Baab - 5 (Islam mein jung ka tasawur)

            ISLAM mein JANG KA TASAWWUR

Jang se muraad har wo muqabla hey jo do musallah gurohon ke darmiyan hota hey aur fareqeen mein se aik ka ya dono ka ye iradah ho ke bahemi talluqaat khatam kar den ya maghloob kar den.

Jang do tarha ke jati he:

1.    Insaaf ke liye                  2. Zulm ke liye

1…..Insaaf ke liye jang se muraad wo larai he, jo aisi qoam ya ghiroh se ki jaye jo dusron par zulm ka martakab ho aur haq ki rah mein rukawat ho.

2…. Zulm ki larai ye hey ke koi qoam ya ghiroh mehaz zalimana tareeke se dusron ke maal o asbaab par qabza karna chahte hon.

Islam sirf insaaf ki jang ka hami hey aur zalimana aur ghasbana jang se mana karta hey.

Insaani muashare mein sab se ziyadah ehmiyat insaani jaan ki hey. Mazahib aur shariyat mein ehtraam nafs ke liye hokum diya jata hey. Is hi usool ki bunyaad par insaani muashara munazzim hota hey.

Zarraat, tijarat, sanat, zaraye rasl o rasail ki sahulat, ijtamai zindagi ke mazahir sab aik hi maqsad ki nishandahi karte hain aur wo insaani jaan ki hifazat o ehtraam hey. Insaani jaan aur is ke zaraye ko khatam karna bohat bara jurm hey.

Quran Kareem ne Hazrat Adam a.s ke beeton ke aik waqiya se is haqeqat ko wazeh kiya he:

“Isi bina par hum ne Bani Israil ko ye likh kar de diya ke jo koi kisi ki jaan le, baghair is key ke is ne kisi ki jaan li ho ya zameen mein fasaad kiya ho to goya is ne tamam insane ka khoon kiya he, aur jis ne kisi ki jaan bachai to goya is ne tamam insaano ko bachaya. In logon ke paas hamare Rasool khuli hidayat le kar aye, magar is ke baad bhi in mein se bohat se aisy hain jo zameen mein had se tajawaz karte hain.”

(Surah Al Maidah-Ayat 32)

“Wo is jaan ko jise Allah Talah ne muhtram qarar diya hey baghair haq ke halaaq nahi karte aur na zina karte hain aur jo koi aisa kare ga wo apne kiye ki saza paye ga.”

(Surah Al Furqaan-Ayat 68)

“Ay Muhammad (Alhe Salato Wassalaam) kaho ke aao! mein tum ko bataon ke Allah Talah ne tum par kiya kiya haraam kiya hey. Tum par wajib hey ke Allah Talah ke sath kisi ko shareek na karo, waldain ke sath naik salook karo, apni Aulad ko muflisi aur tangdasti ke bais qatal na karo, hum tum ko rizq dety hain in ko bhi den gen, badkariyon ke qareeb bhi na jao khuwah chupi howi hon ya khuli howi, kisi aisi jaan ko jisy Allah Talah ne muhtram qarar diya hey halaak na karo siwaye is surat e haal key ke aisa karna haq ka taqaza ho. Allah Talah ne in baton ko tumhe taqeed ki hey shayad tum ko kuch aqal aye.”

(Surah Al Inaam-Ayat 151)

Huzoor Aleh Salato Wasalam ne insaani jaan ke ehtraam ki hamesha talqeen farmai hey.

Do Misalen:

Hazrat Anas  r.a Bin Malik se riwayat hey ke Huzoor  Aleh Salato Wasalam ne farmaya:

“Bare gunahon mein sab se bara gunah Allah Talah ke sath kisi ko shareek karna he, phir qatal nafs, phir waldain ki nafarmani karna aur phir jhoot bolna.”

(Sahi Bukhari Jild Awwal-Hadees 2478)

Hazrat Ibn Umar r.a se riwayat hey ke Huzoor  Aleh Salato Wasalam ne farmaya:

“Momin apne Deen ke wast mein is waqt tak barabar rehta hey jab tak wo kisi haraam khoon ko nahi bahata.”

(Sahi Bukhari Jild Soim-Hadees 1757)

Huzoor Aleh Salato Wasalam farmate hain:

“Qayamat ke din bande se sab se phele jis cheez ka hisaab liya jaye ga wo namaz hey aur pheli cheez jis ka faisla logon ke darmiyan kiya jaye ga wo khoon ke dawey hain.”

(Sansan Nisai Jild Soim-Hadees 293)

Hazrat Abdullah r.a Bin Masood se riwayat hey ke aik shakhs ne Huzoor  Aleh Salato Wasalam se arz kiya: “Sab se bara gunah kon sa he?”

Huzoor Aleh Salato Wasalam ne farmaya:

“Ye ke to kisi ko Allah Talah ka shareek banaye halan ke is ne tujhe paida kiya.”

Is ne phir pocha: “Is ke baad kon sa gunah he?”

Huzoor Aleh Salato Wasalam ne farmaya: “Tu apne bacche ko qatal kar de is khayal se ke wo tery khane mein shareek hoga.”

(Sahi Bukhari Jild Soim-Hadees 1756)

Insane jaan ka ehtram uth jaye aur insane hoqooq pamaal hon to infaradi o ijtamai fasaad paida ho jata hey. Ye fitna o fasaad bohat si sooraton mein runuma hota hey. Ye fitna afraad mein aur jamaton mein bhi hota hey. Is amal se afraad ke hoqooq pamaal hoty hain, naslen aur khetiyan barbaad ho jati hain aur mazhabi azaadi se insaan mehroom ho jata hey.

Quran Kareem mein irshad he:

“Ye log jab bhi khoon rezi ki aag bharkate hain to Allah Talah is ko bujha dety hain. Ye log zameen mein fasaad barpa karne ki koshish karte hain magar Allah Talah fasaad karne walon ko pasand nahi karte.”

(Surah Al Maidah-Ayat 64)

Taqat ka istemaal is waqt karna chahiye jab koi jamaat ya qoam waaz o nasihat par amal na kare.

Allah Talah ne irshad farmaya he:

“Agar Allah Talah logon ko aik dusre ke zariye difa na karta to somey aur garje mabdon aur masajid jin mein Allah Talah ka zikar kasrat se kiya jata he,masmaar kar di jatien.”

(Surah Al Haj-Ayat 40)

Duniya mein kamzoron, be bason aur ghareebon par zulm hota ho, insane hoqooq pamaal kiye jaty hon, ikhlaqi o mazhabi qadron ko khatam karne ki koshish ki jati ho, afhaam o tafheem se masail hal karna mumkin na rahe aur haq ki bala dasti qaim karna zarori hojaye to jang ki jaye.

Jang Ka Islami Tasawwur:

Islami nuqta nazar se jang is sorat mein jaiz hey ke azaadi aur aman o amaan bar qaraar rakha jaye.

Har kaam karne ke liye do cheezon par ghor karna zorori hey.

•         Maqsad ka taiyun kiya jaye jo shariyat ke mutabiq ho.

•         Maqsad ke husool ke liye jiddo jehad ka taiyun kiya jaye.

Maqsad hasil karne mein usool o zawabit ka khayal rakha jaye aur usool o zawabit ikhlaas aur ikhlaaq par mabni hon. agar maqsad ke husool mein khuloos aur awamun naas ki falah nahi hey to maqsad ka husool sahi nahi hey.

Jang ka maqsad agar kamzoor qoamon ki azaadi cheenna, loot maar karna aur Allah Talah ke bandon ko in ke hoqooq se mehroom karna zulm o sitam ka bazaar garam karna hey to aisi jang kitne hi nazmo zabt ke sath ki jaye wo zalimana iqdaam hey. Jang mein loot maar karna, aag lagana, gharon ko jalana, maishat ke tabah karna, doraan e jang ikhlaqi qadron ko ehtraam na karna, asmat o iffat ki hifazat na karna zalimana iqdaam hain.

Jaiz aur haq ke liye jang ki tareef ye hey ke “Maqsad naik ho aur maqsad hasil karne ke liye jo tareeka ikhtiyaar kiye jayen wo mukhlisana hon.

Islami taleemaat ke mutabiq jang mein ye usool mad e nazar rakha jata hey ke maqsad ko hasil karne ke liye pakizgi, hamdardi aur shariat par har haal mein amal kiya jaye.

Islami nuqta nazar se jang ka asal maqsad ba muqabil dushman ko halaak karna aur is ko nuqsaan pohnchana nahi hey. Balke mehez is ke shar ko khatam karna hey. Qowat ka istemaal sirf inhin dushmano ke khilaaf hona chahiye jo amlan bar sare pekaar hon ya had se tajawez kar jayen.

Islam ne duniya mein raij jangi qawaneen ke wehshiyana tareeqon se mana kiya hey. Islam ne in galat tasawwuraat ke odaur karne ki koshish ki hey jo sadiyon se raij the. Islam se qabal log ye samajhne se qasir the ke jab maal o dolat ke liye, mulk ko fateh karne ke liye, shuhrat aur namoori ke liye, jang na ki jaye to phir jang ka kiya maqsad hey….? Jis ke liye insaan apni jaan ka nazrana pesh kare.

Chunacha Huzoor  Aleh Salato Wasalam ne phela kaam ye kiya ke jahaad “Fi Sabeellillah” ke maini aur maqsad ka taiyun farmaya. Is barey mein Huzoor  Aleh Salato Wasalam se kai hadeesen marwi hain.

Aik shakhs Huzoor  Aleh Salato Wasalam ke paas hazir howa aur is ne arz kiya:

“Koi shakhs maal e ghanimat hasil karne ke liye jang karta he, koi bahaduri dikhane ke liye jang karta he, ya Rasool Allah Aleh Salato Wassalaam! Farmaiye is mein kon si jang Allah Talah ke liye hey.”

Huzoor Aleh Salato Wasalam ne farmaya:

“Allah Talah ki rah mein sirf is shakhs ki jang qabil e qabool hey jo mukhlisana tarzon mein Allah Talah ka bol bala karne ke liye jang kare.”

(Bukhari Shareef Jild dom-Hadees 369)

Huzoor Aleh Salato Wasalam ne farmaya:

“Laraiyan do qisam ki hain, jis shakhs ne khalis Alla Talah ki raza ke liye jang ki aur imam ki itaat ki, apna behtreen maal kharch kiya aur fasaad se perhaiz kiya to is ka sona jagna sab ajar ka mustahiq hey aur jis ne duniya dikhawa aur shurat ke liye namoori ke liye jang ki aur imam ki nafarmani ki aur zameen par fasaad phelaya to is ke liye azaab hey.”

(Sansan Abu Dawood Jild Dom-Hadees 743)

Huzoor Aleh Salato Wasalam ne farmaya:

“Qiyamat ke din sab se phele teen qisam ke admiyon ke faisla kiya jaye ga. Phela wo shakhs pesh kiya jaye ga jo lar kar shaheed howa tha. Allah Talah is se apni naimaton ka tazkara farmayen ge aur jab wo in ka iqrar kar le ga to Allah Talah pochen ge tu ne mery liye kya kiya? Banda arz kare ga Allah Talah mein ne aap ke liye jang ki, yahan tak ke mein shaheed hogaya. Allah Talah farmayen ge: “ Tu ne jhoot bola hey tu ne is liye jang kit hi ke log kahen ge falan shakhs bara taqatwar he, so tera maqsad pura hogaya. Phir Allah Talah is ke liye azaab ka hukum den ge aur isy mu ke bal ghaseet kar dozakh mein daal diya jaye ga.”

(Jama Tarmeezi Jild Dom-Hadees 264)

Islami usool o zawabit ke mutabiq agar duniyawi maqasid ke liye jang ki jaye to jaiz nahi.

Shurat o naamori ki talab, maal e ghanimat ki tama, shakhsi aur qoami adawat aur is ka inteqaam. Gharz ye ke duniya ki koi gharz aisi nahi jis ke liye jang jaiz ho. Jang mehez ikhlaqi aur deeni farz hey.

Islam ki ro se jang sirf do sooraton mein jaiz aur zarori hey. Aik difaa aur dosri islah.

Allah Talah farmate hain:

“Deen mein kisi tarha ka jabar nahi. Is liye hidayat gumrahi se juda hey.”

(Surah Al Bakra-Ayat 256)

Islam mein jang ka maqsad aqeede ki azaadi aur dawat e tabligh mein azaadi aur aman o amaan qaim rakhna hey.

Allah Talah farmate hain:

“Allah Talah ki rah mein in logon se jang karo jot um se larte hain lekin ziyadti na karo. Allah Talah ziyadti karne walon ko passand nahi farmate.”

(Surah Al Bakra-Ayat 190)

JANG ke QAWANEEN:

•         Aik martaba median e jang mein Huzoor  Aleh Salato Wasalam ne aik aurat ki lash dekhi. Naraz ho kar farmaya: “Ye larne walon mein shamil nahi thi.”

Phir sipa salaar Hazrat Khalid r.a Bin Waleed ko talab kiya aur irshad farmaya: “Aurat aura jeer ko har giz qatal na karo.”

  Aik aur riwayat ke mutabiq Huzoor  Aleh Salato Wasalam ne aurton   aur bacchon ke qatal e aam se mana farmaya hey.

Huzoor Aleh Salato Wasalam ne farmaya:

“Kisi burhe zaeef ko qatal na karo, chote bacche aur aurat ko qatal na karo.”

Fateh Makkah ke moqey par Huzoor  Aleh Salato Wasalam ne hidayat farma di thi.

“Kisi zakhmi par zulm nahi karna, koi jaan bacha kar bhage to is ka peecha nahi karna aur jo apna darwaza band kar ke beth jaye isy amaan dena.”

Hazrat Ibn e Abbas r.a se riwayat he:

Huzoor Aleh Salato Wasalam jab kisi muhaaz par fauj bhejte the to hidayat farmate the:

“Be zar khadmon ko aur khankah mein rehne walon ko qatal na karna.”

•         Arab raaton ko akhir shab mein jab log be khabar soty hain anchanak hamla karte the. Huzoor  Aleh Salato Wasalam ne is ko khatam kar diya aur qanoon banaya ke subah se phele kisi dushman par hamla na kiya jaye.

•         Log inteqaam ki shiddat mein aag laga detey the. Huzoor  Aleh Salato Wasalam ne is wehshiyana amal ko khatam farma diya.”

(Sahi Bukhari-Jild Doim-Hadees 268)

•         Huzoor Aleh Salato Wasalam ne dushman ko bandh akr qatal karne aur takleef dene ki mamanat farmai hey.

(Sahi Bukhari Jild Doim-Hadees 269,270)

•         Jab foojen kisi ilaqe ko fateh karti hain to faslon ko kharaab karna, kheton ko tabah karna aur bastiyon mein qatal in ke mamolaat mein se hota hey. Magar Islam is ko mana karta hey.

Quran Kareem mein irshad he:

“Jab isy iqtedaar hasil hojata hey to zameen mein is ki saari daur dhoop is liyehoti hey ke fasaad phelaye, kheton ko gharat kare aur nasl e insaani ko tabah kare halan ke Allah (jisy wo gawah bana raha tha) fasaad ko har giz passand nahi karta.”

(Surah Al Bakra-Ayat 205)

•         Dushman ki lashon ki be hurmati karna, in ke aaza ki qata o bareed (jisam ke mukhtalif hisson ko kanta) karne se Islam ne sakhti se mana kiya hey. Huzoor  Aleh Salato Wasalam foojon ko bhejte waqt hidayat farmate the:

“Bad ehdi na karna, ghanimat mein khayanat na karna aur masla na karna.”

(Tarmeezi 162/4)

•         Arab ki jang mein bohat ziyadah shoor hangama barpa hota tha. Huzoor  Aleh Salato Wasalam ne is ki ijazat nahi di.

Hazrat Abu Moosa Asaara r.a se riwayat he:

“Hum Huzoor  Aleh Salato Wasalam ke sath the aur jab kisi wadi mein pohnchte to zor o shoor se taqbeer o tehleel ke naarey buland karte the. Is par Huzoor  Aleh Salato Wasalam ne farmaya k

“Logo! Waqaar ke sath chalo, tum jis ko pukaar rahe ho won a behra hey na ghaib. Wo to tumhare sath he, sab kuch suntan hey aur bohat qareeb hey.”

(Bukhari Kitaab-Al Jahaad-16/4)

Huzoor Aleh Salato Wasalam ke ghazwaat aur muahidaat ka mutalla

 BADAR-E-KUBRAA:

“Yaqeenan Allah Talah ne tumhari badar mein madad ki jab tum kamzoor the to Allah Talah se daro ta ke tum shukar guzaar ban jao.”

(Surah Al Imraan-Ayat 123)

Ghazwa Badar ka murka 17 Ramzaan, 2 hijri mein musalmano aur Quraish Makkah ke darmiyan pesh aya. Badar ka muqaam Madina se 80 mile aur Makkah se 220 mile ke faisle par waqiya hey. Ye muqaam sham ke raaste se qareeb hey.

Pas-E-Manzar:

1. Quraish ke Khat Banaam Abdullah Bin Abi:

Musalmano ne jab Quraish ki girift se azaad ho kar Makkah se Madina ki taraf hijrat ki to Quraish ka ghez o ghazab bohat ziyadah hogaya, chunacha inhon ne Abdullah Bin Ubi ko khat likha:

“Aap logon ne Muhammad Rasool Allah (Alhe Salato Wassalaam) ko panah de rakhi hey hum Allah Talah ki qasam kah kar khete hain ke aap in se larai kijiye ya inhen nikaal dijiye. Agar aisa nahi hoga to hum apni puri taaqat ke sath hamla kar den ge. aap ke sarey mard khatam hojayen ge aur sari aurton ki izzat pamaal hojaye gi.”

Is khat ke pohnchte ho Abdullah Bin Ubi apne bhaiyon ke hukum ki tameel mein mustaad hogaya. Wo phele se hi Huzoor  Aleh Salato Wasalam ke khilaaf the. Is ke zehan mein ye baat thi ke Huzoor  Aleh Salato Wasalam ne Madine mein is ki badshahat khatam ki hey. Chunacha Abdullah Bin Ubi aur is ke rufka Huzoor  Aleh Salato Wasalam se jang ke liye jama howe. Jab Huzoor  Aleh Salato Wasalam ko is ki khabar howi to aap Aleh Salato Wasalam is ke paas tashreef le gaye aur farmaya:

“Quraish ki dhamki ne tum logon par bohat bura asar kiya hey tum log khud apne aap ko jitna nuqsaan pohnchana chahte ho Quraish is se ziyadah tum ko nuqsaan nahi pohncha sakte, tum log apne betey aur bhaiyon se khud hi larna chahte ho.”

Chu ke Abdullah Bin Ubi aur is ke saathiyon ke aksar rishtedaar emaan la chuke the is liye Huzoor  Aleh Salato Wasalam ki baat ba asaani in ki samajh mein aagai aur in halaat mein Abdullah Bin Ubi jang ke iradey se baaz aagaya ab is ke saathi bhi larna nahi chahte the.

1.   Hazrat Saad r.a Bin Maaz ki Abu Jehal se taqrar

Hazrat Saad r.a Bin Maaz ne jab umre ka iradah kiya to wo Umiya Bin Khalaf ke han mehman howe. Aik din Hazrat Saad r.a Umiya ko sath le kar Bait ullah ki taraf nikle to abu jehal se mulaqaat hogai. Abu Jehal ne pocha: “Tumhare sath kon he?”

Umiya ne kaha: “Mery sath Saad r.a hain.”

Abu Jehal ne Hazrat Saad r.a ko mukhatib karty howy kaha: “Tum logon ne “Be deen logon” (musalmano) ko panah de rakhi hey aur in ki har tarha se imdad o tawun kar rahe ho! mein har giz ye nahi dekh sakta ke tum log aakar Kabaa ka tawaaf karo. Khuda ki qasam! Agar tum Umiya ke sath na hoty to zindah bach kar nahi ja sakte the.

“Agar tum hamey Hajj aur tawaaf se mana karo ge to hum bhi tumhara Madina wala raasta band kar den ge.” Hazrat Saad r.a ne ba awaz buland kaha:

Ahle Makka ki maishat ka sara daaromadaar is tijarat par tha jo ahle Makka Shaam ke sath kiya karty the, Kiyonke Makka ki sar zameen to “Wadi Ghair Zi Zaraa” (na qabil zaraat) the, wahan ghalla ki pedawaar siry se hoti hi nahi thi. In ki dolat oon, khalen aur chamra wagera thi. Ahle Makka ye cheezen Shaam le ja kar farookht kar diya karty the aur wahan se zaroriyaat e zindagi khareed laty the. Is maqsad ke liye in ke tijarti qafley aksar o beshtar shaam ki taraf aaty jaty rehty the aur shaam jany ke liye behar soorat Madina ke paas se ho kar guzarna parta tha. Agar ahle Madina tijarat ka ye raasta band kar dety to ahle Makka faqa kasha par majboor ho jaty. Abu Jehal is haqeeqat se ba khoobi agah tha, is liye Hazrat Saad r.a ki dhamki sunne ke baad isy kuch bolne ka hosla na howa.

Quraish ne musalmano ko pegham pohnchaya ke tum is baat par maghroor na hona ke Makka se ma hifazat nikal aye ho hum Madine pohnch kar tumhare sath jang karen ge. In halaat mein Huzoor  Aleh Salato Wasalam raat jag kar guzaarte the ya Sahaba Karaam r.a ke pehre mein sooty the. Yahan tak ke Allah Talah ne Huzoor  Aleh Salato Wasalam ko hifazat ki basharat farmai.

Huzoor Aleh Salato Wasalam ne farmaya “logon! Wapis jao Allah Talah ne meri hifazat ka wada farmaya hey.”

Halaat jab dugargun hogaye aur Quraish kisi bhi tarha baaz na aye to Allah Talah ne musalmano ko jang ki ijazat de di.

Allah Talah ka irshad he:

“Ijazat de di gai in logon ko jin ke khilaaf jang ki ja rahi thi, Kiyonke wo mazloom hain aur Allah Talah yaqeenan in ki madad par qadir hain.”

(Surah Hajj-ayat-39)

  3……..TIJAARTI SHAHRAH:

   Jangi hikmat e amli ke tehat musalmano ne faisla kiya ke jis tarha Qabeela e Quraish ne Madina ko muashi muhasara mein liya howa tha isi tarha wo bhi Makka ke tijaarti qaaflon ko Madina se guzarne na den.

4……. Abu Sufiyaan ka tijaarti qaafla:

Quraish ne musalmano ki hijrat ke sath hi Madine par jang karne ki tiyariyan shuru kar di thien. Hamle ke liye sab se bari zarorat jang ke ikhrajaat the. Quraish ka jo karwan tijaarat ke liye shaam rawana howa to Makke ki abaadi ne raqoom muhaiyya kien. Is tijaarti qaafle mein aurton ne bhi hissa liya.

Madine ki hadood se guzar kar Makka jane waly is qaafle mein aik hazaar onth the jin par qeemti samaan tha. Riwayat ke mutabiq is samaan ki maliyat kam o besh basat kilo sone ke barabar thi. Is qafle ki hifazat ke liye challis admi muqarrar the.

Abu Sufiyaan ka ye tijaarti qaafla Makke se Shaam jaty howy bach nikla tha. Yehi qaafla jab Shaam se wapis aany wala tha to kisi fitna pardaaz ne afwah ura di ke musalman is qaafle ko loot len gen.

Abu Sufiyaan ko jab ye khabar pohnchi to wo sakht khofzada hogaya. Isi waqt aik taiz raftaar qasid Zamzam Bin Umro Al Ghaffari ko Makka ki taraf rawana kiya aur hidayat ki ke Quraish ko ittila kar de ke jis qadar mumkin ho apne is maal e kaseer se bhare howy tijaarti qaafle ki khabar len aur apna sarmaya bachayen q ke Madina se Muhammad (alhe Salato wassalaam) apne Ashaab ke hamrah is qaafle se taaruz ke liye rawana howy hain.

Zamzam Ka Waweela:

Zamzam bohat jald Makka pohnch gaya. Apni faryaad ko musar banane ke liye is ne apne onth ke naak aur kaan kaat diye. Kajawa ulat diya aur apni qameez phar kar nehayat dard naak awaaz mein chillane laga.

“Aye jamat e Quraish! Qaafle ko pohncho, qaafle ko pohncho. Abu Sufiyaan tumhara jo maal le kar aaraha he, is par Muhammad (alhe Salato wassalaam) aur in ke sathiyon ne hamla kar diya hey. Mujhe umeed nahi hey ke tum is ko bacha sako. Faryaad he, faryaad hey.”

Zamzam ka waweela sun kar bohat se log jama hogaye aur kehne lage kiya Muhammad (alhe Salato wassalaam) ye chahte hain ke h umraa  maal raiga chala jaye. Hum apne maal ki hifazat ke liye jaye ge aur dekhen ge ke in musalmano par kiya guzarti hey. Is tarha bazahir to inhon ne shujaat o hamiyat ka muzahira kar diya, magar andar se sab ke dil laraz rahe the Kiyonke inhi dino Huzoor  Aleh Salato Wasalam ki phoppi Aatka ne aik khuwab dekha tha.

Bibi Aatka Bint E Abdul Muttalib Ka Khuwab:

Bibi Aatka ne khuwab dekha ke shatar sawaar Makka se bahir khara hey aur ba awaz e buland keh raha he

“Ay dhoke bazo! Teen din ke baad is taraf rawana ho jao jahan tum ne qatal ho kar girna hey.”

Is ki awaaz sun kar majma lag gaya aur is ke peche peche chalne laga. Wahan se chal kar wo sawaar Masjid e Haram mein aaya aur Kabaa ki chaatt par kharey ho kar logon se mukhatib ho kar wohi elaan kiya hey.

Phir daftan wo sawaar Jibl e Abu Qais ki choti par nazar aya aur yehi elaan karne laga. Is ke baad is ne Jibl e Abu Qais ki choti se aik pathar neche ki taraf lurhka diya. Wo pathar neeche aya aur toot gaya aur is ke tukre ur ur kar Ahle Makka ke gharon mein girne lage. Bibi Aatka kehti hain ke Makka ka koi ghar aisa nahi bacha jis mein is ka koi tukra na gira ho.

Subah howi to Bibi Aatka ne ye khuwab apne bhai Abbas ko sunaya aur kaha ke kisi aur se is ka zikar nahi karna. Abbas ne raaz dari ke sath yehi khuwab apne dost ko sunaya. Is tarha jald hi ye baat sare Makka mein phail gai.

Teesre din Hazrat Abbas Haram mein gaye to wahan Abu Jehal chand logon ke sath betha tha. Is ne Hazrat Abbas ko dekhte hi kaha:

“Tumhare mard to nabowat ke dawey daar the hi…….ab tumhari aurton ne bhi nabowat ka dawa karna shuru kar diya hey.”

Kiya matlab…..? kis ne nabowat ka dawa kiya he? Hazrat Abbas ne heart se pocha.

Ye Aatka ne jo khuwab biyan kiya hey ye nabowat ka muzahira nahi to aur kiya he?

Aatka ke biyan ke mutabiq kisi sawaar ne ahle Makka se kaha hey ke teen din ke baad is taraf rawana hojao jahan tum ne qatal ho kar girna hey. Ab hum teen din tak intezaar karen gen. agar teen din tak kuch na howa to hum sab mutafaqqa tor par tum logon ke barey mein likh den ge ke tumhara gharana arab ka sab se jhoota gharana hey.

Abhi guftugu ho rahi thi ke Abu Sufiyaan ka qasid Zamzam Bin Umro Al Ghaffari Makka mein dakhil howa aur is ne chekh chekh kar Abu Sufiyaan ka pegham sunana shuru kar diya. Goya teesre din hi Aatka ke khuwab ki sadaqat zahir hona shuru hogai.

Ahl E Makka Ki Tayariyan:

Abu Sufiyaan ke pegham sunte ho Makka mein halchal mach gai. Quraish mein koi mard o aurat aisa na tha jis ne apni puri ponji o sarmaya is lashkar ke liye kharch na kiya ho. Quraish ke ghaiz o ghazab ke badal barey zor se utha aur tamam arab par cha gaya. Quraish ke barey barey sardaar aur har qabeele ke log jang ke liye tiyaar hogaye. Makka mein do tarha ke log the ya to aadmi khud jang ke liye tiyaar tha ya is ne apni jagah kisi dusre ko namzad kar diya tha.

Mauzizen e Makka mein se koi peeche na raha. Sirf Abu Lehab ne apni jagah aik aadmi ko bheja jo is ka maqrooz tha. Gardo pesh ke qabail ko bhi Quraish ne bharti kiya.

In ke pesh e nazar ye nahi tha ke qaafle ko bachaya jaye balke wo is irade se nikle the ke aaye din ke khatre ko hamesha ke liye khatam kar diya jaye aur qabail ko is had tak maroob kar den ke aindah ke liye ye tijaarti shahrah bilkul mehfooz hojaye.

Lashkar ki tadaad aik hazaar se zaeed thi. Jin ke paas aik so ghorey aur chey so zarah thien. Onth kasrat se the. Lashkar ka sipa salaar Abu Jehal tha.

Quraish barey takabbur o gharoor se gane bajane wali aurton aur tablon ko sath le kar akartey howe Madina Munawwara ki taraf rawana howe. Ghizai zaroriyaat puri karne ke liye bohat sare onth sath liye. Jahan parao hota onth zibah kiye jate, gosht bhona jata, gane wali aurten shujaat o inteqam ke mazameen par mushtamil nazmen ga kar jazbaat ubharti. Quran Kareem mein Allah Talah ne Quraish ke is lashkar ke bare mein farmaya:

“In logon jaise na bano jo itrate howe aur logon mein khud numai karte howe apne gharon se chale aur Allah ki rah se rokte the, jo kuch wo kar rahe hain Allah isy ghair leny wala hey.”

(Surah Al Anfal-ayat-47)

MAJLIS E SHURAA:

Huzoor Aleh Salato Wasalam har waqt halaat se bakhabar rehte the. Huzoor  Aleh Salato Wasalam ne Hazrat Taha r.a Bin Ubaid aur Hazrat Saeed r.a Bin Zaid ko halaat ka pata lagane ke liye rawana farmaya. Huzoor  Aleh Salato Wasalam ko in halaat ki ittila mili to Huzoor  Aleh Salato Wasalam ne Sahaba Karaam r.a ko jama kiya aur Quraish ki rawangi ke bare mein in ko bataya.

“Aik taraf shumaal mein tijaarti qaafla hey aur dusri taraf junoob se Quraish ka lashkar a raha hey. Allah Talah ka wada hey in dono mein se aik par h umraa  ghalba ho jaye ga.”

“Aur (Yaad karo) jab wada kar raha tha tum se Allah Talah aik ka do gurhon mein se ke wo tumhe mil jaye ga aur tum ye chahte the ke kamzoor ghiroh mil jaye tumhe aur iradah tha Allah Talah ka ye ke sabit kar dikhaye haq ko apne irshadaad se aur kaat de jar kafiron kit a ke sach ko sach aur jhoot ko jhoot kar de khuwa nagawaar guzre mujrimo ko.”

(Surah Al Anfaal-ayat-7-8)

Huzoor Aleh Salato Wasalam ne Ansaar o Mahajireen se farmaya:

“Batao tum kis se muqabla karna chahte ho?”

Aik ghiroh ne arz kiya:

“Abu Sufiyaan ke qaafile par hamla kiya jaye.”

Huzoor Aleh Salato Wasalam ne phir dariyaft farmaya.

Hazrat Maqdaad r.a Bin Umro ne arz kiya:

“Ya Rasool Allah Aleh Salato wassalaam! Jis taraf aap Aleh Salato Wasalam ke rab Aap Aleh Salato Wasalam ko hukum de rahe hain Huzoor  Aleh Salato Wasalam is taraf chaliye. Jis taraf bhi aap jayen, hum Huzoor  Aleh Salato Wasalam ke sath hain. Hum Huzoor  Aleh Salato Wasalam ke sath is waqt tak rahen ge jab tak hamare jisam mein jaan hey.”

Huzoor Aleh Salato Wasalam ne Ansaar ko mukhatib kiye baghair apna sawal dhuraya. Hazrat Saad r.a Bin Maaz uthe aur arz kiya:

“Shayad Huzoor  Aleh Salato Wasalam ka roye sakhan hamari taraf he?”

Huzoor Aleh Salato Wasalam ne farmaya: “Han”

Hazrat Saad r.a na kaha:

“Hum Huzoor Aleh Salato Wasalam par emaan laye hain, Huzoor  Aleh Salato Wasalam ki tasdeeq kar chuke hain ke Huzoor  Aleh Salato Wasalam jo kuch laye hain wo haq hey aur Huzoor  Aleh Salato Wasalam se ehad kar chuke hain. Aye Allah Talah ke Rasool Aleh Salato wassalaam! Jo kuch aap Aleh Salato Wasalam ne iradah farmaya hey hum is se muttafiq hain. Qasam hey is zaat ki jis ne Huzoor  Aleh Salato Wasalam ko haq ke sath bheja hey. Agar Huzoor  Aleh Salato Wasalam hamey samandar mein le jayen to hum Huzoor  Aleh Salato Wasalam ke sath samandar mein utar jayen ge aur hum mein se aik aadmi bhi peeche nahi rahe ga. Hum dil o jaan se Huzoor  Aleh Salato Wasalam ke sath hain. Insha.allah jang mein sabit qadam rahen gen aur Huzoor  Aleh Salato Wasalam jang mein hamari jaan nisaari dekh len ge.”

Huzoor Aleh Salato Wasalam ne apne sathiyon ke pur josh jazbe aur himmat ko dekh kar ye faisla kiya ke Abu Sufiyaan ke qaafle par hamla nahi karen ge balke junoob ki taraf se aane wale Quraish ke lashkar ki taraf pesh qadmi karen ge. Huzoor  Aleh Salato Wasalam ke is faisle se ye baat zahir hoti hey ke aap Aleh Salato Wasalam ne khabhi maal o dolat ko ehmiyat nahi di. Huzoor  Aleh Salato Wasalam ka ye faisla koi mamooli faisla nahi tha.

Islami Lashkar Ki Tadaad Aur Kamaan Ki Taqseem:

Huzoor Aleh Salato Wasalam rawangi ke liye tiyaar howe to Huzoor  Aleh Salato Wasalam ke hamrah teen so afraad the (yani 313 ya 314 ya 317) jin mein se 82 ya 83 ya 84 Mahajir the aur baqi Ansaar the. Is lashkar ne Ghazwey ka koi khas ehtmaam nahi kiya tha na mukammal tiyari thi.

Lashkar mein sirf do ghorey aur sattar onth the, jin mein se har onth par do ya teen aadmi bari bari sawaar hoty the. Aik onth Huzoor  Aleh Salato Wasalam , Hazrat Ali (r.a) r.a aur Hazrat Marsad r.a Bin Abi Marsad Ghanwaa ke hisse mein aya tha jin par teeno hazraat bari bari sawaar hoty the. Lashkar ki tanzeem is tarha ki gai ke aik lashkar Muhajireen ka banaya gaya aur aik Ansaar ka.

Muhajireen ko ilm Hazrat Ali (r.a) r.a Bin Abi Talib ko diya gaya aur Ansaar ka ilm Hazrat Saad r.a Bin Maaz ko aur journol kamaan ka parcham jis ka rang safaid tha Hazrat Masab r.a Bin Umair ko diya gaya. Memna (dayen janib) ke afsar Hazrat Zubair r.a Bin Awam muqarrar kiye gaye aur maisara (bayen janib) ke afsar Hazrat Maqdad r.a Bin Aswad. Purey lashkar mein sirf yehi dono buzurg shehsawar the. Lashkar ke saaqa (akhri hissa) ki kamaan Hazrat Qais r.a Bin Abi Sasa ke hawaley ki gai aur sipa salaar aala ki hesiyat se journol kamaan Huzoor  Aleh Salato Wasalam ne khud sambhali.

Samaan e jang na kaafi tha, magar Huzoor  Aleh Salato Wasalam aur Huzoor  Aleh Salato Wasalam ke sathi samajh chukey the ke ye waqt jaan ki bazi lagane ka hey is liye Allah Talah ke bharosy par inhon ne junoob mashriq ki taraf march (march) kiya. Is taraf se Quraish ka lashkar aaraha tha.

Makki Lashkar Mein Phot

Quraish ko badar ke qareeb hajfa ke muqam par pohnch kar jab maloom howa ke Abu Sufiyaan ka qaafla khatre se nikal gaya hey to Qabeela Zuhra aur Adi ke sardaron ne kaha:

“Ab larna zarori nahi hey.”

Abu Jehal khara hogaya aur nehayat gharoor o takabbur se bola:

“Khuda ki qasam! Hum wapis nahi jayen ge. Badar ja kar wahan teen rooz qayaam karen ge, khoob khayen ge, piyen ge aur jashan manain ge aur sara Arab h umraa  is safar ka haal sune ga aur hamesha ke liye musalmano par hamari dhaak beth jaye gi.”

Zuhra aur Adi ke logon ne Abu Jehal ki jab ye baat suni to inhen yaqeen hogaya ke ye mehaz iqtedaar ki jang hey. Abu Jehal ke dil mein Bano Hashim ke barey mein hasad aur bughaz hey aur mehaz is liye wo Huzoor  Aleh Salato Wasalam ki sadaqat ki mukhalfat kar raha hey. Chunacha Zuhra aur Adi ke log wapis chale gaye.

Lashkar ne apna safar jari rakha. Ab lashkar ki tadaad aik hazaar thi aur is ka rukh badar ki janib tha. Badar pohnch kar is ne aik teele ke qareeb parao dala. Ye teela Wadi e Badar ke junoob mein waqiya hey aur inhon ne munasib jagoh par chukiyan bana lien.

Badar Ka Medaan:

Sarwar e do Aalam Huzoor  Aleh Salato Wasalam Adwat ud duniya ki taraf se wadi e badar mein dakhil howe. Musalmano ne jis jagah qayam kiya wahan koi chasma ya khuwan nahi tha. Zameen reteeli thi. Onthon ke paon rait mein dhas rahe the.

Hazrat Khabab r.a Bin Manzar ne arz kiya:

“Ya Rasool Allah Aleh Salato wassalaam! Is jagah par qayam ka hukum aap Aleh Salato Wasalam ko Allah Talah ki taraf se mila hey ya ye aik jangi tadbeer he?”

Huzoor Aleh Salato Wasalam ne farmaya:

“Ye mehaz aik jangi tadbeer hey.”

Hazrat Khabab r.a Bin Manzar ne arz kiya

“Ya Rasool Allah Aleh Salato Wasalam ye jagah qayam ke liye munasib nahi. Huzoor  Aleh Salato Wasalam aagey tashreef le chalen aur Quraish ke sab se nazdeek jo chasma hey is par qabza kar len, is tarha sarey purane khuwen hamare aqab mein hojayen ge phir hum sare khuwon ko band kar den ge aur sirf aik khuwan rehne den ge aur wahan aik hooz bana kar pani jama kar len gen.”

Huzoor Aleh Salato Wasalam ne ye raye pasand farmai aur is par amal kiya gaya.

Is raat Allah Talah ne badal bhej diye khoob musla dhaar barish howi. Musalmaan reteely ilaqe mein khema zan the. Barish ki waja se rait jam gai aur musalman asaani se chalne phirne lage. Lekin Quraish ne jis jagah kheme dale the wahan barish se har taraf kichar ban gai. Chalna phirna dushwaar hogaya. Raat bhar wo apne khemon mein mehsor ho kar bethy rahe.

Is ehsaan ka Allah Talah ne Quran Kareem mein zikar farmaya he:

“Aur jab ke Allah Talah ne asmaan se pani barsaya ke tum ko paak kare.”

(Surah Al Anfaal-ayat-11)

Jagah jagah pani ko rook kar chote chote hooz bana liye gaye. Agarchey  pani is tarha mehfooz kar liya gaya tha lekin Allah Talah ke mehboob Huzoor  Aleh Salato Wasalam ne dushmano ko bhi pani leny ki ijazat marhammat farma di.

Markaz e Qiyadat:

Sahaba Karam r.a chasme par parao daal chuke to Hazrat Saad r.a Bin Maaz ne ye tajweez pesh ki ke kyn na musalmaan Huzoor  Aleh Salato Wasalam ke liye aik markaz e qiyadat tameer kar den ta ke khuda na khuwasta fateh ke bajaye shikast hojaye ya hangami halaat pesh aajayen to is ke liye hum phele hi se tiyar hain, chunacha inhon ne arz kiya:

“Ay Allah ke Nabi Aleh Salato wassalaam! Kyn na hum Huzoor  Aleh Salato Wasalam ke liye aik chappar tameer kar den jis mein Huzoor  Aleh Salato Wasalam tashreef rakhen ge aur hum Huzoor  Aleh Salato Wasalam ke liye sawariyan tiyar rakhen ge. is ke baad apne dushman se laren ge. agar Allah Talah ne izzat bakshi aur hum dushman par ghalib agaye to hum par Allah Talah ka fazal hoga aur agar khuda na khuwasta dusri sorat pesh aayi to Huzoor  Aleh Salato Wasalam sawaar ho kar hamari qoam ke logon ke paas chale jayen ge.”

Allah Talah ke Habib Huzoor  Aleh Salato Wasalam ne Hazrat Saad r.a Bin Maaz ki tareef farmai aur in ke liye dua e khair ki.

Musalmano ne medaan e jang ke shumaal mashriq mein aik onche teele par saibaan banaya jahan se pura medaan nazar ata tha. Hazrat Saad r.a Bin Maaz ki kamaan mein Ansari najawan ka aik dasta bana diya gaya.

Jumme ki raat har shakhs par neend musallat thi aur wo ongh raha tha. Musalmano aur Quraish ke khemon ke darmiyan rait ka aik bohat bara teela tha. Huzoor  Aleh Salato Wasalam ne Hazrat Ammar r.a Bin Yasir aur Hazrat Abdullah Bin Masood ko Quraish ka haal maloom karne ke liye bheja inhon ne wapis aakar bataya ke wo log sakht pareshan hain.

Jab ke is raat musalmano ko khoob neend aayi. In mein etmad tha. Inhen ye tawaqqa thi ke subah apni ankhon se apne raab ki basharaten dekhen ge.

Subah utthey to musalman hasshash basshash the. Safar ki saari thakan daur ho chuki thi. Magar Huzoor  Aleh Salato Wasalam puri raat jaagte rahe aur Allah Talah se fateh ki dua karte rahe. Subah howi to logon ko namaz ke liye awaaz di aur namaz ada karne ke baad jahaad se mutaliq waaz farmaya.

Badar Ki Janib Kooch:

Quraish ne wadi ke bahir apne khemon mein raat guzari aur subah foji daston ke sath teeley se neeche utre aur badar ke janib Koch kiya. Pani na milne se mushriqeen ki halat ghair hogai, akhir majboor ho kar isi khuwen par aye jis par musalmano ka qabza the. Huzoor  Aleh Salato Wasalam ne farmaya:

“Inhen chor do, inhen ji bhar kar pani pi lene do.”

Quraish ne musalmano ke lashkar ki qowat ka andaza lagane ke liye Umair Bin Wahab Jamhi ko bheja. Umair ne ghorey par sawaar ho kar chakkar lagaya phir wapis ja kar bola:

“Taqreeban teen so aadmi hain. Lekin zara tehro mein dekh lon ke lashkar ke log aur kisi jagah to jama nahi hain?”

Is ke baad wo wadi mein ghora dorata howa daur tak nikal gaya lekin isy mazeed fouj nazar nahi ayi.

Aamne Saamne Lashkar:

17 Ramzaan barooz e Jumma Aleh subah Huzoor  Aleh Salato Wasalam ne harbi usolon ke mutabiq fouj ko munazzim kiya. Is muqe par Huzoor  Aleh Salato Wasalam ne sifen durust farma kar musalmano ko hidayat farmai ke mari ijazat ke baghair larai shuru na ki jaye. Jab tak akhri ehkaam na sun lo, apni jagah par qaim raho. Is ke baad tareeka e jang ke barey mein khususi rehnumai farmate howe irshad farmaya:

“Jab mushriqeen tumhare qareeb ajayen to tum in par teer chalana.”

Dusri taraf mushriqeen ka ye haal tha ke Abu Jehal ne dua ki. Is ne kaha:

“Aye Khuda! Hum mein se jo fareeq qarabat ko ziyadah kantne wala aur ghalat harkaten karne wala hey isy aaj ap halaak kar dijiye. Aye Khuda! Hum mein se jo fareeq ap ke nazdeek ziyadah mehboob hey aur ziyadah pasandedah hey aaj is ki madad farmaiye.”

Allah Talah ne Ayat nazil farmai:

“Agar tum faisla chahte to tumhare paas faisla agaya, aur agar tum baaz ajao to yehi tumhare liye behtar he, lekin agar tum (apni is harkat ki taraf) palto ge to hum bhi (tumhari saza ki taraf) palten ge aur tumhari jamaat agarchey  wo ziyadah hi q na ho tumhare kuch kaam nahi aye gi. Aur yaad rakho Allah Talah momineen ke sath hain.”

(Surah Al Anfaal-ayat-19)

Lashkar e Islam Se Khitaab:

Is muqey par jab ke fareqeen puri tayyari ke sath sifen bandh kar jang ke liye tayyar the. Is waqt Allah Talah ke mehboob Aleh Salato Wasalam ne lashkar Islam se khitab farmaya.

Huzoor Aleh Salato Wasalam ne pehle Allah Talah ki hamd-o-sana ki.

Phir farmaya:

“Main tumhen in kamon se mana karta hon jin se Allah Talah ne mana farmaya hey.Allah Talah ki shan buhat bari hey. Wo haq ka hukum deta hey aur sacchai ko pasand karta hey aur naik kaam karne walon ko apni bargah main buland manzilon par faiez karta hey. Isi ke sath in ka zikar buland hota hey aur isi se inhen fazilat hasil hoti hey aur aaj tum haq ki manzilon mein se aik manzil par kharey ho. Is muqaam par Allah Talah kisi se koi amal qabool nahi kare ga siwaye is ke jo mehaz is ki raza ke liye kiya gaya ho aur jang ke muqey par sirf sabar hi aisi cheez hey jis se Allah Talah hazn o malaal ke daur karta hey. Aur isi sabar ki barkat se gham se nijaat deta hey aur isi sabar se tum akhrat mein nijaat pao ge. Tum mein Allah ka Nabi mojood hey jo tumhe baaz cheezon se mana karta hey aur baaz cheezon ka tumhe hukum deta hey. Allah Talah ne apni kitaab mein jin cheezon ko tumhe hukum diya hey in par amal karo aur jin nishaniyon ka zikar hey in par ghor o fikar karo. Allah Talah ne tumhe zillat ke baad izzat bakshi hey. Is kitaab ko mazboti se pakar lo is se tumhara Rab tum se raazi hoga. Beshak is ka wada haq hey aur is ka qol saccha hey. Beshak mein aur tum Allah Talah ki madad talab karte hain jo hiyyo qaiyoom hey. Wohi hamari pusht panahi karne wala hey aur isi ka daman karam hum ne pakra howa hey. Is par hum ne bharosa kiya hey aur isi ki taraf hum lout kar jayen ge. Allah Talah hamari aur tamam musalmano ki maghfirat farmaye.”

Qaleel Tadaad:

Quraish ka lashkar Atba Bin Rabiya ki qayadat mein tha. Jis waqt dono lashkar aik dusre ke aamne saamne howe to Huzoor  Aleh Salato Wasalam ne dekha ke teen kafiron ke muqable mein aik musalmaan hey aur wo bhi puri tarha maslah nahi hey to Huzoor  Aleh Salato Wasalam ne Allah Talah ke Huzoor  dua ki:

“Ya Allah! Ye Quraish hain aur gharor ke sath aye hain ta ke aap ke Rasool ko jhoota sabit karen. Ya Allah! Bus ab ajaye aap ki madad. Wo madad jis ka wada aap ne mujh se farmaya hey.”

Ain isi waqt Huzoor  Aleh Salato Wasalam aur sary Islami lashkar par chand lamhon ke liye neend tari hogai. Allah Talah ne khuwab mein Aap Aleh Salato Wasalam ko Quraish ki tadaad qaleel dikhai. Jis ko Sahaba Karam r.a ne bhi dekha.

“Jab ke Allah Talah ne tujhe tery khuwab mein in ki tadaad kam dikhai aur (aye musalmano) agar in ki ziyadti dikhata, tu tum buzdil ho jate aur is kaam ke bare mein apas mein ikhtilaaf karte lekin Allah Talah ne bacha liya. Wo dilo ke behdon se khoob agah hey.”

(Surah Al Anfaal-ayat-43)

Allah Talah ka ye kis qadar azeem inaam tha ke medaan e jang mein kuffaar ki tadaad ko thora kar ke dikhaya ta ke musalmano jang ka iqdaam karen aur kuffaar ko bhi musalmano ki tadaad thori dikhai jis ki waja se kuffaar ne larne mein ziyadah koshish nahi ki.

“Jab ke is ne ba waqt mulaqat inhen tumhari nigahon mein bohat kam dikhaye aur tumhe inki nigahon mein bohat kam dikhaya Allah Talah is kaam ko anjaam tak pohncha de jo karna hi tha aur sab kaam Allah hi ki taraf pherey jaty hain.”

(Surah Al Anfaal-ayat-44)

Kaseer Tadaad:

Aur jab larai shuru hogai to doraan e jang kafiron ko musalman apne se do guna nazar ate the. Baad mein musalmano ki tadaad ziyadah dikhane mein ye hikmat nazar ati hey ke musalmano ko fouj kasrat mein dekh kar kuffaar ke andar khof aur haibat beth jaye.

“Yaqeenan tumhare liye ibrat ki nishani thi in do jamaton ki rah mein jo lar rahi thien aur dusra ghiroh kafiron ka thaw o inhen apni ankhon se apne se dugna dekhte the aur Allah Talah jisy chahe apni madad se qavi karta hey. Yaqeenan is mein ankhon walon ke liye bari ibrat hey.”

(Surah Al Imran-ayat-13)

Mabarazat:

Phele fardan fardan muqabla howa. Quraish ke teen behtreen shehsawaar Atba Bin Rabiya, Sheeba Bin Rabiya aur Waleed Bin Aqba mabarazat ke liye medaan mein aye aur teeno halaak hogaye.

Quraish apne teen behtareen shehsawaron aur kamandaron se mehroom hogaye, is liye inhon ne ghaiz o ghazab se be qabo ho kar yakbaar hamla kar diya. Dusri taraf musalmaan apne Raab se nusrat aur madad ki dua karte howe apni apni jagahon par kharey hogaye aur mushriqeen ke hamlon ko na kaam bana diya.

Huzoor Aleh Salato Wasalam ki dua:

Huzoor Aleh Salato Wasalam ne apne Sahaba r.a ko takeed ki ke mery hukum ke baghair hamla nahi karna. Agar dushman tumhe aakar ghaer len to nezon se inhen daur rakho. Huzoor  Aleh Salato Wasalam Hazrat Abu Bakar Siddique r.a ke hamrah is saibaan mein tashreef le gaye jo Huzoor  Aleh Salato Wasalam ke liye banaya gaya tha. Phele Huzoor  Aleh Salato Wasalam ne do rakat namaz ada ki phir Allah Talah se nusrat o madad ka wada pura karne ki dua ki.

“Aye Allah Tala! Aap ne mujh se jo wada kiya hey isy pura farma dijiye. Aye Allah! mein aap se aap ke wade ka sawal karta hon. Aye Allah! Aap par emaan lane wale qaleel hain.”

Huzoor Aleh Salato Wasalam ne ro kar Allah Talah ke Huzoor  dua di. Yahan tak ke dono kandhon se chadar gir gai. Hazrat Abu Bakar Siddique r.a ne chadar durust farmai aur arz kiya:

“Aye Allah ke Rasool Aleh Salato wassalaam! Bus farmaiye, yaqeenan Allah Talah apne ehad ko pura farmayen ge.”

Allah Talah ne farishton ko hukum diya:

“Me tumhare sath hon, tum ahle emaan ke qadam jamao, mein kafiron ke dil mein rob daal don ga.”

(Surah Al Anfaal-ayat-12)

Aur Huzoor  Aleh Salato Wasalam ke pas wahi bheji ke

“Me aik hazaar farishton se tumhari madad karon ga jo aage peeche ayen ge.”

(Surah Al Anfaal-ayat-9)

Farishton Ka Nazool

Is ke baad Huzoor  Aleh Salato Wasalam par ghanodgi tari hogai. Chand lamhon baad Huzoor  Aleh Salato Wasalam ne ankhen kholien phir sar e mubarrak uthaya aur farmaya:

“Abu Bakar khush hojao, Allah ki madad a pohnchi. Ye Jibrail a.s hain apne ghorey ki lagaam thamey kharey hain.”

Is ke baad Huzoor  Aleh Salato Wasalam saibaan se bahir tashreef laye, Huzoor  Aleh Salato Wasalam ne zarah pehan rakhi thi. Huzoor  Aleh Salato Wasalam nehayat bahaduri ke sath aagey barhe aur farmaya:

“Anqareeb dushman shikast kha jaye ga aur pusht phair kar bhage ga.”

(Surah Al Qamar-ayat-45)

Is ke baad Huzoor  Aleh Salato Wasalam ne kankariyon ki aik mutthi li aur Quraish ki taraf rukh kar ke farmaya: “Shahat ul Wajuhu. Chehre bigar jayen.”

Aur sath hi mitti in ke chehron ki taraf phenk di. Phir mushriqeen mein se koi bhi aisa nahi tha jis ki dono ankhon, nathne aur mu mein aik mutthi mitti mein se kuch na gaya ho.

Huzoor Aleh Salato Wasalam ke is amal ko Allah Talah ne apna amal qarar diya.

Allah Talah ka irshad he:

“Jab aap (alhe Salato wassalaam) ne phenka to dar haqeeqat Huzoor  (Alhe Salato Wassalaam) ne nahi phenka, balke Allah Talah ne phenka.”

(Surah Al Anfaal-ayat-17)

Jawabi Hamla:

Jis waqt Huzoor  Aleh Salato Wasalam ne jawabi hamle ka hukum sadir farmaya, dushmano ki himmat passt hogai thi aur in ka josh o kharosh sard par gaya tha. Sahaba Karam r.a ko jab hamla karne ka hukum mila is waqt in ka josh jehad shabab par tha. Inhon ne nehayat shakht hamla kiya. Wo dushmano ki siffen darham barham karte howe agey barhte rahe. Ye dekh kar in ke josh o gharosh mein mazeed taizi agai ke Huzoor  Aleh Salato Wasalam ba nafs e nafees zarah pehne howe taiz taiz tashreef la rahe hain aur farma rahe hain:

“Anqareeb ye dushman shikast kha jaye ga aur pusht phair kar bhage ga.”

(Surah Al Qamar-ayat-45)

Musalmano ne nehayat pur josh jang ki aur farishton ne in ki madad farmai. Riwayat hey ke is din aadmi ka sar kat kar girta aur ye pata nahi chalta ke isy kis ne qatal kiya hey aur aadmi ka hath kat kar girta aur ye pata nahi chalta ke isy kis ne kata hey.

Hazrat Ibn e Abbas r.a farmatey hain:

“Aik musalmaan mushriq ka taqub kar raha tha ke anchanak korey marne ki awaaz ayi aur is ne kisi shehsawaar ki awaaz suni jo keh raha tha ke taiz qadam agey barh.

Musalmaan ne mushriq ko samne dekha ke wo zameen par gira howa hey aur is ki naak par choot ka nishan tha, chehra zakhmi tha jaise kisi ne korey se mara ho aur chehre par neil par gaya tha.

Ansari musalmaan ne ye waqiya Syedena Huzoor  Aleh Salato Wasalam se biyan kiya to Huzoor  Aleh Salato Wasalam ne farmaya:

“Tum sach kehte ho, ye teesre asman ki madad thi.”

Abu Jehal Ka Qatal:

Do Ansari nojawano Hazrat Maooz r.a aur Hazrat Maaz r.a Abu Jehal ki taak mein the, nazar parte hi Abu Jehal par hamla kiya aur wo mar gaya. Abu Jehal ke qatal se Quraish mein bad dili phail gayi.

Umaiyya Ka Qatal:

Lekin abhi aik sardaar Umaiya Bin Khalaf baqi tha.Hazrat Abdur Rehman r.a Bin Oof ne Umaiyya se kisi zamane mein wada kiya tha ke wo Madina aye ga to is ki jaan ke zamin hon ge. Badar mein is dushmanane Khuda se inteqaab lene ka khoob waqt tha lekin chun ke wadey ki pabandi Islam ka shuaar hey is liye wo Umaiyya aur is ke betey ko musalmano ko nazar se bacha kar nikaal dena chahte the. Ittifaaq se Hazrat Bilal r.a ne jo Makka mein is ke mashq sitam rah chuke the dekh liya aur Ansaar ko khabar kar di, sipahi toot parey aur Umaiyya ke betey ko qatal kar diya aur phir Umaiyya ki taraf barhey. Hazrat Abdur Rehman r.a bachane ke liye Umaiyya se lipat gaye lekin logon ne in ki parwah nahi ki aur neezey se Umaiyya ka kaam tamam kar diya. Umaiyya ke marte hi kuffaar ne medaan chor diya.

Shikast Faash:

Thori dair ke baad mushriqeen ke lashkar mein nakaami aur aztaraab ke asaar numayan hogaye. Kuffaar ki sifen musalmano ke sakht hamlon se darham barham hogayen aur murqa apne anjaam ko pohncha. Phir mushriqeen ka hujoom be tarteebi ke sath peeche hata aur in mein bhagdar mach gai. Quraish apne gharoor aur taqat ke bawajood be saro samaan fidaiyon ke hathon shikast kah gaye. Musalmano ke kul chudha aadmi shaheed howe aur Quraish ke bohat se namoor sardar halak hogaye aur mushaheer e Quraish mein se kai log giraftaar howe.

Maqtuleen Badar Se Khitaab:

Huzoor Aleh Salato Wasalam ka mamool tha ke fateh ke baad teen din tak wahin qayam farmate the ta ke thakey mandey sipahi araam kar len aur zakhmiyon ki marham patti kar ke wapsi ke safar ke liye taza tum hojayen. Badar mein Huzoor  Aleh Salato Wasalam teen din muqeem rahe aur teesre din hukum diya ke Huzoor  Aleh Salato Wasalam ki sawari lai jaye. Huzoor  Aleh Salato Wasalam is sawar howe, mujahideen ki aik jamaat bhi Huzoor  Aleh Salato Wasalam ke hamrah howi. Huzoor  Aleh Salato Wasalam is khuwen par tashreef le gaye jis mein kuffaar ki lashon ko daal kar isy mitti se dhanp diya gaya tha. Huzoor  Aleh Salato Wasalam ne aik aik ka naam le kar awaaz di.

Aye Atba Bin Rabiya…..!

Aye Sheeba Bin Rabiya…….!

Aye Abu Jehal Bin Hasshaam….!

Aye Umaiyya Bin Khalaf……!

Kiya ye acha nahi tha ke tum Allah Talah aur is ke Rasool Aleh Salato Wasalam ki farmabardari karte. Ab jab ke pardah uth gaya hey aur Allah Talah ke azaab ko dekh liya to tum musalmaan hone ki aarzo karte ho…....

Is ke baad farmaya!

Bila shuba hum ne isy haq paya, jo Allah Talah ne hum se wada farmaya tha kiya tum ne bhi isy haq paya, jis azaab ki waeed tum se ki gait hi.

Sahaba Karaam r.a ne arz kiya!

Ya Rasool Allah Aleh Salato wassalaam! Huzoor  Aleh Salato Wasalam in ajsaam se mukhatib hain jin mein arwah mojood nahi hain.

Huzoor Aleh Salato Wasalam ne farmaya:

“Qasam hey is Allah ki! Jis ke qabza qudrat mein meri jaan hey. Tum is se ziyadah is baat ke sunne waly nahi ho. Jo kuch mein biyan kar raha hon wo khoob sun rahe hain.”

Maal E Ghanimat:

Jang ke baad musalmano ke lashkar mein maal e ghanimat ke bare mein ikhtilaaf hogaya aur jab ye ikhtilaaf shiddat ikhtiyaar kar gaya to Huzoor  Aleh Salato Wasalam ne hukum diya ke jis ke paas jo kuch hey wo Huzoor  Aleh Salato Wasalam ke hawale kar de.

Sahaba Karaam r.a ne hukum ki tameel ki. Is ke baad Allah Talah ne wahi ke zariye is masle ka hal nazil farmaya.

“(Ay Muhammad s.a.w) log aap se ghanimat ke maal ke barey mein dariyaft karte hain (k kiya hukum he) Keh dijiye ke ghanimat Allah aur is ke Rasool ka maal hey to Allah se daro aura pas mein sulah rakho aur agar emaan rakhte ho to Allah aur is ke Rasool ke hukum par chalo.”

(Surah Al Anfaal-ayat-1)

Is ke baad Maal e Ghanimat ki taqseem ka tarika bhi Allah Talah ne is tarha bataya:

“Jaan lo ke tum jis qisam ki jo kuch ghanimat hasil karo. Is mein panchwa hissa Allah aur is ke Rasool ka aur ahle qarabat ka aur yateemon ka aur masakeen ka aur muhtajon ka aur musafiron ka hey.”

(Surah Al Anfaal-ayat-41)

Is ayat ke nazool ke baad Huzoor  Aleh Salato Wasalam ne is maal e ghanimat ko musalmano ke darmiyan taqseem farma diya.

“To jo maal e ghanimat tumhe mila he, isy khao (k wo tumhare liye) halal paak (he) aur Allah se darte raho beshak Allah bakhsne wala meharbaan hey.”

(Surah Al Anfaal-ayat-69)

Aseeraan E Jang ke Sath Husn E Salook:

Dusre rooz aseeraan e jang jang bargah risalat mein hazir kiye gaye to Huzoor  Aleh Salato Wasalam ne sab se phele in ke qayam o taam ki taraf tawajja farmai. Huzoor  Aleh Salato Wasalam ne inhen apne Sahaba Karaam r.a ke darmiyan hasb e hesiyat taqseem kara diya aur har aik ko takeed farmai ke wo apne hisse ke qaidiyon ki khuraak libaas aur araam ka pura pura khiyal rakhen.

Madina Munawwara pohnch kar chand rooz ke baad Huzoor  Aleh Salato Wasalam ne Sahaba Karaam r.a se mashwara kiya ke aseeraan e badar ka sath kiya karna chahiye?

Tamam Sahaba Karaam r.a ne is masle ke mutaliq apni apni raye pesh ki. Hazrat Abu Bakar Siddique r.a ne apni tajweez pesh ki:

“Ya Rasool Allah Aleh Salato wassalaam! In se fidya liye jaye aur in ko azaad kar diya jaye. Fidya se jo sarmaya akattah hoga wo musalmano ke liye taqwiyat ka bais hoga aur Allah Talah ki rehmat se koi baeed nahi ke in mein se kai log emaan le ayen aur apni behtreen salahiyaton ke bais ummat ki taqwiyat ka bais bane.”

Huzoor Aleh Salato Wasalam ne is tajweez ko pasand farmaya. Fidya ke liye koi khas miqdaar mutaiyan nahi thi. Har shakhs se hasb e hesiyat fidya liya jata tha.

“Aye peghambar! Jo qaidi tum logon ke qabze mein (giraftaar) hain in se keh dijiye ke agar Allah tumhare dilo mein naik niyati dekhe ga to jo (maal) tum se chen gaya hey is se behter tumhe inayat farmaye ga aur tumhare gunnah bhi muaf kar de ga aur Allah bakhsne wala meharbaan hey.”

(Surah Al Anfaal-ayat-70)

Ahle Madina ki ghalib aksariyat nakhuwandah thi. Ginti ke sirf chand afraad likhna parhna jante the. In aseeraan e jang mein jo log muflis aur nadaar the aur fidya ki raqam dene se qaasir the. Huzoor  Aleh Salato Wasalam ne farmaya ke jo shakhs dus bacchon ko likhna parhna sikha de ga, isy azaad kar diya jaye ga. Jab koi qaidi Madina ke dus bacchon ko parhna likhna seekha deta to isy azaad kar diya jata.

Abu Lehab Ka Hashar:

Jab Badar mein kuffaar ki ruswa kun shikast ke baad abhi aik hafta hi mushkil se guzra tha ke Allah Talah ke azaab ne Abu Lehab ko a pakra. Isy aik khatarnaak phonsi nikal ayi jisy arab bohat bura samajhte the aur is se bohat khofzada rehte the in ke nazdeek ye aik mutaadi bimari thi. Jab Abu Lehab ke beton ko pata chala ke in ke baap ko ye khatarnaak phonsi nikal ayi hey to inhon ne is ke paas aana jana tarak kar diya Chunachey wo tanha is ki aziyat aur dard se kai roz tak tarapta raha aur be kasi aur kasamparsi ki mout mar gaya. Teen din is ki lash be goro kafan pari rahi. Makka ke rais e azam ko dafan karne ke liye bhi kisi ne zehmat gawara nahi ki jab is ki lash phool kar phat gai to is ki badbu se sarey ahle muhalla preshan hogaye.

Imam Behqi dalail ul nabowat mein likhte hain aik shakhs ne is ke beton ke paas ja kar inhen malamat ki ke bad bakhto! Tumhe sharam nahi ati ke tumhare baap ki laash se badbu a rahi hey aur tum isy dafan bhi nahi karte. Inhon ne kaha hamey dar hey ke kahin ye bimari hamey bhi na lag jaye.

Bad naami ke khof se is ke bety aye lakriyon se is lashey ko dhakel kar aik gharhe mein daal diya aur is gharhe se daur kharey hokar pathar phenk kar is ko bhar diya.

Ehmiyat O Nataij:

1.    Ghazwa Badar Islam ki pheli larai thi jis mein musalmano ki fateh aik khaas ehmiyat rakhti hey. Chand be kas ghareeb ul watan Quraish Makka ke zulm o sitam se tang a kar tark e watan kar ke Madina mein panah guzeen howe the. Wo is qabil hogaye ke zalimo ko bazoor e shamsheer maar bhagaya. Is se musalmano ke hosle buland hogaye. Allah Talah ne musalmano ko taqweyat ata farmai. Dar haqiqat Islam ka urooj yahin se shuru hota hey ab musalman mehaz jila watan aur be khanma muhajir na the balke aik azaad aur zindah qoam ke afraad the aur is nemat ka zikar Allah Talah ne is tarha farmaya:

“Yaqenan Allah Talah ne tumhari badar mein madad ki jab tum kamzoor the. To Allah Talah se daro ta ke tum shukar guzaar ban jao.”

(Surah Al Imran-ayat-123)

2.    Jang Badar mein amal, dua aur nusrat ka formula musalmano ke liye har shuba zindagi mein mishle rah hey.

Jang Badar mein musalmano ki tadaad kuffaar ke muqable mein intehai kam thi. Huzoor  Aleh Salato Wasalam jang ke liye medaan mein tashreef le gaye aur phir Allah Talah se madad ki darkhuwast ki jiddo jehad aura mal ke baad Allah Talah ne apne Rasool Aleh Salato Wasalam ki duaon aur manajaat ko qabool farmaya aur madad ke liye farishte nazil kar diye aur musalmano ko kamiyaabi howi. Ghazwa Badar hamari rehnumai karta hey ke dua ke sath amal ho to duayen maqbol e bargah hoti hain. Amal ke baghair dua aik aisa jisam hey jis mein rooh nahi hey.

3.    Musalmano ke paas saaz o samaan ki be had kami thi. Nez in ki tadaad bhi kam thi. Is ke baraks kuffaar tadaad mein musalmano se teen gunah ziyadah the aur sazo samaan bhi kaseer tadaad mein tha. Is halat mein musalmano ka chand ghanton mein kuffaar par ghalib a jana mujza hey. Allah Talah ne musalmano ko fateh o ghalba de kar wazeh kar diya ke Islam Haq hey aur kufr o shirk batil hey. Isi liye Quran mein is din ko Yom ul Furqaan kaha gaya hey.

“Agar tum Allah par aur is (nusrat) par emaan rakhte ho. Aur is cheez par jo hum ne apne bande par is din (Yani medaan e Badar) mein utaara jo din haq o batil mein judai (tameez) ka tha. Jis din dono foujen muqable par agai thien.”

(Surah Al Anfaal-ayat-41)

4.    Jang Badar mein ajeeb waqiyat pesh aye musalmano ne dekha ke kuffaar ke lashkar mein in ke apne rishtedaar shamil hain ye bare imtehaan ke lamhaat the ke wo ye to haq ka sath den ya rishtedaron ke muhabbat mein koh jayen. Alhamdulillah musalman sabit qadam rahe.

5.    Mushaheer Quraish jo Islam ke sakht dushman the. Is jang mein khatam hogaye. Abu Jehal, Atka, Waleed, Sheeba aur Umaiyyat sab sardaron mein se the. Jin ke qatal ho jane se kuffaar Makka ki qowat hamesha ke liye khatam hogai.

6.    Ghazwa Badar ki azeem fateh ne musalmano ki qismat ka pansa palat diya. Qabail arab ki nazron mein in ka iqtedaar bohat barh gaya. Ab wo mehaz aik mazhabi jamaat aur nizaam ilahiya ke dai na the, balke wo uthti howi sisasi qowat the. Is fateh ke baad munafiqeen aur bohat se qabail arab jo waqiyaat ka rukh dekh rahe the. Ab khof zada ho gaye ya aur mukhalif chor di. Arab qabail Madina ki hukumat ko sab se bari taqat shumaar karne lage.

7.    Ghazwa Badar ki aik khususiyat ye bhi hey ke Allah Talah ne Quran Kareem mein aik Surat “ Surah Al Anfaal” is Ghazwa ke barey mein nazil farmai hey jis mein fazail Sahaba r.a ke ilawah digar masail Badar ka bhi zikar farmaya hey.

8.    Jang Badar ke sipa salaar e aala khud Huzoor  Aleh Salato Wasalam the. Musalmaan apne sipa salaar ke ehkamaat ki puri sadaqat, diyanat aur jazba e ataat ke sath pabandi karte the. Musalmano ka nazm o zabt aur apne sipa salaar aala ki be chu o chara ataat aik misaal ban gai. Aik achi fouj ki sab se bari khususiyat yehi hey.

9.    Mushriqeen ka alam ye tha ke wo qiyadat wahidah se mehroom the. Quraish ke aksar sardaar fouj mein shareek the. Is tarha in ki qayadat bati howi thi.

10.                 Badar ki jang do aqaid ke darmiyan aik bohat bari aur faisla kun jang thi aur is azeem jang mein Allah Talah ne Islam ko kamiyabi ata farmai.

GHAZWA E AWHAD

Ahle Makka ko jang e badar mein shikast aur apne khas logon ke qatal ka jo sadma bardasht karna para tha is ke sabab wo musalmano ke khilaaf gham o gussa mein bhar gaye the, hata ke inhon ne apne maqtoleen par matam bhi nahi kiya aur qaidiyon ke fidya ki adaigi mein bhi jald bazi karne se mana kar diya tha ta ke musalmaan in ke ranj o gham ki shiddat ka andaza na kar saken.

Zamana jahliyat mein to aik aadmi ke qatal par salon tak laraiyon ka silsila jari rehta tha. Jab ke Ghazwa e Badar mein aik do nahi sattar mushriqeen marey gaye the. Phir kaise mumkin tha ke wo bhar pur inteqaam leny ki koshish na karte.

Inhon ne jang e badar ke baad ye mutafaqqa faisla kar liya ke musalmano se aik bhar por jang ki jaye ta ke in ke ghaiz o ghazab ko taskeen mile aur is ke sath hi jang ki tiyari shuru kar di. Is mamle mein sardaraan e Quraish mein se Akarma Bin Abu Jehal, Sufiyan Bin Umiya, Abu Sufiyan Bin Harb aur Abdullah Bin Rabiya ziyadah pur josh the.

        Inteqami Jang ke Liye Quraish Ki Tiyari

In logon ne is silsily mein phela kaam ye kiya ke Abu Sufiyan ka wo tijarti qafila jo jang e badar ka bais bana aur jisy bacha kar Abu Sufiyan le jane mein kamiyaab hogaya tha, is ka sara maal jangi ikhrajaat ke liye mehfooz kar liya aur jin logon ka maal tha in se kaha k:

“Aye Quraish! Tumhe Muhammad (alhe Salato wassalaam) ne sakht sadma pohnchaya hey aur tumhare muntakhib sardaron ko maar diya hey. Lehaza in se jang karne ke liye is maal ke zariye madad karo.”

Quraish ne is tajweez ko manzoor kar liya. Chunachey ye saara maal aur aik hazaar oonth jang ki tiyari ke liye waqf kar diye.

Allah Talah irshad farmate hain:

“Jin logon ne kufr kiya wo apne amwaal Allah Talah ki rah se rokne ke liye kharch karen ge. to ye kharch to karen ge lekin phir ye in ke liye bais e hasrat hoga. Phir maghlob kiye jayen ge.”

(Surah Al Anfaal-ayat-36)

Phir Quraish ne raza karana khidmat ka darwaza khol diya ke job hi musalmano ke khilaaf jang mein shareek hona chahe, wo shareek hojaye.

 Khawateen Medaan-e-Jang Main:

Chunacha aik saal pura honey se pehly quraish ki tayyari mukammal ho gai aur majmoi tor par kul teen hazaar fouj tayyar ho gai. Quraish ke sardaron ne tajweez paish ki ke jang main aurtein bhi jayen ge chunacha is lashkar main aurtein bhi shamil hoin jin ki tadaad pandra thi. Laraiyon main sabit qadmi aur josh jang ka bara zarya khawateen thin. Jis larai main khawateen sath hoti thin arab jaan par khel jate the ke shikast hogi to aurten be hurmat hon gi. Buhat si aurten aisi thin jinki aulad jang-e-badar main qatal main qatal ho chuki thin is liye wo josh o jazbe se labraiz thin, inho ne mannatein mani thin ke is jang ke zarye apni aulad ke qatal ka badla len gi. Gharz jab foujen tayyar hoi to muazziz gharanon ki aurten bhi fouj main shamil hogaen.

In mein se baaz ke naam ye hain:

1.    Hinda ……..Atba ki beti aur Amir Mawia(r.a) ki maa

2.    Zoja Akrama Bin Abu Jahal

3.    Fatima(Bint-e-Waleed) Hazrat Khalid(r.a) ki behan

4.    Barzat….Masood Saqfi jo tawaif ka rais the, iski beti

5.    Ritata…..Umro Bin Al Ass ki zoja

6.    Khannas…. Hazrat Masaab Bin Umair(r.a) ki maa

Qatal ka mansooba:

Ghazwa Badar main kuffar Makkah ka sab se ziyada nuqsan Hazrat Hamza(r.a) ke hathon hoa tha. Hazrat Hamza(r.a) ne Hinda ke baap Atba ko jang-e-badar main qatal kia tha. Jabeer Bin Maatam ka chaccha bhi Hazrat Hamza(r.a) ke hath se maara gaya. Is liye in ke qatal ka ba qaida mansooba banaya gaya. Hinda ne jabeer ke habshi ghulam wehshi ko jo harba bazi(balm) main kamal rakhta tha Hazrat Hamza(r.a) ke qatal par amaada kia aur ye tey hoa ke jang ke baad habshi ko azad kardia jaye ga. Wehshi ke intekhaab ki waja ye thi ke mushrikeen jantey the ke Hazrat Hamza(r.a) ke sath ro baro muqabla mumkin nahi. Wehshi door se balm phainka karta tha aur is fan main aisa mahir tha ke is ka phainka hoa balm nishaney par lagta tha.

Makki Lashkar:

Sawari aur bar bardari ke liye teen hazaar ount the aur fouj ke liye do so ghorey the. In ghoron ko taza dam rakhne ke liye in par sawari nahi ki gai. Hifazati hathyaron main saat so zarhen thin. Abu Sufyan ko purey lashkar ka sipa salaar muqarrar kia gaya tha. Fouj ki kamaan Khalid Bin Waleed ko di gai aur Akarma Bin Abu Jahal ko in ka mawon banaya gaya. Parcham dastoor ke mutabiq qabila bani Abduddaar ko diya gaya.

Makkey se Jang ki ittela:

Hazrat Abbas(r.a) Huzoor  Aleh Salato Wasalam ke chaccha, go Islam la chukey the, lekin ab tak Makkey hi main muqeem the. Hazrat Abbas(r.a) Quraish ki is sari naqal o harkat aur jangi tayyariyon ka bari hoshyari aur gehrai se mutalla kar rahe the, chunacha jon hi lashkar harkat main aya. Hazrat Abbas(r.a) ne is ki sari tafseelat par mushtamil aik khat Huzoor  Aleh Salato Wasalam ki khidmat main bheja. Khat ley janey waley ne Makkey sy Madine tak ka safar teen din main tey kia aur khat Huzoor  Aleh Salato Wasalam ki khidmat main paish kar diya. Is waqt Huzoor  Aleh Salato Wasalam masjid Qaba main tashreef farma the. Ye khat Harzrat Abi Bin kaab(r.a) ne Huzoor  Aleh Salato Wasalam ko parh kar sunaya. Huzoor  Aleh Salato Wasalam ne inhe is khat ko raaz rakhne ki takeed farmai aur foran Madine tashreef ley aye. Ansaar aur Mahajireen ke buzurgon se salah o mashwara kia.

Khabar Rasan:

Is ke baad Huzoor  Aleh Salato Wasalam ne 5 Shawwal 3 hijri ko do khabar rasan jin ke naam Ins(r.a) aur Mons(r.a) the, khabar laney ke liye bheja,inhon ne akar ittela di ke Quraish ka lashkar Madina ke qareeb ponhach gaya hey.

Huzoor Aleh Salato Wasalam ne Hazrat Khabab(r.a) Bin Manzar ko bheja ke fouj ki tadaad ki khabar layen. Inho ne akar ittela di. Chunkey shehar main hamley ka andesha tha, is liye har taraf pehrey bitha diye gaye the. Hazrat Saad(r.a) Bin Ibada aur Hazrat Saad(r.a) Bin Maaz hathiyaar laga kar puri raat Masjid-e-Nabvi ke darwaze par pehra dety rahe.

Quraish ka lashkar shahrah par chalta raha. Yahan tak ke Madine ke qareeb ponhach kar parao daal diya. Khabar rasan Makki lashkar ki aik aik khabar Madine pohancha rahey rahey the, hatta ke is ke parao ki babat akhri khabar bhi pohancha di.

Hikmat E Amli:

Subah ke waqt Huzoor  Aleh Salato Wasalam ne fouji haai kamaan ki majlis shuraa munaqqid farmai. Jis mein munasib hikmat e amli ikhtiyaar karne ke liye sulah o mashwara kiye. Huzoor  Aleh Salato Wasalam ne unhen apna aik khuwab sunaya.

Huzoor Aleh Salato Wasalam ne irshad farmaya:

“Me ne khuwab dekha hey ke mein aik mehfoz jagah hon. mein ne dekha ke aik gaaye zibah ki ja rahi hey. mein ne khuwab mein mazeed dekha hey ke meri talwar ki dhaar mein dandane pare howe hain. Jab mein ne talwar ko hilaya to is ka agla hissa toot kar gir gaya hey. Phir jab mein ne dusri baar talwar ko hilaya to wo phele se bhi ziyadah umdah hogai.

Khuwab ki tabeer ye hey ke Madina Munawwarah aik mazbot zirah hey aur gaaye zibah karne ka matlab ye hey ke mery kuch Sahaba r.a is jang mein shahadat ka buland martaba hasil karen ge.

Talwaar toot jane ki ye tabeer irshad farmai ke “Mery khandaan mein se koi fard is Ghazwa mein shaheed hoga.”

Phir Huzoor  Aleh Salato Wasalam ne Sahaba Karam r.a ke samne difai hikmat e amli ke mutalliq apni raye pesh ki ke Madine se bahir na niklen shehar ke andar qila band hojayen. Agar mushriqeen apne khemon mein rehte hain to ye qayam be maqsad hoga aur agar lashkar Madine mein dakhil howa to musalman gali kochon mein in se muqabla karen ge aur aurten chaton ke upar se in ko pathar maren gi.

Sahaba Karam r.a ki aik jamaat ne jo Badar mein shirkat se reh gai the, Huzoor  Aleh Salato Wasalam ko mashwara diya ke medaan mein tashreef le chalen aur inhon ne apni is raye par sakht israr kiya: hata ke baaz Sahaba r.a ne kaha:

“Aye Allah ke Rasool Aleh Salato wassalaam! Hum shahadat ki tamanna karte the aur Allah Talah se duaen manga karte the, aab Allah Talah ne ye muqa faraham kar diya hey aur medaan mein nikalne ka waqt agaya hey. Ya Rasool Allah Aleh Salato wassalaam! Aap dushman ke madd e muqabil tashreef le chalen ta ke dushman ye na samjhen ke hum dar gaye hain.”

In garam josh hazraat mein khud Huzoor  Aleh Salato Wasalam ke chacha Hazrat Hamza r.a Bin Abdul Muttalib bhi the. Huzoor  Aleh Salato Wasalam ne aksariyat ke israr ke samne apni raye tabdeel kar di aur akhri faisla yehi howa ke Madine se bahir nikal kar khule medaan mein jang ki jaye.

Is ke baad Huzoor  Aleh Salato Wasalam ne Jumma ki namaz ki imamat ki aur waaz aur nasihat ki, jiddo jehad ki targheeb di aur bataya ke sabar aur sabit qadmi se fateh hasil ho sakti hey. Sath hi hukum diya ke dushman se maqabla ke liye tiyar hojayen. Ye sun kar logon mein khushi ki lehar dour gai. Lashkar tarteeb de diya gaya.

Peshmani:

Namaz asar qaim farmane ke baad Huzoor  Aleh Salato Wasalam hujra e mubarrak mein tashreef le gaye aur zarah zaib tan farma kar bahir tashreef laye. Ab Sahaba Karaam r.a ko nadamat mehsos howi ke hum ne Rasool Allah Aleh Salato Wasalam ki wazeh raye ke bar khilaf mashwarah pesh kar ke acha nahi kiya to Huzoor  Aleh Salato Wasalam ne farmaya ke “Kisi Nabi ke liye ye zaiba nahi ke jab wo zirrah pehan le to baghair larey howe isy utaar de. Yahan tak ke Allah Talah ke dushmano se jang kare. Ab Allah Talah ka naam le kar chalo, ab jo kuch mein tum se khehta hon isy suno aura mal karo! Aur yaad rakho ke agar tum log sabir aur sabit qadam rahe to Allah Talah ki fateh o nusrat tumhare liye hey.”

Huzoor Aleh Salato Wasalam ne lashkar ko teen hisso mein taqseem farmaya.

1.    Muhajireen ka dasta: Is ka parcham Hazrat Masab r.a Bin Umair ko ata kiya.

2.    Qabeela Oos (Ansaar) ka dasta: Is ka alam Hazrat Asaid r.a Bin Hazeer ko ata farmaya.

3.    Qabeela Khazraj (Ansaar) ka dasta: Is ka alam Hazrat Khabab r.a Bin Manzar ko ata farmaya.

Pura lashkar aik hazaar afraad par mushtamil tha jin mein aik so zarah posh aur pachaas shehsawaar the. Is ke baad kooch ka elaan farma diya aur lashkar ne shumaal ka rukh kiya. Hazrat Saad r.a Bin Ibadah aur Hazrat Saad r.a Bin Maaz zarah pehne Huzoor  Aleh Salato Wasalam ke agey agey chal rahe the.

“Aur jab Aye Rasool Aleh Salato Wasalam subah ke waqt tum apne ghar se nikle, musalmano ke liye larai ki jagahen muqarrar aur durust karte the aur Khuda sunne wala ilm wala hey.”

(Surah Al Imran-ayat-121)

Sarkashi:

Huzoor Aleh Salato Wasalam Uhad ki taraf lashkar ke sath rawana howe aur muqaam mashoot par pohnch kar fajar ki namaz ada ki. Huzoor  Aleh Salato Wasalam dushman ke bilkul qareeb the aur dono aik dusre ko dekh rahe the. Medaan e jang mein Abdullah Bin Abi ne baghawat kar di aur teen so afraad ko le kar ye kehta howa wapis chala gaya ke hum nahi samajhte ke kyn apni jaan den…..?

Haqeqat wo nahi jo is ne zahir kit hi balke haqeqat ye thi ke wo is nazuk mor par alag ho kar Islami lashkar mein aise waqt iztarab aur khalbali machana chahta tha jab dushman is ki aik aik nakal o harkat dekh raha hota ke aik taraf to aam fouji Huzoor  Aleh Salato Wasalam ka sath chor den aur jo baqi reh jayen in ke hosle passt hojayen aur dosri taraf is manzar ko dekh kar dushman ki himmat bandhe aur is ke hosle buland hon. qareeb the ke ye munafiq apni iskeem mein kamiyaab ho jata q ke mazeed do jamaaton yani Qabeela Oos mein Bano Harsa aur Qabeela Khazraj mein se Bano Salma ke qadam bhi ukhar chuke the aur wo wapis jane ki tadbeer soch rahe the. Lekin Allah Talah ne in ki dastigeeri farmai aur ye dono jamaaten dobara jehad par amadah hogayen.

“Jo nuqsaan larai ke din tumhe pohncha wo Allah Talah ke azan se tha aur is liye tha ke Allah Talah dekh len tum mein se momin kon hain aur munafiq kon? Wo munafiq ke jab in se kaha gaya “Aao Allah Talah ki rah mein jang karo ya kam az kam (apne shehar ki) madafat hi karo.” To kehne lage “ Agar hamey ilm hota ke aaj jang hogi to hum zaror tumhare sath chalet” ye baa two jab keh rahe the is wo waqt wo emaan ki ba nisbat kufr se ziyadah qareeb the. Wo apni zubano se wo baaten kehte hain jo in ke dilon mein nahi hotien, aur jo kuch wo dilon mein chupate hain Allah Talah isy khoob jante hain.”

(Surah Al Imran-ayat-166-167)

UHAD Mein ISLAMI LASHKAR:

Isi baghawat aur wapsi ke baad Huzoor  Aleh Salato Wasalam ne bache howe lashkar ke sath jis ki tadaad sath so thi dushman ki taraf pesh qadmi farmai. Dushman ka parao Huzoor  Aleh Salato Wasalam ke darmiyan aur uhad ke darmiyan kai simton se hail tha. Is liye Huzoor  Aleh Salato Wasalam ne farmaya:

“Koi hey jo hamey dushmano ki nazron mein aye baghair raaste se guzaar de.”

Jawab mein Abu Khashema r.a ne arz kiya:

“Ya Rasool Allah Aleh Salato wassalaam! mein is khidmat ke liye hazir hon.”

Phir aik mukhtasar raasta ikhtiyaar kiya aur mushriqeen ki nazron se bachate howe lashkar ko uhad ki ghati mein le gaya. Huzoor  Aleh Salato Wasalam ne is jagah lashkar ka champ lagwaya. Samne Madina tha peeche Uhad ka buland tareen pahaar; is tarha dushman ka lashkar musalmano aur Madine ke darmiyan had e fasil ban gaya.

Difai Mansoba:

Yahan pohnch kar Huzoor  Aleh Salato Wasalam ne lashkar ki tarteeb o tanzeem qaim farmai aur jangi nuqta e nazar se isy kai siffo mein taqseem farmaya. Mahir teer andazon ka aik fouji dasta bhi muntakhib farmaya jo pacchaas teer andazon par mushtamil tha. In ki kamaan Hazrat Abdullah r.a Bin Jabeer Bin Nouman Ansari ke supurd ki aur inhen Wadi e Qanata ke junoobi kinare par waqe aik choti se pahari par jo Islami lashkar ke champ se koi darh so meter junoob mashriq mein waqe he, tainaat farmaya.

Huzoor Aleh Salato Wasalam ne teer andaaz commandaron ko hidayat dete howe farmaya:

“Shehsawaron ko teer maar kar hum se daur rakho. Wo peeche se hum par hamla na karen. Hum jeeten ya haaren tum apni jagah par rehna. Tumhari taraf se hum par hamla na hone paye.”

Phir Huzoor  Aleh Salato Wasalam ne teer andazon ko mukhatib kar ke farmaya:

“Hamari pusht ki hifazat karna. Agar dekho hum marey ja rahe hain to hamari madad ko na ana aur agar dekho ke mujahideen maal e ghanimat le rahe hain to tum in ke sath shareek na hona.”

In fouji ehkamaat ke sath is fouji daste ko is pahari par mutaiyan farma kar Huzoor  Aleh Salato Wasalam ne Uhad mein wo shagaaf bhi band farma diya jis se mushriqeen is taraf pohnch sakte the aur Quraish musalmano ko narghe mein le sakte the.

Baqi lashkar ki tarteeb ye thi ke Maisara par Hazrat Manzar r.a Bin Umro muqarrar howe aur Memena par Hazrat Zubair r.a Bin awaam aur in ka mawon Hazrat Maqdad r.a Bin Aswad ko banaya. Hazrat Hamza r.a ko is hissa fouj ki kamaan mili jo zarah posh nahi the. Is tarteeb ke ilawah sif ke agle hisse mein mumtaaz aur muntakhib bahadur logon ko duty lagai gai.

Saf bandi:

Quraish ko badar main tajurba ho chuka tha is liye inho ne tarteeb se sif aria ki. Memna par Khalid Bin Waleed ko muqarar kia. Maisara Akarma Bin Abu Jahal ko diya. Sawaron ka dasta Safwaan Bin Umya ki Kamaan main tha. Jo Quraish ka mashhore rais tha. Teer andazon ke dastey alag the jin ka afsar Abdullah Bin Abi Rabia tha. Talha Bin Abi Talha Abdari alam bardaar tha.

Jang main pehla qadam:

Is ke baad dono fareeq bilkul amne samne aur qareeb agaye aur larai shroo ho gai. Jang main halaak hone wala pehla admi mushrikeen ka alam bardar Talha Bin Abi Talha Abdari tha. Ye shakhs quraish ka nihayat bahadur shesawaar tha. Ye apne ount par sawaar hokar nikla aur is ne muqable ki dawat di. Is ki had se barhi hoi shujaat ke sabab sahabi(r.a) muqable main nahi aye. Hazrat Ali(r.a) tezi se agey barhe aur farmaya: “ Haan! Main ye kam kar deta hon.” is ke sath hi Haidri talwaar bijli ki tarha lehrai aur Talha Bin Abi Talha Abdari ka sar tan se juda hogaya.

Ab aam jang shroo hogai. Hazrat Hazma (r.a), Hazrat Ali(r.a) aur Hazrat Abu Dajana(r.a) ne shujaat o dileri se muqabla karte hoye mushrikeen ki sifen ulat din. Hazrat Hazma (r.a), Hazrat Ali(r.a) aur Hazrat Abu Dajana(r.a) arab ke mashhore pehalwan the, Huzoor  Aleh Salato Wasalam ne dast-e-mubarak main talwaar le kar farmaya:

“Is ka haq kon ada kare ga?”

Is saadat ke liye daftan buhat se hath barhe lekin ye ezaaz Hazrat Abu Dajana(r.a) ke naseeb main tha. Is ezaaz ne inhe mast o be khud kar diya. Sar par surkh romaal bandhey aur akarte hoye fouj se nikle. Huzoor  Aleh Salato Wasalam ne irshaad farmaya:

“ Ye chaal Allah Talah ke liye sakht na pasand hey lekin is waqt pasand hey.”

Hazrat Abu Dajana(r.a) dushman ki sifon ko ulattey aur shikast dety hoye agey barhe. Yahan tak ke Hinda tak ponhach gaye. Bawajud ye ke is waqt Hinda is jang main barh char kar hissa le rahi thi aur har lehaz se qatal ki mustahiq thi magar Abu Dajana(r.a) ne is ke sar par se talwaar rakh kar uthali, inhon ne is baat ko gawara nahi kia ke Huzoor  Aleh Salato Wasalam ki talwaar se kisi aurat ka khoon kia jaye.

Jang-e-ohad main name girami kuffaar halaak hoye aur inki siffen darham barham ho gayen. Josh aur gherat ke liye daf baja baja kar ashaar sunane wali quraishi aurten kuffaar ki shikast dekh kar bhagne par majboor ho gayen. Quraish ka jhanda jab zameen par gir gaya aur dosra koi mushrik isy nahi utha saka tu fouj ke hosle past ho gaye aur wo apne sipahiyon ki lashen chor kar farar ho gaye.

Hazrat Hamza(r.a) ki shahadat:

Quraish ka siah farm wehshi muqa ki talash main tha. Is ne lalach main Hazrat Hamza(r.a) ko dhond lia aur in ki taak main beth gaya. Hazrat Hamza(r.a) bari dileri se talwaar chala rahe the. Wehshi ko in ka samne karne ki jurraat nahi hoi. Wehshi ne jab dekha ke Hazrat Hamza(r.a) ki pusht is ki taraf hey tu is ne apna nezah itni quwwat se in ki taraf phenka ke nezah siney ke paar ho gaya aur Hazrat Hamza(r.a) ki rooh parwaaz kar gai.

(innallaha wa inna ilaihi rajeon)

Jab Hinda ne ye suna ke Hazrat Hamza(r.a) wehshi ke hathon shaheed ho chuke hain tu is ne isi lamha na sirf ye ke wehshi ko azad kar diya balke medaan-e-jang main kharey kharey apne kangan aur haar utar kar isy bakhs diye aur aik tez dhaar chako se Hazrat Hamza(r.a) ka pait chaak kar ke jigar nikaal kar chabana shroo kar diya, phir is ne in ke naak aur kaan kate. Hinda ne is par hi iktafa nahi kia balke qareeb pari hoi musalmaan ki lashon ke kaan aur naak kaat kar dori main puro kar haar banaya aur galey main daal kar wehshiyana raks kia.

Hinda ke ilawa quraish ki aik aur aurat “ Salafa Bin Saad” bhi medaan jang main warid hoi. Darinda sift Salafa Bin Saad us musalmaan shaheed ka sar kaat kar le gai jis ne jang-e-badar main is ke bety ko qatal kia tha. Buhat makro chekh main is ne kaha jab tak main zinda hon is khopri ke piyale main pani piya karon gi. Larai katam hone ke baad Huzoor  Aleh Salato Wasalam ne dekha ke chaccha ka pait aur sina chak hey aur kaleja chaba kar paink diya gaya hey aur musalmaanon ki lashon ke kaan aur naak bhi katey hoye hain tu Huzoor  Aleh Salato Wasalam be inteha ghamgeen hoye.

Bala Dasti:

Hazrat Hamza r.a ki shahadat se musalmano ko na qabil e tilafi nuqsaan pohncha is ke bawajood jang mein musalmano ka palla bhari raha. Musalmano ne aisi jawan mardi se muqabla kiya ke mushriqeen ke hosle passt hogaye aur in ki qowat e bazu jawab de gai.

Teer Andazon Ka Karnama:

Jin teer andazon ko Huzoor  Aleh Salato Wasalam ne muttaiyen farmaya tha. Inhon ne bhi jang mein bara ehm kirdaar ada kiya. Makki shehsawaar Khalid Bin Waleed ki qiyadat mein aur Abu Amir Fasiq ki madad se musalmano ki pusht tak pohnch gaye aur in ki siffon mein khalbali macha kar bhar por shikast se dochar karne ke liye teen baar hamle kiye lekin musalman teer andazon ne inhen is tarha teeron se chalni kar diya ke in ke teeno hamle nakaam hogaye.

Mushriqeen Ki Shikast:

Kuch dair tak shahdeed jang hoti rahi aur chota sa Islami lashkar, jang par puri tarha hawi raha. Bal akhir mushriqeen ke hosle passt hogaye, in ki siffen muntashir hogien. Aisa mehsos hota tha ke teen hazaar mushriqeen ko sath so nahi balke tees hazaar mausalmano ka samna hey. Musalmaan emaan o yaqeen aur janbazi o shujaat ki tasveer bane howe the.

Mushriqeen ko shikast hogai fouj ne wapsi ki rah li. Musalmano ne taqub jari rakha. Takub ki shiddat ka ye aalm tha ke mushriqeen bohat daur tak paspa hogaye aur musalmaan maal e ghanimat jama karne lage.

Khofnaak Ghalti:

Lekin isi waqt jab ke ye mukhtasar sa Islami lashkar ahle Makka ke khilaf tareekh ke auraak par aik aur shandaar fateh likh raha tha, teer andazon ki aksariyat ne aik aisi khofnaak ghalti ki jis ki waja se jang ka pansa palat gaya aur Huzoor  Aleh Salato Wasalam ko takleef pohnchi.

Huzoor Aleh Salato Wasalam ne teer andazon ko fateh ho ya shikast har haal mein apne pahari morchon par qaim rehne ki sakht takeed famai thi lekin in sare takeedi ehkamaat ke bawajood jab inhon ne dekha ke musalmaan ghanimat loot rahe hain to in par duniya ka asar ghalib agaya. Chunachey baaz ne baaz se kaha:

“Ghanimat……! Ghanimat……..! Tumhare sathi jeet gaye…..ab kis baat ka intezaar he?”

Ye awaaz sunte hi in ke commandaur Abdullah r.a Bin Jabeer ne inhen Huzoor  Aleh Salato Wasalam ke ehkamaat yaad dilaye aur kaha:

“Kiya tum bhool gaye ke Huzoor  Aleh Salato Wasalam ne tumhe kiya hukum diya he?”

Lekin ghalib aksariyat ne in ki koi baat nahi suni. Chalis teer andazon ne apne morche chor diye aur maal e ghanimat ke liye lashkar mein shamil hogaye. Is tarha musalmano ka aik ehm morcha khali hogaya aur wahan sirf Abdullah r.a Bin Jabeer aur in ke no sathi baqi reh gaye jo is azam ke sath apne morchon mein rahe ke ye to inhen ijazat mil jaye gi ya wo apni jaan Allah Talah ke liye qurbaan kar den ge.

Khaid Bin Waleed ne is muqe se faidah uthaya aur Islami lashkar ki pusht par ja pohncha. Pahari morchon par mojood chand musalmaan jinhon ne morcha nahi chora tha mushriqeen ka muqabla nahi kar sake. Huzoor  Aleh Salato Wasalam ki hidayat ke khilaf is amal se mushriqeen ne bhar por faida uthaya. Mushriq fouj ka jhanda aik aurat ne utha kar hawa mein buland kar diya aur mushriqeen ki paspa fouj wapis palat ayi aur musalman charon taraf se mushriqeen ke narghe mein agaye. Musalmano mein abtari phail gayi aur afratafri mein musalmano ke hathon baaz musalman mare gaye.

“Allah Talah ne apna wadah sach kar dikhaya jab ke tum kuffaar ko is ke hukum se qatal kar rahe the. Yahan tak ke jab tum ne past himmati ikhtiyaar ki aur kaam mein jhagarne lage aur nafarmani ki, is ke baad kar dikhaya Allah Talah netum ko wo jo tum chahte the baaz tum mein se duniya ka iradah rakhte the aur baaz akhrat ka, phir Allah Talah ne tum ko dushmano ki taraf se pheer diya ta ke tum ko azmaye aur beshak Allah Talah ne tum ko mauf kar diya. Aur Allah Talah momino par bare fazal wale hain.”

(Surah Al Imran-ayat-152)

Shahadat Ki Khabar:

Aisy mein Hazrat Masab r.a Bin Umair jo Huzoor  Aleh Salato Wasalam se sorat mein mushaba aur aalam bardaar the, dushmano ne inhen shaheed kar diya aur kisi ne elaan kar diya ke Huzoor  Aleh Salato Wasalam shaheed hogaye hain. Is elaan se lashkar apas mein gud mud hogaye. Sahaba Karaam r.a apne hosh o hawas kho bethe.

Kafir fouj ne Syedena Aleh Salato Wasalam ki shahdat ki afwah phela kar musalmano mein bad dili phela di thi.

Hazrat Anas  r.a Bin Nasar ne dekha ke chand musalmano ne hathiyaar phenk diye hain. Hazrat Anas  r.a Bin Nasar ne in se pocha ke tum log larte q nahi? Musalmano ne jawab diya: “Aab hum lar kar kiya karen ge? jis ke liye larte the wo to shaheed hogaye.”

Hazrat Anas  r.a Bin Nasar ne kaha

“Agar waqai Huzoor  Aleh Salato Wasalam shaheed hogaye hain to phir in ke baad hum zindah reh kar kiya karen ge?

Chalo shahadat ke raaste par qadam barhao ta ke hum bhi Huzoor  Aleh Salato Wasalam se ja milen.” Ye keh kar jehad mein shareek hogaye aur shaheed hogaye. Baad mein in ki laash dekhi gai to is par teeron, talwaron aur neezon ke 80 se ziyadah zakham aye the.

Jan nisaar lar rahe the lekin nigahen Huzoor  Aleh Salato Wasalam ko dhond rahi thien. Sab se phele Hazrat Kaab r.a Bin Malik ne Huzoor  Aleh Salato Wasalam ko pohnchana. Khushi se naara lagaya.

“Musalmano! Khush hojao……. Ye hain Rasool Allah Aleh Salato wassalaam.”

“Aye Muhammad faqat Rasool hain aur in se phele bhi Rasool guzar chuke hain. Kiya agar ye mar gaye ya qatal hogaye to tum apni aeriyon ke bal phir jao ge? aur jo apni aeriyon ke bal phire ga to har giz wo Allah ko nuqsaan nahi pohncha sakta aur anqareeb Allah shukar guzaaron ko acha badla de ga.”

(Surah Al Imran-ayat-144)

“Yaad karo jab tum bhage ja rahe the, kisi ki tarf palat kar dekhne tak ka hosh tumhe nahi tha aur Rasool (alhe Salato wassalaam) tumhe pukaar rahe the, is waqt tumhari is roosh ka badla Allah Talah ne tumhe ye diya ke tum ko ranj par ranj diye ta ke aindah ke liye tumhe ye sabaq mile ke jo kuch tumhare hath se jaye ya jo musibat tum par nazil ho is par ranjedah na ho. Allah Talah tumhare sab amaal se ba khabar hain.”

(Surah Al Imran-ayat-153)

Ye sada kuffaar ne bhi suni aur wo musalmano se phele hi Huzoor  Aleh Salato Wasalam tak pohnch gaye. Is waqt Huzoor  Aleh Salato Wasalam ke qareeb pandrah Sahaba Karaam r.a majood the. Kuffaar ne bhar pur hamla kiya aur is murka aria mein sath Sahaba r.a shaheed hogaye.

Mushriqeen chahte the ke Huzoor  Aleh Salato Wasalam ko shaheed kar den lekin jan nisaron ne apni jaan ke nazrane pesh kar ke dushmano ko Huzoor  Aleh Salato Wasalam tak nahi pohnchne diya. Is hamle mein Atba Bin Abi Waqas ne Syedena Huzoor  Aleh Salato Wasalam ki janib pathar phenka jis se Huzoor  Aleh Salato Wasalam phelo ke bal gir gaye aur Huzoor  Aleh Salato Wasalam ke dandaane mubarrak shaheed hogaye. Huzoor  Aleh Salato Wasalam ke neeche ka hont zakhmi hogaya.aik mushriq ne Huzoor  Aleh Salato Wasalam ki peshani zakhmi kar di aur aik mushriq ne itni rooz se talwaar mari ke Huzoor  Aleh Salato Wasalam arse tak kandhe mein chot ka asar mehsos farmate rahe. Isi ne dusra waar chehre par kiya jis se khud ki do karriyan chehra mubarrak ke andar ghus gayien aur ankh mubarrak ke neeche ki ubhri howi haddi par zakham aye.

Khone se labraiz halat mein bhi Huzoor  Aleh Salato Wasalam farma rahe the:

“Ya Allah meri qoam ko bakhs de. Wo jante nahi ke kiya kar rahe hain.”

Is nazuk tareen lamha aur mushkil tareen waqt mein Allah Talah ne gaib se madad farmai.

Allah Talah farmate hain:

“Ye baat Allah Talah ne tumhe is liye bata di ke tum khush ho jao aur tumhare dil mutmain hojayen. Fateh o nusrat jo kuch bhi hey Allah Talah ki taraf se hey jo bari qowat wale dana o beena hain.”

(Surah Al Imran-ayat-126)

“(Aur ye madad wo tumhe is liye de ga) ta ke kufr ki rah chalne walon ka aik bazu kaat de, ya in ko aisi zaleel shikast de ke wo na muradi ke sath paspa hojayen.”

(Surah Al Imran-ayat-127)

Jaan Nisari:

Ø Is muqe par jan nisari ki aala tareen misalen samne ayen. Jis waqt Huzoor  Aleh Salato Wasalam zameen par gire Hazrat Abu Taha r.a ne Huzoor  Aleh Salato Wasalam ko apni aghosh mein le liya aur kafiron ke beshtar hamle inhon ne apne jisam par rok liye.

Ø Hazrat Abu Dajana r.a dushmano mein ghire howe apne mehbob peghambar Huzoor  Aleh Salato Wasalam tak pohnche to Huzoor  Aleh Salato Wasalam ke agey dhal ban kar kharey hogaye aur teeron ki barsaat ko rokne ke liye apni kamar ko dhal bana diya.

Ø Hazrat Talha r.a teeron ke agey apna hath rakh dete the. Is tarha in ka aik hath shal hogaya. Is din in ke jisam par sattar ke qareeb zakham aye. Aik zakham sar par laga jis se behosh ho kar gir pare.

Hazrat Abu Bakar Siddique r.a kehte hain ke mein Huzoor  Aleh Salato Wasalam ke liye pani laya to Huzoor  Aleh Salato Wasalam ne farmaya ja kar Talha r.a ko pilao. mein Talha r.a ke paas gaya to wo behosh the aur zakhmo se khone beh raha tha. mein ne in ke chehre par pani chirka to in ko kisi qadar afaka howa aur hosh mein ane par phela sawal ye kiya ke Rasool Allah Aleh Salato Wasalam ka kiya haal he? Hazrat Abu Bakar Siddique r.a ne farmaya Huzoor  Aleh Salato Wasalam khairiyat se hain aur Huzoor  Aleh Salato Wasalam ne hi mujhe aap r.a ke paas bheja hey.

Ye sun kar in ke chehre par ronaq agai aur kaha: “Huzoor Aleh Salato Wasalam ke hoty howe har musibat asaan hey.”

Champ Ki Taraf Wapsi:

Huzoor Aleh Salato Wasalam ne sabit qadmi ke sath pahar ki ghati yani champ ki taraf bharna shuru kar diya. Magar chu ke is wapsi ke maini ye the ke mushriqeen ne musalmano ko narghe mein leny ki jo karwai kit hi wo be natija ho jaye is liye mushriqeen ne wapsi ko nakaam banane ke liye hamle jari rakhe. Magar Huzoor  Aleh Salato Wasalam ne mushriqeen ke hujoom mein raasta bana liya aur Allah Talah ne inhen mehfooz farma diya.

Jang E Uhad Mein Musalman Khawateen:

Is Ghazwa mein musalman khuwateen r.a ne bhi shirkat ki. Hazrat Ayesha r.a aur Hazrat Anas  r.a ki walidah Ume Salma r.a, zakhmiyon ko pani pilati thien. Hazrat Anas  r.a ka irshad he:

“Me ne Hazrat Ayesha r.a aur Ume Salma r.a ko dekha ke painche charhaye howe mashk bhar bhar kar lati thien aur zakhmiyon ko pani pila rahi thien. Mashk khali hojati to ja kar dubara pani le ati thien.”

(Sahi Bukhari)

Aain is waqt jab ke kafiron ne hamla kar diya tha aur Huzoor  Aleh Salato Wasalam ke sath chand jaan nisaar Sahaba Karaam r.a reh gaye the. Hazrat Ume Ammarah r.a Huzoor  Aleh Salato Wasalam ke paas pohnchi aur Huzoor  Aleh Salato Wasalam ke liye dhal ban gayien. Kuffaar jab Huzoor  Aleh Salato Wasalam ki taraf teer chalate the to Hazrat Ume Ammarah r.a dhal par teer roktien thien. Ibne Kamiya jab dorta howa Huzoor  Aleh Salato Wasalam ke paas pohnch gaya to Hazrat Ume Ammarah r.a ne agey barh kar is ke waar ko roka. Jis se in ke kandhe par zakham agaya aur Ume Ammarah r.a ne Ibne Qamiya ke talwaar mari lekin wo dhuri zarah pehne howe tha is liye waar kaar gar nahi howa.

Mushriqeen Ka Akhri Hamla:

Jab Huzoor  Aleh Salato Wasalam ghati mein apni qayam gah mein pohnch gaye to mushriqeen ne musalmano ko shikast deny ki akhri koshish ki. Abu Sufiyan aur Khalid Bin Waleed ki qiyadat mein mushriqeen ne pesh qadmi ki.

Huzoor Aleh Salato Wasalam ne dua farmai:

       “Ya Allah! Humey fateh naseeb farmaiye.”

Phir Hazrat Umar r.a aur Muhajireen ki aik jamaat ne lar kar inhen pahar se neeche utarne par majboor kar diya.

Makka wapis jany se phele Abu Sufiyan Koh e Uhad par charha aur ba awaaz e buland pukara:

“Kiya tum logon mein Muhammad (alhe Salato wassalaam) mojood hain.”

Musalmano ne koi jawab nahi diya.

Abu Sufiyan ne pocha: “Kiya Abu Qahafa ka beta (Abu Bakar r.a) tum mein mojood hain.

Lekin koi jawab nahi mila, is ne phir awaaz di.

Kiya tum mein Umar r.a Bin Khitaab mojood hain?

Magar is ka bhi koi jawab nahi aya to khush ho kar apne sathiyon se mukhatib howa: “Ye teeno to rukhsat howe agar in mein se koi zindah hota to jawab zaror deta.”

Ye sun kar Hazrat Umar r.a se zabt nahi ho saka. Inhon ne karak kar jawab diya:

“Aye Khuda ke dushman! Jin logon ke tu ne zikar kiya wo sab zindah hain aur Allah Talah ne tery ranj o alam ka samaan abhi baqi rakh chora hey.

Abu Sufiyan ne ye sun kar nara lagaya “Aala Hubul” Aye Hubul to oncha hey.

Huzoor Aleh Salato Wasalam ke hukum par Hazrat Umar r.a ne jawab diya.

Allah Talah hi sab se aala aur buzurg o bartar hain.

Abu Sufiyan wapis jaty howe kehne laga aindah saal badar mein phir tum logon se muqabla hoga.

Huzoor Aleh Salato Wasalam ne aik Sahabi r.a se irshad farmaya

“Keh do theek hey. Ab ye baat hamare aur tumhare darmiyan tey rahi.”

Ghazwa Uhad mein teer andazon ki waja se musalmano ko jo shikast howi thi is ki waja se mushriqeen aur munafiqeen ki himmaten bohat barh gai thien. Wo soch rahe the ke hum musalmano ko shikast deny mein kamiyaab hojayen ge.

Hazrat Syedah Fatima R.A:

Huzoor Aleh Salato Wasalam ki shahadat ki afwah Madina pohnchi to wahan se Hazrat Syedah Fatima r.a aur mutadid khawateen be tab ho kar Uhad ki tarf chal parien. Hazrat Fatima r.a ne apne piyare Abba Jaan ko zindah salamat dekha to daur kar gale lag gayen. Phir ilaaj malje ki taraf mutawajja howin. Hazrat Ali (r.a) r.a pani laye aur zakhmon par dalna shuru kiya. Hazrat Fatima r.a ne apne hath se zakham dhoye, saaf kiye. Magar khoon nahi ruka. Akhir Hazrat Fatima r.a ne chatai ka aik tukra jalaya aur is ki raakh zakhmon par chipka di. Ye tadbeer kar gar sabit howi aur khoon nikalna band hogaya.

Shaheed Aur Zakhmiyon Ki Khabar Geeri:

Mushriqeen ke wapis chale jane ke baad musalmano ko hukum mila ke apne tamam shuhda aur zakhmiyon ki khabar geeri ki jaye. Musalmano ke sattar aadmi shaheed howe. In ki tadfeen ki gai.

Allah Talah farmate hain:

“Jo log Allah ki rah mein shaheed kiye gaye hain in ko har giz murdah na samjhen, balke wo zindah hain apne Rab ke paas, rizq paatey rehte hain. Allah Talah ne apna fazal jo inhen de rakha hey is se bohat khush hain aur khushiyan mana rahe hain. In logon ki babat jo ab tak in se nahi mile in ke peeche hain. Is par ke inhen na koi khof hey aur na wo ghamgeen hon ge.”

(Surah Al Imran-ayat-169 ta 170)

Yahoodiyon Ka Propagandah:

Jang e Uhad mein musalmano ko pohnchne wale nuqsaan ke bais yahoodiyon ne propegendah shuru kar diya. Yahoodiyon ne logo se kaha agar Muhammad (alhe Salato wassalaam) Allah Talah ke Rasool hoty to inhen shikast nahi hoti.

Is muqe par Allah Talah ne farmaya:

“Bohat se Nabiyon ke hum rakaab ho kar, bohat se Allah waly jehad kar chuke hain, inhen bhi Allah ki rah mein takleefen pohnchi lekin na to inhon ne himmat hari na sust rahe aur na maroob haye aur Allah sabar karne walon ko chahta hey.”

(Surah Al Imran-ayat-146)

Ehmiyat O Nataij:

1.    Ye jang musalmano ke liye aik mustaqil sabaq ki hesiyat rakhti hey. Ghazwa e Uhad mein musalmano ne Allah Talah ke bajaye kasrat tadaad aur asbaab ke bharosa mein Huzoor  Aleh Salato Wasalam ki wazeh raye ke baraks mashwara kiya aur maal e ghanimat ki muhabbat mein Huzoor  Aleh Salato Wasalam ke wazeh farmaan ki hukum adoli kar ke fateh ko waqti shikast mein badal diya. Ye lamha fikro amal hey.

2.    Mushriqeen ko is amar ka pura muqa hasil hogaya tha ke Uhad mein musalmano ka kila kama kar den, q ke musalman bebas ho kar, in ke gherey mein a chuky the. Lekin Huzoor  Aleh Salato Wasalam ne mushriqeen ke halke ko tor dala aur apni nawwey fisad fouj ko sahi salamat bacha laye aur mushriqeen kuch nahi kar sake ye in ki bohat bari shikast hey.

3.    Tareekh is baat ki shahid hey ke jab bhi kisi lashkar ko shikast howi to fateh lashkar maftuh ke fouji champ par zaror qabiz howa. Jab ke yahan aisi koi sorat nahi thi. Mushriqeen ka lashkar musalmano ke champ par qabiz nahi ho saka.

4.    Mushriqeen anchanak hamla ki waja se musalmano se kisi qisam ka bhi maal e ghanimat hasil kar sake jo ke ba sorat e fateh lazmi amar hey.

5.    Ghazwa e Uhad ne musalmano ke infaradi kirdaar ko rooz e roshan ki tarha ayan kar diya. Sahaba Karaam r.a mein se har aik ne Huzoor  Aleh Salato Wasalam se jis walhana muhabbat o aqeedat ka muzahira kiya aur jis shadmani se Huzoor  Aleh Salato Wasalam ki hifazat ke liye mout ki aghosh ko passand kiya is ki misaal nahi milti. Agar isy tareekh ka zarren baab kahen to baja hey. Jis par ummat baja tor par rehti duniya tak fakhar karti rahe to kam hey.

Ghazwa E Khandak

Ghazwa e Badar aur Ghazwa e Uhad ke baad mushriqeen dushmani mein bohat agey barh gaye the.

Is pas e manzar mein mushriqeen ne arab ke mukhtalif qabail se ittehaad kiya aur dosri janib Madina se jila watan yahoodiyon ne Makka Mukarrama mein ghilaf e Kaaba parkar kar Makka ke sardaar Abu Sufiyaan se ehad o pemaan kiya ke Huzoor  Aleh Salato Wasalam ke khilaaf jang ka aghaaz kar den aur doraan e jang wo har tarha se madad karen ge. is tarha Quraish Arab Qabail aur yahood par mushtamil dus hazaar afraad ka aik lashkar ban gaya jis ka sardaar Abu Sufiyan tha. Is lashkar mein teen so ghorey aur aik hazaar onth shamil the.

Khandak Ki Khudai:

Syedena Huzoor  Aleh Salato Wasalam ko jab dushmanaan e Islam ki rawangi aur hamle ki ittilaat milien to Huzoor  Aleh Salato Wasalam ne Madina Munawwarah mein Sahaba Karaam r.a se mashwara farmaya. Is muqe par Hazrat Sulaman Faarsi r.a ne Iran mein raij tareeqa e jang par Khandak khodne ka mashwara diya.

Khandak ke laghwi maini gharha ya khai hain. Shehron ke difa ka ye tareeqa Faras (Iran) mein raij tha. Magar ahle Arab Khandak se na ashna the. Syedena Huzoor  Aleh Salato Wasalam ne is mashware ko passand farmaya aur medaan e jang ki munasbat se Khandak kho di gai. Is jang ko Ghazwa e Khandak ka naam diya jata hey. Ghazwa e Khandak ka shumaar duniya ki mashoor tareen laraiyon mein hota hey.

Morkheen ka khayal hey ke

“Ye larai Islam ki tarakki ki rah mein akhri rukawat thi.”

Q ke musalman is larai tak kashmakash mein mubtala rahe aur tarakki ke mansubon ki taraf pura dehaan nahi de sake. Waja ye thi ke inhen har waqt ye khatrah lahaq rehta tha ke Quraish Madina par hamla kar den ge.

Is waqt Madina Munawwarah teen atraaf mein dushwaar guzaar pahariyon aur baghaat se ghira howa tha aur shumaal ki taraf medaan tha. Chunachey Syedena Huzoor  Aleh Salato Wasalam ne is rukh par mashriq se maghrib tak neem dairah ki shakal mein Khandak ka nishan lagaya. Bataya ye jata hey ke ye Khandak pandrah foot gheri aur pandrah foot choori aur taqreeban sarey teen mile lambi thi.

Godaam Mein Zakhira:

Madine ke mazafaat mein pheley howy khaeet aur baghaat ki pedawaar godamon mein zakhira kar di gai. Bacchon aur aurton ko qilon mein bhej diya gaya. Khandak ke qareeb ke gharon ko khali kar wa diya gaya. Khandak ke liye hard us aadmiyon ke zimma challis gaz zameen khodna mutaiyan howa. Madine ka har mard, har aurat hata ke jawan saal larke aur larkiyan aur job hi belcha aur kadaal uthane ke qabil the khandak khodne mein masroof hogaye. Khandak khodne ke liye musalmano ne rooz o shab mehnat kar ke isaar o wafadaari ka be misaal muzahira kiya. Khud Huzoor  Aleh Salato Wasalam ne din raat kaam kiya aur banafs e nafees Sahaba Karaam r.a ke sath is khudai mein hissa liya. Khabhi kadaal chalate aur khabhi mitti uthane mein masroof ho jaty the. Musalmaan dus dus afraad ki toliyon mein shareek howe aur wo apna muqarrar kaam qabal az waqt mukammal kar lete to raza karana tor par dusron ke kaam mein hath batate the.

Is dino shahdeed sardi thi. Sahaba Karaam r.a sakht sardi ke mausam mein sanglakh zameen par khandak ki khudai karte aur shahdeed mehnat o mushaqqat se mitti bahir nikalte. Is muzahirah par Huzoor  Aleh Salato Wasalam ne rajziya ye ashaar parh kar Sahaba Karaam r.a ko hosla diya aur in ke jazbe ki tareef farmai.

Ilahi Barkat:

Khandak ki khudai ke doraan ejaaz e nabowat ke kai waqiyaat runuma howe.

·       Hazrat Jabir r.a Bin Abdullah ne bakri zibah ki aur dhai kilo ataa gond kar is ki rotiyan pakain phir Syedena Huzoor  Aleh Salato Wasalam ki khidmat mein hazir ho kar arz kiya: “Thora sa khana tiyar karaya he, Huzoor  Aleh Salato Wasalam tashreef le chalen.” Huzoor  Aleh Salato Wasalam ne ahle Khandak ko pukara aur farmaya.

“Jabir r.a ne tumhare liye khana tiyyar kiya he, sab ajao.”

Aik hazaar afraad pohnch gaye. Huzoor  Aleh Salato Wasalam ne handiya aur rotiyan par kapra dhak diya. Dus dus afraad ki jamaat dastarkhuwan par ati aur shakam e sair ho kar uth jati thi. Yahan tak ke aik hazaar afraad ne pait bhar kar khana ka liya.

·       Aik rooz Hazrat Bashir r.a Bin Saad ki beti ko is ki maan ne khajoor de kar kaha ke ye khajooren apne baap aur mamo ko de ao. Huzoor  Aleh Salato Wasalam ne isy dekh kar apne paas bulaya aur pocha q ayi ho?...... larki ne arz kiya:

“Ya Rasool Allah Aleh Salato wassalaam! Amman ne mery walid aur mery mamo ke liye khajooren bheji hain.”

Syedena Aleh Salato Wasalam ne dastarkhuwan bichane ka hukum diya. Larki se khajooren le kar dastarkhuwan par rakh den. Ahle khandak ko khane ke liye bulaya gaya aur irshad howa ke khane ke liye aik aik jamaat aye. Jamaat dar jamaat ahle khandak dartarkhuwan par jama hoty rahe aur sab ne khoob sair ho kar khajooren khayen.

·       Khandak ki khudai ke doraan aik sakht chataan agai. Huzoor  Aleh Salato Wasalam ne Bismillah parh kar chataan par kadaal mari to aik shula nikla aur aik tehai chataan toot gai. Syedena Huzoor  Aleh Salato Wasalam ne farmaya:

“Allah Hu Akbar! Mujhe mulk Shaam ki chabiyan di gayen hain. Allah ki qasam! mein is waqt Shaam ke surkh mehlaat dekh raha hon.”

Phir Syedena Huzoor  Aleh Salato Wasalam ne dosri baar kadaal mari to chataan ka aik tehai hissa aur toot gaya aur sath hi aik aur shula nikla Huzoor  Aleh Salato Wasalam ne farmaya:

“Allah Hu Akbar! Mujhe Faras ki chabiyan di gayen hain. Allah ki Qasam! mein is waqt kasraa ka safaid mehal dekh raha hon.”

Huzoor Aleh Salato Wasalam ne teesri baat chataan par kadaal mari. Aik aur shula namodaar howa. Huzoor  Aleh Salato Wasalam ne farmaya:

“Allah Hu Akbar! Mujhe Yaman ki chabiyan di gayen hain. Allah ki Qasam! mein Sanaa ke darwaze dekh raha hon.”

Hazrat Salman Faarsi r.a Huzoor  Aleh Salato Wasalam ke qareeb kharey the. Huzoor  Aleh Salato Wasalam ne in se farmaya: “Aye Salman r.a! Meri Ummat Shaam, Faras aur Yaman ko fateh kare gi.”

Bano Qareeza Ki Ghaddari:

Bano Qareeza, yahoodiyon ka aik maaldaar qabeela tha, jo Madina munawwarah ke nawah mein bari shaan o shukat se rehta tha. Inhon ne Huzoor  Aleh Salato Wasalam se muhaidah kar rakha tha ke beroni hamle ki sorat mein hum dushmano ka sath nahi den ge. magar Bano Nazeer ke aik sardaar Hai Ibne Akhtab ne Bano Qareeza ke sardaar Kaab Ibne Asad se khufiya mulaqaat ki aur isy tawun par amadah karne ki koshish ki.

Kaab ne jawab diya ke hum ne Muhammad (alhe Salato wassalaam) ke sath muhaidah kar rakha hey aur Muhammad (alhe Salato wassalaam) wadon ki pasdari karne wale aik sacche insaaan hain, in ke liye mein Muhammad (alhe Salato wassalaam) ke sath kiye gaye muhaide ko tor nahi sakta.

Ibne Akhtab Hai ne kaha….. “Shayad tumhe maloom nahi ke is martaba itna bara lashkar le aya hon ke is ka muqabla mumkin nahi aur hum ne ehad kar rakha hey ke jab tak Muhammad (alhe Salato wassalaam) aur is ke sathiyon ka mukammal khatma nahi ho jata, hum larai se hath nahi uthayen ge. ye qoami mufaad ka mamla he, agar hum kamiyaab rahe to izzat aur shaan o shukat ki zindagi guzaren ge aur agar tumhare inkaar ki waja se nakaam hogaye to hamesha Muhammad (alhe Salato wassalaam) ka ghulaam aur dast e nagar rehna pare ga aur mein tumhe yaqeen dilate hon ke is dafa musalmano ka qattai tor par khatma hojaye ga ta hum tumhe phir bhi hamari kamiyabi mein shak hey to mein wada karta hon ke nakaami ki sorat mein wapis nahi jaon ga, balke tumhare paas ajaon ga aur muhaidah torne ki tumhe jo bhi saza Muhammad (alhe Salato wassalaam) ki taraf se mile gi, is mein tumhare sath barabar ka shareek rahon ga.”

Ye sun kar Kaam ko yaqeen hogaya ke is dafa waqai musalmano ka safaya hojaye ga, is liye wo be khof o khatar hogaya. Digar raosa Bani Qareeza ko bula kar sorat e haal batai aur kaha ke hamey Muhammad (alhe Salato wassalaam) se kiya howa muhaidah tor dena chahiye. Inhon ne bhi taieed ki aur phir sab ke samne muhaide ki dastaweez ko phar diya.

Yaad Dehani:

Huzoor Aleh Salato Wasalam ko is waqiya ka ilm howa to inhon ne haqeeqat maloom karne ke liye Hazrat Saad r.a Bin Maaz aur Hazrat Saad r.a Bin Ibadah ko Bano Qareeza ki taraf rawana farmaya aur irshad farmaya k

“Agar muhaidah torne ki khabar sach howi to is khabar ko wapis akar mabham alfaaz mein biyan karna. Ta ke fouj mein bad dili na phele aur agar ye afwah galat sabit howi to elaaniya biyaan karne mein koi harj nahi.”

Ye dono Sahaba r.a Bano Qareeza ke paas gaye in logon ko musalmano ke sath muhaidah aur Huzoor  Aleh Salato Wasalam ke sath kiye howe ehad o pemaan yaad dilaye.

Ye sun kar qabeela Bano Qareeza na kaha “Hum nahi jante muhaidah kiya cheez hey aur na ye jante hain ke Muhammad (alhe Salato wassalaam) kon hain?”

Sahaba Karaam r.a wapis Huzoor  Aleh Salato Wasalam ki khidmat mein hazir howe aur Bano Qareeza ki ehad shikni ki tasdeeq kar di. Huzoor  Aleh Salato Wasalam ne is muqe par farmaya:

“Hamare liye Allah kafi hey aur wohi behtreen kaar saaz hey.”

(Surah Al Imran-ayat-173)

Kuffaar Ka Lashkar:

Khandak Madine ke shumaal ki janib khodi gayi thi. Quraish apne ittehadiyon ke hamrah Madine pohnch gaye the. Sabqat ke zum mein mubtala munkireen onth aur ghorey sar pat dorate howe Madine ki hadood mein pohnche to heerat o istajaab ki tasveer ban gaye…….. difa ka ye heerat angeez tareeqa is se phele na inhon ne dekha tha aur na suna tha. Jangi saaz o samaan se lees lashkar Khandak ke paar parao dalne par majboor hogaya. Ittehadi ye soch kar aye the ke aik hi rooz mein musalmano ko teh taigh kar ke fateh hasil kar len ge. magar ahle Madina aur in ke darmiyaan hail Khandak ne inhen bebas kar diya. Jis waqt mushriqeen ki fouj Madine pohnchi, mausam badal raha tha. Sipahiyon ko kheemon mein sardi lag rahi thi. Fouj ko muhasarah karna para jis ke liye wo phele se tiyaar nahi the. Syedena Huzoor  Aleh Salato Wasalam apne sathiyon ke hamrah Khandak ke samne mojood the. Mushriq sardaar rozana khandak tak aty. Aik siry se dorey siry tak ghorey doratey the. Magar khandak paar karne ka koi raasta unhen nahi milta tha. Ghaiz o ghazab ke aalam mein wo musalmano par teeron ki bochaar karte, jawab mein musalmaan teer andaaz in par teer barsate the.

Kuffaar Ka Propegandah:

Lashkar Islam mein mojood munafiqeen ne musalmano ke hosle passt karne ki meham shuru kar di.

Inhon ne musalmano se kaha:

Muhammad (alhe Salato wassalaam) ne hamare sath wada farmaya hey ke hum log kaisar o kasraa ko fateh karen ge in ke khazane hamey milen ge jab ke sorat e haal ye hey ke hum log laachaar, kamzoor aur majboor ho kar reh gaye hain.

Ye waqt sakht azmaish ka tha Huzoor  Aleh Salato Wasalam ke sathiyon ko ikhlaas ki kasauti par parkha jar aha tha. Yun Allah Talah ki taraf se nazil Ayat ne khara aur khota alag kar dikhaya.

Allah Talah ne farmaya:

“Yahin momin azmayen gaye aur puri tarha wo jhinjhor diye gaye. Aur is waqt munafiq aur wo log jin ke dilon mein (shak ka) roog tha kehne lagey Allah Talah aur is ke Rasool ne hum se mehaz dhoka faraib ka hi wada kiya tha.”

(Surah Al Ahzaab-ayat-11 ta 12)

Munafiqon ke propegande aur Bano Qareeza ki janib se ehad torne ki khabar se musalmano ko tashveesh howi to inhon ne bargah e Risalat mein dast basta arz kiya ke hamey munafiqon ki resha dawaniyon aur yahood ki bad ehdi ka khatrah hey. Huzoor  Aleh Salato Wasalam ne intehai sukoon aur yaqeen se farmaya:

“Mushriqeen ko yahoodiyon ki kumak par bharosa hey jab ke mein Allah Talah ki madad par yaqeen rakhta hon. yaqeen rakho Allah Talah hamey be yaro madad gaar nahi choren ge.”

Huzoor Aleh Salato Wasalam ke farmaan se musalmano mein naya hosla peda hogaya aur inhen Allah Talah ki madad o nusrat ka yaqeen hogaya.

Momineen Aur Munafiqeen Ki Dili Kefiyat:

Islami fouj mein munafiqon ki tadaad bhi shamil thi. Jo bazahir musalmano ke sath the. Lekin mausam ki sakhti, rasd (raashan) ki qillat, raaton ki be khuwabi, dushman ki bari tadaad, aisy waqiyaat the jinhon ne pardah faash kar diya. Munafiqeen ne mukhtalif huliye bahane shuru kar diye, kehne lage:

“Ya Rasool Allah Aleh Salato wassalaam! Hamare ghar bilkul khali hain aur ghar ki diwaaren choti hone ki waja se ghair mehfooz hain aur dushman ki zad mein hain. Hamari aurten aur bacche ghair mehfooz hain. Is liye hamey ijazat den ta ke hum wapis ja kar in ki hifazat kar saken.”

Allah Talah farmate hain:

“Jab in mein se aik ghiroh ne ye kaha ke Aye Madina walo! Tumhare liye thikana nahi, chalo lot chalo aur in ki aik aur jamaat ye keh kar Nabi s.a.w se ijazat mangne lagi ke hamare ghar ghair mehfooz hain halan ke wo (khule howe) ghair mehfooz nahi the (lekin) in ka pukhta iradah bhaag kharey hone ka tha.”

(Surah Al Ahzaab-ayat-13)

Dosri taraf momino ke dil ikhlaas, yaqeen, emaan aur jaan nisari ke jazba se labraiz the. In ke dilo ki kefiyat Allah Talah ne yun biyan farmai he:

“Aur emaan daaron ne jab lashkaron ko dekha to (be sakhta) keh utthe! ke is hi ka wada hum se Allah Talah ne aur is ke Rasool ne kiya tha aur Allah Talah aur Rasool (alhe Salato wassalaam) ne sach farmaya aur is se in ke emaan mein farmabardaari ka aur izafa hogaya.”

(Surah Al Ahzaab-ayat-22)

Khandak ke Paar:

Khandak ke paar mushriqeen kid us hazaar fouj do haftey se sardi mein thathar rahi thi aur jab ghiza aur muweshiyon ki khuraak ka masla howa to fouj ka sipa salaa baghawat ke khatre se preshan hogaya. Dus hazaar fouj jama karne wale Quraish, yahoodi aur in ke ittehadi qabail babasi ke alam mein khandak ke paar musalmano ko dekh rahe the. Aksar nidar aur janbaaz ghur sawaar khandak paar karte howe khandak mein gir kar halaak hogaye aur agar koi khandak uboor kar gaya to mujahideen ne is ka kaam tamam kar diya. Musalmaan teer andazon ne inhen khandak se daur rakha. Kuffaar Makka ke journalon ne apni apni muqarrarah bari par hata ul maqdoor koshish karne ke bawajood khandak uboor karne mein nakami ka samna kiya.

Aik jagah khandak ki churai kam thi wahan se mashoor aur bahadur pehalwaan Umro chand nojawano ke sath khandak uboor karne mein kamiyaab hogaya aur musalmano ko muqable ke liye lalkara. Umro tanha aik hazaar sawaar ke barabar bahadur samjha jata tha. Hazrat Ali (r.a) r.a Sher e Khuda ne aik waar mein is ke do tukre kar ke naraa takbeer buland kiya to Umro ke sathi bhi farar hogaye. Nofil Bin Abdullah ghorey par sawaar bhaag kar khandak ko phelangna chahta tha magar khandak mein sar ke bal gira aur garden totne se jan bahaq hogaya. Nofil Bin Abdullah ki lash hasil karne ke liye mushriqeen ne dus hazaar darham Huzoor  Aleh Salato Wasalam ki khidmat mein pesh kiye.

Huzoor Aleh Salato Wasalam ne farmaya:

“Na hamey dus hazaar darham ki zarorat hey aur na hi is ki lassh ki” aur yun baghair kisi muaweze ke Nofil Bin Abdullah ki lassh mushriqeen ke hawale kar di gai.

Is rooz pury din ye silsila jari raha aur musalmaan har janib se mushriqeen ka muqabla karte rahe. Is doraan namaz e Zuhar, Asar aur Maghrib qaza howen jinhen baad mein ada kiya gaya.

Madina Munawwarah ke difa mein yahoodi qabeela Bano Qareeza ki ghaddari se jab khatrah howa to Syedena Huzoor  Aleh Salato Wasalam ne Hazrat Zaid r.a Bin Harsa ko teen so afraad ke hamrah Madine ke makanaat aur gharon ke difa ke liye rawana farmaya jahan khawateen aur bacche qayaam pazeer the.

Hazrat Safia(r.a) ki bahaduri:

Jab khandaq ki khudai mukammal ho gai thi aur mushrikeen ki fouj Madina ke qareeb ponhach gai tu musalman khawateen aur bachon ko hifazat ke liye mazboot qilon aur mustahik imarton main muntaqil kar diya gaya. Hazrat Safia(r.a) Bint-e-Abul Muttalib Hazrat Hassan(r.a) ke farigh name qiley main thin. Ye qila bano qariza ki abadi se qareeb tha. Ibtedai ayyaam main to bano qariza kiyun ke musalmaanon ke sathi the is liye mastoraat ko in ki taraf se koi khatra nahi tha. Kiyun ke ehle arab ifaaye ehed ke liye zarb ul misaal the lekin jang shroo hone se pehle Kaab Bin Asad apne purey qabila bano qariza ke hamra ehed se phir gaya.

Is tarha masto raat bhi in logon ki taraf se hoshyaar ho gain. Aik rooz yahodiyon ne ye khayal karte hoy ke musalmaanon ki sari fouj to khandaq ki simt mushrikeen se barsarepekaar hey. Qila par hamla ka mansooba tayyar kia. Chunacha is gharz se aik yahudi ko sab se pehle halaat maloom karne ke liye qila ki taraf bheja.

Hazrat Safia(r.a) Bint-e-Abul Muttalib farmati hain:

“ Hamarey paas se aik yahudi guzra aur qiley ke charoon taraf chakkar lagaya. Ye is waqt ki baat hey jab hamarey darmiyan koi nahi tha jo h umraa  difa karta……

Is liye main ne kaha:

“ Aye Hassan(r.a)!ye yahudi…..jesa ke ap dekh rahe hain. Qila ke chakkar laga raha hey aur mujhe Allah ki qasam andesha hey ke ye baqi yahud ko bhi hamari kamzori ke mutalliq agah karde ga. Huzoor  Aleh Salato Wasalam aur Sahaba karaam(r.a) jang main is tarha masroof hain ke wo hamari madad ko nahi a saktey. Ap jayye aur is yahudi ko qatal kar dijye.”

Hazrat Hassan(r.a) darbaar Nabvi(s.a.w.w) ke shayar the. Binai se mehroom the.

Hazrat Hassan(r.a) ne kaha: “ Agar main larne ke qabil hota to is waqt medaan-e-jang main hota,”

Hazrat Safia(r.a) kehti hen:

“ Ab main ne apni kamar bandhi aur lathi li aur qiley se utar kar is yahudi ke paas pohanchi aur lathi se maar maar kar is ka khatma kardiya. Is ke baad qiley main wapis aye aur Hazrat Hassan(r.a) se kaha: “ Jayye! Is ke hathyaar utaar lijye.”

Hazrat Hassan(r.a) ne kaha “ Mujhe iske hathyaar aur samaan ki koi zarorat nahi.”

Musalmaan bachon aur aurtoon ki hifazat par Huzoor  Aleh Salato Wasalam ki phoppi ke is karnamy ka bara gehra asar hoa. Is karwai se yahudiyon ne samjha ke in qilon main bhi musalmaanon ka hifazati lashkar mojood he, yahudiyon ko dobara is qisam ki jurraat na hoi. Albatta wo mushrikeen ke sath apne ittehaad ka amli sabot paish karne ke liye inhe musalsal rasd pohanchate rahe. Musalmaanon ne in ke rasd ke bees ounton par qabza kar liya.

Kuffaar Ki Hosla Shikni:

Agarchey muhasara ki tawalat mein musalmaan bhi mushkilaat ka samna kar rahe the lekin kuffaar mein himmat o hosla nahi raha tha. Isi doraan aik no muslim ne khamoshi se Syedena Huzoor  Aleh Salato Wasalam ki khidmat e aqdas mein hazir ho kar kuffaar mein phot dalne ki ijazat talab ki. Ye no muslim Naeem r.a Bin Masood the. Jin ke emaan se abhi tak kuffaar agah nahi howe the. Inhon ne yahood ke baghi qabeele Bano Qareeze aur Quraish Makka ke lashkar mein mojood Bano Ghatfaan mein aisi phot dali ke wo aik dusre se mutanfar aur bazaar hogaye.

Kuffaar ka lashkar hosla haar raha tha. In ki rasd khatam ho rahi thi ke Quraish Makka ko Hajj ke intezaam ki fikar hogai. Mausam ki shiddat mein izafa hogaya aur sardi barh gai. Sipahi bimaar o halaak ho rahe the aur ye soch rahe the ke hum kis tarha wapis hon ge?

Musalmano mein mojood munafiqon ki sazish bhi in ke kisi kaam nahi ayi aur wo musalmano ke haleef qabail ko ehad torne par raza mand nahi kar sake.

Ghaibi Madad:

Syedena Huzoor  Aleh Salato Wasalam Zuhar o Asar ke doraan musalsal dua mein masroof rahe:

“Aye Allah! Aap Quran Kareem ke nazil farmane waly hain aur jald hisaab karne wale hain. In qabeelon ko shikast dijiye. Aye Allah! In ko shikast dijiye aur in ko larkhara dijiye aur in par hamari madad farmaiye.”

Batil par ittehaad karne wale abhi kisi faisle par muttafiq nahi howe the ke raat ko itni taiz aandhi aayi ke kheemey hawa mein ghobaron ki tarha urne lage. Lashkar mein roshan alao bujh gaya. Shahdeed barish se sardi barh gai. Barish, tufaan aur baadlon ki garj mein kuffaar ki mayusi fouj khof o haraas ka shikaar hogai aur Allah Talah ne aandhi, barish aur farishton ki jamaat se mujahideen ki madad farmai.

Quran e Kareem mein irshad he:

“Aye emaan walon! Allah Talah ki is naimat ko yaad karo jo tum par howi jab tumhare paas lashkar aya to Allah Talah ne in par aandhi bheji aur aisa lashkar bheja jo tumhe nazar nahi aata tha aur Allah Talah dekh rahe the jo tum kar rahe the.”

(Surah Al Ahzaab-ayat-9)

Hazrat Huzaifa r.a jab Huzoor  Aleh Salato Wasalam ke hukum se kuffaar ke lashkar mein halaat maloom karne gaye to inhon ne dekha ke hawa ke tufaan ne in ke kheeme ukhaar diye, degen ulat den, ghorey bad mast daur rahe the aur sangrezon ki awazen a rahi thien jo ghoron ko lag rahe the.

Hazrat Huzaifa r.a farmate hain:

“Jab mein wapis a raha tha to raasta mein bees sawaar mile. Inhon ne mujh se kaha ke tum apne aqa ko khabar de do ke Haq Talah ne kuffaar ke lashkar par Huzoor  Aleh Salato Wasalam ko nijaat di. mein Huzoor  Aleh Salato Wasalam ke paas pohncha to Huzoor  Aleh Salato Wasalam ne bhi namaz mukammal kar ke tabassum farmaya aur mujhe basharat di.”

Quran Paak mein irshad he:

“Aur jab dekhin musalmano ne foujen, bole ye wohi hain jo wada diya tha hum ko Allah Talah ne aur in ke Rasool Aleh Salato Wasalam ne aur sach kaha Allah Talah ne aur in ke Rasool Aleh Salato Wasalam ne, aur in ka aur barha yaqeen aur attat karna.”

(Surah Al Ahzaab-ayat-22)

Kuffaar Ki Nakaami:

Jab aandhi, aag aur barish ka ye tufaan, bijli ki chamak aur karak urooj par pohnchien aur lashkar tabah o barbaad hota nazar aaya to Abu Sufiyan ne ajlat mein meeting ki, halaat biyan kar ke khud hi jaldi mein ye faisla sunaya ke mein ghar jar aha hon tum bhi safar karo aur seedha apne oonth ke paas aya aur bad hawaasi mein isy maarna shuru kar diya ke wo uth khara ho. Halan ke is ke ghutne bandhe howe the aur wo uth nahi sakta tha. Aik dusre aadmi ne oonth ke ghutne khole to wo uthne ke qabil howa. Is tarha Quraish aur Haleef Qabail wapis lout gaye. Jab subah sadiq ne raat ka pardah chaak kiya to sipahiyon ne dekha ke medaan e jang mein dushman mojood nahi the.

Allah Talah ka irshad he:

“Aur Allah Talah ne kafiron ko gusse mein bhare howe hi (namuraad) lota diya inhon ne koi faidah nahi paya. Aur is jang mein Allah Talah khud hi momino ke liye kaafi hogaya. Allah Talah bari qowaton wala aur ghalib hain.”

(Surah Al Ahzaab-ayat-25)

Musalmaan Madina Munawwarah lout gaye aur Allah Talah ka shukar baja laye.

Syedena Huzoor  Aleh Salato Wasalam ne is muqe par farmaya!

“Ab Quraish ki laraiyan khatam hogayen aindah hum pesh qadmi karen gen.”

Samama Ka Islam:

Inhi dino Samama Ibne Asaal nami aik shaks jo Yamama ke ilaqe ka sardaar tha, Huzoor  Aleh Salato Wasalam ko dhoke se qatal karne ki niyat se Madina mein dakhil howa aur na waaqfiyat ki waja se Madina ki galiyon mein bhatakne laga. Sahaba Karaam r.a ko is par shuba howa aur usy pakar kar Huzoor  Aleh Salato Wasalam ki khidmat mein pesh kar diya. Huzoor  Aleh Salato Wasalam ne farmaya ke is ko masjid ke aik satoon ke sath bandh do.

Ye shakhs teen din tak Masjid e Nabvi mein qaid raha. Is doraan Huzoor  Aleh Salato Wasalam ne is ki bohat khatir madarat ki aur subah o shaam apni khaas oonthni ka doodh is ke liye bhejte rahe. Rozana is se ye bhi pochte ke tumhari kiya raye he?

Samama kehta…… “Agar aap mujhe qatal karen ge to aik mauziz insaan ko qatal karen ge aur agar ehsaan karen ge to aik sipaas guzaar shakhs par ehsaan karen ge aur agar meri rehai ke ewaz raqam talab karen ge to muhaiya kar di jaye gi.”

Teesre din Huzoor  Aleh Salato Wasalam ne farmaya ke Samama ko azaad kar do. Chunacha Sahaba Karaam r.a ne isi waqt is ko riha kar diya. Ab Samama ka jisam mukammal tor par azaad tha, magar is ka dil Huzoor  Aleh Salato Wasalam ke husn e salook ka aseer ho chukka tha ke rehai ke baad is ne Masjid se bahir ja kar ghusal kiya aur wapis akar baghair kisi tamheed ke goya howa LA ILAHA ILLALLAH

MUHAMMAD UR RASOOL ALLAH

Huzoor Aleh Salato wassalaam, Hazrat Samama r.a ki sadaqat aur kaya palat se bohat masroor howe aur in ko duniya o akhrat ki bhalai ki khushkhabri di.

Is ke baad Hazrat Samama r.a ne umrah ke liye jane ki ijazat chahi. Huzoor  Aleh Salato Wasalam ne bakhushi ijazat de di aur wo umrah ke liye rawana hogaye. Jab wo

LABBAIK ALLAHUMA LABBAIK LA SHAREEKA LAKA LABBAIK

Parhte howe Makka mein dakhil howe to ahle Makka ne pocha:

“Kiya tum Be Deen hogaye ho?” (k Allah ko lashareek keh rahe ho)

Inhon ne kaha…… “Nahi, Be Deen nahi howa, balke deendaar howa hon q ke Hazrat Muhammad Aleh Salato Wasalam ke deen ka peero kaar ban gaya hon aur yaad rakho ke aindah tumhe gandum ka aik daana bhi nahi mile ga jab tak Huzoor  Aleh Salato Wasalam hukum nahi den ge.”

Ahle Makka ke liye jo ghilla ata tha, wo Yamama se guzar kar ata tha. Hazrat Samama r.a ne wapis ja kar hasb e wada ghilla band akr diya aur ahle Makka bhook se bilbila utthe.

Chunacha Abu Sufiyan Madina aya aur Huzoor  Aleh Salato Wasalam se kaha:

“Kiya tum apne ap ko Rehmat tulilalameen nahi kehte ho?”

“Kehta hon.” Huzoor  Aleh Salato Wasalam ne farmaya,

“Magar hamare sath tumhara salook mukhtalif hey.” Abu Sufiyan bola “Tum ne hamare baron ko talwaar se maar dala aur bacchon ko bhook se maar rahe ho. mein tumhe Allah ka aur rishtedaari ka wasta deta hon ke hamare haal par reham karo.”

Huzoor Aleh Salato Wasalam ko is ki halat e zaar par reham agaya aur Huzoor  Aleh Salato Wasalam ne Hazrat Samama r.a ko peghaam diya ke ahle Makka ki tijarat ke raaste khool diye jayen.

SALLAL LAAHO TAALA HABIBIHI MUHAMMADION WASALAM

Ehmiyat O Nataij:

1.    Jazeerah e arab ki mutadid Islam dushman qowaton ne apni tamam afraid qowat aur maddi wasail ko jama kar ke bare josh o gharosh se markaz Islam par hamla kiya tha. Is hamle ke sath inhon ne bari tawaqqaat wabasta kar rakhi thien lekin in ki ye muttehdah meham jis maiyoos kun nakami se do chaar howi, is ne in ki kamar tor di. Inhen yaqeen hogaya ke itni qowat wo dobarah har giz jama nahi kar sakte is liye ab is no ghaiz Islami mumlikat aur is ke deen ko wo qatan koi shikast nahi pohncha saken ge.

2.    Yahood jo Madina Tayyaba mein ayesh o araam ki zindagi basar kar rahe the bazaron aur tijarti mandiyon mein in ko bala dasti hasil thi. Zarrai zameenen, baghaat aur nakhlistaan in ki milkiyat the. Bahemi muhaidah ki waja se in ki tarf ankh utha kar koi nahi dekh sakta tha. Is ke bawajood in ke dilon mein Islam ke barey mein bughaz o anaad ke jazbaat josh marte rehte the. Is ghazwa ke bais in ki Islam dushmani zahir hogai. Muhaidah torne mein inhon ne pehal ki. In sangeen halaat mein in ki ehad shikni aur khayanat karne ke sabab in ko saza dene mein azaad hogaye.

SULAH HUDEBIYA:

Mushriqeen ke zulm o sitam se tang aakar musalmaan Makka chor kar Madina Tayyaba mein abaad hogaye the. Magar kuffaar ne inhen yahan bhi araam ka sans nahi lene diya. Allah Talah ne mushriqeen ke is maarwa salook ki mazmab ki hey.

Allah Talah ka irshad he:

“Allah Talah mushriqon ko q azaab na den. Halan ke inhon ne ahle emaan ko Masjid ul Haraam mein ane se rook diya.

(Surah Al Anfaal-ayat-34)

Aik raat Huzoor  Aleh Salato Wasalam ne khuwab dekha ke Huzoor  Aleh Salato Wasalam Sahaba Karaam r.a ke sath Makka Mukarrama tashreef l gaye hain aur Umrah ada kiya hey. Huzoor  Aleh Salato Wasalam ne Sahaba Karaam r.a ko khuwab sunaya aur Umrah ki adaigi ke liye Makka jane ka iradah farmaya. Makka jane ki khabar sun kar musalmaan bohat khush howe. Makka muhajireen ka abai aur mehboob watan tha muddat se wo log Makka nahi gaye the muhajireen ko aksar Makka ki yaad ati thi inhen ziyarat e Kabaa ki bhi bari khuwahish thi. Madina ke musalmaan bhi becheni se is waqt ke muntazir the jab inhen bhi Allah Talah ke ghar ki ziyarat naseeb ho.

Umre ke Liye Rawangi:

Hijrat ke chatey saal Huzoor  Aleh Salato Wasalam apne do hazaar sathiyon ke hamrah Makka Mukarrama rawana hogaye. Is baar musalmano ke qaafle mein kai soo oonth bhi shamil the. Sardaraan e Quraish ke liye ye waqt bohat sakht tha. Wo faisla karne se qasir the. Agar ijazat de di jaye ke musalmaan kai soo oonth ke sath Makka mein dakhil ho jayen to ye andesha tha ke wo Makka par qabza kar len gen. agar do hazaar musalmaan Makka mein dakhil hojayen to is baat ki kiya zamanat hey ke jab wo wahan se jayen ge to do hazaar se ziyadah nahi hongen. Inhon ne faisla kiya ke musalmano ko Makka mein dakhil nahi hone diya jaye. Huzoor  Aleh Salato Wasalam ne in ke khadshaat aur andeshon ko daur karne ke liye apne safeer Haraash r.a Bin Umaiyya Harai ko bheja ta ke Quraish ko bataye ke musalmano ko maqsad sirf Kabaa ki ziyarat karna hey. In ke paas koi hathiyaar nahi he, agar musalmaan jang ke liye atey to hathiyaar pehan kar atey. Lekin Syedena Huzoor  Aleh Salato Wasalam ka safeer Makka nahi pohnch saka. Do soo sawaron ka dasta jis ki qayadat Akarma Ibn e Abu Jehal kar raha tha, raasta mein marahim howa aur qasid aur is ke sathiyon ko pakar liya. In ke jitney oonth the inhi tangent kaat dien. Musalmaan safeer aur is ke sathi oonthon se hath dho bethene ke baad ragistaan mein bhatak gaye. Qareeb tha ke wo halaak hojaye Allah Talah ki madad se wo musalmano ke qaafle tak pohnchne mein kamiyaab hogaye.

Hudebiya:

Musalmano ne “Zul Haleefa” ke muqaam par qurbani ke oontho par nishaan lagane ki rasam ada ki. Is hi muqaam par Umrah ke liye ahraam bandhe aur Makka ki janib rawana hogaye. Huzoor  Aleh Salato Wasalam ne har qisam ke takrao se bachne ke liye Zul Haleefa ka pahari raasta ikhtiyaar kiya aur Makka ki janib apna safar jari rakha. Zul Haleefa ki sar zameen se guzarne ke baad wo log aik intehai tang aur dushwaar pahari ilaqe mein dakhil howe jahan se oontho ka guzarna mushkil aur khatarnaak tha. Is pahari ilaqe mein musalmano ko suraj ki hiddat aur piyaas ki shiddat ki waja se bohat takleef howi. Lekin inhon ne kisi na kisi tarha raasta tey kar liya aur aisy ilaqe mein dakhil hogaye jis ka naam “Hadeebiya” mashoor tha. Hadeebiya Makka se gayarah kilo meter ke faasley par waqiya hey. Yahan se pura Makka nazar ata hey. Makka mein rehne walon ki ankhen nam hogayien. In ka dil tarap uttha ke thori dair baad watan ki mitti ki sondhi khushbo se jisam o jaan mauttar hojayen ge.

Dil Girafta Kefiyat:

Lekin theek aisy lamhaat mein jab ke musalmaan ehtraam ke jazbe aur walhana ishq se Makka pohnchne ki tamanna kar rahe the peghambar e Islam Huzoor  Aleh Salato Wasalam ka oonth chalte chalte ruka aur zameen par beth gaya. Syedena Huzoor  Aleh Salato Wasalam ne oonth ko uthana chaha wo uth gaya lekin uthne ke baad wo qadam peeche hata aur dobara beth gaya. Syedena Huzoor  Aleh Salato Wasalam oonth se utar aye aur musalmano ko mukhatib kar ke farmaya Allah Talah ki marzi yehi hey ke hum is jagah qayaam karen. Huzoor  Aleh Salato Wasalam ka ye irshaad sun kar sare musalmaan oonthon se utar aye. Lekin wo bohat ghamgeen aur dil girafta the. Inhen tawaqqa nahi thi ke Makka ki hadood mein dakhil ho kar, Makka se bahir tehrna parey ga. Ye jagah Hadeebiya ke ilaqe mein thi. Mausam e bahaar mein pani wafar miqdaar mein hota tha lekin is waqt wahan pani nahi tha. Hadeebiya aik khuwen ka naam tha. Is ke ird gird jo gaon abaad tha wo bhi isi naam se mashoor hogaya. Is ka kuch rukba hadood e Haram mein hey aur kuch hadood e Haram se bahir hey. Ye muqaam Makka Mukarrama se noo mile daur waqiya hey.

Musalmono ne Allah Talah ke mehboob Huzoor  Aleh Salato Wasalam se arz kiya:

“Ya Rasool Allah Aleh Salato wassalaam! Hamare sath kai soo oonth hain aur hum taqreeban do hazaar afraad hain. Yahan pani nahi hey. Aise khusk ilaqe mein kaise rahen ge? Huzoor  Aleh Salato Wasalam ki khidmat mein hamai guzarish hey ke hum agey barhen aur aisi jagah pohnch jayen jahan pani jo.”

Huzoor Aleh Salato Wasalam ne dua ke liye dono hath asmaan ki taraf uthaye aur bargah e Ilahi mein dua ki:

“Aye Khalid o Malik Allah Tala! Agar ap pani muhaiya nahi karen ge to musalmaan be ikhtiyaar haram mein dakhil hojayen ge.”

Wahan aik kuwan tha jo khusk tha. Huzoor  Aleh Salato Wasalam ne aik teer liya aur teer ko kuwen mein gaarne ka hukum diya. Kuwen mein jaise hi teer gara gaya pani ka chasma ubal para.

Muzakarat:

Huzoor Aleh Salato Wasalam ki amad ki khabar un kar Quraish ke log is uljhan mein giraftaar hogaye ke agar hum musalmano ko Makka mein dakhil hone se rokte hain to jazeera tul arab ke log mukhalif hojayen ge. Arab qabail ye samjhen ge ke hum Khane Kabaa ke malik ban bethe hain aur Hajj o Umrah aur Ziyaraat e Kabaa ab Quraish ki marzi se hoga aur agar Muhammad (alhe Salato wassalaam) ke qaafle ko Makka mein aany dety hain purey Arab mein sharmindigi hogi ke Muhammad (alhe Salato wassalaam) hum par ghalib agaye.

Is maghdosh sorat e haal se nimatne ke liye inhon ne Arwah Bin Masood Saqfa ko safer muqarrar kiya ta ke wo Hudaibiya ja kar Huzoor  Aleh Salato Wasalam se muzakarat kare. Arwah Bin Masood ne Huzoor  Aleh Salato Wasalam se mulaqaat ki aur in se pocha:

“Tum log kis maqsad se aye ho?”

Syedena Huzoor  Aleh Salato Wasalam ne farmaya:

“Hum Khane Kabaa ki ziyarat karne aye hain.”

Arwah Bin Masood ko qurbani ke wo oonth dikhaye jin par qurbani ke nishan lage howe the. Guftugu ke doraan Arwah ne bari badtamizi se Syedena Aleh Salato Wasalam ke chehrah aqdas ko hath lagaya. Hazrat Mughirah r.a Bin Shuba ne ghazab naak ho kar talwaar ki nook is ke hath mein chibhoi aur bole,

“Ghustakhi nahi kar adab se baat kar.”

Hazrat Abu Bakar Siddique r.a ne Arwah se kaha,

“Aye Arwah! Agar tu safer nahi hota to hum tujhe mout ki neend sula dete.”

Arwah Bin Masood Quraish ke paas pohncha to is ne Quraish ke buzurgon se kaha:

“Me ne Roam ka darbaar aur Habsha ke badshah Nijashi ka darbaar dekha hey. Lekin jo wafadaari aur jaan nisaari musalmano ke dilo mein Muhammad (alhe Salato wassalaam) ke liye hey wo mujhe Qaisar aur Nijashi ke darbaar mein nazar nahi ayi.”

Arwah Bin Masood ke baad aik aur shakhs Quraish ke safeer ki hasiyat se Hudaibiya aaya. Is ne dekhen ke musalmaan ahraam bandhe howe hain aur qurabani ke oonth in ke sath hain. Wapis ja kar Quraish se kaha:

“Me ne qurbani ke oontho ko dekha hey. Jin par saliqa (qurbani ka makhsos nishan) bana howa tha. Is ke ilawah mein ne suna, ke wo Hajj ka makhsos wird parh rahe the. Lehaza is mein koi shak o shuba nahi ke wo Kabaa ki ziyarat karne aye hain aur merey khayal mein in ke upar pabandi nahi lagani chahiye.”

Lekin Quraish mutmain nahi howe. Inhon ne Halais Bin Alqama ko bheja. Halais jab wahan pohncha to Huzoor  Aleh Salato Wasalam ne farmaya:

“Quraish ke numainde ko azaad chor diya jaye ta ke wo jahan jana chahe, jaye. Jis se chahey mulaqaat kare aur jo chahey dekhe.”

Halais Bin Alqama ne bhi yehi dekha ke sarey musalmaan ahraam bandhe howe hain aur qurbani ke liye apne sath oonth laye hain. Halais ko kahin bhi hathiyaar nazar nahi aye. Halais taizi se Makka pohncha aur Quraish ke samne apne tasuraat biyan kiye:

“Aye Makka ke sardaron! mein yaqeen se keh sakta hon ke musalmaan Khane Kabaa ki ziyarat ke liye aye hain. Inki niyat mein khot nahi hey. Merey khayal mein inhen Makka aany ki ijazat honi chahiye. Har shakhs ke Khane Kabaa ki ziyarat ka haq hey. Khane Kabaa par kisi ki ajarah dari nahi hey.”

Quraish ke sardaar Makka mein musalmano ke dakhley par raza mand nahi howe. To Halais naraz hogaya. Aur kaha:

“Agar tum ne Muhammad Aleh Salato Wasalam aur in ke peero karon ko Makka mein aane aur Kabaa ki ziyarat se roka to mein tum logon se alehdah hojao ga aur tum bhi aaj ke baad se mujhe apna ittehadi nahi samajhna.”

Musalmano ke Safeer, Hazrat Usmaan R.A:

Syedena Huzoor  Aleh Salato Wasalam ne Hazrat Usmaan r.a ko qasid bana kar Makka bheja. Hazrat Usmaan r.a ne jab Quraish se mulaqaat ki to ahle Makka ne kaha:

“Aap r.a hamare qabeele se talluq rakhte hain. Hum aap r.a ko ijazat dety hain Kabaa ka tawaaf karen aur Umrah ada karen lekin Muhammad (alhe Salato wassalaam) ko is baat ki ijazat nahi de sakte ke wo Khane Kabaa mein dakhil hon.”

Koor e chasam Quraish ki zid aur hat dharma se muzakarat nakaam hogaye. Hazrat Usmaan r.a ki wapsi mein dair hogai aur is doraan in musalmano mein ye afwah phail gai ke Hazrat Usmaan r.a ko shaheed kar diya gaya hey.

BAIT UR RIZWAAN

Syedena Huzoor  Aleh Salato Wasalam babol ke darakht ke neeche beth gaye aur farmaya ke Usmaan r.a ke khoon ka badla lena farz hey. Jo shakhs is mein shareek hona chahta hey wo mere hath par bait kare ke akhri dum tak wafadaar rahe ga. Tamam Sahaba Karaam r.a ne Huzoor  Aleh Salato Wasalam ke dast e mubarrak par bait kar li. Huzoor  Aleh Salato Wasalam ne apne dayen hath ko Usman r.a ka hath farmaya aur apne dusre hath par hath rakh kar Hazrat Usmaan r.a ki taraf se bhi bait ki.

Surah Fatah mein irshad he:

“Jo log aap se bait karte hain wo yaqeenan Allah se bait karte hain. In ke hothon par Allah ka hath hey. To jo shakhs ehad shikni kare wo apne nafs par hi ehad shikni karta hey jo shakhs is iqrar ko pura kare jo is ne Allah ke sath kiya hey to isy anqareeb Allah bohat bara ajar de ga.”

(Surah Al Fatah-ayat-10)

Kuffaar Ka Safeer:

“Bait ur Rizwaan ke baad ittila musool howi ke Hazrat Usmaan r.a ki shahadad ki khabar durust nahi thi.

Do din do raat ke muzakarat ke baad Quraish ne “Suhail Bin Umro” ko safeer bana kar aik wafad ke sath Hudaibiya bheja ta ke wo Syedena Huzoor  Aleh Salato Wasalam se zarori muzakarat kare. Ta ke “Adam Jaarhiyat” ka muhaidah tey paya jaye. Huzoor  Aleh Salato Wasalam ne Hazrat Ali (r.a) r.a ko bulwaya aur in se kaha ke wo muhaidah ki dastawaiz tiyar karen. Hazrat Ali (r.a) r.a ne likhna shuru kiya.

                 BISMILLAH HIR REHMAAN NIR RAHEEM

Suhail Bin Umro ne foran toka aur bola:

“Hum Rehmaan aur Raheem ko nahi jante, Ali ko “BIMIKA AL ALLAHUMA” likhna chahiye. Q ke qadeem zamane se hum arbon ke tamam muhaide isi naam se shuru hoty hain.”

Hazrat Ali (r.a) r.a ne agla fiqrah likha:

Ye muhaidah howa hey Muhammad Rasool Allah (alhe Salato wassalaam) aur Suhail Bin Umro ke darmiyaan.”

Lekin Suhail Bin Umro ne aik baar phir aitraaz kiya aur kaha: “Is tarha na likho q ke hum Muhammad (alhe Salato wassalaam) ko Khuda ka Rasool nahi mante aur agar mante to Makka mein aane se q rokte? Lehaza is muhaide ka aghaaz is tarha hona chahiye:

“Ye muhaidah hey Muhammad Bin Abdullah aur Suhail Bin Umro ke darmiyan.”

Hazrat Ali (r.a) r.a ne Huzoor  Aleh Salato Wasalam ki taraf dekha…… Huzoor  Aleh Salato Wasalam ne farmaya:

“Ya Ali! Wahi likho jo Suhail kehta hey ta ke is ki razamandi hasil rahe.”

Sulah Nama:

Muhaide ke alfaaz ye hain:

“BISMIKA ALLAHHUMA. Ye muhaidah tey hey Muhammad (alhe Salato wassalaam) Bin Abdullah aur Suhail Bin Umro ke darmiyan aur is muhaide ki ro se Quraish ye manzoor karte hain ke

1.    Aindah dus saal tak musalmano aur ahle Makka ke darmiyan jang nahi hogi aur agar in dus saalon mein koi shakhs Quraish ki ijazat ke baghair musalmano se a miley to musalmano ka ye farz hey ke isy Quraish ke hawale kar den lekin agar koi shakhs musalmano se alehdah ho kar Quraish ke paas aajaye to wo isy musalmano ke hawale nahi karen ge.

2.    Dus saalon mein koi fareeq dusre ki jaan aur maal ko nuqsaan nahi pohnchaye ga.

3.    Dus saala muddat mein Quraish ko ijazat hogi ke wo jis ke sath chahen azaadana muhaidah karen aur apni marzi se rah o rasam barhayen.

4.    Musalmano ko is saal Makka mein dakhil hone aur Kabaa ki ziyarat karne ki ijazat nahi hogi lekin agle saal wo Kabaa ki ziyarat ke liye a sakte hain. Taham shart ye hey ke teen din se ziyadah Makka mein nahi tehren ge aur talwaar ke ilawah koi dusra hathiyaar apne sath nahi layen ge.

Ye muhaidah Huzoor  Aleh Salato Wasalam aur Quraish Makka ke darmiyan howa. Musalmaan Quraish ke taraf se lagai howi pabandi par dil girafta the aur isy apni touheen samajh rahe the.

Hazrat Umar r.a ne Huzoor  Aleh Salato Wasalam se arz kiya:

“Ya Rasool Allah Aleh Salato wassalaam! Kiya Huzoor  Aleh Salato Wasalam ne ye nahi farmaya tha ke hum Makka jayen ge aur Khane Kabaa ka tawaaf karen ge?”

Huzoor Aleh Salato Wasalam ne farmaya: “Tum insha.allah Makka zaror jao ge aur Khane Kabaa ka tawaaf karne ki saadat hasil karo ge.”

Hazrat Abu Jandal R.A Ki Wapsi:

Muhaidah Hudaibiya par dastakhat hone ke baad Hazrat Abu Jandal r.a Makka se farar hogaye aur Hudaibiya pohnch kar musalmano se a miley. Hazrat Abu Jandal r.a ke Hudaibiya pohnchte hi Suhail Bin Umro bhi wahan agaya aur is ne kaha:

“Hamare aur tumhare darmiyaan muhaide ki ro se agar koi shakhs farar hojaye aur tumhari panah mein ajaye to tumhara ye farz hey ke isy hamare hawale kar do…… lehaza mere larke Abu Jandal ko mery hawale kiya jaye.”

Huzoor Aleh Salato Wasalam ne Hazrat Abu Jandal r.a ko in ke baap ke hawale kar diya.

Hazrat Abu Jandal r.a ne arz kiya, “Ya Rasool Allah Aleh Salato wassalaam! Mera baap mujhe maar dale ga.” Huzoor  Aleh Salato Wasalam ne dilasa dete howe kaha,

“Abu Jandal daro nahi! Allah Talah tumhari hifazat karen ge.”

Lekin is waqiya se musalmano mein gham o gussa ki lehar dour gai aur Kabaa ki ziyarat se mehroom hone ke baad in ke asaab par ye dusri kari zarb thi. Lekin Bait Ur Rizwaan ne inhen be qabu nahi hone diya.

Huzoor Aleh Salato Wasalam ne jab ye dekha ke aam musalmaan bohat ranjeedah hain to Huzoor  Aleh Salato Wasalam ne inhen jama kar ke Surah Fatah ye ayaten sunaien:

“Allah khush howa emaan walon se, jab hath milane lage tujh se is darakht ke neeche, phir jana jo in ke ji mein tha, phir utara un par chain aur inaam di un ko aik fatah nazdeek.”

(Surah Al Fatah-ayat-18)

Sulah nama ke baad Huzoor  Aleh Salato Wasalam ne Sahaba Karaam r.a ko hukum diya ke qurbani ke janwar zibah kar do aur sar mudhwa kar ahraam khol do. Syedena Aleh Salato Wasalam ne teen martaba hukum diya magar Sahaba Karaam r.a is qadar shikasta dil aur ranj o gham mein doby howe the ke inhon ne apni jagah se harkat nahi ki.

Syedena Aleh Salato Wasalam is muqe par bohat ranjeedah howe aur apne kheema mein tashreef le gaye Um ul Momineen Hazrat Ume Salma r.a se apne dukh ka izhaar kiya. Inhon ne arz kiya: “Huzoor Aleh Salato Wasalam apna oonth zibah kar ke sar mudhwa len musalmaan Huzoor  Aleh Salato Wasalam ki pairwi karen ge.”

Syedena Huzoor  Aleh Salato Wasalam ne jab qurbani kar ke sar mudhwa liya to Sahaba Karaam r.a ne qurbaniyan den aur sar mudhwa liya aur ahraam se bahir agaye.

Islami Fouj:

Aam musalmaan muhaide ke dair pa asraat ko nahi samajh sake the. Jab wo apne sar mudhwane aur ahraam se nikalne ke baad Madina rawana howe to wo bohat gham zadah aur dil girafta the. Aisi haalat mein jab ke musalmaan dilon mein dard chupaye Madina ki janib gamzan the. Raaste mein aik aur musalmaan Hazrat Abu Baseer r.a ne jo Makka se bhaag nikle the, musalmano se panah ki darkhuwast ki.

Hazrat Abu Baseer r.a abhi itminaan ka sans nahi leny paye the ke Quraish ke do afraad bhi wahan pohnch gaye aur mutalba kiya “Ya Muhammad (alhe Salato wassalaam)! Muhaide ki ro se Abu Baseer r.a ko hamare hawale kiya jaye.”

Hazrat Umar r.a ne agey barh kar arz kiya

“Ya Rasool Allah Aleh Salato wassalaam! Is martaba is shakhs ko wapis na bhejen. Ye hum se panah mangne aya hey agar hamari jaan bhi chali jaye to isy Quraish ko nahi den ge.”

Huzoor Aleh Salato Wasalam ne jawab diya: “ Hum ifaye ehad ke paband hain.”

Ye jawab sun kar Makka se aane wale do admiyon ne musalmano ke samne Hazrat Abu Baseer r.a ko oonth ki peeth par bandha aur rawana hogaye.

Hazrat Abu Baseer r.a ne raaste mein apni rassiyan tor dalien aur azaad hone mein kamiyaab hogaye. Hazrat Abu Baseer r.a ne do mein se aik shakhs ko mout ki neend sula diya jab ke dusra jaan bacha kar bhaag gaya. Hazrat Abu Baseer r.a dubara musalmano se a miley aur in se panah ki darkhuwast ki. Agle rooz zindah bach jane wala shakhs musalmano ke qaafle tak pohnch gaya aur Abu Baseer r.a ka mutalba karne laga. Huzoor  Aleh Salato Wasalam ne hukum diya ke Hazrat Abu Baseer r.a ko is shakhs ke hawale kar diya jaye lekin is se phele ke Quraish ke numaindah Hazrat Abu Baseer r.a ko pakar kar apne sath le jaye wo farar hogaye. Hazarat Abu Baseer r.a ne Makka jane ke bajaye registaan mein panah lene ka faisla kiya.

Hazrat Abu Baseer r.a Zu Al Marwah ke muqaam par panah guzeen hogaye. Kuch dino baad Hazrat Abu Jandal r.a bhi Makka se farar ho kar Zu Al Marwah pohnch gaye aur Hazrat Abu Baseer r.a se a miley phir rafta rafta dusre musalmaan bhi Makka se nikal kar Zu Al Marwah pohnchna shuru hogaye aur aik ghiroh tashkeel pa gaya.

Hudaibiya ka muhaidah howe aik saal bhi nahi guzra tha ke Zu Al Marwah mein musalmano ki tadad itni ziyadah hogai ke aik fouj ban gai. Wo Makka jane wale kaarwano ka raasta rook kar maal e ghanimat hasil karne lage. Zu Al Marwah ke musalmano ne Quraish ko is tarha se naak chane chabwaya diye ke inhon ne aajiz o laachaar ho kar khud hi peghambar e Islam Aleh Salato Wasalam se darkhuwast ki ke wo Zu Al Marwah mein jama hone wale musalmano ko Madina bulwa len. Is tarha Zu Al Marwah ke musalmaan Madina agaye.

                     JANG E KHYBER

“Khyber” aik bari abaadi ya shehar ka naam hey. Yahan yadoodiyon ne kai mazboot qiley bana rakhe the. Ye nehayat hi zarkhaiz ilaqa hey. Kheti baari aur ajnaas khurd o nosh is jagah kasrat se peda hoti hain. Is ilaqe ki aab o hawa qadre ghair sehat mand hey. Khyber sar zameen Arab par yadoodiyon ka sab se bara markaz tha.

Ahle haq ne jab yahoodiyon ko bad ehadi, jhoot aur faraib ke jurm mein Madina se jila watan kiya to qabeela Bano Nazeer Khyber mein a kar abaad hogaye the. Khyber ke yahoodi bahadur aur taqat war the, dolat mand the. Khyber ki sona ugalti zameeno aur sar sabz nakhlistano ki waja se in ki muashi halat bohat achi thi, amdani (income) waafar thi. Amdani ka aksar hissa ahle Islam ko nuqsaan pohnchane aurin ko tabah o barbaad karne ki sazishon mein kharch hota tha.

Huzoor Aleh Salato Wasalam Hudaibiya ke safar se Zul Hajjah 6 mein Madina Tayyaba wapis tashreef le aye. Yahan akar Huzoor  Aleh Salato Wasalam ko Khyber ke yahoodiyon ki sazishon ke barey mein aagahi howi ke Sulah Hudaibiya ke bawajood inhon ne apni adawat ke tor tareeqe nahi badle. Wo log badsatoor musalmano ke tijarti qaflon ko Khyber ke muzafaat se guzarne ki ijazat nahi dety the. Ta ke musalmaan shumali mulkon se iqtesadi rabta qaim na kar saken.

Yahood ki resha dawaniyon ko khatam karne ke liye Syedena Huzoor  Aleh Salato Wasalam ne faisla kiya ke Khyber ki taraf pesh qadmi ki jaye. Lehaza Madina Tayyaba mein bees pacchis rooz qayaam ke baad Huzoor  Aleh Salato Wasalam Khyber ki taraf rawana howe. Hazrat Sabaa Bin Arfata Ghaffari r.a ko Madina Tayyaba mein apna naib muqarrar farmaya. Islami fouj ke sipa salaar Huzoor  Aleh Salato Wasalam khud the. Islami lashkar ki tadaad sulaa soo (1600) thi jin mein se chodah soo paidal aur do soo ghorey sawaar the.

Khawateen Ki Shirkat:

Ghazwa e Khyber mein kuch khawateen bhi shareek e safar howien. Chand khawateen Huzoor  Aleh Salato Wasalam ki khidmat mein hazir howien aur arz kiya ke Huzoor  Aleh Salato Wasalam Ghazwa e Khyber mein yahoodiyon ke khilaaf jang ke liye tashreef le ja rahe hain hamari ye khuwahish hey ke hamey bhi apne hamrah le jayen ta ke hum medaan e jang mein zakhmi mujahideen ki marham patti kar saken. Inhen waqt par dawa aur pani de saken. Hum larai ke doraan nezah utha utha kar layen gi aur mujahideen ko den gi. Is tarha hum sipahiyon ki madad karen gi. Huzoor  Aleh Salato Wasalam ne in ka ye josh aur jazba dekhte howe ijazat ata farma di.

Jaye Qayaam Ka Intekhab:

Khyber se thore faisle par Bano Ghatfaan ke qabail ke qabail abaad the. Ye qabail yahoodiyon ke mawun aur madad gaar the. Ghazwa e Khandak mein bhi ye musalmano ke khilaaf rahe the.

Jab Bano Atfaan ko ittila mili ke Huzoor  Aleh Salato Wasalam Khyber par hamla karne ke liye rawana hogaye hain to inhon ne apne jangjo jawano ko jama kiya ta ke ahle Khyber ki madad ke liye rawana hon.

Huzoor Aleh Salato Wasalam ne aala harbi baseerat se kaam letey howe lashkar gah ke liye aisi jagah muntakhib farmai ke Khyber aur Ghatfaan ke darmiyani raasta kaat dala ta ke Bano Ghatfaan, ahle Khyber ki madad nahi kar saken.

Dusri janib Bano Ghatfaan Khyber ki taraf aik manzil tey kar chuke to inhen shor sunai diya wo samjhe ke musalmano ne in ke ahle o ayaal par hamla kar diya hey. Is khayal se wo khofzada hogaye. Inhon ne faisla kiya ke Khyber ke yahoodiyon ki imdad ke liye agey barhne ke bajaye apne ahle o ayaal ki hifazat karen.

Huzoor Aleh Salato Wasalam KI DUA:

Doraan e safar aik din Sahaba Karaam r.a ne josh mein a kar nihayat buland awaaz se naraa Takbeer buland karne shuru kar diye. Huzoor  Aleh Salato Wasalam ne farmaya:

“Ahishta….. tum na kisi behrey ko pukaar rahe ho, na ghaib ko. Tum jisy pukaar rahe ho wo tumhare paas hi hey.”

Jab ye kaarwane hadood Khyber mein dakhil howa to Huzoor  Aleh Salato Wasalam ne karwaan ko qayaam ka hukum diya, sab tehar gaye aur ye dua farmai:

“Ya Allah! Asmano aur jin cheezon par aap saya fugan hain in ke Rab. Aye saat asmano aur jo inhon ne upar uthaya howa hey. In sab ke Rab! Hawaon aur jin ko wo ura rahi hey in ke Rab! Hum aap se in ke is gaon ki khair aur is ke bashindon ki khair ka sawaal karte hain aur hum is gaon ke shar aur is ke rehne walon ke shar se panah mangte hain.”

Phir farmaya: “Aqdimowa bismillah” Allah ka naam le kar agey barho.

KHYBER KA MEHLE WAQO:

Khyber ka qila bunyadi tor par teen hisson mein taqseem tha aur har hissa mutadid qilon par mushtamil tha.

1.    Hasoon al natata…… is hisse mein teen qile the:

A.  Alnaam    B. Al Saab   G. Qalta Zabeer

2.    Hasoon al Shak….. is hisse mein do qile the.

A.  Hasan Abi                  B. hasan bara. Is qile ko Albareed bhi kaha jata tha.

3.    Hasoon Al Kateeba…. Is hisse mein teen qile the.

A.  Hasan al Qamoos      B. Alwateh          G. Salalam

Yahoodi apne apne qilon mein morcha band ho gaye. Inhon ne apne ahle o ayaal ko “Alkateeba ke qile” mein tehra diya. Isi qile mein maal o asbaab ko bhi mehfooz kar diya. Ghilla ke anbaar aur aslah ke zakhair “Kalaha Lanaam” mein jama kar diye gaye.

Jang Ka Aghaz:

 Sab se phele Huzoor  Aleh Salato Wasalam ne Natata ke qilon ko fatah karne ka azam farmaya aur Natata ke qilon mein sab se phele Qila Alnaam ka muhasara kiya aur jald hi alnaam ke baad dusre qile bhi fatah hogaye. Albatta AlQamoos nihayat mustehkam aur mazboot qila tha is ko fatah karna aik masla ban gya. Har subah musalmaan is qile par hamla karte aur shaam ko wapis ajate. Kai din tak is ka muhasara jari raha.

Khyber ki muzir aabo hawa ke bais Huzoor  Aleh Salato Wasalam bimaar hogaye to Huzoor  Aleh Salato Wasalam ne apna parcham Hazrat Abu Bakar Siddique r.a ko ata farma diya. Hazrat Abu Bakar Siddique r.a ne fouj ki kamaan sambhal li aur qila par hamla kiya lekin shaded mazhammat ke bawajood kamiyabi nahi howi. Kharaab mausam ki waja se Hazrat Abu Bakar Siddique r.a bimaar hogaye. Dusre rooz Huzoor  Aleh Salato Wasalam ne in ki jagah Hazrat Umar r.a ko fouj ki qiyadat sonp di aur parcham in ke hawale kar diya. Magar mazboot qilon par koi zarb nahi par saki.

FATAH E KHYBER:

Ye sorat e haal jab Syedena Huzoor  Aleh Salato Wasalam ke samne arz ki gai to Huzoor  Aleh Salato Wasalam ne farmaya: “Kal mein ye jhanda is shakhs ko don ga jis ke zariye Allah Talah is qile ko fatah farma den ge.”

Huzoor Aleh Salato Wasalam ka ye irshad e girami sab mujahideen ne sun liya. In ki ye raat paicho tab mein guzri. Har haik ki khuwahish thi ke ye saadat is ko naseeb ho. Jab subah howi to sarey mujahideen bargah e Risalat mein hazir howe. Wo ye janne ke liye az had be qarar the ke wo kon khush naseeb hey jis ko aj parcham ata kiya jaye ga?

Ashoob chasham ki waja se Hazrat Ali (r.a) r.a Huzoor  Aleh Salato Wasalam ke sath nahi aye the. Jab Huzoor  Aleh Salato Wasalam Madina Tayyaba se rawana hogaye to Hazrat Ali (r.a) r.a ne socha:

“Huzoor Aleh Salato Wasalam jehaad par tashreef le jayen aur mein peeche reh jaon Ba Khuda! Aisa har giz nahi hoga.”

Chunacha Hazrat Ali (r.a) r.a Khyber tashreef le aye aur halat ye thi ke ankhon par patti bandhi howi thi. Huzoor  Aleh Salato Wasalam namaz e Jumma ada farma chuke to jhanda mangwaya aur pocha:

“Ali r.a kahan he?”

Arz kiya: “ In ki dono ankhen dukh rahi hain is liye yahan mojood nahi.”

Huzoor Aleh Salato Wasalam ne inhen bulaya. Jab Hazrat Ali (r.a) r.a Huzoor  Aleh Salato Wasalam ke samne tashreef laye to arz kiya: “ Mujhe nazar nahi ata.”

Huzoor Aleh Salato Wasalam ne farmaya:

“Mery nazdeek ajao.”

Syedena Ali r.a farmate hain “ Huzoor  Aleh Salato Wasalam ne mera sar apni goud mein rakha aur luaab e dehan meri ankhon par lagaya, to isi waqt meri ankhen theek hogayen.

Aur mujhe Huzoor  Aleh Salato Wasalam ne apna parcham ata farmaya aur hidayat farmai ke phele dushmano ko Islam ki dawat dena aur inhen Allah Talah ke haqooq se agah karna agar tumhari tableegh se koi aik aadmi bhi raahe raast par agaya to ye tumhare liye surkh oonton se behter hey.

Hazrat Ali (r.a) r.a rukhsat ho kar qile ke samne tashreef le gaye aur ja kar apna jhanda nasb kar diya. Aik yahoodi ne is qile ki chaatt se jhanka aur pocha: “ Aap kon hain?” Hazrat Ali (r.a) r.a ne farmaya: “Me Ali hon.” Yahoodi ke mu se nikla: “Is Khuda ki qasam! Jis ne Mosa a.s par toureet nazil ki aap yahoodiyon par ghalib ajayen ge.

Mubaarzat:

Yahoodiyon ne Hazrat Ali (r.a) r.a ki dawat Islam ko mustarad kar diya aur larai ke liye madd e muqabil agaye aur apna jangjo agey bheja. Hazrat Ali (r.a) r.a is ka muqabla karne ke liye agey barhe aur palak jhapakne mein is ka kaam tamam kar diya. Is tarha yahoodiyon ki taraf se kai janbaaz jangjo aye aur koi bhi kamiyaab nahi howa. Jang e Khyber ke doraan Hazrat Ali (r.a) r.a ne dus din mein chaar qilon ko fatah kiya. Jab ke baqiya qilon mein rehne walon ne khud hi hathiyaar daal diye.

“Aur is ne tum ko in ki zameen aur in ke gharon aur in ke maal ka wo ilaqa diya jahan tum ne khabhi pair bhi nahi rakha tha waris bana diya aur Allah har cheez par qudrat rakhta hey.”

(Surah Al Ahzaab-ayat-27)

Fatah Khyber ke Baad:

Fatah Khyber ke baad peghamber e Islam Huzoor  Aleh Salato Wasalam ne yahoodiyon ke sath meharbani aur afo o darguzar farmaya. Inhen ijazat de di gai ke wo Khyber chor kar chale jayen aur sath gharelo samaan le ja sakte hain. Khajoren, muwaishi aur ghilla apne sath le jane ki ijazat nahi thi. Jo yahoodi Khyber chor kar nahi jana chahte the inhen wahan rehne ki ijazat mil gai aur ye riayat bhi hasil hogai ke wo apna karobaar kar sakte hain. Yahoodiyon ki tamam muqaddas kitaben aur dusre eham kaghzaat bhi lota diye gaye.

Ehmiyat O Nataij:

1.    Khyber ki fatah se Islam ki mulki aur siyasi halat ka naya dour shuru hota hey. Islam ke haqeeqi dushman sirf do the. Mushriqeen aur yahood. Agarchey mazhaban baham mukhtalif the lekin siyasi asbaab ki bina par in mein ittehaad peda hogaya tha. Yahoodiyon ne tamam Arab ko Islam ki mukhalfat par uksaya tha. Jis ka phela manzar Khandak ka maurka tha. Lekin Khyber ki fatah ke baad yahood ki qowat bilkul toot gai aur mushriqeen ka aik bazo jata raha.

2.    Ghazwa e Khyber se phele tamam janggen difai howien. Ye pheli iqdami jang thi. Ye phela ilaqa hey jisy fatah kar ke Islami riyasat mein shamil kiya gaya.

3.    Fatah Khyber ke baad Islami riyasat ko ye haq hasil hogaya ke wo jab chahen jis waqt chahen yahood ko yahan se nikaal sakte hain. Is liye yahood apni shararaton se baaz agaye.

4.    Fatah Khyber ke baad agar Huzoor  Aleh Salato Wasalam chahte to Arab ke janggi dastoor ke mutabiq yahoodiyon ko qatal karwa sakte the lekin Huzoor  Aleh Salato Wasalam ne in sab ko azaad kar diya. Is husn e salook se baaz log musalmaan hogaye.

MUARKA MOTA:

Jazerh arab kay mashreek or magrib mein do almi kowatein,iran or radam mojood thin.jinhon ny taqreeban sari duniya ko apney kabzy mein lia hua tha.aisi halat mein saday la ilaha illallah buland hoior haq ko fatah naseebb hoi.islam ki pe dar pe fatohat ny dushmane islam ko shonka diya.qaseer rom ko jab islami fatohat ka ilm hua to usny musalmanon se muqably ki tayyari shuru krdi.

Huzoor Aleh Salato Wasalm ne basra ke governer ko grami nama tehreer farmaya, governer ka name haris bin abi shimr ul ghasani tha, Huzoor  Aleh Salato Wasalm ny tehreer farmaya ke tum islam qubool farma lo.ye grami nama Hazrat haris bin umer al azdi ly kr gay.jab wo mota ke moqam par pohunchy to qaseer ke ek raees Sharjeel bin umrah wal ghasani ny pocha: ap kon hain?Or kahan ja rhy hain?Kia ap muhammad (alehe salato wassalm) ke qasid hain?

Hazrat Haris Ny Farmaya:

Han mein Hazrat muhammad(alehe salato wassal) ka qasid hoon

Ye sunty hi isny Hazrat haris ko rassiyon se band dia or phir in ka sar qalam krdia. Us zamany mein qasid ya safeer ka qatal ek battareen or naqabl e mafi jurm tha.or issy qabal kisi ny bhi safeer ko kabhi qatal kia .ye jurm elan e jang samjha jata tha.aj bhi isy sangeen jurm samjha jata hai.

LASHKAR E ISLAM KO HIDAYAT:

Jab ye almnaak khabar Huzoor  Aleh Salato Wasalm ny suni to unhy buhut dukh hua Huzoor  Aleh salato wasalm ka intekam leny ki tayyari shuru krdi.mujahedeen madina tayyaba se teen meel daur jarf ke makam par jama huy. Syedna Huzoor  Aleh Salato Wasalm  wahan tashreef lay or zohar ki namaz qaim ki namaz ke bad sahaba karam se irshad farmaya:

Is lashkar ka sipa salar zaid bin haris ko muqarrar karta hoon.agar ye shaheed hojayn to jafar bin abi talib is lashkar ki kaman sambhalen gy agr jaffar bhi shaheed hojayn to abdullah bin rawaha mujahedeen ke sipa salar hongy or agar ye bhi rah e haq mein shaheed hojayn to musalman jis ko chahen ameer muntakib krlen Hazrat zaid bin harisa Huzoor  Aleh Salato Wasalm ke azad krda ghulam thy.hazrat jaffar e tayyar Hazrat Ali (r.a) ke bhai or Huzoor  Aleh Salato Wasalam ke khas masahib thy Hazrat abdullah bin rawaha muaziz ansari or mashoor shair thy.

Huzoor Aleh salato wasalm ny apney dast e mubarak se Hazrat zaid ko ilm ata farmayailm safaid rang ka tha.mujahedeen ko taqeed farmayi sub sy pehly haris bin umer shaheed ki qabar par hazri den or logon ko islam qubool krny ki dawat den.agar wo is dawat ko qubool krlen to buhut acha hai.or agar wo islam ki dawat qubool na kren to Allah se madad talab krty huy in se jang kren. Huzoor  Aleh Salato Wasalam ny mujaheden islam ko rukhsat krty waqt ye hidayat

Farmai. mein tumhy Allah se darny ki nasehat krta hoon or jo musalman tumhary hum safar hainin ke sath bhalai ki taqeed krta hoon.Allah ka nam lekar Allah ke munqir logo ke sath jang kro.kisi ko dhoka na denaq hadad ya krna kisi bacchy ya aurat ko qatal na karna.kisi borhy ko or hanka hoon mein gosha nasheen rehny walon ko qaid na krna kisi darakht ko nuksan pohunchana na kisi ko katna or kisi makan ko munahdum na krna.

Lashkar E Islam Ki Rawangi:

Jama de ul awwal sun ath hijrime teen sipahiyon ki islami fauj mota ki taraf rawana hoi.islami fauj ny jab madina tayyaba se koch kia to sharjeel bin umar al ghasani ko in ki rawangi ki itlah milk gai to is ny bhi jang ke liy ek lakh fauj rawana krdi. Islam ke janbaaz madina tayyaba sejab mulk sham ke muan nami qasbay mein pohunchy to inhy khabar mili ke sharjeel ki fauj ke ilawahar qul ek lakh fauj ke sath balqa mein khema zan hogya hai.

Shahadat:

Jab islami lashkar balqa (sham) pohuncha to romi lashkar se amna samna hua or dono lashkar ek dosry par hamla awar hogay Huzoor  Aleh Salato Wasalam ka atta farmaya hua ilm Hazrat zaid bin harisa ke hath mein tha.aap ki talwar moot ban kr dushmanon ki safon par qayamat barpa karrhi thi.bila akhir ek dushman ny neza Hazrat zaid bin harisa ke seeny mein utaar dia.or Hazrat zaid bin harisa shaheed hogay. Issy pehly ke islam ka parcham in ke hath se zameen par girta Hazrat jaffar bin abi talib agy barhy or parcham utha lia.kuffar ke teer or talwaron ny ap ko shaded zakmi krdia.lekin Hazrat jaffar akhr dam tak dushmanon se muqabla krty rahy. Isi doraan ek romi ny in ko apni talwar se shaheed krdia.hazrat abdullah bin rawaha teezi se agy barhy or inhon ny jhanda utha lia.yahan tk ke wo bhi shaheed hogay.

Is ke baad Hazrat sabit bin qais agy barhy or islam ke jhandy ko utha lia or buland awaz mein mujahedeen se kaha. Ay islam ke sarfaroshon!Ab aisa admi muntakhib krlo jo islami ilm ko buland rkh sakay.

Logon ny kaha hum tumhy apna alambardaar banaty hain.

Hazrat sabit bin qais ny kaha ke mein is laiq nhi. Samny Hazrat khalid bin waleed khary thy.hazrat sabit bin qais ny hazreen se pocha kia tum khalid ko qaid lashkar muntakhib karny par raza mand ho? Sub ny baik awaz ho kar kaha:hum raza mand hain.

Hikmat e Amli:

Hazrat khalid ny wo alam pakar lia.hazrat abdullah bin rawaha ny jis waqt jam e shahadat noosh kia magrib ka waqt tha.dono lashkar apni apni chawniyon mein wapis agay.agly roz Hazrat khalid ki jangi hikmat e amli samny ai.hazrat khalid bin waleed ny islami lashkar ki tarteeb badal dior lashkar ki nay tareeqy se safbandi ki.mesrah ke fojiyon ko meemna par or memna ke fojiyon ko mesrah par saf aran kardiya.

Dushman ke sipahi jab amny samny huy to dekhy huy chehroon ki bajay inhyn ajanabi chehry nazar ay.inhon ny samjha ke islami lashkar mein nai fauj shamil hogai hai.ye khayal aty hi dushman ki fauj ke hosly past hogay.hazrat khalid bin waleed ny dushman ki nafsiyati bechaini or izteraab ko mehsoos krlia or dushman par hamla kardia.dushman ke beshumar nojawan mout ke ghat utar gay or buhut se dushmanon ny khoof zada ho kar medan e jang se rah e farar ikhtiyar krli or musalmanon ko buhut sa maal e ghanimat hasil hua.hazrat khalid ny bahaduri se jang ki or wo musalmanon ko kuffar ke beshumar lashkar ke nargay se nikalny mein kamiyaab hogay.doran e jang Hazrat khalid ke hathon mein nao talwaren totin.sath din jang jaari rahi.farzandan e tauheed uqaaboon ki tarhan romi lashkar par jhanptay or in ko maut ke ghaat utarty rahy.

Hazrat khalid bin waleed khudadad jangi salahiyat ki bina par islami lashkar ko apney se santh gunah ziyada dushmanon ke hisaar se nikalny mein kamiyab hogay.

Huzoor(Aleh Salato Wasalam)Ny Medan E Jang Ka Haal Bata Diya

Ahadees mein hai k:

Huzoor Aleh Salato Wasalam sahaba karam ke hamrah masjid nabhvi mein tashreef farmaty.maqam mota or Huzoor  Aleh Salato Wasalam ki nazroon ke samny koi parda hail nahi tha.Huzoor Aleh Salato Wasalam barahy raast medan e jang ka mushaheeda farma rahy thy.goya khud medan e jang mein mojod hain.

Huzoor Aleh Salato Wasalam ny farmaya:

Ahle haq or romiyon ke darmiyan jang shuru hai.zaid kuffar ke sath lar rahy hain. Or wo shaheed hogay.ab jaffar muarka aazma hain..wo bhi shahadat pa gay. Ab abdullah ny alam uthaya hai.wo bhi rah e khuda mein nisaar hogay. Huzoor  Aleh Salato Wasalam apney jannisaroon ki halat batany ke baad Gham zada huy.or Huzoor  Aleh Salato Wasalam ki ankhen ashkbaar thin.

Kuch dair sukoon ke baad irshad farmaya ke ab khalid ny kaman sambhal li hai. Wo Allah Talah ka behtreen banda hai. Allah ny is ke hath par fatah naseeb farma de hai. Is ke baad Huzoor  Aleh Salato Wasalam ny dua farma de hai. Ya Allah khalid teri talwaroon mein se ek talwaar hai.pas tu us ki madad farma. Us roz se khalid bin waleed saif ullah ke laqab se mashhoor huy.

Khair E Maqdam:

Musalman bary araam sy apney markaaz madina munawaraah ki taraf rawana huy. Madeeny ke qareeb pohunchy to Huzoor  Aleh Salato Wasalam deegar sahaba Karam ke hamrah khair maqdam ke liy madina se bahar tashreef le ay or Islami lashkar ka istaqbaal kiya.istaqbaal krny walon mein jo bacchy shamil thy wo ek hojoom ki tarhan agy agy daor rahy thy jab ke Huzoor  Aleh Salato Wasalam apni sawari par tashreef la rahy thy. Bacchon ki taraf dekh kar Huzoor  Aleh Salato Wasalam ny farmaya. In bacchon ko sawariyon par bitha do or jaffar ke bety ko mujhy dedo. Chunachan Hazrat jaffar ke bety abdullah bin jaffar ko khidmat e aqdas mein paish kiya gaya.Huzoor Aleh Salato Wasalam ny abdullah ko utha kar apny sath sawari par bitha lia. Jab wo lashkar samny aya to kuch logon nyin ka istaqbaal taanoon se kiya.

                   YA FARAR FARARTUM FE SABILILLAH

Ay bhagoron!Tum rahy khuda mein jihaad krny sy bhaag ay ho is zindagi sy medan e jihad mein shaheed hona tumhary liy bais e izzat tha. Huzoor  Aleh Salato Wasalam ny ye jumly suny to foran irshad farmaya. Bhagny waly nahin hain.ye bar bar hamlah karny waly hain.

Ye rooh parwar shad sun kar musalmanon ki pareshani door hogai.

Ahmiyat O Nataij

Tareekh islam is baat ki gawah hai ke yehi loog jo ghazwah e mota mein romiyon ke khilaf islami fauj ka hissa hony ki shakal mein takray thy.or bazahir is jang ka koi hatmi fatah ya shikast ki suraat mein nateejah bar amad nhi hua tha magar Huzoor  Aleh Salato Wasalam ki zaban e mubarak se nikly huy alfaaz ke ye bhagny waly nahi hain balky ye bar bar hamlah karny waly hain.kuch hi arsay ke baa urf ba hurf sach sabit huy or musalmanon ny qaleel arsy meromiyon or iraniyon ko bary bary muarkon mein shikast faash deny ke baad sara ilaqa hukomat mein shamil karlia or yun qaisrah or kasra jesi ye azeem hokoomatein or in ke rehny waly islam ke halkah bagosh ho kar deen o duniya ki be panah daolat se sarfaraz huuy or islam  ke liyin logo ny buhut se lazawal karnamy anjam diya.