaam ne jab ye guftugo farmai to ankhon se anso jari hogaye aur Huzoor alhe saalato wassalaam wahan se tashreef le gaye.

Hazrat Abu Talib par Huzoor alhe saalato wassalaam ki istiqamat aur yaqeen e kamil ka bohat ziyada asar howa. Hazrat Abu Talib ne Huzoor alhe saalato wassalaam ko bulaya aur farmaya:

“Ay azeez! Ay mery bhatije! Jo tumhara dil chahey karo aur logon se biyan karo. Me kisi halat me tumhe dushmano k hawaly nahi karon ga.”

Mansooba:

Kuffaar Makkah ko jab yaqeen hogaya k Hazrat Abu Talib Huzoor alhe saalato wassalaam ki himayat se dasbardaar nahi honge to inhon ne aik mansoba banaya. Wo log Ammara Bin Waleed ko sath le kar Hazrat Abu Talib k paas aye. Inhon ne kaha:

“Ay Abu Talib! Hum tumhary paas Ammara Bin Waleed ko laye hain, ye Quraish me sab se ziyada aqalmand hain. Ye tumhara beta hoga aur zindagi k har mamle me tumhara dost o baaz o sabit hoga. Tum apny bhatije Muhammad (sallallahu alaihi wasallam) ko hamary hawaly kar do aur Ammara ko hum tumhary supurd kar den gen.”

Hazrat Abu Talib ne kaha:

“Ye batareen soda he, tum hamey apna larka dety ho k hum isy khilayen pilayen aur mera larka mangty ho k tum isy qatal kar do. Ye insaaf nahi he jurm he. tum hamey zaleel karna chahty ho, tum yahan se chaly jao aur tumhary dil me jo aye karo.”

Is k baad Quraish ne mashwara kar k tey kiya k jin logon ne Islam qabool kiya he inhen saza deni chahiye ta k wo log Islam chor den aur wapis apny deen me aajayen. Ye zalimana tajweez musalmanon k liye bari musibat aur azmaish thi. Is waqt musalmanon ko bari takleef pohnchi. Chikh o pukaar aura ho buka se Makkah ki zameen laraz gai.

Jab Hazrat Abu Talib ne Kuffaar ki zulm amaiz shararaton ko dekha to Huzoor alhe saalato wassalaam ki himayat k liye Bano Hashim aur Bani Matlab ko dawat di sab jama hogaye. Abu Lehab is majlis me shareek nahi howa. Hazrat Abu Talib ne apny khandaan ko aik jagah jama hony par khushi ka izhar farmaya aur kaha:

“Quraish agar bohat saari taqat bhi jama kar len to bhi wo Bani Hashim ka kuch nahi bigaar sakty.”

Aik taraf ye mansoby ban rahy the aur dusri taraf Kuffaar e Makkah Huzoor alhe saalato wassalaam k qatal k mansoby bana rahe the. Bar bar Hazrat Abu Talib k paas aty the, apas me mashwary karty aur musalmano ko aziyaten dety the. Magar Huzoor alhe saalato wassalaam deen me masroof rahe aur Quran Paak ki ayaten logon ko sunaty rahe the. Allah Tala ki Khalqiyat is ki Razzaqi aur Izzat o Jalal ko biyan farmaty the. Namaz k jo ehkaam A chuky the is k ada karny ka tareeqa bataty the. Gunahon ki buraiyan biyan farmaty the. Huzoor alhe saalato wassalaam ki taleem me ye asar the k jo aadmi musalmaan hojata tha wo buraiyon se paak hojata tha. Wo emaan me kamil aur sabar o isteqamat ka pahaar ban jata tha.

Quran e Kareem ki ayaten jin me Allah Tala ki Hamd o Sana biyan howi he, jo suntan tha mutasir ho jata tha. Allah Tala k fazal o karam se Islam rozana taraqqi kar raha tha. Har ghar me Islam ka charcha tha. Mukhalfeen shiddat se mukhalfat kar rahe the. Magar wo heraan the k in k gharon ki aurten in k jawan bacche aur samajhdaar log jab Quran e Kareem sunty hain to phir koi khof aur koi lalach in ko Islam qabool karny se nahi rokta.

Rehmat Ka Darwaza:

Aik martaba mushriqeen ne kaha “Agar tum hamary liye Koh-e-Sifa ko sony ka bana do to hum tum par emaan le ayen gen.”

“Kiya waqai?” Huzoor alhe saalato wassalaam ne pocha

  “Han, yaqeenan.” Sab ne yaqeen dilaya.

Huzoor alhe saalato wassalaam ne jab dua karny ka irada farmaya to Hazrat Jibrail a.s Ameen nazil howy aur arz kiya “Ya Rasool Allah(alhe saalato wassalaam)! Allah Tala Aap ko salaam khety hain aur farmaty hain k agar aap ki khuwahish ho to Sifa ki pahari soona ban jaye gi, lekin agar is k bawajood ye log emaan na laye to phir in k liye toba o rehmat ka darwaza band ho jaye ga aur me in ko aisa azaab don ga k puri kainaat me aisa azaab kisi ko na mila hoga.”

Huzoor alhe saalato wassalaam apni qoam ki hat dharma se waqif the. Is liye Huzoor alhe saalato wassalaam ne dua nahi farmai aur Jibrail a.s Ameen ko jawab diya k Koh-e-Sifa beshak soona na bany lekin in k liye toba o rehmat ka darwaza hamesha khula rakha jaye.

Parliment House:

Isi doraan Haj ka mausam agaya. Quraish ko ye fikar daman geer howi k Arab k wafood k samny Huzoor alhe saalato wassalaam naye deen ki tabligh zaroor Karen gen. lehaza is k toor k liye phele hi iqdamaat kar liye jayen. Is maqsad k liye wo “ Dar-ul-Nadwah” me jama hoye.

Dar-ul-Nadwah Quraish ka parliament house tha. Ye Kaba k pehlo me aik zee shaan mehal tha. Quraish jab kisi eham aur khas kaam ko shuru karna chahty the to isi mehal me jama ho kar sulah o mashwara karty the.

Waleed Bin Mughira ki sardaari me gaft o shanaid howi. Kisi ne kaha k pagal mashoor kar diya jaye, kisi ne mashwara diya k kaahan k naam se shurat di jaye. Kisi ne kaha shaair kaha jaye lekin Waleed Bin Mughira kisi baat se muttafiq nahi howa. Bal akhir logon ne is se pocha, tumhari raye kiya he?

Waleed Bin Mughira ne kaha: “Muhammad (alhe saalato wassalaam) ko jadu gar mashoor kar diya jaye.”

Tey paya k Makkah k tamaam raaston par apny aadmi bitha diye jayen ta k atraaf e aalam se jo log Haj k liye aayen in ko ye bataya jaye k yahan aik jadu gar he jo apny kalaam se baap bety aur khawand biwi me aur rishtedaron me tafreeq dalta he. lehaza log is k paas na jayen.

Quran e Kareem ne is majlis ka tazkara in alfaaz me kiya he:

“Is ne socha aur kuch baat banany ki koshish ki. Han khuda ki maar is par kaisi baat banany ki koshish ki. Phir palta aur takabbur me parh gaya. Akhir kaar bola k ye kuch nahi he magar aik jadu he jo phele se chala A raha he, ye to aik insaani kalaam he.” ( Surat Al-Mudassir Ayat-18-25)

Is kaam me sab se ziyada pesh pesh Abu Lehab tha. Wo mohallon aur bazaron me Huzoor alhe saalato wassalaam k peche peche chalta tha. Jahan Huzoor alhe saalato wassalaam tabligh karty the, Abu Lehab chikh chikh kar kehta tha is ki baat na suno. Log jab Haj se wapis howe to in k ilm me ye baat A chuki thi Huzoor alhe saalato wassalaam ne nabowat ka elaan farmaya he, is tarha pury arab aur qarb o jawaar me Huzoor alhe saalato wassalaam ka charcha ho gaya aur kuffaar ki tadbeer ulat gayi.

Zeerak Sardar:

Kuffar ne jab ye dekha ke in ki tadbeerain na kaam ho rahi hain aur Huzoor alhe saalato wassalaam ki dawat aam ho rahi he aur ziyaddah se ziyaddah log Islam ki talemaat se waqif ho rahey hain to inhon ne mashwara kar ke Makkah ke sab se chalaak aur zerak sardar Atba Bin Rabia ko Huzoor alhe saalato wassalaam ke paas bheja ke wo Huzoor alhe saalato wassalaam ko dunyawi lalach dey kar tabligh-e-deen se rookney ki koshish karey.

Atba ne Huzoor alhe saalato wassalaam se kaha,

“ Bhatijey tum hasb-o-nasb main hum se behter ho. Tum ne hamarey abaao ajdaad ke tareeqey ko batil qaarar diya he aur inhe jahil kaha he. Aj mujhe tum apne dil ki baat batado ke tum kya chahte ho?

Agar tum doolat ke liye ye sab kar rahey ho to hum tumharey liye itna soona chandi jama karden ge ke tum Ehl-e-Makkah main sab se ziyadah maal daar ho jao ge.

Agar sadari chahte ho tu hum is par raazi hain ke tumhe Quraish ka sardar bana den.

Agar tum shadi ke khuwahish mand ho to Makkah ki sab se khubsoorat larki ko tumhari dulhan bana den ge aur agar ye sab nahi he aur tum kisi jin ya mawrai taaqat ke zer-e-asar ho jis ki batain tum logon ko sunatey ho aur is se chutkaara paney se ajiz ho to hum tumharey ilaj ke liye haziq tabeeb talash kartey hain takey wo tumhara ilaj karey aur tum sehat mand hojao ge.”

Atba ke taweel lecture ke baad Huzoor alhe saalato wassalaam ne jawab main Surat Ham meem As Sadja ki tilawat ki.

“Ham meem- ye khudaye Rehman aur Raheem ki taraf se nazil karda cheez he, aik aisi kitaab jis ki ayaat khoob khool kar biyan ki gaien hain, Arbi zuban ka Quran, un logon ke liye jo ilm rakhtey hain! Basharat deney wala aur dara deney wala. Magar in logon main se aksar ru gardaani kartey hain aur wo sun kar nahi dety kehtey hain “Jis cheez ki taraf tu hamey bula raha he is ke liye hamarey dilon par ghilaaf charhey hoye hain, hamarey kaan behrey ho gaye hain aur hamarey aur terey darmiyan aik hijaab hail ho gaya he. Tu apna kaam kar, hum apna kaam kiye jaen ge.”( Surat  Ham meem As Sadja Ayat-1-5)

Atba gum sum sunta raha. Phir uth kar apni qoum main wapis agaya. Atba ko aata dekh kar mushrikeen ne aik dosrey se kaha:

“ Khuda ki qasam! Abul Waleed(Atba) tumharey paas wo chehra ley kar nahi araha jo chehra ley kar gaya tha.”

Atba ne kaha:

“ Aaj main ne aisa kalaam suna he ke is se pehley nahi suna tha, Khuda ki qasam! Na wo shaiyri he, na jadu he, na najomiyon ka kalaam he. Meri raye ye he ke tum sab is ko azziyat deney se baaz ajao. Jo kalaam main ne suna he is ki shaan zahir honey wali he. Meri baat mano is shakhs ko is ke haal par chor do. Agar Arab is par ghalib agaye to tumhara kaam dosron ke zariye anjaam paye ga aur agar wo Arab par ghalib agaya to is ki izzat hamari izzat he. kiyun k wo hamarey qabiley se he.”

Log hairat se is ko dekhney lagey phir inhon ne raye qaim ki ke Atba par Muhammad( alhe saalato wassalaam) ka jadu chal gaya he.

Aik rooz jab Huzoor alhe saalato wassalaam Kaba ka tawaaf kar rahey the Quraish ke sar karda afraad in ke paas aye aur tajweez paish ki ke

“ Aye Muhammad( alhe saalato wassalaam)! Jis ki ibaadat tum kartey ho is ki ibaadat hum karein aur jis ki ibaadat hum kartey hain is ki ibaadat tum karo. Is tarha hum aur tum is kaam main mushtarik hojayen.”

Ye riwayat bhi milti he ke Huzoor alhe saalato wassalaam ke samney ye tajweez rakhi gai ke aik saal Huzoor alhe saalato wassalaam Quraish ke maaboodon ki poja Karen aur aik saal Quraish Huzoor alhe saalato wassalaam ke Rab ki ibaadat karein. Quraish ki is qisam ki tajweez ke jawab main Surat Al-Kafiroon nazil hoi.

Keh do! Aye kafiroon main in ki ibaadat nahi karta jis ki tum ibaadat kartey ho. Na tum is ki ibaadat karney waley ho jis ki main ibaadat karta hon aur na main ibaadat karney wala hon jin kit um ibaadat kartey ho aur na tum is ki ibaadat karney waley ho jis ki main ibaadat karta hon. Tumharey liye tumhara deen aur merey liye mera deen. ( Surat Al-Kafiroon)

Irshaad Bari Talah:

Jab Quraish ka koi heela kaar gar nahi hoa to aik baar phir inhon ne ghor-o-khoos kia aur Huzoor alhe saalato wassalaam ki dawat ko khatam karney ke liye mukhtalif tareeqey ikhtiyaar kiye. Quran ne is ka jagah jagah tazkira kia he.

“ Ye log kehtey hain, “Aye wo sakhs jis par ye zikar nazil hoa he, to yaqeenan deewana he.” ( Surat Al- Hijar Ayat-6)

“ In logon ko is baat par taajjub howa k aik darany wala khud inhin me se agaya. Munkareen kehny lagy k “ye sahir he, sakht jhoota he.” ( Surat Soaad Ayat-4)

“Jab ye kafir log kalaam nasihat (Quran) sunty hain to tumhey aisi nazron se dekhty hain k goya tumhary qadam ukhaar den gen. aur khety hain k ye zaror diwana he.”

( Surat Al-Qalam Ayat-51)

“Darasal hum ne is tarha in logon me se baaz baaz k zariye se aazmaish me dala he ta k wo inhen dekh kar kahen “ Kiya ye hain wo log jin par hamary darmiyan Allah Tala ka fazl o karam howa he?” Haan! Kiya Allah Tala apny shukar guzaar bandon ko in se ziyadah nahi janty hain?”

( Surat Al-Inaam Ayat-53)

“Mujrim log duniya me emaan lany walon ka mazaak uraty the. Jab in k paas se guzarty the to ankhen maar maar kar in ki taraf ishara karty the. Apny ghar walon ki taraf plattey to mazey lety howy plattey the, aur jab inhen dekhte to kehty the k ye bheky howy log hain, halan k wo in par nigran bana kar bheje gaye the.”

( Surat Al-Mutaffafeen Ayat-29 ta 33)

“Jin logon ne (Huzoor alhe saalato wassalaam) ki baat many se inkaar kar diya he wo kehty hain “Ye Furqaan aik man gharat cheez he jisy is shakhs ne aap hi gharr liya aur kuch logon ne is kaam me is ki madad ki he.” bara zalim aur sakht jhoota he jis par ye log utar aye hain.” ( Surat Al-Furqaan Ayat-4)

“Kehty hain “Ye purany logon ki likhi howi cheezen hain jinhen ye shahks naqal karata he aur wo subah o sham sunai jati he.” ( Surat Al-Furqaan Ayat-5)

“Aur hamey maloom he k ye log tumhare mutalliq kehty hain k is shakhs ko aik aadmi sikha parhata he.” ( Surat Al-Nahal Ayat-103)

“Aur kehny lagy ye kaisa rasool he khata he khana aur phirta he bazaron me, q na is ki taraf koi farishta rehta is k sath darany ko.” ( Surat Al-Furqaan Ayat-7)


BARAN E REHMAT


“Baraan-e-Rehmat” uloom ka khazeena he. Ganj giran maya he. Aksar kitabon ko parhty howy insaan boriyat mehsos karta he. Do chaar safhaat parh kar us ki tashnagi bujh jati he. Jab k azeemi sahib ki seerat ki ye kitaab parhty howy insaan tashnagi mehsos karta he. Wo chahta he k isy mazeed parhay q k har line dusri line aur har safah dusry safah se marboot he. Maloomat se pur ye kitaab qari kin a to nazar idhar udhar hony deti he aur na hi khayal aur ye hi kisi kitaab ki khobi hoti he k wo qari k dil me utar jaye aur wo isy mazeed se mazeed parhney me laga rahe.