Topics
محاسبہ کیا جائے تو زندگی آسان ہے ۔ تنگ دستی کے باوجود اللہ کا شکر ادا کر کے زندگی گزر جاتی ہے لیکن اگر کوئی فرد یا ماحول میں لوگ درپے آزار ہو جائیں تو نفسیاتی الجھنیں پیدا ہوتی ہیں اور اعصاب کم زور ہو جاتے ہین۔ مسائل کا جائزہ لیا جائے تو ہم کسی کے لئے یا کوئی ہمارے لئے مصیبت ہے۔ وجہ عدم تحفظ اور ایک دوسرے کو قبول نہ کرنا ہے۔ جب محسوس ہوتا ہے کہ فلاں شخص سے مفادات کو خطرہ ہے یا وہ ہمیں نہیں پسند تو بیشتر ایسا ہوتا ہے کہ ہم رکاوٹ بن جاتے ہیں۔
فرد رکاوٹ کو دیوار سمجھ لے تو وہ تاثر قبول کر کے اثرات کو خود پر غالب کر لیتا ہے اور ذہنی الجھنوں میں مبتلا ہو جاتا ہے یعنی منفی لہریں اپنے اندر جذب کر لیتا ہے۔ نظر انداز کر دے تو حقیقت یہ ہے کہ یہاں کوئی کسی کا برا کر سکتا ہے نہ اچھا۔۔ ہر عمل اپنے لئے ہے۔
ایک بار مرشد کریم نے واقعہ سنایا کہ ایک شخص کسی دفتر میں ملازم تھا۔ جس کمرے میں وہ بیٹھتا تھا وہاں اس کی پشت کی طرف دیوار میں سوراخ تھے۔ ایک روز سانپ نے ڈس لیا، وہ صاحب سمجھے کسی کیڑے نے کاٹا ہے لہذا سانپ کے زہر کا اثر زائل ہو گیا اور انہیں خبر نہیں ہوئی۔
کچھ عرصہ بعد کہیں اور تبادلہ ہوگیا۔
دس سال بعد واپس آئے تو دیکھا کہ سوراخوں کو بند کر دیا گیا ہے۔
وجہ پوچھنے پر بتایا گیا کہ یہاں سانپ تھا جس نے آپ کو ڈس لیا تھا۔ انہیں یقین نہیں آیا اور دیوار کو کھرچنا شروع کیا۔ سوراخ ظاہر ہوا تو اندر سانپ کی کینچلی تھی۔کینچلی دیکھی تو یقین ہو گیا کہ مجھے سانپ نے ڈسا ہے۔ زہر کے اثرات ظاہر ہوئے اور وہ صاحب مر گئے۔
دس سال بعد اس شخص نے سانپ کے ڈسنے کے تاثر کو قبول کیا تو زہر کا اثر مظہر بن گیا جب کہ جس وقت سانپ نےڈسا تھا، بے خبری کی وجہ سے زہر نے اثر نہیں کیا۔
کسی کا خیال آنے پر تناؤ اور وسوسوں کی یلغار ہو جاتی ہے، ممکن ہے کہ ہمارا خیال آنے پر بھی دوسرے اسی کیفیت سے گزرتے ہوں۔ جب اسے مسئلہ درپیش ہوتا تو کوشش ہوتی ہے کہ خود کو دوسرے کی جگہ پر رکھ کر دیکھے کہ مقابل حالات کو کس تناظر میں دیکھ رہا ہے جس سے ذہن منفی ہو گیا۔ خود کو دوسرے کی جگہ پر رکھا جائے تو وجہ سمجھ آ جا تی ہے، اپنی غلطی سامنے آئے تو دہراتا نہیں ہے، دوسرا شخص عدم تحفظ کا شکار ہو تو پھر الجھتا نہیں، رویوں کو نظر انداز کر دیتا ہے۔ اس عادت سے بہت سے مسائل حل ہو جاتے ہیں۔
ایک روز کسی نے مسئلہ بیان کیا کہ آفس میں انتظامیہ کی طرف سے مشکلات ہیں، سب کے سامنے تذلیل اور دباؤ میں رکھنے کی کوشش کی جاتی ہے جب کہ میں اپنے کام سے کام رکھتا ہوں اور جواب نہیں دیتا لیکن اندر میں تناؤ سے کارکردگی متاثر ہو گئی ہے۔بتایئے اس مشکل کا مقابلہ کیسے کروں؟
مرشد کریم نے فرمایا، ” بدتر کا مقابلہ کرنا یہ ہے کہ آدمی خوب تر ہو جائے۔مقابلہ کر لو گے تو خوب تر ہو جاؤ گے۔“ عرفیؔ کا یہ شعر وہ اکثر پڑھتے ہیں،
عرفیؔ تو میندیش زغوغائے رقیباں
آوازِ سگاں کم نہ کند رزق گدا را
ترجمہ : عرفیؔ غم نہ کر ، رقیبوں کے شور سے نہ گھبرا ۔ تو اپنے کام میں لگا رہ۔ کتوں کے بھونکنے سے گدا گر کی روزی کم نہیں ہوتی۔
اس کے بعد فرمایا ، ” آپ کھڑے ہو جائیں گے تو وہ اور زیادہ شور کریں گے۔ جواب دینا بہت خراب ہے۔ کہیں جواب نہ دینا خرابی ہے۔ آدمی کو یہ معلوم ہونا چاہیئے کہ جواب کہاں دینا چاہئے ۔سو (100) میں سے اٹھانوے (98) فی صد باتیں ایسی ہوتی ہیں جن کا جواب دینا ضروری نہیں ہے۔ جب آپ جواب نہیں دیں گے تو سامنے والا کب تک بولے گا۔۔؟ زبان اور ذہن کو غیر ضروری باتوں سے محفوظ رکھنے کے لئے یا حی یا قیوم پڑھتے رہنا چاہیئے۔
اللہ کا تصور قائم اور آپ دوسروں سے متاثر نہیں ہوں گے۔“
بعد میں اس شخص نے بتایا کہ مشورہ پر عمل سے میرے اندر یقین پیدا ہوا اور جو لوگ مخالف تھے، بالآخر خاموش ہو گئے۔ کہتے ہیں کچھ بھی بول دو، اسے فرق نہیں پڑتا۔
مرشد کریم نے فہرست بنانے کا کہا کہ روزانہ محاسبہ کریں، اچھے کام بھی لکھیں اور جو غلط کیا ہے وہ بھی جیسے غصہ ، حسد ، غیر ضروری باتیں۔ اسی طرح کسی کی مدد، تفکر ، معاف کرنا ، اچھی سوچ ۔ محاسبہ سے پہلی بات یہ سامنے آئی کہ کون سی باتیں وہ روز دہراتا ہے اور اس کے اثرات ذہن کو کتنی دیر تک متاثر کرتے ہیں۔ یہ باتیں حذف ہو جائیں تو تناؤ اور وسوسے سے متاثر نہیں کریں گے۔
ایک روز عرض کیا ، بعض باتیں ایسی ہیں کہ جب ذہن میں آتی ہیں تو فلم چلنا شروع ہو جاتی ہے اور شروع سے آخر تک جو کچھ ہوا وہ بار بار ذہن پر نقش بنتا ہے،غصہ سے ذہن پراگندہ ہو جاتا ہے۔
فرمایا،” معافی کا خانہ خالی ہے۔غصہ سے روشنیاں جل جاتی ہیں، لاحول پڑھ کر دوسرے کاموں میں مصروف ہو جاؤ۔ کوئی گالی دے اور ہم گالی کو یاد کریں تو ہم کیا کر رہے ہیں۔۔۔؟ خود کو گالی دے رہے ہیں۔ راستہ میں بدبودار شے ہو، گزرنے کے بجائے کھڑے ہو جائیں تو کیا ہوگا۔۔۔؟ بدبو آتی رہے گی یہاں تک کہ ہم بدبو کا حصہ بن جائیں گے اور پھر بدبو محسوس نہیں ہوگی۔۔ یعنی ہم اس کے اندر داخل ہو گئے اور وہ ہمارے اندر داخل ہوگئی۔ اس طرح کے خیالات کی وجہ دل میں شکوہ ہونا ہے کہ میرے ساتھ ایسا کیوں ہوا۔ معاف کر دو اور آگئے بڑھ جاؤ۔“
احساسات کی دنیا لوگو ں کو نظر آجائے یا خیال کے زون کی تصویر کھینچی جا سکے تو معلوم ہوگا کہ محبوب ہمہ وقت محبّ کے ساتھ ہے۔ چلتے پھرتے، اٹھتے بیٹھتے ، تفکر میں گم ، گاڑی چلاتے اور کھانا کھاتے ہوئے ، لوگوں کے درمیان ، ٹی وی دیکھتے یہاں تک کہ مضمون لکھتے ہوئے بھی ذہن ہر وقت محبوب سے باتیں کرتا ہے۔
مرشد کریم ” اولی الالباب “ ہستیوں میں سے ہیں جن کا ذہن ہمہ وقت تخلیق کی ساخت میں تفکر اور خالق کائنات کے تشکر میں مشغول ہوتا ہے۔
قانون ہے کہ متوجہ ہونے سے صفات منتقل ہوتی ہیں۔ توجہ سے مرید کے ذہن میں تفکر کی صفات کا کسی نہ کسی حد تک غلبہ ہو جاتا ہے ۔ نظر ہر شے پر ٹھہرنا چاہتی ہے، توجہ چند سیکنڈ رک جائے ، ذہن شے میں داخل محسوس ہوتا ہے اور دیگر چیزیں دھندلا جاتی ہیں۔ اس کیفیت میں لطف و سکون اور ایسی دنیا سے واقفیت ہے کہ جہاں الفاظ نہیں مشاہدہ ہے اور مشاہدہ سے تفکر کا ذہن واقف ہے۔
کئی روز سے سورہ شمس زبان پر اور ذہن اس تلاش میں ہے کہ ،
اللہ تعالیٰ کے نزدیک شمس کیا ہے؟
” ضحا ھا “ کی جو تشریح مرشد کریم نے بیان فرمائی ہیں اس میں کون سا قانون ہے؟
اللہ نے ” قمر ، تلاھا ، نہار، جلاھا ، لیل ، یغشا ھا، سماء ، بناھا ، ارض اور سواھا“ کسے فرمایا ہے؟
اس نے سورہ شمس کے ہر لفظ کو انڈر لائن کیا اور معنی تلاش کر کے تفکر شروع کیا۔ لغت سے بہت مدد ملتی ہے لیکن وہ لغت کے معنی کو حتمی نہیں سمجھتا ۔ قرآن اللہ کی کتاب ہے اور وہ اسے اندر کی آواز سے سمجھنا چاہتا ہے۔ معنی تلاش کر کے عربی ذہن میں دہراتا ہے اور عربی سے سمجھنے کی کوشش کرتا ہے۔ تجربہ ہے کہ اس مشق سے کسی بھی وقت ادراک ہو جاتا ہے۔
قربت میں راہ نمائی ملتی ہے، جتنا بتانا ہو، بتا دیتے ہیں یا پھر مزید تفکر کے لئے کوئی اشارہ ہوتا ہے ۔ پہلے اس لئے نہیں پوچھا کہ انہوں نے فرمایا تھا اگر میں بتا دوں تو تم تفکر کرنا کیسے سیکھو گے۔
لہذا اپنا ہوم ورک مکمل رکھتا ہے، اس کے بعد شیخ راہ نمائی کرتے ہیں تاکہ شاگرد سوچنا اور بتائے ہوئے راستہ پر چلنا سیکھے۔
ایک مرتبہ کسی نے خط لکھا اور پوچھا کہ میں چاہتا ہوں آپ کا جنون میرا جنون بن جائے۔
جواب لکھوایا ۔۔۔” لغت کے اعتبار سے جنون کا مطلب دیوانگی ، کسی کام کو کرنے کی دھن یعنی اس طرح کام کیا جائے کہ اس کے پیچھے کوئی ایک مقصد متعین ہو۔ اس مقصد کے حصول میں آدمی اس طرح کوشش کرے کہ سوتے جاگتے زمین پر ، فضا میں ، خلا کی وسعتوں اور خلا کے سمٹنے میں کوئی حرکت ' مقصد' کے خلاف نہ ہو۔
تفکر و کوشش کا ہر زاویہ ایک معین مقصد ہو۔ آسان الفاظ میں اس طرح کہا جا سکتا ہے کہ ہزاروں لاکھوں خیالات کے ہجوم میں کسی ایک خیال کا انتخاب کیا جائے اور اس ایک خیال میں اس طرح بے خیال ہو جائے کہ آگے پیچھے ظاہر یا چھپے ہوئے ہر عمل میں مقصد کا تعین ایک ہو۔ بندہ عشق کا دعویٰ کرتا ہے ، دعویٰ صحیح ہے غلط ہے، اس کے پیچھے کسی بھی طرح مادی تقاضا در آئے تو اس کا مفہوم یہ ہے کہ جذبہ صادق نہیں ہے۔ ہم جب اسکول جاتے ہیں، اسکول میں ضرورت کے علاوہ کسی اور طرف ذہن مشغول ہوجائے تو طالب علم کبھی فارغ التحصیل نہیں ہو سکتا ۔ آپ جنون کا جو بھی مفہوم سمجھیں وہ نہیں ہے۔ جنون کا مطلب کسی ایک نقطہ پر وہ نقطہ محبوب، محبوبہ ، دنیا یا کوئی اور تقاضا بھی ہو سکتا ہے، ایک ہستی میں خود کو فنا کر لینے کے علاوہ کچھ نہیں ہے۔“
خط کا اختتام اس شعر پر کیا،
من تو شدم تو من شدی
من تن شدم تو جاں شدی
تا کس نہ گوید بعد ازیں
من دیگرم تو دیگری
عائشہ خان عظیمی
حضور قلندر بابا اولیاء فرماتے ہیں
بچہ ماں باپ سے پیدا ہوتا ہے
استاد تراش خراش کے اسے ہیرا بنا دیتے
