Topics
رسول اللہﷺ نے فرمایا حج میں خرچ کرنا اللہ کے راستے میں خرچ کرنا ہے۔ شیخ الحدیث مولانا محمد ذکریا صاحب فرماتے ہیں کہ مجھے اپنے آقا اور مرشد حضرت اقدس مولانا خلیل احمد صاحب کی ہمرکابی میں دو مرتبہ حج کرنے کی سعادت نصیب ہوئی۔ میں نے ہمیشہ حضرت کا یہ معمول دیکھا کہ وہاں کے قیام میں ہند کے جانے والے کوئی ہدیہ پیش کرتے تو اول تو حضرت بڑے اصرار سے اس کو یہ کہہ کر واپس فرماتے کہ یہاں کے لوگ زیادہ مستحق ہیں۔ ان کی خدمت میں پیش کیا جائے۔ مخصوص اہل کمال کا پتہ بھی بتا دیتے۔ اس کے بعد بھی کوئی اصرار کرتا تو حضرت قبول فرما کر مجھے مرحمت فرما دیتے کہ اس کی کوئی چیز بازار سے منگا لینا یہاں کے تاجروں کی بھی مدد کرنی چاہے۔
مولانا ذکریا صاحب فرماتے ہیں کہ میں نے اپنے شیخ حضرت مولانا خلیل احمد صاحب کو بہت کم شعر پڑھتے سنا ہے۔ مگر جب حج کے لئے تشریف لے گئے اور مسجد الحرام میں تشریف فرما تھے تو میں نے بہت عجیب انداز سے آپ کو یہ شعر پڑھتے سنا۔
کہاں ہم اور کہاں یہ نکہتِ گل
نسیم صبح تیری مہربانی
خواجہ شمس الدین عظیمی
چار ابواب پر مشتمل اس کتاب کے باب اول میں تمام مقدس مقامات کا تعارف پیش کیا گیا ہے ۔ باب دوئم میں حج وعمرہ کا طریقہ اورباب سوئم میں اراکین حج وعمرہ کی حکمت بیان کی گئی ہے۔جب کہ باب چہارم میں چودہ سوسال میں گزرے ہوئے اورموجودہ صدی میں موجود ایسے مردوخواتین بزرگوں کے مشاہدات وکیفیات جمع کئے گئے ہیں جن کو دوران حج وعمرہ حضورعلیہ الصلوۃ والسلام کا فیض حاصل ہوا ہے اورجن خواتین وحضرات کو خالق اکبر ، اللہ وحدہ لاشریک کا صفاتی دیدارنصیب ہوا۔
