مصنف اور شاعر

قلندر بابااولیاءؒ نے روحانی علوم کوعوام الناس تک پہنچانے کے لیے تین کتابیں تصنیف کیں ہیں۔ جس میں انہوں نے اللہ کی قربت کا طریقہ اور انسان کی زندگی کا اصل مقصد تحریر کیا ہے اور آپ نے اپنی کتابوں میں زمین و آسمان کی حقیقت بیان کی ہے۔ چاند اور سورج کس طرح کام کرتے ہیں اس کےفارمولے اور نقشے بنا کر دیے ہیں۔

آپ کی تصنیفات  کے نام یہ ہیں:

۱۔ رباعیات                    ۲۔ لوح و قلم                  ۳۔تذکرہ تاج الدین باباؒ

قلندر بابااولیاءؒ شاعری کا اعلیٰ ذوق رکھتے تھے۔آپ کی محفل میں شعر و ادب پر بھی گٖفتگو ہوتی تھی۔ اردو، فارسی کے مشہور شعراء کا کلام آپ کو یاد تھا مشہور شعراء قلندر بابااولیاءؒ  کو بہت عمدہ اور بلند پایا شاعر تسلیم کرتے تھے۔

آپ کی شاعری کی خصوصیت یہ ہے کہ یہ اللہ تعالیٰ سے محبت کا احساس دلاتی ہے اور دنیا میں بہترین زندگی گزارنے کے فارمولے بیان کرتی ہے۔آپ شاعری میں عظیم اور برخیا  تخلص کیا کرتے تھے۔حضور قلندر بابااولیاءؒ فرماتے ہیں:

گم ہو گیا بس اس کے سوا کیا معلوم

کس سمت سے وہ نکل گیا کیا معلوم

ممکن نہیں اس تک ہو رسائی اپنی

جو وقت گیا کہاں گیا کیا معلوم

پیارے بچو!

بزرگوں کا کہنا ہے کہ" وقت کی قدر کرو،گیا وقت پھر ہاتھ نہیں آتا" انسان کی زندگی میں وقت کی بڑی اہمیت ہے آپ غور کریں ہم پوری زندگی وقت میں ہی گزارتے ہیں۔بچپن سی لے کر لڑکپن،لڑکپن سے جوانی اور جوانی سے بڑھاپے اور پھر مرنے تک جو وقت ہم کار آمد گزارتے ہیں وہ ہماری زندگی کا حاصل ہے اور جو وقت ہم ضائع کر دیں گے اس کے نتیجے میں ہمیں کچھ بھی نہیں ملے گا۔

وقت ہر انسان کی زندگی کا قیمتی  سرمایا ہے۔ہر انسان چاہے غریب ہو یا امیر۔چھوٹا ہو یا بڑا اسے روزانہ وقت کے سرمائے کی بھری ہوئی تھیلی سونپ دی جاتی ہے۔اب یہ انسان پر منحصر ہے کہ  وہ چوبیس گھنٹے کی تھیلی سے فائدہ اٹھاتا ہے یااسے ضائع کر دیتا ہے۔اگر انسان وقت کی اہمیت کو سمجھ لے تو اس پر علم کے دروازے کھل جاتے ہیں اور وہ کامیاب زندگی گزارتا ہے۔