کچھ نہ ہونے میں ہونا تغیر ہے

یہ ڈائری ہے۔ پڑھنے والے کو اس میں ترتیب نہیں ملے گی اس لئے کہ لکھنے والے نے شعوری ترتیب کو مدِ نظر نہیں رکھا۔ لاشعور نے جو کہا، شعور نے قلم بند کیا ہے اور ایسا ہی ہوتا ہے۔

                                                                                                         شعور ہر جگہ فکشن نہیں ہے ۔ بات یہ ہے کہ شعور کس کا ہے۔۔۔؟ شے کا دراک میں آنا اس طرح کہ بندہ دیکھ لے، شعور ہے۔ ایک شعور ہمارا ہے، ہمہ وقت چیزوں کو تبدیل ہوتا دیکھتا ہے اور ایک شعور مرشد کا ہے۔ فرماتے ہیں کہ ” کچھ نہ ہونے میں جو ہونا ہے ۔۔ وہ تغیر ہے۔ “

                                                                           مرشد کی باتیں گہری ہیں۔ مختصر اور جامع بات کر کے دریا کو کوزہ میں بند کر دیتے ہیں۔بظاہر کوزہ یعنی بات مختصر ہوتی ہے لیکن اندر جھانکئے۔۔ دریا نظر آتا ہے اور دریا کو بالآخر سمندر قبول کر لیتا ہے۔ ان کی باتوں پر غور کرنے سے وہ اپنے اندر کی تاریکیوں سے واقف ہوا، اس طرح کہ اپنا وجود بے معنی ہوگیا۔ یاد آیا کہ ایک بار کسی کی تحریر درست کرواتے ہوئے صاحبِ علم نے فرمایا تھا، ” اپنا وجود نہیں، یہاں صرف وجود لکھو۔۔ وجود اپنا نہیں ہوتا!“

                                                                                                                            زمین پر رات اور آسمان پر صبح کا سماں تھا۔ سوچ رہا تھا کہ ہم روشنی کو صبح کہتے ہیں اور اندھیرے کو رات ، ایسے میں روشنی سے جگ مگ کرتے آسمان کو رات کیسے کہا جائے۔ آسمان دن میں بھی روشن ہوتا ہے اور رات میں بھی ۔۔ لگتا ہے کہ آسمان۔۔۔ رات دن کی بندشوں سے آزاد ہے۔ ایک ستارہ پر نظر جمائی۔ وہ ایسا چمکا جیسے اس کی جانب متوجہ ہو گیا ہو۔ غور کرنے پر احساس ہوا کہ وہ ستارہ نہیں اور شاید ستارہ کی روشنی بھی نہیں بلکہ ستارہ کی روشنی کا عکس ہے۔ عکس نشانی ہے۔ نشانی پر غور کرنے سے حقیقت کا ادراک ہوتا ہے۔

                                                                                 اس نے خود سے سوال کیا، جب وہ عکس دیکھ سکتا ہے تو پھر جس کا عکس ہے اسے کیوں نہیں دیکھتا۔۔؟ ذہن میں آیت آئی،

                ” اور ہم نے بنائے آسمان میں بروج، اور آراستہ کیا اسے دیکھنے والوں کے لیے

                اور محفوظ کر دیا اس کو ہر شیطان مردود سے ۔“                                                       ( الحجر                      :               ۱۶۔۱۷)

                                                                             خیال نے کہا ، جو اپنی حقیقت سے واقف نہیں، وہ ستاروں کی اصل کیا دیکھے گا۔ ستارہ آسمان کی مخلوق ہے۔ آسمان۔۔ زمین سے مختلف زون ہے۔ زمین سے آسمانی مخلوقات جیسی نظر آتی ہیں ، وہ ویسی نہیں ہیں۔ دوسرے زون کی مخلوق سے واقف ہونے کے لیے اس زون میں داخل ہونا یعنی آسمان کے حواس کا وقوف ضروری ہے بصورت دیگر۔۔؟

                                                                                              اکثر ایسا ہوتا ہے کہ وہ خواب میں خواب دیکھتا ہے۔ اس نے سوچا خواب میں خواب دیکھنا کیا ہے۔۔۔؟ اتنا بڑا حصہ خواب میں گزرتا ہے۔یہاں کے چھ گھنٹے نہیں معلوم خواب کی دنیا کے کتنے سال ہوں گے لیکن بہت مختصر یاد رہتا ہے۔

                                                        ایک بار اس نے مرشد کریم کو خواب سنانے کے بعد کہا کہ میں نے یہ سب جاگنے سے چند لمحے پہلے دیکھا۔ فرمایا،

                       ” آپ کو کیسے معلوم کہ چند لمحے پہلے دیکھا؟ یہاں کے اور وہاں کے وقت میں بہت فرق ہے۔“

                                                                                                                           وہ سوچ رہا تھا کہ خواب کا اتنا بڑا حصہ ہم کہاں گزار کر آتے ہیں اس طرح کہ گمان تک نہیں ہوتا ، کہاں جا رہے ہیں اور کہاں سے آ رہے ہیں۔ کہیں  ایسا تو نہیں کہ ہر رات خواب میں آدمی نقطۂ آغاز پر پہنچتا ہے اور وہاں سے واپس نزول کرتا ہے۔۔؟

                                                                                               یہی بات مرشد کریم سے عرض کی۔ فرمایا ، ” اللہ تعالیٰ نے قرآن کریم میں ارشاد فرمایا ہے،

                ” ہم نے انسان کو بہترین صناعی کے ساتھ تخلیق کیا، پھر اس کو اسفل سافلین

                میں پھینک دیا۔“                                            (التین    :                ۴۔۵)

                                                                       اس آیت میں تفکر کیا جائے تو آدمی کی زندگی کے دو رخوں کا ادراک ہوتا ہے۔ ایک رخ وہ ہے جو مادی وجود کے ساتھ مادی اشیا میں تصرف کرتا ہے یعنی کسی ایک شے میں تحقیق کرتا ہے۔ اس کے پیش نظر اس تخلیق میں ان رموز کو تلاش کرنا ہے جو اس شے کے باطن میں موجود ہیں۔ مثالیں بہت ہیں۔ ایک مثال ایٹم بم کی ہے۔ جاپان کے شہروں پر جب ایٹم بم گرایا گیا تو وہاں دھوئیں کا پہاڑ نظر آیا۔لوگ اسے پہاڑ سمجھتے رہے لیکن جب چھو کر دیکھا گیا تو دھوئیں کی طرح کوئی چیز تھی جو غائب ہوگئی۔ یعنی ایٹم جس چیز کا بھی نام رکھا گیا ایک ایسی ہستی ہے جو زمین کا بہرحال ایک حصہ یا ایک جزو ہے۔ لیکن اس کے اندر تباہی و بربادی کا اتنا بڑا ذخیرہ ہے کہ ہیروشیما کا بہرحال ایک حصہ یا ایک جزو ہے کہ ہیرو شیما اور ناگاسا کی پہاڑ پر جب ایٹم بم گرایا گیا تو پہاڑ دھواں بن گیا اور وہ دھواں ہوا میں تحلیل ہو گیا۔ اس ایٹم کو ہم زمین کے ذرّات کے علاوہ اور کچھ نہیں کہہ سکتے۔ اس قسم کی اور بھی اشیا ءہیں جن کو موجودہ سائنس نے تلاش کر لیا ہے۔“

                                                                                             مرشد کریم کی بات جاری تھی۔ وہ فرما رہے تھے کہ ” موجودہ دور میں سائنس کا غلغلہ ہے۔ موجودہ سائنسی تحقیق و تلاش و کارکردگی ہے جس کی نشان دہی قرآن کریم میں کی گئی ہے۔

                ” جو لوگ مجھ میں جدوجہد کرتے ہیں میں ان کے لیے اپنی راہیں کھول دیتا

                ہوں۔“                                          ( العنکبوت                     :                     ۶۹)

                                                        جو لوگ تلاش کرتے ہیں، فی نا۔۔۔میرے لیے نہیں، فی نا کے معنی ہیں میری صفات میں۔۔۔ مجھ میں تفکر کرتے ہیں، میں ان کے اوپر اپنے راستے کھول دیتا ہوں۔“

                                                                                                  فرمایا، ” اللہ نے آدمی کی تخلیق کی تو نطفہ، مضغہ، علقہ کے مراحل بیان ہوئے اور انسان کو احسن تقویم فرمایاہے۔ مفہوم واضح ہے کہ آدمی اور انسان ایک ہونے کے باوجود الگ الگ یونٹ ہیں۔ آدمی نطفہ ، علقہ اور مضغہ ہے اور انسان احسن تقویم ہے۔“              اتنا فرما کر وہ خاموش ہو گئے۔

                                                   عرض کیا ، حضور کیا بات مکمل ہوگئی۔۔۔؟

                                         فرمایا، ” بات اپنی جگہ مکمل ہے۔۔۔ تشریح باقی ہے۔“

                            اس نے اصرار نہیں کیا اور وہ مسکرا دیئے۔

                                                             مرشد کریم کی موجودگی میں وہ موجود ہو کے بھی غیر موجود ہوتا ہے۔ جو خیال آتا ہے صرف اس پر عمل کرتا ہے اور جس بات سے خیال روک دیتا ہے، اس کے بارے میں نہیں پوچھتا۔خیال نے کہا، مرید کے لئے مرشد محبوب ہے اور محبوب کب غیر موجود ہوتا ہے۔ ہم جہاں ہیں وہ ہمارے ساتھ ہے۔ اگر کوئی شے توجہ میں رکاوٹ بنے تو اس کا مطلب یہ ہے کہ ارادہ کو استحکام کی ضرورت ہے۔

                                                                                                         خواب میں گزرے لمحات کے سوال کو انہوں نے احسن تقویم اور اسفل سافلین کی روشنی میں سمجھایا۔ بتائے گئے نکات پر غور کر رہا تھا کہ ذہن میں جھماکا ہوا۔ خواب لاشعور کا زون ہے اور لاشعور روشنی ہے۔ پھر خواب میں وجود روشنی کے نظر کیوں نہیں آتے۔۔؟ جس طرح جاگنے میں ہم ایک دوسرے کو دیکھتے ہیں، وہی خدوخال خواب میں ہیں۔ وہ تو خواب میں بھی خود کو مادی روپ میں دیکھتا ہے جب کہ خواب کا زون، مادی زون نہیں ہے۔ مٹی میں کثافت ہے،خواب کے حواس میں رفتار تیز ہوتی ہے اور کثیف (بھاری) وجود کے لئے ایسی رفتار ممکن نہیں۔سونے والا غائب نہیں ہو جاتا، جسم بیڈ پر ہوتا ہے۔۔ اندر میں وجود سفر کرتا ہے۔ مٹی کی دنیا فکشن ہے۔ فکشن کا مطلب وہ شے جو فرض کی گئی ہو۔ جب آدمی روشنی کے زون میں داخل ہو کر بھی وہاں کی دنیا کو مادی خدوخال یعنی مٹی کے لباس میں دیکھے تو پھر خواب میں جو دیکھا، وہ کیا ہوا۔۔؟

                                                                                   لاشعور نے کہا ، تم وہاں روشنی اس لئے نہیں دیکھتے کیوں کہ تم نے یہاں روشنی نہیں دیکھی۔ جو فکشن میں رہتا ہے، اس کا خواب بھی فکشن ہے۔ جب تک دن کے حواس میں روشنی سے واقف نہیں ہوگے، خواب میں بھی نہیں دیکھو گے۔ جو کچھ ہے، اسی دنیا میں ہے۔ ” موتو اقبل ان تموتوا“   مر جاؤ، مرنے سے پہلے۔ نیند آدھی موت ہے۔ لاشعور نے راہ نمائی کی کہ نیند سے پہلے بیداری میں رہتے ہوئے نیند کی دنیا سے واقف ہو جانا فلاح ہے۔

                                                                                                      رات اور دن سے متعلق سوال و جواب کے بعد مرشد کریم نے ڈایا گرام سمجھائی تھی کہ دائرہ کا بننا کیا ہے اور مثلت کیسے بنتا ہے۔ ذہن اس قدر بھاری ہوگیا تھا کہ واپس آکر کئی گھنٹے تک دباؤ محسوس ہوا۔ ڈایا گرام باربار دیکھی اور اس کا تعلق رات اور دن کی آیات سے جوڑنے کی کوشش کی۔ لغت میں عربی الفاظ کے معنی کیے۔ قرآن کریم میں ارشاد ہے،

                ” اس نے آسمانوں اور زمین کو برحق پیدا کیا ہے۔ وہی دن پر رات اوررات پر دن کو لپیٹتا ہے۔ اسی نےسورج اور چاند کو اسی طرح مسخر کر رکھاہے کہ ہر ایک، ایک مقررہ وقت تک چلے جا رہا ہے۔ جان رکھو، وہ عزیز اور در گذر کرنے والا ہے۔“   ( الزمر            :                   ۵ )

                                                                ” یکوّر“  کے معنی لپیٹنے کے ہیں۔ لپیٹنے سے محوری اور طولانی گردش بنتی ہے۔ دھاگے کورِیل میں لپیٹیں، دھاگا آگے بڑھتا ہے اور دائرہ بنتا ہے۔ چلتی ہوئی گاڑی میں ٹائر کی حرکت غور طلب ہے۔جب تک ٹائر دائرہ کی شکل میں آگے نہیں بڑھے گا، گاڑی نہیں چلے گی۔ گاڑی کیا، ٹائر بھی حرکت نہیں کرتا۔ کائنات میں ہر حرکت محوری اور طولانی گردش میں ہے۔ آگے بڑھنا، طولانی حرکت ہے اور دائرہ میں سفر ، محوری حرکت ہے۔

                                                      شے مرکز سے توانائی (انرجی) لے کر آگے بڑھتی ہے، آگے بڑھنے سے فاصلہ پیدا ہوتا ہے اور واپس مرکز کی طرف آنا یعنی دائرہ بننے سے توانائی ( انرجی) کی فیڈنگ جاری رہتی ہے۔ رات میں ملنے والی توانائی ( انرجی) دن بھر استعمال ہوتی ہے اور تھکن محسوس ہو تو نیند غالب ہو جاتی ہے۔

                                                                                  دائرہ کا مطلب یہ ہے کہ اس میں طولانی گردش موجود ہے اور محوری حرکت غالب ہے۔ طولانی گردش اسپیس ہے اور محوری گردش ٹائم ہے۔

                                                                          رات دن اس کے لئے مشکل موضوع ہے اور یہ بات اس نے مرشد کریم سے بھی عرض کی تھی جس پر انہوں نے فرمایا تھا کہ مشکل کام سب سے پہلے کرنا چاہیئے لہذا رات اور دن پر غور کرنا شروع کر دیا۔ درجہ بہ درجہ نکات سامنے آرہے تھے۔ تفکر کا دل چسپ پہلو یہ ہے کہ سلسلہ رکتا نہیں، ہر نکتہ اپنی ذات میں ایک باب ہے۔

                                                                        لاشعور نے راہ نمائی کی دائرہ کا آگے بڑھنا دراصل تکرار ہے۔ دائرہ کی ابتدا نقطہ ہے۔ کاغذ پر دائرہ بنایئے، قلم کی نوک جہاں رکھی جائے گی، سب سے پہلے نقطہ بنے گا۔قلم آگے بڑھا، دوسرا نقطہ بنا۔ نقطہ۔ نقطوں کی شکل میں آگے بڑھتا ہے۔ یعنی ایک نقطہ کے دو، دو کے چار، چار کے سولہ اور سولہ کے دو سو چھپن نقطے بنے جسے ہم لکیر کہتے ہیں۔ نقطہ ایک ہو یا سو۔۔ سب کی شکل ایک ہے۔ یعنی دو سو چھپن نقطے، صرف ایک نقطہ کی تکرار ہیں۔ تکرار سے فاصلہ پیدا ہو رہا ہے۔ آگے بڑھنے والی لکیر ایک طرف مرکز سے دور اور دوسری طرف قریب ہو رہی ہے۔ دوری فکشن تخلیق کرتی ہے یعنی آدمی ایک دو تین چار پانچ کی گنتی میں پھنس کر یہ بھول جاتا ہے کہ یہاں سب کچھ ایک ہے۔

                ” وہ رات کو دن میں اور دن کو رات میں داخل کرتا ہے۔“     ( الحدید :۶)

        دن کو رات میں داخل کرنا اور رات کو دن میں داخل کرنا، یہ بھی لپیٹنا ہے۔

                                                                                                            لپیٹنا یعنی تکرار۔۔۔ تکرار سے ٹائم اور اسپیس تخلیق ہوتی ہے ۔ رات کا دن میں داخل ہونا طولانی حرکت اور دن کا واپس بن جانا محوری حرکت ہے۔ رات اور دن مل کر دائرہ بناتے ہیں۔ دائرہ پھر سے رات اور دن میں داخل ہو جاتا ہے۔ مرشد کریم نے فرمایا تھا کہ جہاں دو دائرے ملتے ہیں وہاں اسپیس تخلیق ہوتی ہے۔ یہ اسپیس خالق اور مخلوق کے درمیان پردہ ہے۔

                                                                                                          خیال نے کہا، نقطہ کی جگہ دن اور رات کو رکھو تو سارے دن اور رات ایک جیسے ہیں، پھر ہر دن نیا دن اور ہر رات نئی رات کیسے ہوگئی۔۔؟

                ” اور وہ اللہ ہی ہے جس نے رات اور دن بنائے اور سورج اور چاند کو پیدا

                کیا۔ سب ایک ایک فلک میں تیر رہے ہیں۔“                                                                     ( الانبیا            :                ۳۳ )

                                                 سورج دن اور چاند رات کے حواس ہیں۔ جس طرح دن میں چاند آسمان پر ہو کر بھی دکھائی نہیں دیتا اسی طرح رات کے حواس دن میں موجود رہ کر بھی مغلوب ہوتے ہیں۔ چاند اور سورج دونوں متعین اور مخصوص مدار میں تیرتے ہیں۔ایک ایک فلک میں تیرنا یعنی دائرہ کا دائرہ میں داخل ہونا۔ یہ دن کو رات میں اور رات کو دن میں داخل کرنے والی بات ہوگئی۔محوری اور طولانی گردش کا ذکر یہاں پھر آگیا جس سے کوئی مخلوق باہر نہیں۔

                                                                                                     کل فی فلک یسجون                     ۔۔۔ سب ایک ایک فلک میں تیر رہے ہیں۔ لغت میں ” یسجون“ کے معنی ہیں وہ تیزی سے دوڑتے ہیں۔ ” سج“ کے معنی تیرنا۔۔ پانی یا ہوا میں تیزی سے گزرنے کے ہیں۔

                                                                                         قرآن کریم میں ستاروں کی گردش کے لئے بھی یہ الفاظ استعمال ہوئے ہیں۔

                                                                         تیرنے کا ایک مطلب یہ سمجھ میں آیا کہ اجرام فلکی حرکت میں ہیں، حرکت سے تبدیلی پیدا ہوتی ہے اور تبدیلی فکشن ہے۔ ایک ایک فلک میں تیرنے کا دوسرا مطلب کشش ثقل کی موجودگی، مقداروں کا معین ہونا اور تکرار ہے۔تکرار دوری پیدا کرتی ہے اوردوری فکشن ہے۔ تیرنے کا تیسرا مطلب یہ سمجھ میں آیا کہ جسے ہم خشکی سمجھتے ہیں، وہ بھی پانی ہے لیکن خشکی میں پانی کا درجۂ حرارت مختلف ہے۔ دوسری بات یہ ہے کہ خود پانی کیا ہے۔۔؟ یہ تو اسے بھی نہیں معلوم لیکن مرشد کی تحریرں اور لیکچرز سے اس نے یہ سمجھا ہے کہ پانی اطلاع اور اطلاع روشنی کی صورت میں نزول کرتی ہے۔

                                                                                   ذہن بھاری محسوس ہوا۔ قلم رکھا ہی تھا کہ ایک اور آیت پر نظر پڑی اور وہ خود کو مزید تلاش سے روک نہ سکا۔ اللہ تعالیٰ فرماتے ہیں،

                ” ان کے لئے ایک اور نشانی رات ہے، ہم اس کے اوپر سے دن ہٹا دیتے ہیں تو ان پر اندھیرا چھا جاتا ہے۔“        (یٰس:۳۷)

                                                                             ” نسلخ“ کے معنی ” ہٹا دینا ، منسوخ کرنا“ ہے۔ منسوخ کرنا یا ہٹا دینا۔۔ نفی کرنا ہے۔ دن رات کی اور رات دن کی نفی ہے۔ جب دونوں ایک دوسرے کی نفی ہیں تو پھر باقی کیا رہا اور حقیقت کیا ہے۔۔؟