Topics

بیعت ہونے سے کیا مراد ہے اورکیوں ضروری ہے


بیعت ہونے سے کیا مراد ہے اور بیعت کرنا کیوں ضروری ہے۔۔۔ بیعت کے قوانین کی وضاحت فرما دیں۔

                                                                                                       محمد زکریا بٹ                                                            (لانڈھی ، کراچی)

 

جواب:   حضور قلندر بابا اولیاء رحمتہ اللہ علیہ نے بیعت کے قواعد و ضوابط کے بارے میں بیان کرتے ہوئے فرمایا سیدنا حضور علیہ الصلوٰۃ والسلام کا بنایا ہوا قانون ہے۔ ایک آدمی دو جگہ بیعت نہیں ہو سکتا اگر کوئی صاحب دو تین جگہ بیعت ہوگئے ہیں تو ایسا قانون سے عدم واقفیت کی وجہ سے ہوا  ہوگا۔ حضور ﷺ کا ہر فرمان قانون کی حیثیت رکھتا ہے کیونکہ حضور ﷺ کے ہر فرمان کے پیچھے حکمت ہے۔

            بیعت کے اس قانون کی حکمت کیا ہے۔۔۔ اس قانون کی حکمت کو سمجھنے کے لئے  اگر غور کریں تو ایک بات سامنے آتی ہے کہ جتنے بھی انسان دنیا میں پیدا ہوئے ہیں سب کا ایک ہی باپ ہوتا ہے۔ کسی شخص کا اپنے باپ کا باپ ہونے سے انکار کرنا نہایت بے شرمی اور غلط  بات ہے۔ جس طرح صلبی باپ کی اولاد ہوتی ہے اس طرح روحانی استاد ( پیر و مرشد) بھی روحانی باپ کا درجہ رکھتا ہے۔ دنیاوی قوانین کے تحت کوئی اپنے صلبی باپ کو   نہیں بدل سکتا اسی طرح روحانی قوانین کے تحت روحانی باپ بھی نہیں بدلا جاسکتا اس کی وجہ یہ ہے ہر استاد کی تربیت کا طریقہ مختلف ہوتا ہے اور مزاج و طبیعت میں بھی فرق ہوتا ہے۔

            فرض کیا کہ آپ نے کسی کو اپنا پیر و مرشد بنا لیا اور اس سے بیعت کر لی اب آپ کی تربیت شروع ہوگئی، تربیت استاد کی ذہنی ساخت کے مطابق شروع ہوئی۔ اگر آپ یہاں سے دوسری جگہ جائیں گے تو تربیت میں فرق پڑنے کے ساتھ ساتھ وقت الگ ضائع ہوگا کیونکہ جگہ تبدیل کرنے سے نئے استاد کی ذہنی ساخت تربیت میں زیرِ بحث آجاتی ہے۔

            روحانی علوم بطور ورثے کے منتقل ہوتے ہیں۔ ایسا ممکن نہیں کہ آپ نے سکول میں داخلہ لیا اور میٹرک کے بعد BA            کیا اور ڈگری حاصل کر لی۔ روحانی علوم اور دنیاوی علوم کے طریقہ حصول میں بہت واضح فرق ہے۔ جس طرح صلبی باپ کی تمام جائیداد اولاد کو ہی منتقل ہوتی ہے اسی طرح روحانی علوم کا ورثہ بھی روحانی اولاد کو ہی منتقل ہوتا ہے۔ کسی سے بیعت ہونے سے قبل ضروری ہے کہ ہر طرح سے اطمینان کر لیا جائے۔ جلد بازی کا مظاہرہ نہ کیا جائے جس سے بیعت کرنا چاہتے ہوں پہلے اس کے شب و روز کا جائزہ لیا جائے اس کے معمولات کو دیکھیں اور اس کے قریب ہو کر اس کے دوست احباب سے قربت حاصل کی جائے اس بات کا اندازہ ہو سکے کہ کسی غلط جگہ اپنا پاؤں تو نہیں پھنسا رہے۔ جو بعد میں دقت کا باعث بنے۔

           

                                                                                                                                                                       حضور ﷺ کا یہ فرمان بھی قانون کی حیثیت رکھتا ہے کہ بیعت میں جلد بازی

                                                                                                                                                            نہیں کرنی چاہیئے۔ بہت سوچ سمجھ کر بیعت ہونا چاہیئے کیونکہ یہ قانون مدِ نظر

                                                                                                                                          رکھنا چاہیئے  کہ بیعت ہونے کے بعد توڑی نہیں جا سکتی۔

ہاں یہ بات بھی ہے کہ بیعت کرنا کوئی ایسا فریضہ نہیں ہے کہ لازمی بیعت کی جائے۔ نماز روزہ کی پابندی کرنے سے، استغفار کرنے سے، قرآن کریم اور درود شریف پڑھنے سے فیض و برکات حاصل کئے جا سکتے ہیں لیکن  یہ حقیقت ہے کہ استاد کے بغیر کسی علم کو مکمل طور پر حاصل کرنا ناممکن ہے۔

                                                                                                                                                                                                                                                                                                            روحانی علوم کا ورثہ اس وقت منتقل ہوتا ہے جب کسی ایسے شخص کو استادبنایا جائے جس کے پاس روحانی علوم کا ورثہ موجود ہو۔ 

Topics

Ism e Zaat View

Ism e Zaat

خواجہ شمس الدین عظیمی



روز نامہ جنگ، کراچی کے کالم ” قارئین کے مسائل“ اور ماہنامہ روحانی ڈائجسٹ کے ادارتی ” روحانی سوال و  جواب “ کے کالمز میں خانوادہ سلسلہ عظیمیہ سے پوچھے گئے سوالات گو کہ تاریخِ اشاعت کے حساب پرانے ہیں لیکن معاشرے سے تعلق کی بنا پر ان کالمز پر وقت کی گرد اثر انداز نہیں ہوئی اور ان کی افادیت و اثر پذیری ترو تازہ ہے۔پیشِ نظر کتاب میں شامل کالمز حال کا قصہ نہیں،ماضی کی داستان بھی ہیں۔ یہ حالات حاضرہ کا مظاہرہ نہیں، مستقبل کے لئے راہنمائی کا ذریعہ بھی ہے۔قارئین اور محققین کے لئے اس کتاب میں ۹۲ کالمز کی شکل میں علم و آگاہی کا خزانہ ہے جو تفکر کی دعوت دیتا ہے لہذا کسی بھی دور میں ، کسی  بھی وقت ان تحریرات پر غور و فکر سے حکمت کے موتیوں کا حصول ممکن ہے۔ ان کالمز میں بہت سارے موضوعات کو ایک ہی تحریر میں تسلسل کے ساتھ لکھا گیا ہے۔منطق سے سلجھائے اور لغت کے بکھیڑوں میں الجھے بغیر سادہ طرز ِاسلوب کے ساتھ دریا کوزے میں بند ہے۔