Topics

Ashaab-e-Feel


Tum ne nahi dekha k tumhary Rab ne in hathi walon k kiya haal kiya, in k daoo ko tabahi mein nahi dala aur in par parindon ki tukriyan bhejien k inhen kankar k patharon se maaren to inhen kar dala khaye howy bhoos k tarha. (Surah Fail)

Hazrat Ibrahim a.s ne Allah Tala k hukum se Makka mein Allah Tala ka ghar tamer kiya hey. Arab k log Khana Kaba mein har saal haj k liye aaty the. Khana Kaba ka intizaam Quraish k hath mein tha is liye arab k dusrey tamam qabail Quraish ko izzat-o-ehtraam ki nagah se dekhty the.

Arab k junoob mein aik mulk Yaman waqia tha. Yaman mein esai badshah Abraha ki hukumat thi. Wo aik nihayat mutasib aur muqa parast governor tha. Is ne habsha k badshah k sath ghaddaari kar k Yaman par qabza kar liya aur badshah ko qatal kar diya. Is ne jab dekha k arab Khana Kaba ka haj karty hain to is ne arbon ko neecha dikhany aur mazhab se daur karny k liye Yaman ki daro-ul-saltanat “Sa aa” mein aik azeem-ul-shaan imarat tamer karwai.

Is ne imaarat mein safaid, surkh, zard aur siyah pathar lagwaye. Is ki diwaron mein jagah jagah soney aur chandi k patrey lagwaye. Is imarat mein lagy howy darwazon aur khirkiyon mein khubsurti k liye soney ki mekhen lagwai gayen. Zarbuft k pardon se is imarat ko aaraasta kiya gaya tha.

Khubsurti mein ye imarat duniya mein aik ajooba thi. Jagah jagah choty choty minaar bany howy the jin mein ood aur amber jalta tha khushbo se puri imarat mehakti rehti thi. Farsh par behtreen qaleen bichey howy the. Ye imarat khubsurti aur taseen-o-araish mein apni misaal aap thi. Abraha ne logon ko hukum diya k ainda Khana Kaba ki jagah is ibadat gah mein aa kar haj aur tawaaf Karen.

Shawahid milty hain kuch arsy tak log is ghar ka haj karty rahy aakhir kaar aik raat is mein kisi ne ghilazat daal di. Jab Abraha ko pata chala to gussa mein aag bagola ho gaya is ne Khana Kaba par fooj kasha ka irada kiya aur hazaron ki tadaad mein fooj jama ki. Is ka irada tha k fooj kasha kar k Khana Kaba ko (naozubillah) manhadam kar diya jaye. Abraha ne apney liye aik hathi k intikhaab kiya. Is k lashkar mein barah ya teerah hathi the. Abraha ne jis hathi ka intikhaab kiya tha wo itna taqatwar tha k mooti se mooti diwaar ko takkar maar kar gira deta tha.

Fooj kasha k liye Abraha Yaman se Makkah rawana howa aur Makkah mein dakhil hony k liye Makkah k atraaf mein parao dala. Is jagah Makkah k logon k mawashi charty the. Abraha k lashkar ne wo mawashi pakar liye in mein do so oont Huzoor aleh Salato Wasalam k jadd-e-amjad Hazrat Abdul Muttalib k the. Is waqt Hazrat Abdul Muttalib Khana Kaba k matwali aur Quraish k sardaar the.

Jab in ko lashkar kasha ki khabar mili k Abraha Makkah par hamla karna chahta hey to inhon ne Quraish ko jama kiya aur meeting kar k ye tey kiya k Makkah ko khali kar diya jaye.

Hazrat Abdul Muttalib ne farmaya:

“Khana Kaba ko koi manhadam nahi kar sakta. Ye Allah Tala ka ghar he, Allah Tala khud is ki hifazat Karen gen.”

Meeting mein ye tey paya k Abraha se mulaqaat ki jaye chunacha Hazrat Abdul Muttalib Quraish k chand buzurgon k sath Abraha se milny gaye.

Abraha ne Hazrat Abdul Muttalib ka nihayat pur josh istaqbaal kiya. Allah Tala ne Hazrat Abdul Muttalib ko be misaal husn-o-jamaal ata kiya tha aur Hazrat Abdul Muttalib ki shakhsiyat waqaar aur dabdaby mein be misaal thi. Hazrat Abdul Muttalib ko jo dekhta tha maroob ho jata tha.

Abraha Hazrat Abdul Muttalib ko dekh kar maroob ho gaya aur nihayat adab-o-ehtraam k sath istaqbaal kiya. Abraha ne ye to munasib na samjha k Hazrat Abdul Muttalib ko takhat par apney barabar bithaye. Is ne azaaz-o-akraam mein ye roosh ikhtiyaar ki k khud takhat se utar kar in k sath beth gaya.

Doraan-e-guftogu Hazrat Abdul Muttalib ne apney oonton ki rehai ka mutalba kiya. Abraha ne heraan ho kar kaha:

“Barey tajub ki baat hey k aap ne mujh se apney oonton k barey mein baat ki aur Khana Kaba jo aap ka aur aap k aabo ajdaad k deen aur mazhab ka muqaam hey is k barey mein aap ne kuch nahi farmaya.”

Hazrat Abdul Muttalib ne farmaya:

“Me oonton ka malik hon, is liye mein ne oonton ka sawal kiya aur Khana Kaba Allah Tala ka ghar hey. Allah Tala khud apney ghar ki hifazat farmayen gen.”

Abraha thori dair khamosh raha aur is k baad Hazrat Abdul Muttalib k oonton k wapis karny ka hukum de diya. Hazrat Abdul Muttalib apney oonton ko le kar Makkah wapis aagaye aur Quraish ko hukum diya k Makkah khali kar den aur tamam oonton ko Khana Kaba ki nazar kar diya aur chand aadmiyon ko apney hamrah le kar Khana Kaba aaye aur sab ne gir gira kar duaen mangien.

“Aap se darkhuwast he, dua he, iltija hey k Aye Allah! Banda apni jagah ki hifazat karta he, aap apney ghar ki hifazat farmaiye aura hl-e-saleeb k muqaably mein hamari madad farmaiye. In ki saleeb aur in ki tadbeer aap ki tadbeer par khabhi ghalib nahi aasakti. Ye log lashkar aur hathi le kar aye hain ta k aap k ayaal ko qaid Karen. Aap k haram ki barbaadi k liye aaye hain jahalat ki bina par ye iraada kiya hey aap ki azmat o jalaal ka khayal nahi kiya.”

Hazrat Abdul Muttalib Allah Tala se dua kar k hamrahiyon k sath pahaar par charh gaye. Is majme mein burhe jawaan sab mojood the. Majme mein mojood nojawanon ne Hazrat Abdul Muttalib ki khidmat mein arz kiya:

“Hum Abraha se laren ge aur is k lashkar ko Makkah mein dakhil nahi hony den ge.

Hazrat Abdul Muttalib ne nojawanon ko josh o kharosh dekh kar farmaya:

“Hamey aqalmandi aur hosh k sath is mamley ko hal karna chahiye. Bazahir hamari itni taqat nahi hey k hum itni bari fooj ka muqabla kar saken.”

Baham mashwara se ye tey paya k aurton aur burhey mard Makkah mein rahen ge aur nojawaan kafan pehan kar Makkah se kooch Karen ge aur Abraha ki fooj jidhar se guzrey gi wahan lait jayen ge ta k hamari qurbani Allah Tala qabool farma len.

Chunacha aisa hi howa Hazrat Abdul Muttalib nojawanon ko sath le kar is muqaam par lait gaye, jahan se Abraha ki fooj ko guzarna tha aur dua ki Allah Tala hamari qurbani qabool farma aur apney ghar ki hifazat farma.

Dusri taraf se Abraha ne Makkah par fooj kasha k liye lashkar tiyaar kiya aur bagal baja kar kooch karny ka hukum diya. Jab lashkar mazdalfa aur manaa k darmiyaan mehsar mein pohncha to Abraha ka hathi beth gaya. Is ko uthany ki bohat koshish ki magar wo nahi uttha. Hathi ko aankas mary gaye, lekin wo nahi uttha. Jab Makkah ki dusri taraf se uthaya gaya to wo foran uth kar taizi se Yaman ki taraf bhagney laga aur jab is ka mu Makkah ki taraf karty the to wo beth jata tha. Aisa lagta tha k zameen ne is ko pakar liya hey. Shaan-o-shoukat ka muzahira karty howy Abraha ki fooj ne jab pesh qadmi ki to Allah Tala ne is fooj ko waadi-e-mehsar mein rook diya.

Patharon se arbon ne aslah ka kaam liya aur fooj par sang baari ki. Allah Tala ne dushmanon par sang baari karny wali hawa nazil farma di jis ki waja se fooj tittar bittar ho gai aur asmaan mein beshumaar churyan namodaar howien.

Quran Paak mein in ka naam “Ababeel” hey. Ababeel churya se choti hoti hey. Ye churyan lashkar par bajre k daany k barabar kankariyan girati gayen.

Fooj k jis sipahi par ye kankariyan girti thien. In k jisam par cheechak nikal ati thi aur jaise hi jisam par kankariyan lagti thien jisam galny lagta tha. Lashkar mein fooj ki kaseer tadaad cheechak ki wajah se halaaq hogai. In kankariyon k lagney se lashkar mein aisi bhagdar machi k fooji aik dusrey ko rondtey kuchaltey howy bhaag nikley. Bhaagney waly aik dusrey par gir rahe the aur mar rahe the. Malik-ul-Moat ne inhen itni bhi muhlat nahi di k wo abraha k foojiyon ki lashen utha saken.

Allah Tala ne Abraha par aisi aafat nazil ki k Abraha ki ugliyon k pur jhar gaye, phir seena phat gaya, dil bahir nikal aaya aur wo tarap tarap kar mar gaya aur dushmanon par churiyon ka ghez-o-ghazab zarb-ul-misaal ban gaya. Ye waqia Huzoor Aleh salato wassalam ki padaish se pachaas din phele ka hey.

 


BARAN E REHMAT


“Baraan-e-Rehmat” uloom ka khazeena he. Ganj giran maya he. Aksar kitabon ko parhty howy insaan boriyat mehsos karta he. Do chaar safhaat parh kar us ki tashnagi bujh jati he. Jab k azeemi sahib ki seerat ki ye kitaab parhty howy insaan tashnagi mehsos karta he. Wo chahta he k isy mazeed parhay q k har line dusri line aur har safah dusry safah se marboot he. Maloomat se pur ye kitaab qari kin a to nazar idhar udhar hony deti he aur na hi khayal aur ye hi kisi kitaab ki khobi hoti he k wo qari k dil me utar jaye aur wo isy mazeed se mazeed parhney me laga rahe.