مئی 1982؁ء۔قرآن پاک

قرآن پاک ایک ایسی کتاب ہے جس میں شک و شبہ کی گنجائش نہیں ہے اور یہ کتاب ان لوگوں کو ہدایت بخشتی ہے جو متقی ہیں۔ اور متقی وہ لوگ ہیں جو غیب پر یقین رکھتے ہیں اور یقین کی انتہا یہ ہے کہ آدمی کے اندر کی نظر کھل جاتی ہے اور غیب اس کے لئے مشاہدہ بن جاتا ہے جب تک مشاہدہ عمل میں نہ آئے یقین کی تعریف پوری نہیں ہوتی۔ قرآن پاک ایک ایسی یقینی دستاویز ہے جس دستاویز میں ماشرتی قوانین کے ساتھ ساتھ ایسے فارمولے درج ہیں جن کے اوپر تسخیر کائنات کا دارومدار ہے۔ ان فارمولوں میں اس بات کی پوری وضاحت موجود ہے کہ ہم علم الکتاب حاصل کر کے زمان و مکان (Time & Space) کی گرفت کو توڑ سکتے ہیں۔ قرآن پاک کے علوم کو جاننے والا اور سمجھنے والا کوئی بندہ بغیر وسائل کے خلا میں پرواز کرنے اور ایک جگہ سے دور دراز دوسری جگہ کسی چیز کو منتقل کرنے پر قدرت رکھتا ہے۔ یہی بندہ اللہ تعالیٰ کا انعام یافتہ ہوتا ہے۔ آسمانوں میں اور زمین میں موجود تمام اشیاء اس کے لئے مسخر ہوتی ہیں۔

روئے زمین پر انسان کو اگر ہدایت مل سکتی ہے تو صرف اللہ کی کتاب قرآن پاک سے مل سکتی ہے۔

قرآن کریم کو اس عزم، اس ولولہ اور اس ہمت کے ساتھ پڑھئے کہ اس کی نورانی کرنوں سے ہمیں اپنی زندگی سنوارنی ہے۔ قرآن آئینے کی طرح آپ کے اندر ہر داغ اور ہر دھبہ نمایاں کر کے پیش کرتا ہے۔ قرآن ایک ایسی انسائیکلوپیڈیا ہے جس میں ہر چھوٹی سے چھوٹی اور بڑی سے بڑی بات وضاحت کے ساتھ بیان کر دی گئی ہے۔ اب یہ آپ کا کام ہے کہ آپ قرآن پاک میں بیان کردہ نعمتوں سے کتنا فائدہ حاصل کرتے ہیں۔

اللہ تعالیٰ فرماتے ہیں:

’’کتاب جو ہم نے آپ کی طرف بھیجی برکت والی ہے تا کہ وہ اس میں غور و فکر کریں اور عقل والے اس سے نصیحت حاصل کریں۔‘‘

تخلیقی قوانین (فارمولوں) کے یکتا ماہر، اللہ تعالیٰ کی مشیت ہم راز اور احسن الخالقین کے امین، کائنات کے سرتاج، رحمت اللعالمین حضور علیہ الصلوٰۃ والسلام کا ارشاد ہے:

’’اپنی آواز اور اپنے لہجے سے قرآن کو آراستہ کرو۔‘‘

نبی صلی اللہ علیہ و سلم قرآن پاک کے ایک ایک حرف کو واضح کر کے اور ایک ایک آیت کو الگ کر کے پڑھا کرتے تھے۔ حضور پاک صلی اللہ علیہ و سلم کا ارشاد گرامی ہے:

’’قرآن پڑھنے والوں سے قیامت کے روز کہا جائے گا…جس ٹھہرائو اور خوش الحانی کے ساتھ تم دنیا میں بنا سنوار کر قرآن پڑھا کرتے ت ھے، اسی طرح قرآن کی تلاوت کرو اور ہر آیت کے صلے میں ایک درجہ بلند ہوتے جائو۔ تمہارا ٹھکانہ تمہاری تلاوت کی آخری آیت کے قریب ہے۔‘‘

قرآن پاک اس طرح نہ پڑھئے کہ گانے کا گمان ہو، نہ اتنی دھمی آواز میں پڑھئے کہ سمجھ میں نہ آئے۔

اور اپنی نماز میں نہ تو زیادہ زور سے پڑھئے اور نہ بالکل آہستہ آہستہ بلکہ دونوں کے درمیان کا طریقہ اختیار کیجئے۔ (قرآن)

یاد رکھئے! جو دل گندے اور نجس خیالات کی آماجگاہ ہے اور جس دل میں طہارت اور پاکیزگی نہیں ہے وہ دل قرآن پاک کی عظمت و وقعت سے خالی رہتا ہے۔ دل کی پاکیزگی اور طہارت کے لئے پہلا مرحلہ حلال روزی ہے۔

قرآن پاک کی تلاوت تفکر اور تدبر کے ساتھ کیجئے۔ اس کے اندر بیان کردہ حقائق اور حکمتوں کو سمجھئے۔ فر فر تلاوت کرنے کی بجائے سمجھ کر پڑھنے کی طرزیں اختیار کیجئے۔

حضرت عبداللہؓ ابن عباسؓ فرمایا کرتے تھے کہ میں ’’القارعہ‘‘ اور ’’القدر‘‘ جیسی چھوٹی سورتوں کو معانی اور مفہوم کے اعتبار سے سوچ سمجھ کر پڑھنا اس سے زیادہ بہتر سمجھتا ہوں کہ ’’البقرہ‘‘ اور ’’آل عمران‘‘ جیسی بڑی بڑی سورتیں جلدی جلدی پڑھ جائوں اور کچھ نہ سمجھوں۔

نبی برحق، آقائے نامدار، باعث تخلیق کائنات صلی اللہ علیہ و سلم ایک مرتبہ ساری رات ایک ہی آیت کی تلاوت فرماتے رہے…

’’اے خدا! اگر تو ان کو عذاب دے تو تیرے بندے ہیں اور اگر تو ان کو بخش دے تو تُو انتہائی زبردست اور نہایت حکمت والا ہے۔‘‘

Topics

View

Noor E Naboat Noor E Elahi

خواجہ شمس الدین عظیمی

ماہنامہ روحانی ڈائجسٹ میں نور نبوت نورالٰہی کے شائع شدہ تقریباً تمام مضامیں کا ذخِرہ

SEARCH TOPICS

مئی 1982؁ء۔قرآن پاک

Topics