Topics
ایک دفعہ کچھ جنگی قیدی گر فتار ہو کر آئے ان میں ایک عورت بھی تھی جس کا دودھ پیتا بچہ اس سے بچھڑ گیا تھا وہ مامتا کی ماری ایسےبے قرار تھی کہ جس چھو ٹے بچے کو دیکھتی اسے اپنے سینے سے لگا کر دودھ پلا نے لگتی ۔اس عورت کا یہ حال دیکھ کر حضورپاک ﷺ نے صحابہؓ سے پو چھا’’ کیا تم توقع کر سکتے ہوکہ ماں اپنے بچے کو اپنے ہاتھ سے آگ میں پھینک دے گی ؟ صحابہؓ نے عرض کیا یا رسول اللہ ! خود پھینکنا تو درکنار ،اگر بچہ آگ میں گر نے لگے تو یہ اپنی جا ن دے کر بھی بچے کو بچا لے گی ۔‘‘ نبی ؐ بر حق نے فر مایا:’’خدا اپنے بندوں پر اس سے زیادہ مہر بان ہے ۔‘‘
خواجہ شمس الدین عظیمی
اس کتاب کے پیش لفظ میں حضرت عظیمی صاحب تحریر فرماتے ہیں ’’کائنات کیا ہے، ایک نقطہ ہے، نقطہ نور ہے اور نور روشنی ہے۔ ہر نقطہ تجلی کا عکس ہے۔ یہ عکس جب نور اور روشنی میں منتقل ہوتا ہے تو جسم مثالی بن جاتا ہے۔ جسم مثالی کامظاہرہ گوشت پوست کا جسم ہے۔ہڈیوں کے پنجرے پر قائم عمارت گوشت اور پٹھوں پر کھڑی ہے۔ کھال اس عمارت کے اوپر پلاسٹر اور رنگ و روغن ہے۔وریدوں، شریانوں، اعصاب، ہڈیوں، گوشت اور پوست سے مرکب آدم زاد کی زندگی حواس کے علاوہ کچھ نہیں ہے۔
حواس کی تعداد پانچ بتائی جاتی ہے جبکہ ایک انسان کے اندر ساڑھے گیارہ ہزار حواس کام کرتے ہیں۔میں نے چونسٹھ سال میں تیئس ہزار تین سو ساٹھ سورج دیکھے ہیں۔تیئس ہزار سے زیادہ سورج میری زندگی میں ماضی ، حال اور مستقبل کی تعمیر کرتے رہے ۔ میں چونسٹھ سال کا آدمی دراصل بچپن ، جوانی اور بوڑھاپے کا بہروپ ہوں۔ روپ بہروپ کی یہ داستان المناک بھی ہے اور مسرت آگیں بھی۔ میں اس المناک اور مسرت آگیں کرداروں کو گھاٹ گھاٹ پانی پی کر کاسۂ گدائی میں جمع کرتا رہا اور اب جب کہ کاسۂ گدائی لبریز ہوگیا ہے۔ میں آپ کی خدمت میں روپ بہروپ کی یہ کہانی پیش کررہا ہوں‘‘۔۲۸۳ عنوانات کے تحت آپ نے اس کتاب میں اپنی کیفیات کوبیان فرمایاہے۔
