مچھلی اور سانپ

غوث علی شاہ صاحبؒ نے ’’تذکرہ غوثیہ‘‘ میں لکھا ہے۔

’’دو آدمی نہر کے کنارے پانی میں پیر ڈالے بیٹھے تھے۔۔۔۔۔۔نہر میں مچھلی اور سانپ ایک ساتھ تیر رہے تھے۔۔۔۔۔۔مچھلی نے سانپ سے کہا۔۔۔۔۔۔

اے سانپ! تجھے لوگ اچھا نہیں سمجھتے۔۔۔۔۔۔تجھ سے ڈرتے ہیں۔۔۔۔۔۔تجھے دیکھ کر خوش ہونے کے بجائے ہیبت زدہ ہو جاتے ہیں۔۔۔۔۔۔اور میں کتنی خوبصورت اور اچھی ہوں کہ لوگ مجھے دیکھ کر خوش ہوتے ہیں۔۔۔۔۔۔مجھے ایکوریم Aquariumمیں سجاتے ہیں۔۔۔۔۔۔اور مزے لے لے کر میری مختلف ڈشیں کھاتے ہیں۔۔۔

سانپ نے مچھلی سے کہا۔۔۔

میری بہن!۔۔۔۔۔۔ایسا نہیں ہے۔۔۔۔۔۔آدمی اپنے ڈر سے، اپنے خوف سے مر جاتا ہے۔

جب مچھلی نے سانپ کی اس بات کو تسلیم نہیں کیا تو سانپ نے کہا۔۔۔۔۔۔

آؤ تجربہ کرتے ہیں۔۔۔۔۔۔

یہ جو دو آدمی پیر لٹکائے بیٹھے ہیں۔۔۔۔۔۔ان میں سے ایک کے پیر میں، میں کاٹتا ہوں اور تم اُچھلنا۔ سانپ نے ایک آدمی کو ڈسا۔۔۔۔۔۔مچھلی اُچھل کر پانی سے اوپر آئی اور پانی میں دوبارہ غوطہ لگا دیا۔

وہ آدمی ہنسا اور کہا۔۔۔۔۔۔

دیکھو مچھلی مذاق کر رہی ہے، مجھے چھیڑ رہی ہے۔

میرے پیر میں کاٹ کر گئی ہے۔

سانپ مچھلی سے بولا۔۔۔۔۔۔

بہن مچھلی!

ہم کچھ دیر انتظار کرتے ہیں کہ آیا اس کے اوپر زہر کا اثر ہوتا ہے یا نہیں ہوتا۔۔۔۔۔۔اس آدمی کے اوپر کوئی اثر نہیں ہوا اور وہ وہاں سے اُٹھ کر چلا گیا۔

مچھلی اور سانپ پانی کے رُخ تیرتے ہوئے آگے بڑھے۔۔۔۔۔۔دیکھا کہ ایک آدمی بیٹھا ہوا ہے اور اس کے پیر بھی پانی میں ڈوبے ہوئے ہیں۔

سانپ نے مچھلی سے کہا۔۔۔۔۔۔

بی مچھلی! اس آدمی کے پیر میں اب تُو کاٹ۔۔۔۔۔۔میں اُچھلوں گا۔

یہی ہوا کہ مچھلی نے آدمی کے پیر میں کاٹا اور سانپ پانی کے اندر سے اُچھلا اور دیکھتے ہی دیکھتے وہ آدمی بے ہوش ہو گیا۔۔۔۔۔۔

آدمی جب بے ہوش ہو گیا تو سانپ نے مچھلی سے کہا۔۔۔۔۔۔

بی مچھلی! تم نے دیکھا کہ میرے ڈسنے کے بعد جب تم اُچھلی تو آدمی کے ذہن میں یہ بات نہیں آئی کہ کسی زہریلے کیڑے نے کاٹا ہے اور اب جب کہ تم نے کاٹا اور میں اُچھلا تو آدمی یہ سمجھا کہ سانپ نے ڈسا ہے۔ سانپ میں زہر ہوتا ہے اس خوف سے وہ بے ہوش ہو گیا۔