احسا س برتری۔۔۔ احساس کم تری

                                                                                                                ” زندگی میں ایک دوست ضرور ایسا ہونا چاہیے جس سے آپ ہر بات کہہ سکیں ورنہ اندر ہی گھلتا ہے۔ بتا دینے سے بوجھ ہلکا ہو جاتا ہے۔۔ دوست ایسا ہو جو غیر جانب دار ہو۔“

                                                                               مرشد کریم نے جن دنوں یہ بات فرمائی، وہ اندر ہی اندر پیچ و تاب کا شکار تھا۔ ذہن اس قدر الجھ گیا تھا کہ صحیح فیصلہ کرنے کے قابل نہیں تھا، بہت سی باتیں اس نے قیاس کر لی تھیں ۔۔ قیاس گہرا ہونے سے ، حقیقت محسوس ہوتا ہے جب کہ اس میں الوژن زیادہ ہوتا ہے۔

                                                                      ذہن میں آنے والی اکثر باتیں ایسی ہوتیں جنہیں شیخ کو بتانے کا خیال آتا تو وہ سوچتا کہ کیسے بتائے گا۔ وہ کیا کہیں گے کہ میں ایسا سوچتا ہوں۔ یہ سوچ کر خاموش ہو جاتا اور استغفار کا ورد شروع کر دیتا تاکہ اللہ توالیٰ اپنی حفاظت میں لیں اور ذہن میں وسوسے نہ آئیں۔

                                                                        صاحبِ یقین نے ذہن پڑھ اور فرمایا،

                                            ” جس خیال کی کنہ معلوم نہ ہو اس پر کبھی یقین نہ کرنا!“

                                            اس نے سوچا ، مرشد سے بڑھ کر دوست کون ہو سکتا ہے۔۔ مرشد۔۔۔ امین ہے۔

عرض کیا، کبھی کبھی محسوس ہوتا ہے کہ میرے اندر احساسِ کم تری ہے۔

سر اثبات میں ہلایا اور فرمایا ” جی ہاں ، ایسا ہے! یہ صرف آپ کا نہیں ۔۔ پوری قوم کا مسئلہ ہے۔ پھر پوچھا کہ احساس ِ کم تری کیوں ہے؟ یہ بتاؤ کس بات کی کمی ہے، اللہ نے اچھا بنایا ہے، ذہن اچھا ہے، سب کچھ اللہ نے دیا ہے، اچھے  ماں باپ اور بہن بھائی ہیں، گھر اچھا ہے، ضرورت کی ہر چیز میسر ہے اور ۔۔آپ کے اندر صرف احساسِ کم تری نہیں، احساسِ بر تری بھی ہے۔“

وہ ہنس پڑا۔ یہ اس کے لئے انکشاف تھا۔ عرض کیا، واقعی؟ وہ کیسے۔۔۔؟

فرمایا، ” جی ہاں احساسِ برتری اور برتری کا احساس ۔۔احساس کم تری سے زیادہ ہے۔“

اسے سمجھ نہیں آیا کہ یہ ہو کیا گیا۔ چہرہ دیکھنے والا تھا۔

حضور ! کرم نوازی ہے کہ آپ نے خامی کی نشان دہی فرمائی ، یقیناً ایسا ہی ہے لیکن میں نے کبھی غور نہیں کیا۔

                                                                                                                  ” اب غور کرنا ، سمجھ میں آئے گا کہ میں نے کیا کہاہے۔ ہر شے دو رخوں پہ تخلیق ہوئی ہے۔ جہاں احساسِ کم تری ہے۔ بر تری کا احساس ضرور ہوگا اور برتری کا دوسرا رخ کم تری ہے۔“

                                                     دماغ میں واقعات کی فلم چلنا شروع ہوگئی اور سمجھ میں آیا کہ کم تری کا احساس اس لئے پیدا ہوا کہ وہ برتری چاہتا ہے۔ حالات و واقعات کیا تھے اور کیا ہیں، اگرچہ ان میں سیکھنے کے لئے بہت کچھ ہے لیکن لکھنا مناسب نہیں اس لئے کہ تجربات و مشاہدات نے سکھایا ہے کہ جو بات لکھ دی جائے، چاہے ذاتی ڈائری میں ہی کیوں نہ ہو ، زندگی میں یا اس دنیا سے گزر جانے کے بعد۔۔ سامنے ضرور آتی ہے جس سے جذبات مجروح ہوتے ہیں۔ دوسروں کی دل آزاری کرنے سے ہماری دل آزاری کا سبب کہیں نہ کہیں پیدا ہو جاتا ہے۔

                                                                                                    خیال بولا ، کیا صرف اس لئے کسی کی دل آزاری نہیں کی جائے کہ ردِ عمل ہوگا؟ یہ غیر جانب دار سوچ نہیں، خود غرضی ہے کہ دوسروں کے ساتھ اس لئ بھلا کریں کہ ہمارے ساتھ اچھا ہو۔۔؟ اللہ کو ملاوٹ پسند نہیں!

                                                                                        خیال نے تصحیح کی اور اس نے آواز پر لبیک کہا۔ خیال بولا، کسی کی دل آزاری اس لیے نہیں کرنی چاہیے کیوں کہ یہ اللہ کا حکم ہے۔ دل میں آیت روشن ہوئی،

            ” ایک میٹھا بول اور غلطی معاف کرنا اس خیرات سے بہتر ہے جس کے پیچھے دکھ ہو۔

            اللہ بے نیاز ہے اور بردباری اس کی صفت ہے۔“        (البقرۃ: ۲۶۳  )

                                    ڈائری میں روز کی یادداشت لکھنے کا مقصد ان باتوں کو یاد رکھنا ہے جن کو سیکھ کر اس نے اپنا رویہ تبدیل کیا اور وہ آگے بڑھا۔ورنہ  تلخ یادیں لکھنا تکلیف دہ ہے، خیال بھی آجائے تو ذہن مرشد کی طرف کر لیتا ہے۔ ایک روز مرشد کریم نے اسے کوئی بات سمجھاتے ہوئے  یہ شعر پڑھا۔

                                                یاد ِ                                                                    ماضی                                                                              عذاب                                                                              ہے                                                                                         یارب

                                                چھین                                                   لے                                                  مجھ                                              سے                                            حافظہ                                      میرا   

                                                                                           اور وہ مسکرا دیا۔ بعد میں باتیں ڈائری میں اتار رہا تھا تو سوچا کہ نہیں معلوم شاعر پر کیا گزرہی ہوگی جو یہ آمد ہوئی۔

                                                                                                                       بات احساس ِ کم تری سے شروع ہوئی تھی۔ کریم مرشد نے مسئلہ کی کنہ بتائی تو وہ سوچ میں ڈوب گیا۔ شیخ کی نظریں اس پر تھیں اور وہ محاسبہ میں گم تھا۔

                                                                                          خیال نے کہا ، ہر شخص دوسرے شخص کو دباتا ہے تا کہ اپنے اندر بر تری کے احساس کو تسکین ملے۔بر تری جتنی زیادہ ہوتی ہے، احساس ِ کم تری اسی مناسبت سے بڑھ جاتا ہے۔ بدقسمتی سے وہ بھی ان لوگوں میں تھا لیکن خوش قسمتی یہ ہے کہ اللہ نے سر۔۔ تا ۔۔ پا محبت سے لبریز دوست کی صحبت عطا کی جو شفقت کے ساتھ خامیوں کا احساس دلاتے ہیں۔

                                                                                           وہ جتنا شیخ طریقت کت تصور میں رہتا ہے، اس کو اپنا آپ کثیف محسوس ہوتا ہے۔ہاتھ دھو لے، غسل کر لے اس کے باوجود یہ احساس غالب رہتا ہے کہ من کا پاپی، تن کا پاک۔۔ پاک نہیں ہوتا۔

                                                                             ایسی ہی ایک کیفیت میں ایک روز خدمت میں حاضر تھا، پیاس لگی، انہوں نے قریب رکھا پانی کا گلاس بڑھایا، پانی پی کر وہ اٹھنے لگا اور اجازت مانگی کہ گلاس دھو کر آجاؤں۔ یہ سننا تھا کہ  مرشد کریم نے پیار سے ڈانٹا ۔۔” کیا تم کوئی چھوت ہو؟ یہ باتیں تو وہاں ہوتی ہیں جہاں اونچی نیچی ذاتوں کی بنیاد پر معاشرہ تقسیم ہوتا ہے۔ ایسا کوئی دوست تو نہیں تھا تمہارا۔۔؟“

                                                                                           خاموشی سے واپس بیٹھ گیا۔

                                                                                       خیر! تہیہ کیا کہ خامی پر قابو پانا ہے۔

                                                                            عرض کیا کہ میں اپنی اصلاح کروں گا۔

                                                                           شیخ طریقت نے فرمایا، ” یاد ہے میں نے کہا تھا کہ کسی کی بات کا برا نہیں منانا۔ کوئی کچھ بھی کہے ردِ عمل ظاہر مت کرنا۔۔؟“

                                                                                      جی آپ نے فرمایا تھا، یاد آگیا۔

                                                                                  ” پھر۔۔۔؟“

                                                                        شرمندگی ہوئی کہ مرشد کی بات یاد نہیں رہی۔

                                                                  فرمایا، ” کوئی اچھا کہے یا برا ، متاثر نہیں ہونا۔۔ احساس ِ کم تری اور بر تری ، دونوں رخوں سے نکل آؤ گے۔“

                                                اس نے خود سے پوچھا ، مجھے کوئی بات بری کیوں لگتی ہے۔۔۔؟

                                               اندر سے آواز آئی، اس لئے کہ تم خود کو اچھا سمجھتے ہو۔ جب خود کو ہر عیب سے پاک اچھا سمجھنے کی سوچ تبدیل ہوگی، زندگی میں توازن قائم ہو جائے گا۔

                                         ضمیر نے احساس دلایا کہ خامیوں کا اعتراف کرنے کی توفیق بھی اللہ دیتا ہے۔

سوچ بدلنے سے عمل خود بخود بدلتا ہے۔ بظاہر یہ عام لیکن بباطن گہری بات ہے۔ قانون ہے کہ بات اس وقت سمجھ آتی ہے جب ذہن ، ذہن سے ملتا ہے۔ بیوی اور شوہر کا ذہن نہ ملے وہ ایک دوسرے کی بات نہیں سمجھ سکتے، اختلافات پیدا ہوتے ہیں، گھر کا ماحول خراب ہو جاتا ہے۔ دو مختلف شوق رکھنے والے دوست ایک ساتھ اس لئے ہیں کہ کہیں نہ کہیں ان کا ذہن ملتا ہے۔ اس طرح مرشد اور مرید یک جان دو قالب اس وقت ہوتے ہیں جب ذہن۔۔ ذہن سے ملتا ہے۔ یعنی ہر حال میں مرشد کا حکم عزیز ہو اور تعمیل ِ حکم زندگی بن جائے۔ استاد طریقت فرماتے ہیں،

" مرشد کی جان سے جان ملتی ہے تو مرید کی جان بنتی ہے۔“

                                                                                                                 محبت کے بغیر زندگی بے معنی اور لاکشش ہے۔ ہر شخص کسی سے محبت کرتا ہے اسی لئے اس کا دنیا میں دل لگتا ہے ۔ جس کو پیسوں سے محبت ہے اسے کاروبار میں نقصان ہو جائے، صدمہ برداشت نہیں ہوتا۔ اسی طرح اولاد کا غم ماں باپ کو توڑ دیتا ہے۔ کسی کو محبت ہو جائے اور وہ نہ ملے یا دھوکا ہو تو دل دنیا سے اٹھ جاتا ہے۔ یہ سب عام مثالیں ہیں۔ کہنے کا مقصد یہ ہے کہ ہر شخص کو کسی نہ کسی سے محبت ہے جس کی وجہ سے دل لگا رہتا ہے۔ ایک وجہ ختم ہو جائے تو دوسری شے وجہ بن جاتی ہے۔

                                                                                               دنیا میں رہنے کی خواہش اسے بھی نہیں۔دل بے زار ہے، سمجھ نہیں آتا کہ ایک جیسی زندگی کوئی ہر روز کیسے گزارے۔ ایک روز کاغذ پر لکھ کر مرشد کریم کے سامنے کاغذ رکھا۔ ” میں مزید جینا نہیں چاہتا لیکن اللہ کو دیکھے بغیر مرنا بھی نہیں چاہتا۔ جب یہاں نہیں دیکھا تو وہاں کیسے دیکھوں گا۔“

                                                                      فرمایا ، ” کثرت سے یاحی یا قیوم کا ورد کیا کرو اور رات کو سونے سے پہلے نہا کر صاف لباس پہن کر درود شریف پڑھو۔ لوگ سارا دن پریشان رہتے ہیں، ادھر اُدھر کی باتوں کو سوچنے کے بجائے یاحی یا قیوم کا ورد کیا جائے تو سفر آسان ہو جاتا ہے۔“

                                                                                                                           ایک روز ایک صاحب  ملنے آئے ، عمر پینتالیس سے اوپر تھی۔ یہ ان کی پہلی ملاقات تھی۔ باتوں باتوں میں انہوں نے مرشد کریم سے عرض کیا کہ میں ہارٹ پیشنٹ ہوں، حال ہی میں بائی پاس ہوا ہے، میرے لئے دعا کیجئے کہ اللہ زندگی دے۔

                                                                                    فرمایا، ” اتنا جی کر کیا کرنا ہے۔۔؟“

                                                         وہ بھی وہاں موجود تھا، مسکراہٹ نہ روک سکا۔

                                                    ان صاحب نے عرض کیا کہ میرے چھوٹے بچے ہیں۔

                                   فرمایا، ” جب بچہ ماں کے پیٹ میں ہوتا ہے تو بتائیے نو مہینے تک اور اس کے بعد بچہ کی پرورش کون کرتا ہے؟ کون اسے کھلاتا  پلاتا ہے اور اس کی حفاظت کرتا ہے؟“

وہ صاحب بولے ، اللہ کرتا ہے۔

                  بعد کی باتیں لفظ بہ لفظ یاد نہیں لیکن یہ بات سمجھائی گئی کہ کفیل اللہ ہے۔ بچوں کی پرورش اور تربیت ماں باپ کی ذمہ داری ہے لیکن مقصد حیات اللہ سے واقف ہونا ہے۔

                                                         البتہ آخری جملہ یاد ہے ۔ مرشد کریم نے فرمایا، ” آدمی اس لئے مرنا چاہتا ہے کہ وہ دنیا سے بے زار ہے، اس لئے نہیں مرنا چاہتا کہ اسے اللہ کو دیکھنا ہے۔“

                                                       اور وہ خباردار ہو گیا۔ سمجھ گیا کہ کیا کہا گیا ہے۔

                                                                                                                   لاشعور جو کہتا ہے، شعور لکھ لیتا ہے۔ بات سے بات نکلتی ہے اور بات بن جاتی ہے۔ دنیا کے ہر کام کی طرح لکھنا بھی آمد ہے۔ لاشعوری تحریک پر عمل کیا جائے تو لاشعور کی رفتار سے مطابقت پیدا ہونا شروع ہو جاتی ہے۔ یہ ایک زبردست مشق ہے جس پر عمل کر کے ایک روز احساس ہوتا ہے کہ یہ مشق نہیں۔۔ طرز حیات ہے۔

                                                                                  جب سے مرشد کریم نے فرمایا ہے کہ کسی کی بات سے متاثر نہیں ہونا، چاہے تعریف ہی کیوں نہ ہو اس نے خود پر کام کرنا شروع کیا ہے۔ توجہ حکم سے ہٹتی ہے تو غلطی ہو جاتی ہے مگر کوئی ہے جو فوراً احساس دلاتا ہے کہ غلط کیا ہے۔

                                                                                                                                                                                              چند روز پہلے کسی پر سخت غصہ آیا۔ اتنا سخت کہ محسوس ہوا دماغ کے خلیے (Cells)   متاثر ہوئے ہیں۔ ٹھیک ٹھاک قسم کا ایس ایم ایس لکھا۔ آواز صبر کی تلقین کر رہی تھی۔ غصہ اس قدر غالب تھا کہ اس نے آواز کو نظر انداز کرنا چاہا مگر کسی نے روک دیا۔

                                                                                       خود سے پوچھا کہ کیا میرا رویہ مناسب ہے۔۔؟

                                                                                       کیا مجھے یہ پیغام بھیجنا چاہیے۔۔؟

                                                                                        مجھے اس پر غصہ کیوں آرہا ہے۔۔۔؟

                                                                                         آواز آئی ، اس لئے کہ تم اسے کم زور سمجھتے ہو۔

                                                                       جواب نے اسے پریشان کر دیا۔

                                                         رات میں اس شخص سے متعلق مزید کوئی بات سامنے آئی اور  وہ چڑ گیا۔ اس نے محسوس کیا کہ خود غرضی غالب آگئی ہے۔ اس کیفیت سے نکلنے میں ایک گھنٹہ لگا۔

                                                                               آئینہ کے سامنے جا کھڑا ہوا کہ جب ہر شے کی کوئی نہ کوئی شکل ہے، غصہ کی شکل کیسی ہوتی ہے؟

                                                                            دیکھا۔۔ وہ بھیانک لگ رہا تھا۔

                                                                                                                                                اگلے روز مرشد کریم سے واقعہ بیان کیا اور بتایا کہ مجھے غصہ اس لئے آیا کہ میں نے اسے خود سے کم زور سمجھا۔

                                                                          یہ سننا تھا کہ شیخ نے سر پر ہاتھ رکھا اور فرمایا، ” یہ بڑی اچھی بات ہے، اصلاح ہوگئی آپ کی۔ آپ نے اپنی خامی کا اعتراف کیا اور پیشمان ہوئے۔ آپ کو غصہ اُس پر نہیں، اپنے آپ پر آیا کہ ایسا کیوں کیا۔“

                                                                                                           اس نے بتایا کہ رات کو پھر یہی کیفیت تھی لیکن میں سمجھ گیا تھا کہ یہ میری کم زوری ہے۔

                              ” جب سمجھ میں آگیا تو کیوں نہیں رکے؟“

عرض کیا ، فوری طور پر اس کیفیت سے نہیں نکل سکا۔ آئینہ میں خود کو دیکھا تو چہرہ بھیانک تھا۔

                                                           فرمایا ، ” میں خوش ہوں کہ آپ کو غلطی کا احساس ہوا اور آپ نے سیکھا۔ اللہ تعالیٰ نے ہر شے مقداروں پر تخلیق کی ہے۔ جب اللہ کے حکم کی خلاف ورزی ہوتی ہے تو مقداروں میں توازن نہیں رہتا اور دل کش چہرہ۔۔۔ بے کشش ہو جاتا ہے۔ خوب صورتی کا تعلق مقداروں کی ترتیب سے ہے۔اللہ نے جن باتوں سے منع فرمایا ہے ان کو کرنے سے مقداریں متاثر ہوتی ہیں اور حکم پر عمل کیا جائے تو مقداریں اعتدال میں آتی ہیں اور بندہ خوب صورت لگتا ہے۔ اللہ فرماتے ہیں کہ جو لوگ غصہ پر قابو پا لیتے ہیں اللہ ایسے محسن بندوں سے محبت کرتا ہے۔ کیا مطلب ہوا اس کا۔۔؟ اور جو لوگ غصہ کرتے ہیں ان کی حیثیت کیا ہوئی۔۔؟ وہ خود کو اللہ کی محبت سے دور کر لیتے ہیں۔“

                                                                                                          خیال نے احساس دلایا کہ غصہ احساسِ برتری کی علامت ہے۔ اس واقعہ نے اسے اس کی طرز فکر سے متعارف کرایا۔ محض غلطی کا اعتراف کرنا اصلاح نہیں ہے، غلطی کا احساس ہو کر اسے نہ دہرانا اصلاح ہے۔

                                                                            مرشد نے فرمایا، ” کبھی غصہ مت کرنا۔ جب ابلیس راندۂ درگاہ ہوا تو اس نے اللہ سے کہا، میں زمین میں ان کے لئے دل فریبیاں پیدا کر کے ان سب کو بہکاؤں گا سوائے تیرے ان بندوں کے جنہیں تو نے ان میں  سےخالص کر لیا ہو۔ اللہ تعالیٰ نے فرمایا کہ بے شک جو میرے نیک بندے ہیں وہ تیری باتوں میں نہیں آئیں گے۔ تیرا بس صرف ان بہکے ہوئے لوگوں پر چلے گا جو تیری پیروی کرتے ہیں۔“