تعارف

پیارے بچو!

اللہ تعالیٰ نے اپنے محبوب بندے حضرت محمدﷺ کو جو مقام عطا کیا ہے وہ ازل سےابد تک قائم رہے گا۔

حضرت محمدﷺ کے اعلیٰ مقام پر تمام انبیاء اکرام علیہم السلام فخر کرتے ہیں۔

اللہ تعالیٰ فرماتے ہیں:

ترجمہ: “آج کے دن میں نے دین کی تکمیل کر دی ہے اور اپنی تمام نعمتیں آپ ﷺ پر پوری کر دیں۔”

(سورۃ المائدہ۔۳)

پیارے بچو!

نعمتیں پوری ہونے کا مفہوم یہ ہے کہ اللہ تعالیٰ نے ایک لاکھ چوبیس ہزار پیغمبروں کو جتنی فضیلت اور نعمتیں عطا کیں ہیں وہ تمام نعمتیں حضرت محمدﷺ کو عطا کیں ہیں اور حضرت محمدﷺ پر دین کی تکمیل کر دی ہے۔

حضرت محمدﷺ کی حیات طیبہ میں ہر شعبہ سے تعلق رکھنے والے فرد کے لئے رہنمائی موجود ہے اور یہ رہنمائی گزرے ہوئے وقتوں میں بھی قابل عمل تھی۔آج بھی قابل عمل ہے۔سائنس اگر آج سے سو گنا زیادہ ترقی کر لےتب بھی یہ رہنمائی نوع انسانی کے لیے مشل راہ ہے۔

حضرت محمدﷺ ۔۔۔۔۔۔۔۔۔۔ فرمانبردار بیٹے ۔۔۔۔۔۔۔۔۔ شفیق باپ ۔۔۔۔۔۔۔۔۔۔ بہترین شوہر ۔۔۔۔۔۔۔۔۔۔۔ ہمدرد پڑوسی ۔۔۔۔۔۔۔۔۔۔۔ اچھے رشتہ دار ۔۔۔۔۔۔۔۔۔۔۔۔ سپاہی ۔۔۔۔۔۔۔۔۔۔۔ سپہ سالار ۔۔۔۔۔۔۔۔۔۔۔۔۔۔ منتظم ۔۔۔۔۔۔۔۔۔۔۔۔۔۔۔ تاجر ۔۔۔۔۔۔۔۔۔۔۔۔ آجر ۔۔۔۔۔۔۔۔۔۔۔۔۔۔ حاکم ۔۔۔۔۔۔۔۔۔۔۔۔۔۔۔۔ اچھے شہری ۔۔۔۔۔۔۔۔۔۔۔۔۔ منصف ۔۔۔۔۔۔۔۔۔۔۔۔ طبیب ۔۔۔۔۔۔۔۔ اور رہنما ہیں اور ہر حیثیت میں نوع انسانی کے لیے ہادی اور رہبر ہیں۔

حضرت محمدﷺ سے رہنمائی حاصل کرنے کے لیے ضروری ہے کہ ہم حضرت محمدﷺ کی زندگی کا بار بار مطالعہ کریں۔

پیارے بچوں!

زندگی میں کامیاب ہونے کے لیے کتاب بچوں کے حضرت محمدﷺ لکھی گئی ہے۔

اللہ تعالیٰ ہم سب کو کتاب بچوں کے محمدﷺ کو پڑھنے اور اس پر عمل کرنے کی توفیق عطا فرمائیں۔آمین

اب آپ حصہ سوئم کا مطالعہ کر رہے ہیں۔ اس میں بتایا گیا ہے کہ مدینہ منورہ ہجرت کرنے کے بعد حضرت محمدﷺ اور مسلمانوں کو کن کن مشکلات کا سامنا کرنا پڑا اور حضرت محمدﷺ نے ان مشکل حالات میں مسائل کو کس طرح منصوبہ بندی کے ساتھ حل کیا۔