مرشد مرشد مرشد

    اس کے پاس چھوٹی ڈائری تھی جسے وہ ساتھ رکھتا۔ سفر میں یا پھر کہیں بھی غور و فکر کے دوران ذہن میں جو خیال آتا وہ نوٹ کر لیتا ۔مشق جاری تھی کہ غیر محسوس طریقہ سے معمول میں تبدیلی آئی۔ اسے کسی کتاب پر کام کرنے کی ذمہ داری دی گئی۔ ذمہ داری جلد پوری کرنے کے لیے وقت اور سوچ کتاب پر مرکوز کر دی۔ اس دوران ذہن میں ڈائری میں لکھنے کے لیے خیالات آتے رہے لیکن وہ انہیں تحریر میں نہیں لایا۔ بس چند خیالات کو کچھ دیر دہرایا اور باقی واپس آنے کے لیے گزر گئے۔ ڈائری لکھنے کا عمل کہیں پیچھے رہ گیا، کتاب مکمل ہو گئی۔

                                                                                   اب جب اس نے واپس ڈائری لکھنا شروع کی۔۔۔ ذہن خالی تھا۔اس نے سوچا خالی ذہن ہونا تو اچھی بات ہے۔ موقع ہے نئی آبیاری کا۔پہلا عکس مرشد کا ہونا چاہئے  اور پھر ہر عکس پہلا ہونا چاہئے۔ لیکن پریشانی یہ تھی سمجھ نہیں آیا کہ لکھے تو کیا لکھے۔ ایسا بہت کم ہوتا کہ لکھنے کے لیے اس کے پاس کچھ نہ ہو۔ جب وہ لکھتا تو لکھتا چلا جاتا لیکن کئی بار ذہن پر زور دینے کے بعد بھی کاغذ کورا تھا۔

        خالی ذہن ہونے کو دماغ جس مثبت طریقے سے دیکھ رہا تھا دل اس سے مطمئن نہیں تھا۔

دل کی طرف متوجہ ہوا۔ وہاں اطمینان نہیں، بے چینی تھی۔ دل نے کہا۔۔ یہ وہ خالی ذہن ہونا نہیں جسے تصوف خالی الذہنی کہتا ہے۔ یہ وہ خالی الذہنی ہے جو توجہ بٹ جانے سے پیدا ہوتی ہے، ذہن میں بہت کچھ ہو کر بھی کچھ نہیں ہوتا۔

        اپنا محاسبہ کیا تو دل نے راہ نمائی کی۔۔ کسی کام کو کرنے کا مطلب یہ نہیں کہ دوسرے اہم کام چھوڑ دیئے جائیں۔ جب تم وقتاً  وقتاً لکھتے تھے تو کیا لکھتے تھے۔۔ کسے اور کس لیے لکھتے تھے۔۔۔؟

اس نے جواب دیا، مطلوب سے مطلوب کی باتیں کرتا تھا۔

       دل نے کہا، پھر تم نے وہ باتیں کرنا کیوں چھوڑ دیں۔ کیا کتاب پر کام کے دوران خیالات کا سلسلہ رکا۔۔۔؟ اس نے کہا ، نہیں۔

تم رک کیوں گئے۔۔۔؟

                               دل بھاری کر دینے والی کیفیت تھی۔ خود کو روانی میں لانے کے لیے ابتداء سے ڈائری پڑھنا شرو ع کی۔ ایک کے بعد ایک پلٹنے والا صفحہ ذہنی بوجھ کو بڑھا رہا تھا۔ لکھی گئی اپنی تحریر اس کے لیے نئی تھی، جیسے وہ کسی اور کا لکھا پڑھ رہا ہو۔

                             خود سے پوچھا۔۔۔ اگر یہ سب میں نے لکھا ہے تو اب کیوں نہیں لکھ سکتا۔ اگر یہ میں نے لکھا ہے تو پھر ہر سطر میرے لیے اتنی نئی کیوں ہے جتنا کسی پڑھنے والے کے لیے ہوگی؟

                                                   جن دنوں اس نے ڈائری میں لکھنا شروع کیا ہر وقت تصور میں رہتا۔توجہ بٹتی تو بے چین ہو جاتا اور ننھے بچے کی طرح دوڑ کر ماں کا دامن پکڑ لیتا۔وابستگی کا یہ عالم تھا کہ جیسے ہی تصور گہرا ہوتا وہ اندر باہر حدت محسوس کرتا  جیسے محبوب کے حصار میں ہو۔ عجب بے خود کر دینے والی کیفیت ہوتی۔ بے خیالی میں محبوب سے باتیں کرتا۔ بتاتا کہ وہ ان سے کتنی محبت کرتا ہے یا وہ اس سے کتنی محبت کرتے ہیں۔اتنی قربت تو نصیب والے کو ملتی ہے۔ بڑوں کا کہنا ہے لوہا میگنٹ کو نہیں  کھینچتا، میگنٹ لوہے کو کھینچتا ہے۔ سارا دن محبوب سے محبوب کی باتیں کرتا۔ سوال پوچھتا جواب ملتے۔ اپنی باتیں بتاتا اس یقین کے ساتھ کہ وہ سن رہے ہیں۔ ان کا تصور اس یقین کے ساتھ کہ وہ دیکھ رہے ہیں۔ محبت  جب بیان سے باہر ہوجاتی ، خاموش ہو جاتا کہ کچھ جذبات جب لفظ بنتے ہیں تو وقعت کھو دیتے ہیں۔ انہیں صرف وہی سمجھتا جو خاموشی کی زبان جانتا ہے اور خاموشی کی زبان گہری ہوتی ہے۔ خاموش رہ کر بھی خاموشی نہیں ہوتی۔ اسے سمجھنے کے لیے محبوب بننا پڑتا ہے اور پھر خاموشی بات کرتی ہے۔ خاموشی گہری ہوتی تو آنکھیں سیپ بن جاتیں اور قطار در قطار موتی باہر آتے۔ وہ محبوب کے تصور میں ڈوب جاتا۔ دل پر مرشد کا لمس محسوس ہوتا تو قرار آجاتا۔ بابا بلھے شاہ ؒ فرماتے ہیں،

                                                                                                                       یہ ڈائری خاص  اوقات میں لکھی گئی تھی۔ ان اوقات میں جب  وہ خود کو محبوب کے تصور میں گم کر دیتا اور پھر جو ذہن میں آتا لکھتا چلا جاتا۔یہ واقعی اس کی تحریر نہیں تھی۔ یہ تو محبت کی تحریر تھی جو محبت نے محبت کے لیے لکھی تھی۔ اس میں فلسفہ کی گنجائش تھی نہ منطقی استدلال کی۔ جہاں محبت ہوتی ہے وہاں فلسفے بے معنی ہو جاتے ہیں   اور کوئی دلیل استدلال نہیں چلتا۔ یہ کائنات اللہ نے محبت سے بنائی اور اپنے تعارف و پہچان کے لیے محبت کو ذریعہ بنایا۔ محبت فرماں برداری ہے، فرماں برداری ادب ہے اور ادب حضوری ہے۔

                                                     وہ محبوب کو یاد تو کرتا تھا لیکن اس نے پہلے کی طرح محبوب سے باتیں کرنا چھوڑ دی تھیں اس لیے اب جو لکھنے بیٹھا تو خود کو کورا پایا۔ خیال نے کہا۔ کورے تو تم ہمیشہ سے تھے، وہ قلم کوئی اور ہے جو تمہارے کاغذ کو سیاہ کرتا ہے۔

                                                                              اس نے کہا۔۔ مجھے پہلے روز سے احساس ہے کہ یہ میں نہیں میرے اندر کوئی لکھتا ہے لیکن اس وقت میں اندر والے کی تحریروں سے مانوس تھا۔ وہ لفظ مجھے اپنے لگتے تھے۔ جب بعد میں ان کو پڑھتا وہ کیفیت یاد آجاتی جس میں وہ لکھے گئے تھے لیکن اب تو کیفیت یاد آرہی ہے اور نہ الفاظ۔ لگتا ہی نہیں کہ میرا اندر کی آواز سے ایسا تعلق بھی تھا۔ ایسا نہیں کہ میں نے ان چند ہفتوں میں مرشد کریم کو یاد نہیں کیا۔ لیکن ہاں۔۔ذہن بٹ گیا اور بٹا ہوا ذہن اپنا ہوتا ہے نہ کسی کا۔

                                                                         محبت کرتے ہو۔۔؟ خیال نے پوچھا۔

                                                          اس نے اثبات میں سر ہلایا۔

                                                             اور ذکر۔۔؟

                                                                   وہ خاموش ہو گیا ۔

                                                  خیال نے کہا۔۔۔ تم اب پہلے کی طرح  محبت کو بار بار دہراتے نہیں۔ محبت ذکر ہے اور ذکر محبت ہے۔ مرشد تمہیں یاد کرتا ہے تم بھی بار بار یاد کرو۔ کوئی مشکل نہیں کہ تم پھر سے لکھو گے۔

                                                                                اس نے کہا، میں اس لیے پریشان نہیں کہ میں کیوں نہیں لکھ سکتا۔ میں اس لئے پریشان ہوں کہ جو آواز میرے اندر بولتی ہے میں اب پہلے کی طرح اسے  نہیں سُن رہا۔ میرے لیے لکھنا اہم نہیں ہے۔ میرے لئے وہ تعلق اہم ہے جو میرے اندر زندگی کے احساس کو جگاتا ہے ورنہ میرا جینا بے معنی ہے۔ زندگی مجھے بوجھ لگتی ہے۔ میں پریشان ہوں کہ اچھا بھلا چلتے چلتے بھٹک کیوں جاتا ہوں۔ میں بے چین کیوں ہوں۔۔؟

                                                                                                                                اچانک ذہن میں ایک تصویر بنی۔اس نے ایک بار مجسم تصویر سے سوال کیا تھا کہ زندگی بوجھ اور وہ اتنا بے چین کیوں ہے۔۔۔؟           تصویر سے لہریں اٹھیں جب دماغ کی اسکرین سے ٹکرا کر حافظہ میں آئیں تو یاد آیا کہ مرشد کریم نے فرمایا تھا کہ ” ایک طرف سات ارب کا شعور ہے اور دوسری طرف لاشعور کا شعور ہے۔ آدمی کا شعور لاشعور کو پسند نہیں کرتا اس لیے وہ اسے بار بار لاشعور سے ہٹا کر سات ارب لوگوں کے شعور کی طرف کھینچتا ہے۔ سات ارب شعور کے حصار سے نکلنا آسان نہیں۔ جو بندہ لاشعور کے شعور کو مضبوطی سے اپنا لیتا ہے، اس پر فکشن شعور کا حصار ٹوٹ جاتا ہے۔ “

                                                                    اس سے غلطیاں ضرور ہوتی ہیں لیکن یہ غلطیاں۔۔۔ احساس ہونے پر پہلے سے زیادہ محتاط کر دیتی ہیں۔ بھیڑ میں جو بچہ ماں کا ہاتھ چھڑا کر تھوڑی دیر کے لیے جدا ہو جائے وہ واپس کھو جانے کے ڈر سے ماں کا ہاتھ مضبوطی سے پکڑ لیتا ہے۔

                                     خیال نے کہا، بچہ کا ماں کا ہاتھ پکڑنا بہتر ہے یا بچہ خود کو ماں کے حوالہ کر دے اور ماں اس کا ہاتھ پکڑ کر چلے، یہ بہتر ہے۔۔۔؟

اس نے کہا، دوسری بات بہتر ہے۔

خیال نے پوچھا کیوں۔۔۔؟

اس نے کہا، بچہ تو نادان ہوتا ہے۔ کبھی ہاتھ پکڑتا ہے اور جب کوئی چیز اچھی لگے ہاتھ چھوڑ دیتا ہے۔ یوں بھیڑ میں گم ہونے کا خدشہ ہوتا ہے۔ لیکن جو بچہ خود کو ماں کے حوالے کر کے چلتا ہے وہ کبھی گم نہیں ہوتا۔بچہ ماں کا ہاتھ چھوڑ دیتا ہے۔۔۔ ماں بچہ کا ہاتھ کبھی نہیں چھوڑتی۔

                          لیکن یہ بات تمہیں کب سمجھ آئے گی۔۔۔؟ خیال نے پوچھا۔

بڑے کمال سے اسے آئینہ دکھایا گیا تھا اور وہ سُن ہو گیا۔

                                                                       خیال نے کہا، میرا مقصد شرمندہ کرنا نہیں محبت کا احساس دلانا ہے۔ بڑھانا ہے اور بڑھاتے جانا ہے۔ یہ بھٹکنا اور بھٹک کر پلٹنا کب تک چلے گا۔ اب تک تم ہاتھ پکڑنے کی کوشش کرتے رہے ہو۔ مرشد کا ظرف  اعلیٰ  ہے کبھی ہاتھ پیچھے نہیں کیا۔ ہاتھ پکڑنے کی کوشش مت کرو۔ ہاتھ کو حوالہ کر دو۔

                                                                   وہ اجازت لے کر کمرے میں داخل ہوا ، مرشد کریم اسے دیکھ کر مسکرائے اور بیٹھنے کا اشارہ کیا۔ مسکراہٹ محبت کا سمندر تھی۔ وہ کیسے بتائے کہ جب غلطی کر کے سامنے آتا ہے تو کس قدر شرمندہ ہوتا ہے لیکن محبوب۔۔۔ محبوب تو سر تاپا محبت ہے۔ صبح کا بھولا جب شام کو لوٹتا ہے تو وہ اسے بھولا نہیں کہتے، در گذر کرتے ہیں۔ مرشد کی مسکراہٹ ہی مرید کا تزکیہ ہے۔ اس نے دل پر ہاتھ رکھ کر احترام میں سر جھکایا  اور ایک طرف خاموشی سے بیٹھ گیا۔

                                                                 وہ کسی سے بات چیت میں مصروف تھے کہ تھوڑی دیر بعد اچانک رکے اور اس کی طرف متوجہ ہو کر پوچھا،

” تمہارا ذہن بھاری ہے، کیا بات ہے۔۔۔؟“ لہجہ پرزور تھا۔

اچانک سوال کے لیے وہ تیار نہیں تھا، ہڑبڑا کر کہا میں ٹھیک ہوں۔

انہوں نے پھر پر زور لہجہ میں پوچھا، ” کیا بات ہے؟“

دل بھرا ہوا تھا، آنکھیں بھی بھر گئیں اور اس نے کہا۔۔۔” ذہن پر بوجھ ہے۔“

گہری مسکراہٹ کے ساتھ فرمایا ، ” جاؤ وضو کر کے آؤ۔“

وضو کر کے آیا تو ان کے ہاتھ میں دودھ کا گلاس تھا جو انہوں نے پینے کے لیے دیا اور کسی کو تحریر لکھوانے میں مصروف ہوگئے۔ قربت میں بےقرار دل کو قرار آگیا تھا۔

اس دن دور دراز کے کسی گاؤں سے ایک عقیدت مند خدمت میں سلام کے لیے حاضر ہوا۔

 مرشد کریم نے گرم جوشی سے استقبال کیا اور اس کے والد کی خیریت دریافت کرتے ہوئے فرمایا، ” آپ کے والد مجھے بہت یاد  کرتے ہیں۔   جب وہ مجھے یاد کرتے ہیں تو ان کا عکس میرے سامنے آجاتا ہے۔ وہ بہت اچھے انسان ہیں، ان کو میرا سلام کہئے گا۔“

                                                                       یہ بات سن کر وہ بہت نادم ہوا۔ خیال آیا کہ محبت میں فاصلے حذف ہو جاتے ہیں۔ کوئی دور رہ کر پاس اور کوئی پاس رہ کر دور ہوتا ہے۔ دور بیٹھے مرید کے لیے مرشد کا سلام اور پاس بیٹھے مرید کے لیے اس واقعہ میں پیغام ہے۔

                                        جب سب لوگ جا چکے تو اس نے بھی اجازت طلب کی تاکہ وہ آرام فرمالیں۔

انہوں نے پوچھا ، ” آپ کچھ کہنا چاہتے تھے؟“

عرض کیا، میں نے  غلطی کی ہے اور بہت نادم ہوں۔

کریم مرشد نے فرمایا، ” غلطی ہونا غلط نہیں، غلطی کے بعد غلطی سے نہ سیکھنا غلط ہے۔ غلطیوں سے پاک ذات صرف خالق کی ہے۔ آدمی مخلوق ہے اور غلطی مخلوق سے ہوتی ہے۔ اللہ رحیم ہے اور ہرشخص کو ہدایت دیتا ہے۔ قرآن کریم میں ارشاد ہے،

” اگر کبھی شیطان تمہیں اکسائے تو اللہ کی پناہ مانگو، وہ سب کچھ سننے اور جاننےوالا ہے۔ حقیقت میں جو لوگ متقی ہیں ان کا حال تو یہ ہوتا ہے کہ کبھی شیطان کے اثر سے کوئی برا خیال اگر انہیں چھو بھی جاتا ہے تو فوراً چوکنے ہو جاتے ہیں اور پھر انہیں صاف نظر آنے لگتا ہے۔ “                                                                                                                                                   ( الاعراف : ۲۰۰- ۲۰۱)                          

فرمایا ، ” ہر شخص کے اندر ایسی آواز ہے جو غلطی کا احساس  دلاتی ہے۔ یہ آواز ضمیر کی آواز ہے۔ ضمیر کی آواز پر ہمیشہ عمل کرنا چاہئے ۔ آواز پر عمل کیا جائے تو تزکیہ نفس ہے اور غلطی کرنے سے پہلے اس آواز کو سن لیا جائے تو ہر عمل ضمیر کا عمل بن جاتا ہے اور ضمیر باطن کا نور ہے۔“

                                                                                                                 مرشد کا ہاتھ پکڑ کر مرید خود کو محفوظ سمجھتا ہے۔ یقیناً وہ محفوظ ہے اگر راستہ کے مناظر میں نہ الجھے۔مرشد اپنا ہاتھ اس کے ہاتھ میں دے کر اسے سہارا دیتا ہے۔ لیکن چوں کہ آدمی شعوری طور پر کمزور ہے اس لیے جیسے ہی توجہ مرشد سے ہٹ کر راستہ کی چکا چوند میں گم ہوتی ہے مرید ہاتھ چھوڑ دیتا ہے۔ مرشد مختلف زاویوں سے مرید کو سمجھاتا ہے کہ خود کو حوالہ کر دینا فلاح ہے۔ لیکن کچھ لوگوں کو ٹھوکر کھا کر بات سمجھ آتی ہے۔

                                                                                                                  اس نے  ہاتھ پکڑ نے کا فرق سمجھ لیا تھا۔ کوئی مرشد کا ہاتھ کیسے تھام سکتا ہے۔ یہ مرشد ہے جو مرید کا ہاتھ تھامتا ہے اور پھر فلاح کی جانب قدم اٹھتے ہیں۔

                                                                                  فلاح سے اس کے ذہن میں اذان کے کلمات گونجے، ” حی علی الفلاح، حی علی الفلاح“ اور اس سے پہلے حکم ہے، ” حی علی الصلوٰۃ ، حی علی الصلوٰۃ “۔ کیسی گہری بات ہے۔ مساجد سے حق کی آوازیں بلند ہوتی ہیں لیکن ہم غور نہیں کرتے۔ پرندے اور جا نور جب خاموش ہوتے ہیں آپ کبھی ان کی آنکھوں کو غور سے دیکھئے ایسے لگتا ہے تفکر میں ہیں۔سارس تو سب نے دیکھا ہوگا۔ سارس   جب سر کو جھکا کر اپنے باریک پیروں پر کھڑا ہوتا ہے ایسے لگتا ہے تعظیم سے سر کو جھکا کر معبود کے حضور کھڑا ہے۔ ایک پر نہیں ہلتا۔اتنا گہرا تفکر ہے اس کا ۔ اور آدمی ہے کہ دن میں کتنی مرتبہ حکم ِ اذاں ہوتا ہے اور ایک بار بھی غور نہیں کرتا کہ اذان کیا کہہ رہی ہے۔ بہت شفیق، کریم، مہربان اور رحیم ہے اللہ جو اتنی گستاخی اور بے ادبی کے باوجود لوگوں کو معاف کرتا ہے نہ صرف معاف کرتا ہے بلکہ نوازتا ہے۔