Spiritual Healing
سوال: میرے ایک عزیز کو دن میں کئی دفعہ ایسا محسوس
ہوتا ہے جیسے اس کی ٹانگوں، پیروں اور کمر پر کیڑے رینگ رہے ہوں۔ بدن میں سوئیاں
چبھتی محسوس ہوتی ہیں۔ وہ اس بیماری سے نجات حاصل کرنے کے لئے ہر ممکن تدبیر کر
چکے ہیں۔ آج کل تعویذ بھی پہنے ہوئے ہیں اور وظائف بھی پڑھتے ہیں۔ کوئی ایسا علاج
تجویز فرمایئے جس سے انہیں مستقل آرام آ جائے۔
جواب: اپنے عزیز سے کہیں کہ صبح بہت سویرے اٹھ کر فجر
کی نماز پڑھیں اور سورہ فلق پڑھتے پڑھتے کشتی میں سوار ہو کر ایک ساحل سے دوسرے
ساحل تک دریا پار کر لیں۔ دوران سفر بات کرنا منع ہے۔ دریا پار کرنے کے بعد پانی
کے کنارے مشرق کی طرف منہ کر کے اکڑوں بیٹھ جائیں اور انگشت شہادت سے ہامان،
ہاروت، ماروت لکھ کر ہاتھ سے مٹا دیں۔ لکھنے اور مٹانے کا یہ عمل ہر حال میں سورج
نکلنے سے پہلے کیا جائے۔ اگر یہ نہ ہو سکے تو آبادی کے باہر کنوئیں کے پانی میں
اپنا چہرے کا عکس دیکھا جا سکتا ہے۔ کراچی میں رہنے والے کوئی صاحب اگر اس کیفیت
میں مبتلا ہوں تو وہ کیماڑی سے کشتی میں بیٹھ کر منوڑا تک سفر کر سکتے ہیں اور
وہاں ساحل سمندر پر عمل کر سکتے ہیں۔ علی ہذا القیاس لاہور میں دریائے راوی کے ایک
کنارے سے دوسرے کنارے تک اور دوسرے دریاؤں کے قریب رہنے والے حضرات دریا کے ایک
کنارے سے دوسرے کنارے تک سفر کر کے یہ عمل کر سکتے ہیں۔ خدانخواستہ اگر کسی کے
اوپر جادو یا سحر کا اثر ہو گیا ہے تو وہ بھی اس عمل سے ختم ہو جاتا ہے۔ اس عمل کے
لئے پیشگی اجازت لینے کی ضرورت نہیں ہے۔ ہر شخص کو کھلی اجازت ہے۔ اللہ تعالیٰ ہم
سب کا حامی اور مددگار ہے۔
