Topics

KHIDMAT E KHALAQ

Surat Fatihah ki pehli ayat main Allah Ta’lah ne apni ta’reef biyaan ki hai.

            “Alhamdulillah E Rabbul’Aala’meen”

            Sab ta’reefen Allah ke liye hain jo aalmeen ka Rabb hai, be’had meherbaan, nihayat reham wala hai, buland se buland, awwal se aakhir, aakhir se awwal, zaahir o baatin, maazi wa haal, haal o mustaqbil, raat aur din, Samawaat aur zameen main jo kuch hai in sab se ziyadah Allah ki ta’reef hai.

Makhlooq Ki Duty:

            Allah Ta’lah ne makhlooqaat ko peda kiya hai. Peda karne se pehle zindigi ke liye zaroori wasaail kiye aur kainaati nizaam ko is tarah tarteeb diya keh kainaat ka har fard aur har zarah aik dusre ke kaam aa raha hai.

            Sab Ta’reefen Allah ke liye makhsoos hain jis ne suraj banaya, suraj ko itna matee, farmaa’n bardaar aur esaar karne wala banaya keh woh nahin dekhta keh meri dhoop se kon faidah uthata hai. Dhoop tapte medaan par parti hai. Dhoop buland o baala barf posh pahaariyo’n ko hararat bakhshiti hai. Dhoop mehlaat ke kamro’n aur phons ki jhonpariyo’n ko bhi roshan karti hai. Dhoop kheton par bhi phelti hai aur dhoop keechar main rehne wale keere makoro’n ko bhi zindigi atta karti hai.

            Allah ne chaand banaya. Chaand ki Ro ki pehle kirnen margazaro’n ko husan atta karti hain. Phalo’n ko mithaas muntaqal karti hain. Paani main hulchul peda karti hain. Chaand ki munawar kirne’n jab sumanadr ke seene ko cheer kar is ke dil main utar jaati hain to sumandar main irtiaash peda hota hai. Pursakoon paani main iztiraabi kefiyat main bhonchaal ki surat

Main zaahir hoti hai aur sakoon aamez lehre’n bees, tees fit oopar uchhalti hain.

            Aasmaan ko Allah ne sitaaro’n se sajaya. Ghup andhere main sitaare musaafiro’n ko raastah dikhaate hain aur pedal chalne waale qaafilo’n, oonto’n ya kashtiyo’n main bethe hue musaafir sitaaro’n se rehnumaai haasil karte hain.

            Zameen jis ko Allah Ta’lah ne itna sakht nahin banaya keh log thokaren kha kar girne lagen aur itna narm nahin banaya

 Keh zameen ke baasi daldal main dhans jaein. Allah Ta’lah ne zameen ko makhlooqaat ke liye bichhona bana diya.

Giyaarah Hazaar Noo’ein:

            Zameen main mojood saarhe giaaarah hazaar makhlooqaat ki zindigi ka daar o madaar paani par hai. Paani Allah Ta’lah ke hukam se khidmat guzaari main masroof hai. Woh nahin sochta nahin dekhta keh kon sarkash hai, kon zaalim hai, kon gunehgaar hai yak on hai jo Allah Ta’lah ki farma’n bardaari main Allah ko haazir o naazir jaan kar is ki ta’reef biyaan karta hai. Sab ki zindigi ban raha hai.

            “Alhamdulillah Rabb ul Aalameen”

            Sab Ta’reefe’n is wa’hidah la shareek Allah ke liye makhsoos hain jo Aalmeen ko peda kar ke wasaail atta karta hai. Jo Rehmaan aur Raheem hai.

            Sab Ta’reefe’n Allah ke liye hain jo saare jahaano’n ka paalne wala hai. Behad Rehmaan aur nihayat Reham wala hai.

            Allah ke sifaati naam taqreeban giaarah hazaar hain aur har naam Allah ki aik sifat hai. Sab naamo’n par Allah Ta’lah ka isam Raheem muheet hai. Noo’o’n ki ta’daad bhi giyaraah hazaar paanch so batayi jaati hai.

Har Makhlooq Dusri Makhlooq Ke Saath Bandhi Hui Hai:

            Har makhlooq ka har fard jis tarah zameen ko dekhta hai is tarah aasmaan ko bhi dekhta hai. Zameen par dekhta hai to isse pahaar nazar aate hain.

            Zameen ke andar dekhta hai to madniyaat ka suraag milta hai. Zehan paani main utar jaata hai to paani ki makhlooq ka idraak hota hai. Koi sahib feham insaan paani ki makhlooq ke baare main ta’fakkur karta hai to is ke oopar ajaaibaat ki duniya khul jaati hai. Chhoti machhli aik inch se bhi kam aur bari waheel machhli, ghoonghe, marjaan seep ke pet main moti, Sea Food wagerah sumandar ki makhlooq hain.

            Jab Insaan kin azar zameen ke gird o nawaah se nikal kar aasmaan ko dekhti hai. Aasmaan main das hazaar sitaaro’n par parti hai to insaan sitaare ke bushra ko dekhta hai. Sitaare is ko nahin rokte keh mujhe na dekh, chaand bhi man’aa nahin karta keh mujhe na dekho. Tasawwuf  ki duniya main is ka matlab yeh liya jata hai ke kaainaat main har makhlooq dusri makhlooq se makhfi rishtah main bandhi hui hai. Agar maklooqaat ke darmiyaan chahe woh makhlooq zameeni ho, chahe woh makhlooq paani ki ho, chahe woh makhlooq hawa ki ho, chahe woh makhlooq aasmaano’n ki duniya ki makhlooq ho. Agar makhfi rishtah main juri hui na hoti to har aasmaani nazaarah dekhne main koi na koi rukawat zaroor peda karta.

            Yehi makhfi rishtah kaainaat ke chhote se chhote zarrah aur bare se bare karah ko aik dusre ke sath munsalik kiye hue hai. Is Ilm se sufi ke oopar yeh haqeeqat munakshaf hoti hai keh tam’maam kaainaat aik hi hasti ki malakiyat hai. Agar kaainaat ke mukhtalif ijsaam zameen, chaand, suraj, sitaare, farishte, jinaat mukhtalif hastiyo’n ki malakiyat hote to yaqeenan aik dusre ki

Roshnaasi main tasaadam peda ho jata. Aik hasti ki malakiyat dusri hasti ki malakiyat se muta’raf hona na pasand karti.

            Quran Paak ne aisi maalik hasti ka Ta’ruf Allah ke naam se karwaya hai.

            “Alhamdulillah Rabb ul Aalmeen”

            Sab ta’reefe’n kaainaat ki maalik aik hasti ke liye makhsoos hain. Is hasti ka naam Allah hai. Allah ki ta’reef yeh hai keh woh makhlooq ko peda karta hai aur ba’hesiyat Rabb ke makhlooqaat ki zaruriyaat ki kafalat karta hai.

Kaainaat Ka Har Zarrah Ta’meel Ka Paband Hai:

            Allah isam zaat hai. Isam zaat maalikaanah haqooq rakhne waali hasti ka naam hai. Ya’ni Allah maalik hai aur saath saath qaadir matlaq bhi hai.

            Allah apni malkiyat main jis tarah chahe tasaraf kar sakta hai. Jis tarah chahe takhleeq ki nizaam main tabdeeli kar sakta hai aur jis tarah chahe kaainaati nizaam ko chalaane main aik dusre ki duty laga sakta hai. Maklooq ka koi fard is ke nizaam main dakhal nahin de sakta.

            Alhamdulillah Rabb ul Alamaeen. Al’Rehmaan ur Raheem.

            In dono Aayaat main Allah Ta’lah kid ono sifaat malkiyat aur rehmat o qudrat ka tazkirah hai. Isam zaat Allah maalkanah haqooq ka haamil hai. Aur rehmaan o Raheem qaadiranah haqooq ka maalik hai. Qaadiranah siffat ko tasawwuf ki zubaan main rehmat kehete hain. Allah ke saarrhe giaraah hazaar asmaa main raheemanah aur qaaidranah osaaf har isam main mojood hain. Yehi osaaf makhlooqaat ke darmiyaan makhfi rishtah ki hesiyat rakhte hain.

            Suraj ki roshni ehl e zameen ki khidmat guzaari se is liye inkaar nahin kar sakti keh ehl e zameen aur suraj aik hi hasti ki malkiyat hain. Woh hasti maalkaanah haqooq main haakimaanah qadro’n ki maalik hai aur is ki rehmat o qudrat kisi waqt bhi is baat ko gawarah nahin karti keh is ki malkiyatein aik dusre ke waqoof aur khidmat guzaari se munkar ho jaayein.

            Ruhaani ustaad apne shagird, saalik ko yeh raaz muntaqil karta hai keh mojudaat ki zindigi aur zindigi ke tam’maam ajza kaainaat ke wajood main aane se pehle Allah Ta’lah ke Ilm main the. Allah Ta’lah ne jab in ajzaa ko harkat main laana chah to “KUNN” farma diya. Is Ilm se yeh munakshaf hua keh kaainaat, kaainaat main har fard ba’shamol insaan aik harkat hai aur yeh harkat Allah Ta’lah ke hukam se shuru hoti hai. Is harkat ke hazaaro’n ajzaa hain aur in ajza aur in ajza main se har cheez aik harkat hai goya insaan ki zaat lashumaar harkato’n ka maj’muaa hai. Bilkul isi tarah har makhlooq aik harkat hai aur har harkat ke hazaaro’n ajza hain aur in ajza main se har cheez aik harkat hai. Har harkat dusri harkat ke sath Malahaq hai.

            Har harkat Allah se shuru hoti hai aur Allah ki tarf lot rahi hai. Choon keh har makhlooq harkat ki belt par mutaharak hai is liye har makhlooq ka dusri makhlooq se rishtah qaaim hai.

            “Ham ne tumhare liye jo kuch aasmaano main hai aur jo zameen main hai sab ka sab tumhare tabe kar diya hai ya’ni unhain tumhari khidmat guzaari main masroof kar diya hai.

            Suraj bhi khidmat main masroof hai, chaand bhi khidmat main masroof hai, zameen bhi khidmat main masroof hai, nibataat aur jamadaat bhi khidmat main masroof hai aur insaan bhi makhlooqaat ki khidmat main masroof hai. Yeh aisi khidmat hai, khidmat guzaar ko jis kai lam nahin hai. Allah Ta’lah ne insaan ko fazaliyat bakhshi keh insaan yeh Ilm seekh leta hai.

Haqooq e Insaani Aur Degar Makhlooq Ke Haqooq:

            Aik mureed ne muraad se poocha:

            Allah se dosti kis tarah ki jaye?

            Muraad ne mureed se poocha:

            Tum kisi se dosti karna chaho to kiya karo ge?

            Mureed ne arz kiya:

            Is ke sath husan e akhlaaq ka bartaao Karen ge is ki khaatir madaarat Karen ge, is ka khayal rakhein ge.

            Muraad ne kaha:

            Agar yeh baatein nahin karo ge ya tumhain is ke muwaqeh nahin milen ge phir kiya hoga?

            Mureed ne arz kiya:

            Ho sakta hai keh dosti khatam ho jaye.

            Muraad ne farmaya:

            Dosti is waqt pukhtah hoti hai jab aadimi dost ki dilchaspiyon ko qabool kar le. Agar tum namazi ke pakke dost banna chahte ho to is ke sath namaaz parhna shuru kar do. Jua khelne wale ka dost juwaari hota hai. Aur nashah karne wale ka dost gar is ke sath nashah nahin karta to aapas main dosti nahin hoti.

            Muraad ne mureed se sawal kiya keh:

            Allah Ta’lah kiya karte hain?

            Mureed ne apni zehni istaat ke mutaabiq idhar udhar ki bohat saari baatein ken.

            Muraad ne qatah kalaam kar ke farmaya keh:

            Mukhtasar baat yeh hai keh Allah apni makhlooq ki khidmat karta hai. Allah se agar dosti karni hai to makhlooq ki khidmat karo.

Muraad ne mazeed tashreeh farmaai:

Kiya tumne bakri dekhi hai?

Mureed ne arz kiya:

Jee haan! Dekhi hai

Poocha: bakri kiya karti hai?

Mureed ne arz kiya:

Bakri doodh deti hai. Log is ka gosht khate hain. Is ki khaal insaano’n ke kaam aati hai.

Muraad ne farmaya: is ka matlab yeh hua keh bakri insaan ki khidmat main masroof hai.

Muraad ne phir poocha:

Zameen kiya duty hai?

Mureed ne arz kiya:

Zameen par khetiyaa’n lehlahti hain. Zameen daraht ugaati hai. Darakhto’n par phal lagte hain. Zameen insaan ko khush karne ke liye phoolo’n main rang aamezi karti hai.

Muraad ne sawal kiya:

Bakri aur zameen ka kiya rishta hai?

Mureed ne arz kiya:

Bakri zameen par ghaas charti hai darakhto’n ke patte khaati hai.

Muraad ne irshad farmaya keh:

Kaainaati system yeh hai keh har she dusre ki khidmat karne main masroof hai jab ger asharaf makhlooq Allah ki khidmat kar rahi hai to insaan ka bhi farz hai keh makhlooqaat ki khidmat kare.

Jan Saalik is ramz ko samajh leta hai aur Allah ki makhlooq ki khidmat ko apni zindigi ka maqsad banal eta hai to isse apne baap Aadam Aleh Assalaam ka warsah muntaqil ho jata hai.

Hazrat  Aadam Aleh Assalaam pehle sufi hain jinhain Allah Ta’lah ne baatini aloom sikhaaye hain. Baatini aloom ka dusra naam tasawwuf hai aur yehi Ilm Hazrat  Aadam Aleh Aslaam ka warsah hai.

Aadam aleh Assalam sab ke baap hain. Baap olaad ki khidmat karta hai. Olaad ko paalta posta hai. Aadam ka har beta bhi Aadam ki olaad ka baap hai. Baap ka yeh farz hai keh olaad ki khidmat kare. Aadam zaad ko bila tkhsees makhlooq ki khidmat is liye karni chahiye keh dusri makhlooqaat bhi aadam ki khidmat main masroof hain.


Ahsan o Tasawuf (sufism)

KHWAJA SHAMS-UD-DIN AZEEMI

Rohaniyat aur tasawuf ke barey mein logon nay bohat kuch likha hai, aik giroh ka khayaal hai ke aksar sufia chunkay oon ka libaas pehantay they is liye log inhen sufi kehte they. Oon ko arabi mein sof kehte hain. Woh log yeh libaas is liye pehantay they ke sof ka libaas pehnana aksar nabiyo, walyoon aur bargzida hstyon ka mamool raha hai. Baaz hazraat ke khayaal mein ashaab sufah ke sath nisbat rakhnay ki wajah se yeh log sufi kehlate hain jabkay aik tabqa ka khayaal hai ke sufi Safa se mushtaq hai lekin un saari tshrihat se dil mutmaen nahi hota.