MASAYEB O TAKALEEF

Mushreqeen ki kaarwaiyan haq k parchaar ko rokny mein kamiyaab aur mussar sabit nahi ho rahi thien. Kuffaar is surat e haal se pareshaan hey. Bal akhir 25 sardaran e Quraish ki aik commite tashkeel di gayi jis ka sarbarah Abu Lehab tha. Commite ne tey kiya k Isalm ki mukhaalfat Peghambar e Islam ki ayza rasani aur Isalam lany walon par tarha tarha k sitam aur zulm o tashaddud kiya jaye.

Abu Lehab Huzoor Aleh saalato Wasalam ki adawat mein is qadar agey barh gaya jab Huzoor Aleh saalato Wasalam k dusrey sahabzady Hazrat Abdullah ka intiqaal howa to Abu Lehab khushi se dorta howa apney rufqa k paas pohncha aur inhen bataya k Muhammad(alhe saalato wassalaam) abtar (nasal bareedah) hogaye hain. Quran e Hakeem ne Abu Lehab k is amal par Huzoor Aleh saalato Wasalam ko pohnchny waly dukh ka madawa Surah Kausar mein kiya hey.

“(Aye Nabi saw) Hum ne Aap ko Kausar ata kar diya. Pas aap apney rab k liye Namaaz qaim kijiye aur qurbani kijiye. Be shak aap ko dushman hi la waris aur be naam hey.” ( Surat Al-Kausar)

QATAL KI SAZISH:

Aik din Huzoor Aleh saalato Wasalam Khana Kaba mein Allah Tala ki ibadat kar rahe the. Abu Jehal apney qabeely k kuch afraad k hamrah wahan pohnch gaya. Abu Jehal k hath mein ooth ki ojhri thi jis mein khoon aur dusri gangiyan bhari howi thien.

Jazeera ul arab mein kisi ko sazaye moat deny ka aik tareeka ye bhi tha k pani ya khoon ya dusri gangiyon se bhari howi ooth ki ojhri ko sar par is tarha charha dety the k sar aur chehra ojhri k andar pehns jata tha aur phir ojhri k nichly hissy kko kisi thely k mu ki tarha mazbooti se garden mein baandh diya jata tha. Is tarha naak aur mu mukammal tor par ojhri k ghubbare mein band hojaty the aur sans ruk jata tha……dum ghutny k bais jald hi moat waqia ho jati thi.

Is rooz Abu Jehal aur is k sathi ye faisla kar k aye the k wo Huzoor Aleh saalato Wasalam ko ojhri k zariye halaak kar den gen. Abu Jehal aur is k sathi jab Khana Kaba mein dakhil howy to Huzoor Aleh saalato Wasalam apney gardo pesh se be khabar Allah Tala k samny sar ba sajood the. Abu Jehal ne oonth ki ojhri sajdy ki halat mein Huzoor Aleh saalato Wasalam k sar par rakh di. Huzoor Aleh saalato Wasalam ka chehra or sar is ojhri mein mubtala hogaya. Phir Abu Jehal ne bari phurti k sath ojhri k dusrey siry ko aik theeli ki tarha Huzoor Aleh saalato Wasalam ki garden par bandh diya. Huzoor Aleh saalato Wasalam ko jaisy hi ye ehsaas howa k koi cheez in k sar par rakh di gayi hey. Jab sans ghutney laga aur shahdeed takleef howi to ojhri ko mu par se hatany ki koshish ki lekin kamiyaab nahi howy.

Jo log Huzoor Aleh saalato Wasalam k qareeb the inhen ba khubi ehsaas tha k sans rukney k bais Huzoor Aleh saalato Wasalam jald hi apni jaan se hath dho bethen gen. Huzoor Aleh saalato Wasalam k beqarari o betaabi ko dekhty howy inhon ne ye socha ko wo Huzoor Aleh saalato Wasalam k chehrey se ojhri ka ghilaaf utaar den lekin inhen Abu Jehal ka khouf tha aur wo janty the k agar wo Huzoor Aleh saalato Wasalam ki madad Karen gen to Abu Jehal jaise khoufnaak shakhs ki dushmani mool len ge.

Quraish ki aik aurat jo wahan mojood thi wo is karbnaak manzar ki tab na la saki aur doorti howi Huzoor Aleh saalato Wasalam k ghar pohnchi aur in ki sahabzaadi Hazrat Fatima r.a ko ittila di. Hazrat Fatima r.a saraseema halat mein roty howy Khana Kaba mein pohnchien. Abu Jehal aur dusrey logon ne jab Hazrat Fatima r.a ko aaty dekha to peeche hat gaye aur Hazrat Fatima r.a ne Huzoor Aleh saalato Wasalam k chehrey aur sar ko ojhri ki girift se azaad kiya aur apney daaman se in k chehrey ko saaf kiya. Huzoor Aleh saalato Wasalam dum ghutney k bais aik ghanta tak harkat k qabil na hosakey aur is k baad apni beti k saharey kharey howy aur ahista ahista qadam uthatey howy ghar ki taraf rawana hogaye. Ghar pohnch kar Huzoor Aleh saalato Wasalam ne Hazrat Fatima r.a ki madad se apney chehrey aur sar ko khoon aur degar kasafat se saaf kiya, kaprey tabdeel kiye. Hazrat Fatima r.a ne apney walid k kaprey dho kar sukhany k liye dhoop mein daal diye. Agley din Huzoor Aleh saalato Wasalam guzishta rooz k waqiya se khouf zada howy baghair dobara Khana Kaba mein tashreef le gaye aur wahan ibadat mein mashghool hogaye.

Is martaba Aqba Ibn Abi Mueet nami shakhs ne sajdy ki halat mein apni chadar Huzoor Aleh saalato Wasalam par daal di aur itna shahdeed hamla kiya k Huzoor Aleh saalato Wasalam ki naak aur mu se khoon jari hogaya. Aqba ye koshish kar raha tha k sajdy se sar uthaney se phele hi pe dar pe waar kar k Huzoor Aleh saalato Wasalam ka khaatma kar de (naozibillah)

Lekin wo apney maqsad mein kamiyaab na ho saka aur Huzoor Aleh saalato Wasalam apney aap ko hamla aawar se churaney mein kamiyaab hogaye aur khoon aloodah chehra k sath ghar wapis tashreef le ay.

Abu Lehab ki biwi Um e Jameel jis ka naam Arwaa Bint-e-Harb Bin Amiya tha. Wo apney sohar k sath mil kar Huzoor Aleh saalato Wasalam ko ayza pohnchany mein pesh pesh thi.wo Huzoor Aleh saalato Wasalam k raasty mein aur in k darwazy par kanty daal diya karti thi. Is zalimana faal par Quran mein Surah Lehab nazil howi.

“Toot gaye Abu Lehab k hath aur wo na muraad hogaya. Is ka maal aur jo kuch is ne kamaya is k kuch kaam nahi aaya. Zaroor wo shula zan aag mein dala jaye ga aur (is k sath) is ki biwi bhi. Lagai bujhai karny wali, is ki garden mein mujh ki rassi hogi.”

( Surat Al-Lehab)

Um e Jameel ko jab ye maloom howa k is ki aur is k sohar ki mazammat mein ye ayat nazil howi hain to wo Huzoor Aleh saalato Wasalam ko talash karti howi Khana Kaba pohnch gayi, is k hath mein pathar the jo wo maarney k liye lai thi. Huzoor Aleh saalato Wasalam k hamrah is waqt Hazrat Abu Bakar Siddique r.a bhi mojood the. Um e Jameel Hazrat Abu Bakar Siddique r.a k paas aayi aur pocha: “Tumhara sathi kahan he? mujhe maloom howa hey wo meri (hijo) burai karta hey. agar mein ne isy dhond liya to ye pathar is k sar par maron gi.”

Is shor sharaby k baad wo chali gayi. Is k jany k baad Hazrat Abu Bakar Siddique r.a ne Huzoor Aleh saalato Wasalam se dariyaaft kiya k kiya wo Huzoor Aleh saalato Wasalam ko nahi dekh rahi thi. Huzoor Aleh saalato Wasalam ne jawab diya k Allah Tala ne is ko waqti tor par andha kar diya tha.

Amiya Bin Khalaf Abu Lehab ki team ka rukun tha. Wo jab Syedna Aleh saalato Wasalam ko dekhta lan tan karta aur mughlozaat bakta tha. Quran e Paak ki Surah Hamza ki pheli ayat isi siyah bakht ki taraf ishara karti hey.

“Lan tan aur buraiyan karny waly k liye tabahi hey.”

( Surat Al-Hamza Ayat-1)

Akhnas Bin Shareek Shaqfi bhi Huzoor Aleh saalato Wasalam k satany walon mein tha. Quran ne Surah Qalam mein is ki khabasaten ginwai hain.

“Har giz khouf na karo kisi aisy shakhs se jo bohat qasmy khany wala hey wuqat aadmi he, taany deta he, chughliyan khata phirta he, bhalai se rookta he, zulm o ziyatti mein had se guzar jany wala he, sakht bad amaal he, jafa kaar he, aur in se oyyub k sath bad asal he, is bina par k wo bohat maal aur ulaad rakhta hey. jab hamari ayaat is ko sunai jati hain to kheta hey ye to agley waqton k afsany hain.”

( Surat Al-Qalam Ayat-10 ta 15)

 

 

MUKHALFEEN KI EZA RASANIYAN AUR MUSALMANON KI ISTIQAMAT

Huzoor Aleh saalato Wasalam k khilaaf kuffaar Makkah ki karastaniyan apney urooj par thien bawajood is key k Huzoor Aleh saalato Wasalam k aala kirdaar aur kareemana ikhlaaq k mushriqeen mutraf the aur Huzoor Aleh saalato Wasalam k mauziz chacha Abu Talib ki himayat o hifazat Huzoor Aleh saalato Wasalam ko hasil thi. Digar musalmanon khosusan kamzoor afraad ki ayza rasani ki kaarwaiyon ki tafseel kuch ziyada hi sangeen aur talkh hey.

Abu Jehal ne ye watera apna rakha tha k jab kisi mauziz aur taqatwar aadmi musalmaan hony ki khabar suntan to isy bura kehta. Zaleel o ruswa karta aur maal o jah ko sakht khasary se do char karny ki dhamkiyan deta aur agar koi kamzoor hota to isy maarna aur dusron ko bhi bura nagheeta karta.

Hazrat Usman Ghani (r.a) Bin Affaan:

Hazrat Usman (r.a) Bin Affaan bohat maal daar sakhi aur naram kho the. Aap r.a ka talluq khandaan Bani Amiya se tha. Jab musalmaan howy to in k chacha inhen khajoor ki chatai mein lipait kar dhuwan dety the.

Hazrat Masab (r.a) Bin Umair:

Hazrat Masab (r.a) Bin Umair bhi bary nazo nam mein paly the. Aala tareen libaas pehnty, besh qimat jooty istamaal karty aur har waqt khusbu mein basy rehty. In k qabool Islam ki khabar jab in k ghar walon ko mili ghar walon ne in ka dana pani band kar diya aur inhen ghar se nikaal diya. Halaat ki shiddat se do char howy to khaal is tarha udhar gai jis tarha sanp kencili utaarta hey.

Hazrat Ammaar(r.a) Bin Yasir:

Hazrat Ammaar (r.a) Bin Yasir Bano Maghzoom k ghulaam the. Inhon ne, in k walid Hazrat Yasir r.a aur waleedah Hazrat Samiya r.a ne Islam qabool kar liya to kuffaar ne is qadar zulm kiya k in k waldain apni jaan se hath doh bethy. Sakht dhoop mein Hazrat Ammaar r.a ko pathreeli zameen par lita kar seeney par surkh patthar rakh dety the aur khabhi pani mein duboya jata tha. Mushriqeen in se mutaalba karty k jab tak Muhammad (alhe saalato wassalaam) ko bura nahi kaho ge ya laat o aza k barey mein kalma khair na kaho ge hum tumhey nahi choren ge. Hazrat Ammaar r.a in ki baat manny par majboor hogaye aur rooty howy khidmat e iqdas mein hazir howy to ye ayat nazil howi:

“Jo koi munkir ho Allah se yaqeen laye peeche magar wo nahi jis par zabardasti ki aur is ka dil barqarar rahy emaan par, lekin jo koi dil khool kar munkir howa so in par ghazab hey Allah ka aur in ko buri maar hey.”  

( Surat Al-Nahal Ayat-106)

Hazrat Khabaab(r.a):

Hazrat Khabaab r.a, Um Anmaar k ghulaam the, in ki malka qabeela Khaza se talluq rakhti thi. Qabeela walon ne Hazrat Khabaab r.a ko saza deny ka ye tareeka istimaal kiya k dehakty howy angaron par lita kar in k upar pathar rakh dety the. Jisam jalta, charbi pighalti aur aag bujh jati magar saza khatam na hoti.

Hazrat Fakeeha(r.a):

Hazrat Fakeeha r.a Sufiyaan Ibn Amiya k ghulaam the, in ka paon rassi se baandh diye jaty aur zameen par ghaseeta jata tha. Hazrat Abu Bakar Siddique r.a ne in k malik ko qeemat ada ki aur azaad kar diya.

Hazrat Bilal Habshi(r.a):

Phele ghulaam jo Hazrat Zaid r.a k baad halka e Islam mein dakhil howy wo Hazrat Bilal Habshi r.a the. Jazeera tul arab mein teen cheezen mukammal bad bakhti ki alamat samjhi jati thien. Aik ajnabi ya begana hona, dusra ghulaam hona aur teesra siyah foam hona aur Hazrat Bilal r.a mein ye teenon cheezen mojood thien.

Jab in k malik Amiya Bin Khalaf ko ye ittila mili k Hazrat Bilal r.a musalmaan hogaye hain to wo inhen Makkah se bahir le gaya aur in k kaprey utar wa kar inhen pury suraj k neeche tapti howi rait mein lita diya. In k hath bandh diye aur seeny par bhari patthar rakhwa diya aur in se kaha k ya to Islam ko chor de ya dhoop mein para reh yahan tak k tu mar jaye. Hazrat Bilal r.a ye janty the k in ka malik apney kahe par amal kare ga aur in k hath paer nahi kholy ga lekin inhon ne Deen e Hanif se dasbardaar hony k bajaye mout se hum aaghosh hona qabool kar liya aur marny k liye taiyaar hogaye. Lekin isi doraan Hazrat Abu Bakar r.a Hazrat Bilal r.a ko nijaat dilany k gharz se in k malik k paas pohnchy aur in k samny Hazrat Bilal r.a ko khareedney ki tajweez pesh kar di. Hazrat Bilal r.a k malik ne jab ye dekha k Hazrat Abu Bakar r.a is k ghulaam ko bohat ziyadah qeemat par khareed rahe hain to is ne inhen bachny par raza mandi zahir kar di aur Hazrat Abu Bakar r.a ne Hazrat Bilal r.a ko khareedney k baad azaad kar diya.

Hazrat Abu Zar Ghaffari:

Hazrat Abu Zar Ghaffari r.a Jalil ul Qadar Sahabi aur Huzoor Aleh saalato Wasalam k jaan nisaar sathi the. In ka talluq qabeela Ghaffar se tha. Ye qabeela Makkah k shumaal mein sakonat pazeer tha. Hadiya nasheen arbon ki rasam k mutabiq saal mein char mahinnon k liye gharat giri aur daketi haraam thi aur in mahinnon ko Mah e Haraam kehty the. Makkah ki ziyarat par jany waly afraad par hamla karny ki mamanat thi lekin qabeela Ghaffar k log mazkorah rasoomaat aur qawaneen ki pabandi nahi karty the. Wo Mah e Haraam k mahinny mein qafilon par loot maar ki gharz se hamla karty aur Makkah ki ziyarat par jany walon ko bhi mauf nahi karty the.

Aik martaba Zid Qad k mahinny mein qabeely walon ne apni hadood se guzarny waly aik qafily par hamla kar k qafily ka maal asbaab loot liya aur qafila mein shamil mard, aurton aur bacchon ko qatal kar diya. Hazrat Abu Zar Ghaffari r.a jo is waqt tak musalmaan nahi howy the inhen shahdeed nadamat howi aur inhon ne apna qabeela chor diya. Kayi mah sehra nordi karny k baad Makkah pohnchy aur Huzoor Aleh saalato Wasalam ka naam suna. Inhen maloom howa k Huzoor Aleh saalato Wasalam logon ko Allah wahida la shahreek ki taraf bulaty hain aur bury kaam karny se rokty hain aur Allah Tala k sath kisi ko shahreek karny se mana karty hain.

Hazrat Abu Zar Ghaffari r.a ne Huzoor Aleh saalato Wasalam se milny ka faisla kar liya. Aik reh geer se pocha k Huzoor Aleh saalato Wasalam ka ghar kahan he? is ne tajjub ghez nigahon se Hazrat Abu Zar Ghaffari r.a ko dekha aur onchi awaaz mein chillany laga: “ Ay logo! Idhar aao aur isy pakro aur maar dalo kyn k ye aik musalmaan hey jo hamary hath lag gaya hey.”

Palak chapakty hi logon ne Hazrat Abu Zar Ghaffari r.a par hamla kar diya aur wo jaan bachany k liye wahan se faraar ho gaye. Lekin Quraish ne in ka peecha kiya aur in par patthar ki barish kar di. Itny patthar marey k Hazrat Abu Zar Ghaffari r.a nidhaal ho kar zameen par gir gaye aur Makkah walon ne inhen murdah samajh kar chor diya.

Aik musalmaan k sangsaar kiye jany ki ittila Hazrat Abu Zar Ghaffari r.a ko mil gait hi lehaza wo raat ki tareeki mein aye aur aik dusre musalmaan ki madad se Hazrat Abu Zar Ghaffari r.a ko utha kar le gaye. Baad mein pata chala k Hazrat Abu Zar Ghaffari r.a musalmaan nahi balkey Huzoor Aleh saalato Wasalam se mulaqaat karna chahty hain. Dusrey din Hazrat Abu Zar Ghaffari r.a ne Huzoor Aleh saalato Wasalam se mulaqaat ki.

Hazrat Abu Zar Ghaffari r.a ka shumaar Isalm k namoor musalmanon mein hota hey. Hazrat Abu Zar Ghaffari r.a ne apney pury qabeely ko musalmaan kar liya. In ka qabeela jo loot maar k zariye zindagi guzaarta tha is nafrat ghez amal se hamesha k liye dasbardaar hogaya.

Is waqiye se ye baat ayan ho jati hey k Makkah k bashindey Huzoor Aleh saalato Wasalam ki dushmani mein itna barh gaye the k agar koi in k ghar ka pata pochta tha to wo ye samajhtey the k pata pochney wala ya to musalmaan hey ya musalmaan hona chahta hey lehaza is par sang baari shuru kar dety the.