تخمِ گل کی آنکھ زیرِ خاک بھی بے خواب ہے

                                                                                ذہن اکثر اوقات سن محسوس ہوتا ہے جیسے کسی نے سلا دیا ہو۔ جو پڑھتا ہے نقش نہیں بنتا اور سنے ہوئے لفظ فوراً بھول کے خانہ میں چلے جاتے ہیں۔ دس روز سے وہ ایک کتاب پڑھ رہا ہے لیکن کچھ یاد نہیں کہ کیا پڑھا ہے۔ اس صورت حال کو توجہ کی کمی قیاس کر کے ایک روز ایک سطر دس مرتبہ پڑھی کہ یاد ہو جائے لیکن جیسے ہی اگلی سطر پر پہنچا۔۔۔ گزشتہ کا ہر لفظ ذہن سے غائب ہوگیا۔

                                                                        ذہن کا سن ہونا تکلیف دہ ہے۔ یہ ایسا ہے جیسے پرندہ کو پنجرہ میں قید کر دینا۔

خیال نے کہا، تکلیف دہ اس لئے ہے کہ ” میں“ پر ضرب پڑتی ہے۔ اس نے کہا، جب جانتا ہوں کہ کرنے والا کوئی اور ہے پھر ایسا کیوں ہو رہا ہے۔شاید بے بسی سے واقفیت کی کیفیت علم الیقین کی حد تک تھی۔۔عین الیقین سے وہ اب گزر رہا ہے۔۔ حق الیقین کیا ہوگا۔۔ اسے معلوم نہیں۔

                                                                              اس نے دیکھا ہے کہ کسی تحریر میں ” شاید“ آتا ہے، مرشد کریم یہ لفظ نکلوا دیتے ہیں۔

                                                                           ایک روز پوچھا ، حضور! آپ کو ”شاید“ نہیں پسند؟

                                                                    فرمایا ۔۔۔” شاید میں شک ہے۔“

                                                                                                           آدمی مخصوص ذہن کے ساتھ لکھنے بیٹھتا ہے لیکن جب لکھتا ہے تو ذہن اور ہوتا ہے۔ کیفیات پر غور کرنے سے ادراک ہوتا ہے کہ ہر عمل خیال کا پابند ہے۔ اس بات کو ہمیشہ سرسری طور پر لیا کہ زندگی خیال پر قائم ہے۔ سرسری کا مطلب سر پر سے گزرنا ہے۔بات جب تک نہ کھلے اس کا سننا سرسری ہے۔ تجربات سے گزرا اور خیال کو سننا شروع کیا۔ احساس ہوا جب تک خیال نہ آئے آدمی کچھ نہیں کر سکتا۔ کچھ بھی نہیں! خیال کیا ہے، اس پر غور کرنا ہے۔ آتا کہاں سے ہے اور بغیر آواز کے اپنے معنی و مفہوم کس طرح واضح کر دیتا ہے؟

        جب کوئی چیز دی جاتی ہے تو پہلا سوال یہ کیا جاتا ہے کہ یہ کیا ہے اور کس نے دیا؟

                                                               دنیاوی معاملات میں شے سے متعلق ” کیا“ اور ”کس نے“ کے الفاظ کی طرف ذہن متوجہ ہوتا ہے لیکن خیال جس سے ذہن ایک لمحہ بھی خالی نہیں، اس کے بارے میں کیا اور کیوں ہمارے ذہنوں میں نہیں آتا۔

                                                     محسوس ہوتا ہے اور آنکھ دیکھتی ہے کہ خیال باہر سے نہیں۔۔ اندر سے آتا ہے۔باہر کچھ بھی نہیں ہے۔ خیال کی لہریں خلیوں  (Cells)  سے ٹکراتی ہیں اور اس میں موجود تصویر کا عکس بنتا ہے۔ جسم خول اور ہر خلیہ اسکرین ہے۔ لہریں مرکز سے کس طرح آتی ہیں ، پھیلتی کیسے ہیں اور ہم کس طرح واقف ہوتے ہیں، اس عمل پر وہ جب بھی غور کرتا ہے ذہن میں ہلکی اور دھندلی تصویریں بنتی ہیں جنہیں وہ الفاظ میں بیان کرنے سے قاصر ہے۔

                                                                                              ذہن کئی مرتبہ سن ہونے کی کیفیت سے دوچار ہوا ہے۔ جب پہلے کچھ دیر کے لئے ایسا ہوا تو کچھ بھی نظر نہیں آیا۔ تھوڑی دیر بعد کسی نے توجہ دلائی اور وہ ظاہری دنیا کی طرف متوجہ ہوا۔

                                                                                                                   ظاہری ۔۔ روز مرہ بول چال میں یہ لفظ دکھاوے یا فریب کے معنی میں استعمال ہوتا ہے۔ ایسا مظہر جس میں حقیقت نہ ہو۔ اکثر لوگ کہتے ہیں کہ ظاہری چیزوں پر نہ جانا۔ بالفاظ دیگر وہ  یہ کہتے ہیں کہ جو نظر آتا ہے وہ ہوتا نہیں ہے۔ مگر مجموعی طور پر ظاہری دنیا کو حتمی بھی سمجھتے ہیں۔ اس نکتہ پر آ کر ذہن کیوں سن ہو جاتے ہیں۔۔؟

                                                               مرشد کریم کے پاس بیٹھ کر اس نے ہر آنے والے خیال کو سننا شروع کیا اور عمل کرنے سے ضمیر نے اپنی طرف متوجہ کیا۔ استاد طریقت کی تربیت کا انداز ہے کہ وہ خامیوں کی نشان دہی اس انداز میں کرتے کہ سننے والے پر واضح ہو جاتا ہے کہ بات اس کے لئے کہی گئی ہے۔

                                           محفل یا تنہائی میں جن خامیوں کی نشان دہی کی گئی ہے اس نے اللہ کی توفیق سے سب سےپہلے ان خامیوں کو اپنے اندر تلاش کیا۔ اندر جھانک لینے کے بعد آدمی خاموش ہو جاتا ہے۔

                                                وہ اپنی ہی غلطی ۔ چھوٹی ہو یا بڑی ، انہیں بتاتا ہے۔ جب تک غلطی کا اعتراف نہ کر لے ، شرمندگی محسوس ہوتی ہے۔ انہوں نے ہمیشہ بات سنی ہے، وقت دیا اور راہ نمائی کی ہے۔

                                                    ایک مرتبہ صاحب علم سے کسی خواہش کا اظہار کیا، بات سنی، سر پر ہاتھ رکھا اور دعا دی۔

                                               اگلے روز انہوں نے کسی سے فرمایا، اگر سارے کام ہماری مرضی سے ہونے لگیں تو دنیا کا نظام کیسے چلے گا ۔۔؟ وہ بھی وہاں موجود تھا۔ سمجھ گیا کیا کہا جا رہا ہے۔

                                                                               شیخ طریقت نے اسے سمجھایا ہے کہ ہر شے گزر جانے والی ہے۔۔۔ خود کو اللہ کے سپرد کرو۔ یک در گیر ومحکم بگیر۔ وہ اس پر عمل کرتا اور کچھ دنوں کے بعد کہیں نہ کہیں الجھ جاتا۔ جب ذہن واپس ان معاملات کی جانب جانے لگا جن سے دور رہنے کا کہا گیا تھا تو اس دوران مسلسل خواب میں دیکھا کہ وہ گاڑی غلط چلا رہا ہے، کہیں گاڑی راستہ میں رک گئی ہے اور بریک کام نہیں کر رہے ، کہیں ریورس کا مسئلہ ہے اور کہیں گاڑی کا وہ حال ہوا کہ لکھتے ہوئے خوف آتا ہے۔

                                                                                              ان خوابوں کا ذکر صاحبِ علم سے نہیں کیا۔ سوچا کتنے شرم کی بات ہے کہ وہ ایک ہی بات دس مرتبہ سمجھائیں اور میں پھر وہی غلطی کروں۔

                                                                                      پاس بیٹھا ہوا تھا اور بات خوابوں پر ہو رہی تھی۔ وہ خاموش ۔۔سن رہا تھا لیکن شرمندگی کی وجہ سے اپنے خواب کا ذکر نہیں کیا۔ تھوڑی دیر بعد وہ اس کی طرف متوجہ ہوئے اور ہنستے ہوئے پوچھا،

                                                                                       ” ہا ں بھئی! تم نے کوئی خواب دیکھا۔۔۔؟“

             اس نے سر جھکا لیا۔

                                                         مرشد ۔۔۔۔مرید کے لیے آئینہ ہے۔ ایسا آئینہ کہ سامنے جانا تو بعد کی بات۔۔ مرشد کو یاد کیا، آئینہ بنا اور اس نے اپنا عکس دیکھا۔ معلوم ہو جاتا ہے کہ وہ کتنے پانی میں ہے۔

                                       سختی کر کے کسی کو نہیں بدلا جا سکتا، محبت کے سوا کوئی راستہ نہیں اور مرشد سر۔۔۔ تا۔۔۔ پا محبت ہیں۔ انہوں نے سکھایا کہ جو خامیاں ہمیں دوسروں میں نظر آتی ہیں وہ ہمارے اند ر ہیں۔اپنا محاسبہ کیا جائے تو کوئی دوسرا بُرا نہیں لگے گا۔ اب جب اسے لگتا ہے کہ فلاں میں یہ برائی ہے، مرشد کی بات یاد آتی ہے۔ وہ اپنے اندر دیکھتا ہے اور خاموش ہو جاتا ہے۔صرف خاموش نہیں ہوتا، تزکیہ کرتا ہے۔

                                                              ایک مرتبہ ذہن میں کوئی بات آئی جسے لکھنا مناسب نہیں تا ہم بات کا تعلق خود نمائی سے تھا۔

                                                                                         تین چار دن تک شیخ نے کچھ نہیں کہا مگر چوتھے روز خدمت میں حاضر ہوا تو تھوڑی دیر بعد انہوں نے واقعہ سنایا۔۔ شہزادی زیب النسا کنیزوں اور خدّام سے ہمیشہ نرمی کا سلوک کرتی۔ وہ بہت خوبصورت تھی اور اسے خود کو آئینہ میں دیکھنے کا بہت شوق تھا۔اس کا قیمتی آئینہ جو چین سے بھیجا گیا تھا، اسے بہت پسند تھا۔ ایک روز کنیز سے وہ آئینہ ٹوٹ گیا۔

                                             شہزادی نے شیشہ ٹوٹنے کی آواز سنی تو پوچھا ، کیا ہوا۔۔؟

                             کنیز ڈرتے ہوئے آئی اور عرض کیا،

                        از قضا آئینہ چینی شکست

                        (قضا سے چینی آئینہ ٹوٹ گیا)

                              شہزادی نے ہنس کر جواب دیا،

                        خوب شد اسباب ِ خود بینی شکست

                        ( اچھا ہوا خود نمائی کا شیشہ ٹوٹ گیا)

                                              واقعہ سنانے کے بعد مرشد نے کچھ نہیں کہا اور وہ محاسبہ میں گم ہو گیا۔ شکر ادا کیا کہ اللہ نے ہدایت کا راستہ کھلا رکھا ہے۔ شیخ فرماتے ہیں کہ بروقت غلطی کا احساس ہونا بڑی نعمت ہے۔

                                                                  اندر میں سے کوئی بولا، اتنی دیر سے تم ایک ہی بات لیے بیٹھے ہو کہ ذہن سن ہے اور یہ بھی کہتے ہو کہ تمہارے اختیار میں کچھ نہیں، زندگی خیال ہے۔جب  زندگی خیال ہے اور تمہارے اختیار میں کچھ نہیں تو کیا سن ہونے کی کیفیت خیال نہیں۔۔؟ خیال آئے بغیر ذہن سن ہو سکتا ہے۔۔؟ باربار ذہن سن ہونے کا ذکر شکایت ہے، کسی چیز کے نہ ہونے کو دہرانا اللہ سے گلہ ہے اور یہ بہت بری بات۔ استغفار پڑھنا اور توکل کرنا چاہئے  تاکہ ناشکری سے دوری ہو۔

                                مذکور خود منکی ابوھم وچئی

                ” رونے دھونے یا ناشکری سے مٹکے میں موجود پانی بھی خشک ہو جاتا ہے۔“

                                                                                                                       اس نے سوچا اللہ جس حال میں رکھے ۔۔۔ راضی رہنا ہے۔ اور ”جس“ پر ایک مرتبہ ذہن رک گیا۔ خیال نے کہا ، جس حال کا مطلب یہ ہے کہ ایک حال تمہاری مرضی کا اور ایک مرضی کا نہیں ہے، اب اس میں سے جس میں بھی اللہ رکھے۔۔۔نیوٹرل سوچ نہیں ہے۔ یہ دنیا معنی و مفہوم کی ہے۔۔ معنی و مفہوم خیال میں ملاوٹ ہے۔ لاتناہیت سے نور کائنات میں پھیلتا ہے تو اس کی کوئی سمت نہیں ہوتی۔۔ ہر ذرّہ پر محیط ہوتا ہے۔ اسی طرح خیال نیوٹرل ہے لیکن سب سے پہلے اپنے بارے میں سوچنے سے لامحدود خیال محدود ہوجاتا ہے۔ کسی شاعر نے کہ

       جب                                                                        کھینچ                                                                                                      کے                                                                                   آہ                                                                                                   سرد

کہتا                                                                                                                                                                                ہے                                                                                                                                                                            کوئی                                                                                                     بندہ

جس                                                                                                     حال                                                            میں                                                       بھی                                                            رکھے

صد                                                                                                          شکر                                                                                                                         ہے                                                                         اللہ                                                                                                                      کا                                             

میں                                                                                                                    سوچنے                                                                                                                                    لگتا                                                                                                                          ہوں

یہ                                                                                                            شکر                                                                                                   کیا                                                                                                                      اس                                                                                                                نے

یا                                                                                                                                                   شکوہ                                                                                    کیا                                                                                                   اس                                                                                                          نے

رزاق                                                                                                                                            دو                                                                                                                                        عالم                                                                                                                                                           سے

                                                                         طرز فکر میں خامی ہو تو لفظوں میں ناشکری، بے یقینی، شکوے شکایات ہوتے ہیں۔مرشد کریم اکثر اس کے لفظ درست کرواتے ہیں تا کہ طرز فکر راست ہو اور اسے معلوم ہو کہ وہ کیا بول رہا ہے۔

                                                                                   مرشد کریم نے ایک  مرتبہ  ایک جملہ درست کرواتے ہوئے پوچھا ، ” ہو سکتا ہے اور ہوتا ہے میں کیا فرق ہے۔؟“

                                                                  عرض کیا ، ایک میں بات حتمی اور دوسرے میں امکان ہے۔

                                                              فرمایا ۔۔۔” ایک میں شک اور دوسرے میں یقین ہے۔“

                                                                  جب وہ کوئی بات لکھ لیتا ہے تو پھر مٹاتا نہیں ہے، جو لکھ لیا وہ لکھ لیا۔ ایسا کم ہوا ہے کہ لکھی ہوئی بات مٹائی ہو۔مقصد ذہن خالی کرنا ہے۔ مٹا کر دوبارہ لکھنے سے ذہن الجھتا ہے اور سر بھاری ہوجاتا ہے۔ ذہن کو روانی میں لانے اور خیال کی رفتار سے مطابقت پیدا کرنے کے لیے یہ اچھی مشق ہے کہ الجھو مت۔۔ گزر جاؤ۔

                                                                    کبھی کبھی دل چاہتا ہے کہ بندہ اپنی خامیاں بھی لکھے۔ ایک بار مرشد کریم نے اسے کہا تھا کہ ڈائری میں اپنی خامیاں اور جن حالات سے گزرے ہو ،لکھو۔ اس نے ان کی بات یاد رکھی ہے لیکن اس پر عمل نہ ہونے کے برابر ہے۔ ایسا کرنے کے لیے ہمت چاہئے ۔

                                                                                 خیال بولا، اگر مرشد کی بات پر عمل کرنے کے لیے بندہ فائدہ اور نقصان دیکھے تو یک جان کیسے ہوگا۔۔؟

                      اس نے کہا، لکھنا مشکل نہیں ہے اس لئے کہ ہر شخص کم و بیش ایک سے حالات سے گزرتا ہے لیکن سب خود کو چھپاتے ہیں اور اچھائیاں ظاہر کرتے ہیں۔ اس طرح سے دوسروں کے عیب نکالنے اور انہیں برا کہنے میں آسانی ہوتی ہے۔ اپنی خامیوں کا ذکر اکثر کر دیتا ہوں اور حالات کی تفصیل میں صرف اس لئے نہیں جاتا کہ کم زور ہوں۔۔۔ جس سے گزر کر آیا ہوں، اگر واپس اس طرف گیا تو ایسا نہ ہو کہ نکلنا مشکل ہو جائے۔۔ جو گزر گیا اس کے بارے میں اب سوچتا بھی نہیں۔ بہر حال سالک کے لئے خود کو عیاں کرنا اچھا ہے کہ جب خود کو عیاں کر دیا۔۔ اچھائی اور برائی سے نکل گیا۔ اب یہ پرواہ نہیں ہوتی کہ لوگ کیا کہیں گے۔۔ وہ صرف مرشد کو دیکھتا ہے۔

                                                     آخری مغل بادشاہ بہادر شاہ ظفرؔ نے کہا ہے،                                   

                        نہ                                                                                      تھی                                                                               حال                                                                      کی                                                                     جب                                                                                    ہمیں                                                             اپنی                                                          خبر

                        رہے                                                                                  دیکھتے                                                                              اوروں                                                                         کے                                                                   عیب                                                                         و                                                                                                       ہنر

                        پڑی                                                                                                                                          اپنی                                                                                                                                                                          برائیوں                                                                                               پر                                                                                                              جو                                                                                                     نظر

                        تو                                                                                                                                         نگاہ                                                                                                                                                 میں                                                                                                                     کوئی                                                                                                                                 برا                                                                                             نہ                                                                        رہا

                                                                             خیال سے کہا ، مرشد کی تعمیل ضروری ہے اور ایک دن وہ لکھے گا۔۔۔ اتنا کہ جتنا بتانا ضروری ہے۔

                                                                                                        محاسبہ کرنے سے ذہن ہلکا ہوتا ہے، خامیوں کی نشان دہی ہوتی ہے اور بندہ اپنے اندر تاریکیوں سے واقف ہوتا ہے۔ ضمیر متوجہ کرنا شروع کر دیتا ہے کہ کیا کرنا چاہئے  اور کیا نہیں۔

                                                                     ضمیر کی انسپائریشن سائنس ہے۔ ایسی سائنس جس میں تغیر نہیں ہے، جس کا نتیجہ نہیں بدلتا۔ یہ ایسی سائنس ہے جس پر کائنات کا نظام قائم ہے۔ضمیر کو سننے اور عمل کرنے سے ذہن کی فریکوئنسی، کائناتی فریکوئنسی سے مل جاتی ہے اس لئے کہ پوری کائنات میں ایک ضمیر کام کر رہا ہے۔

                                                            ذہن میں اسپارک ہونا ، چیزوں کا کھلنا ، تصویریں بننا ، یہ بتانا کہ کیا کرنا ہے اور کیا نہیں، کوئی چیز کیسے بنتی ہے اور کس میں کتنی مقداریں کام کر رہی ہیں ۔۔ ضمیر کی راہ نمائی کے بغیر ممکن نہیں ہے ۔علم صرف خالق کا ہے جو ضمیر کے ذریعے مخلوقات میں منتقل ہوتا ہے۔

                                                                       رات اور دن پر تفکر جاری ہے۔ تفکر سے وہ واقف ہوا کہ فہم اس وقت ملتا ہے جب اللہ ذہن کھولتا ہے۔ لوگ کہتے ہیں کہ شعر و سخن آمد ہے۔ شاعری میں الفاظ کے الہام کو آمد کہتے ہیں۔ آمد کو صرف شعر و سخن سے منسوب کرنا عجیب ہے۔ شعر و سخن اور نظم و نثر کیا۔۔ ہر تخلیقی کام آمد ہے اور ہر کام تخلیق ہے۔

                                                                         خیال نے کہا ، راہ نمائی کا نظام خواب میں بھی ہے۔ ہر خواب بیداری کی زندگی کا عکس ہے کہ  آدمی جو کچھ بیداری میں کرتا ہے، وہی خواب میں دیکھتا ہے۔ ہر روز نیند کی دنیا سے پیغام ملتا ہے کہ بیدار ہو کر کن باتوں سے احتیاط کرنی ہے اور کس طرف جانا ہے۔

                                                                                       بزرگ فرماتے ہیں کہ سویا اور مرا برابر ہیں۔سب کا تجربہ ہے کہ سونے والا مر نہیں جاتا ، اس میں موجود وجود دوسرے عالم میں منتقل ہوتا ہے ۔ اسی طرح مرنے والے کا جسم اس دنیا میں رہتا ہے اور اندر ” موجود “ دوسرے عالم میں منتقل ہو جاتا ہے۔ موت کہیں نہیں ہے، ہر طرف زندگی ہے۔ کائنات اللہ کی صفات پر قائم ہے اور اللہ کی صفات کو دوام ہے۔

                                               حضرت علامہ اقبال                     ؒ                   فرماتے ہیں :

                        تخم                                            گل                                            کی                                                           آنکھ                                               زیرِ                                        خاک                                                    بھی                                                               بے                                        خواب                                                  ہے

                        کس                                                                          قدر                                                          نشو         و نما                                                                      کے                                                                                          واسطے                                                                                           بے                                                 تاب                                                                         ہے

                        زندگی                                                                      کا                                                                                 شعلہ                                                               اس                                                                دانہ                                                                   میں                                                                جو                                                             مستور                                                         ہے

                        خود                                                             نمائی ،                                                                                      خود                                                                              فزائی                                                                                                        کے                                                                                                        لئے                                                                        مجبور                                                                             ہے

                        سردی ِ                                                                       مرقد                                                                      سے                                                                       بھی                                                                                           افسردہ                                                                                                          ہوسکتا                                                                                        نہیں

                        خاک                                              میں                                                      دب                                                  کر                                          بھی                                                             اپنا                                                            سوز                                                 کھو                            سکتا                                                                      نہیں

                        پھول                                            بن                                          کر                                                   اپنی                                                                تربت                                               سے                                                 نکل                                      آتا                                                        ہے                                                                                یہ

                        موت                                                                                  سے                                                                                گویا                                                                                     قبائے                                                                                    زندگی                                                                                 پاتا                                                               ہے                                                                                  یہ

                        ہے                                                                          لحد                                                                          اس                                                                            قوتِ                                                                     آشفتہ                                                                                 کی                                                                                                    شیرازہ                                                                                                                     بند

                        ڈالتی                                                                 ہے                                                                     گردنِ                                                                     گردوں                                                                میں                                                                                       جو                                                                                            اپنی                                                                                          کمند

                        موت            ،                                                                                       تجدید          ِ                                                                              مذاق                                                                                                   زندگی                                                                                               کا                                                                                                                     نام                                                                                                                   ہے

                        خواب                                          کے                                                     پردہ                                                             میں                                           بیداری                                        کا                                     اک                                                                         نام                                                                                                              ہے