مارچ1995؁ء۔تلاوت

نبی مکرم صلی اللہ علیہ و سلم نے فرمایا ہے کہ جس شخص نے قرآن پڑھا اور اس کی تلاوت روزانہ کرتا رہا اس کی مثال ایسی ہے جیسے مشک سے بھری زنبیل……کہ اس کی خوشبو چار سو مہک رہی ہے اور جس شخص نے قرآن پڑھا لیکن اس کی تلاوت نہیں کرتا تو اس کی مثال ایسی ہے جیسے مشک سے بھری ہوئی بوتل کہ اس کو ڈاٹ لگا کر بند کر دیا گیا ہے۔

تلاوت سے پہلے طہارت، یکسوئی، توجہ اور پاک صاف جگہ کا ہونا بہت ضروری ہے۔ جب آپ قرآن پاک کی تلاوت کریں تو پورے احترام، حضور قلب اور سلیقہ کے ساتھ تجوید اور ترتیل کا خیال رکھیں۔ حروف ٹھیک ٹھیک اور ٹھہر ٹھہر کر ادا کریں۔

قرآن پاک نہ زیادہ زور سے پڑھئے، نہ بالکل آہستہ، بلکہ درمیانی آواز سے پڑھئے۔ خداوند قدوس کی ہدایت ہے:

’’اور اپنی نماز میں نہ تو زیادہ زور سے پڑھئے اور نہ بالکل ہی دھیرے دھیرے بلکہ دونوں کے درمیان کا طریقہ اختیار کیجئے۔‘‘

جو لوگ قرآن کی تلاوت اس لئے کرتے ہیں کہ لوگ انہیں نیکوکار سمجھیں یا لوگ ان کے گرویدہ ہو جائیں، اپنی خوش الحانی کا سکہ جمانے اور اپنی دینداری کی دھاک بٹھانے کیلئے قرآن پڑھتے ہیں تو ایسے بندے قرآن کی ہدایت سے محروم رہتے ہیں۔

ہم سب کے آقا نبی کریم صلی اللہ علیہ و سلم نے فرمایا ہے:

’’میری امت کیلئے سب سے بہتر عبادت قرآن کی تلاوت ہے۔ بندہ تلاوت قرآن کے ذریعے خدا کا سب سے زیادہ قُرب حاصل کرتا ہے۔‘‘

اللہ کے دوست جن کیلئے اللہ نے یہ ساری کائنات تخلیق کی اور جن کی بادشاہت عالمین پر محیط ہے اور جن کیلئے چاند، سورج، ستارے، ارض و سماوات اور جو کچھ ان کے اندر ہے سب مسخر کر دیا گیا ہے۔ ایک بار چٹائی پر سو رہے تھے۔ چٹائی پر لیٹنے سے حضور صلی اللہ علیہ و سلم کے جسم اطہر پر چٹائی کے نشانات پڑ گئے۔ حضرت عبداللہؓ بن مسعود یہ دیکھ کر رونے لگے۔

رحمتہ اللعالمین صلی اللہ علیہ و سلم نے حضرت عبداللہؓ کو روتے ہوئے دیکھ کر ارشاد فرمایا:

’’کیوں رو رہے ہو؟‘‘

حضرت عبداللہؓ نے عرض کیا:

’’یا رسول اللہ صلی اللہ علیہ و سلم! قیصر و کسریٰ تو ریشم اور مخمل کے گدوں پر سوئیں اور آپﷺ بوریئے پر۔‘‘

اللہ کے حبیب صلی اللہ علیہ و سلم نے فرمایا:

’’یہ رونے کی بات نہیں۔ قیصر و کسریٰ کیلئے دنیا ہے اور ہمارے لئے آخرت ہے۔‘‘

نبی صلی اللہ علیہ و سلم کے خادم خاص حضرت انسؓ فرماتے ہیں کہ آپ صلی اللہ علیہ و سلم جب بستر پر تشریف لے جاتے تو یہ دعا پڑھتے:

ترجمہ:’’شکر و تعریف خدا ہی کیلئے ہے جس نے ہمیں کھلایا، پلایا اور جس نے ہمارے کاموں میں بھرپور مدد فرمائی اور جس نے ہمیں رہنے کو ٹھکانہ بخشا۔ کتنے ہی لوگ ہیں جن کا نہ کوئی معین و مددگار ہے نہ کوئی ٹھکانہ دینے والا۔‘‘

حضرت عائشہؓ فرماتی ہیں کہ ایک بار ایک انصاری خاتون آئیں اور انہوں نے نبی اکرم صلی اللہ علیہ و سلم کا بستر دیکھا۔ گھر جا کر اس خاتون نے اون بھر کر خوبصورت اور نرم و ملائم بستر تیار کیا اور حضور صلی اللہ علیہ و سلم کیلئے بھیج دیا۔ حضور اکرم صلی اللہ علیہ و سلم جب تشریف لائے اور وہ نرم و ملائم بستر رکھا ہوا دیکھا تو فرمایا۔

’’یہ کیا ہے؟‘‘

میں نے عرض کیا۔ ’’یا رسول اللہ صلی اللہ علیہ و سلم! فلاں انصاری خاتون آئی تھیں اور آپﷺ کا بستر دیکھ کر گئی تھیں۔ یہ بستر ان ہی خاتون نے آپﷺ کیلئے بھیجا ہے۔‘‘

نبی صلی اللہ علیہ و سلم نے فرمایا:

’’نہیں، اس کو واپس کر دو۔‘‘

مجھے یہ بستر ہی پسند تھا اس لئے واپس کرنے کو دل نہیں چاہا۔ رسول اللہ صلی اللہ علیہ و سلم نے اتنا اصرار فرمایا کہ بالآخر واپس کرنا پڑا۔

Topics

View

Noor E Naboat Noor E Elahi

خواجہ شمس الدین عظیمی

ماہنامہ روحانی ڈائجسٹ میں نور نبوت نورالٰہی کے شائع شدہ تقریباً تمام مضامیں کا ذخِرہ

SEARCH TOPICS

مارچ1995؁ء۔تلاوت

Topics