بائیسواں باب ۔ رنگوں کے مراکز

                شمالی امریکہ میں پائے جانے والے ریڈ انڈین قبائل کے مطابق جسم انسانی اور کرہ ارض ایک ہی طرز پر بنائے گئے ہیں۔ دونوں کا اپنا اپنا ایک محور ہے۔ جسم انسانی کا محور ریڑھ کی ہڈی ہے جس پر انسانی حرکات و سکنات کا انحصار ہے۔ اس محور میں چند ایسے مراکز ہیں جن پر صحت کا دارومدار ہے۔ وید اور یوگا کی تعلیمات کے مطابق بھی انسانی صحت اور جسم کی حرکات و سکنات کا دارومدار جسم انسانی میں موجود توانائی کے مراکز پر ہوتا ہے۔

                اگر ہم انسان کے مادی وجود کے حوالے سے ان مراکز کا کھوج لگاتے ہیں تو ان کی تفصیل کچھ یوں ہے۔

                پہلا مرکز سر کے اوپر حصہ میں واقع ہے۔ جب بچہ پیدا ہوتا ہے تو یہ حصہ نرم ہوتا ہے گویا یہ ایک دروازہ ہے جس کے ذریعہ بچہ زندگی قبول کرتا ہے۔

                اس کے نیچے دوسرا مرکز ‘‘دماغ’’ ہے جس کے ذریعے وہ سوچنا سیکھتا ہے۔ تیسرا مرکز حلق ہے جو منہ اور ناک کے سوراخوں کو آپس میں ملاتا ہے۔ اس مرکز کی وساطت سے چکھنے اور بولنے کی حس پیدا ہوتی ہے۔ چوتھا مرکز دل ہے جس کے ذریعہ جسم میں ارتعاشات Vibrationکا نظام قائم ہے۔ آخری مرکز ناف کے نیچے ہے۔ اس مرکز سے جسمانی حرکات و سکنات کنٹرول ہوتی ہیں۔

                ان مراکز میں اور ان کے درمیان توانائی کا بہائو مناسب طور پر قائم رہے تو جسمانی صحت ٹھیک رہتی ہے۔ تمام مراکز توانائی کی مقداروں سے معمور ہیں۔ ہر مرکز ایک اص وصف پر قائم ہے اور اس وصف کا اظہار رنگوں کی شکل میں ہوتا ہے۔

                ہر شئے میں درجہ بندی ہے چنانچہ رنگ کے بھی کئی درجات ہیں۔ گرم توانائی جسم کو متحرک رکھتی ہے یہ ہمارے جسم کے نچلے حصہ میں پیدا ہوتی ہے۔ اس کا رنگ سرخ ہے۔ جو توانائی کھانا ہضم کرتی ہے اس کا مزاج گرم اور رنگ زرد ہے۔ اس مرکز کے عدم توازن کی بناء پر معدہ، لبلبہ اور جگر کے افعال متاثر ہو جاتے ہیں۔

                قلبی مرکز کا رنگ سرخ ہے۔ اس مرکز کے عدم توازن کی بناء پر تھائی رائیڈ گلینڈ اور جنسی نظام کے افعال متاثر ہوتے ہیں۔ قوت مدافعت کمزور پڑ جاتی ہے۔ اگر سرخ رنگ میں عدم توازن پیدا ہو جائے تو غصہ بڑھ جاتا ہے اور آدمی جلد بازی کا مظاہرہ کرتا ہے۔

                حلق میں بھی ایک مرکز ہے جس کا رنگ نیلا ہے۔ اس کے مطالعہ سے معلوم ہوتا ہے کہ کوئی شخص اپنے جذبات کا اظہار الفاظ میں کس طرح کرتا ہے۔ جسمانی طور پر چونکہ یہ گلے میں واقع ہے اس لئے گلے کی جملہ کمزوریاں اس مرکز کے ذریعہ دریافت کی جا سکتی ہیں۔ مثلاً اگر تھائی رائیڈ گلینڈ خراب ہو جائیں تو جسم متاثر ہو سکتا ہے۔

                بھنوئوں کے درمیان میں جو مرکز ہے اس کا قدرتی رنگ گہرا نیلا ہے۔ اس کا تعلق دماغ کے اس حصے سے ہے جو لاشعوری تحریکات کا حامل ہے۔ سر کے بیچ میں موجود مرکز کا رنگ بنفشی ہے اس رنگ سے کسی شخص کے اندر فنکارانہ صلاحیتوں، مذہب سے لگائو اور اس کے حسن پرست ہونے کا اندازہ لگایا جا سکتا ہے۔

                اگر ہم صحت مند رہنا چاہتے ہیں تو ہمارے لئے ضروری ہے کہ ہم تمام مراکز کے رنگوں سے مکمل طور پر واقف ہوں۔

            تخلیق اور رنگ:

                انسان کے اندرونی اور بیرونی جسمانی نظام کا مطالعہ کیا جائے تو یہ حقیقت منکشف ہوتی ہے کہ انسان کی تخلیق رنگوں سے ہوئی ہے۔ اس بات کی تصدیق اس بات سے ہو جاتی ہے کہ جسم انسانی کے ہر عضو کا اپنا ایک مخصوص رنگ ہوتا ہے اور ہر فرد میں قدرے کمی بیشی سے اس رنگ کو باآسانی شناخت کیا جا سکتا ہے۔

                مثلاً

                ۱۔            کھال کا رنگ                                                              ۲۔           بالوں کا رنگ

                ۳۔           ہونٹوں کا رنگ                                                           ۴۔           زبان کا رنگ

                ۵۔           حلق کا رنگ                                                               ۶۔           آنکھوں کا رنگ

                ۷۔           ناک کے اندر کا رنگ

                ۸۔           نرخرے کا رنگ

                ۹۔            پھیپھڑوں کا رنگ                                                       ۰۱۔         دل کا رنگ

                ۱۱۔          جگر کا رنگ                                                ۲۱۔         پتہ کا رنگ

                ۳۱۔         گردوں کا رنگ                                                           ۴۱۔         تلی کا رنگ

                ۵۱۔         آنتوں کا رنگ                                                            ۶۱۔          معدہ کا رنگ

                ۷۱۔         ہڈیوں کا بیرونی و اندرونی رنگ                                      ۸۱۔         خون کا رنگ

                ۹۱۔          پیشاب کا رنگ                                                           ۰۲۔        پاخانے کا رنگ          

                نظریہ رنگ و نور کے مطابق ہر رنگ کا مزاج اور خاصیت الگ الگ ہے۔ جب تک رنگ متوازن رہتے ہیں انسان صحت مند رہتا ہے اور جب کسی بھی رنگ میں توازن برقرار نہیں رہتا تو آدمی بیمار ہو جاتا ہے۔

                انسان بنیادی طور پر مختلف رنگوں کا امتزاج ہے اور سورج کی روشنی میں یہ تمام رنگ موجود ہیں جو کہ انسان دھوپ سے اپنی ضرورت کے مطابق حاصل کرتا رہتا ہے لیکن جب اس نظام میں خرابی واقع ہو جاتی ہے تو رنگ میں کمی و بیشی ہو جاتی ہے۔ اس کی علامات مرض کی صورت میں ظاہر ہوتی ہیں۔ رنگ کی کمی یا بیشی کو دور کر دیا جائے تو انسان تندرست ہو جاتا ہے۔

                انسان، انسان کی دنیا، جنات، جنات کی دنیا، فرشتے، فرشتوں کی دنیا، غرض یہ کہ کائنات میں موجود ہر شئے رنگوں کے اعتدال پر قائم ہے۔

                اگر کسی دانشور کو اس بات سے اختلاف ہے تو زمین پر پھیلی ہوئی کھربوں چیزوں میں سے کوئی ایک چیز بے رنگ تلاش کرے جو اسے نہیں ملے گی۔ دراصل کائنات رنگوں کے علاوہ کچھ نہیں ہے۔

                چھ ارب انسانوں میں ایک بھی انسان رنگوں کے مرکب کے علاوہ کچھ نہیں۔ انسان جس ماحول میں رہتا ہے وہ بھی رنگوں کے علاوہ کچھ نہیں ہے۔

                ۱۔            سورج کے سات رنگ                                                 ۲۔           اندھیرے کا رنگ

                ۳۔           پھولوں کا رنگ                                                           ۴۔           پانی کا رنگ

                ۵۔           آکسیجن کا رنگ                                                           ۶۔           چاند کی چاندنی

                ۷۔           کہکشائوں کا رنگ                                                         ۸۔           ستاروں کا رنگ

                ۹۔            بادل کا رنگ                                                               ۱۰۔         قوس قزح کا رنگ

                ۱۱۔          پھول پودوں کا رنگ                                                    ۱۲۔         درختوں کا رنگ

                ۱۳۔         زمین کا رنگ                                                              ۱۴۔         ہوا کا رنگ

                ۱۵۔         لباس کا رنگ                                                              ۱۶۔          دیواروں کا رنگ

                ۱۷۔         کھڑکیوں میں پردوں کا رنگ                                        ۱۸۔         غذائوں کا رنگ

                ہر انسان چاہے وہ جاہل ہو، کم لکھا پڑھا ہو، زیادہ پڑھا لکھا ہو، ڈاکٹر ہو، پی ایچ ڈی ہو، کسان ہو، شاعر ہو، ادیب ہو، مورخ ہو، فنکار ہو، مرد ہو، عورت ہو یا سائنس دان ہو، رنگوں کی دنیا میں زندہ رہتا ہے اور جب رنگ اس کا ساتھ چھوڑ دیتے ہیں تو مر جاتا ہے۔

                ہمارا کھانا پینا، رہن سہن، لباس، خزاں کا موسم، بہار کا موسم، سب رنگین ہیں۔ ایک دانشور کا کہنا ہے کہ اگر ایک شخص یہ خواب دیکھتا ہے کہ وہ ایک قوس قزح ہے اور بیدار ہونے کے بعد جب وہ یہ خواب سناتا ہے کہ میں نے دیکھا کہ میں ایک دھنک رنگ وجود کا حامل ہوں تو کیا یہ نہیں کہا جا سکتا کہ دھنک نے یہ خواب دیکھا کہ وہ ایک انسان ہے۔ ہم اس حقیقت کو کیوں کر جھٹلا سکتے ہیں کہ ہم ایک دھنک ہیں جو یہ خواب دیکھ رہی ہے کہ وہ ایک انسان ہے۔